1. Kudihi kutwatela kudizila yuma yakumbidi?

WATIYAHU dehi nsañu kuchisanji nakudihula neyi, ‘Indi mbidi yadinu ituña yikekala ñahi?’ Yuma yatama yamwekanaña swayi-swayi nawa chakukasumwisha chakwila kwosi muntu wunatweshi kushimuna yuma yikamwekana kumbidiku. (Yakoba 4:14) Hela chochu, Yehova weluka yuma yikamwekana kumbidi. (Isaya 46:10) Hanyaka haheni Izu dindi Bayibolu yashimwineñahu dehi bayi neyi yuma yatama yinakumwekana mumafuku etu hohuku, ilaña niyuma yayiwahi yikamwekana kumbidi.

2, 3. Lwihwinyi lwamwihwiliwu Yesu kudi atumbanji, nawa wakwili nindidi?

² Yesu Kristu wahosheli hansañu yaWanta waNzambi wamba kakumisha kutama nakubalumuna iseki kwikala paradisa. (Luka 4:43) Antu akeñeli kwiluka mpinji yamba kenza Wanta. Atumbanji twaYesu amwihwili nawu: ‘Chinjikijilwinyi chakwiluka nachu hiwamba kenzeyi, nihamba kakuma nyaka yamakonu?’ (Matewu 24:3) Hakwakula Yesu wayilejeli nindi Yehova Nzambi hohu diyi weluka chikupu mpinji yamba kakuma nyaka yinu. (Matewu 24:36)  Ilaña Yesu washimwineñahu dehi yuma yamba kamwekana hamaseki henohu Wanta kanda wuleti kuwunda kwakweni nikukiñewa kumuchidi wamuntu. Yuma yashimwiniyi Yesu yinakumwekana makonu!

³ Henohu kanda tusandujoli wunsahu wakwila nawu tunakushakama ‘kunsa yanyaka yamakonuku,’ tusambilenu ntahi kutoñojoka chantesha hanjita oyu yabulahu dehi kumonawu antu. Yamwekeni muwanta wawaspiritu wakamwekanaña, nawa yakufumamu yachi yatwikundama.

4, 5. (a) Chumanyi chamwekeni mwiwulu hanyima yakwila Yesu anamuswanishi dehi kwikala Mwanta? (b) Kwesekeja naChimwekeshu 12:12, chumanyi chafumini munjita yadiña mwiwulu?

⁴ Mukapetulu kanafumiku kawunu mukanda kalumbulwili nawu Yesu Kristu wekalili Mwanta mwiwulu muchaaka cha 1914. (Tañenu Danyeli 7:13, 14.) Hanyima yakwikala Mwanta, Yesu wazatilihu chuma chimu. Bayibolu yahoshaña nawu, “Mwiwulu himukwila njita; “Mikeli [ijina daYesu dikwawu] nawañelu jindi hiyakwasa njita nanowu chazañombi [Satana Diyabolu]; chazañombi niyena nawañelu jindi nawa hiyakwasa.” * Satana nawañelu jindi atama, andemoni ayishindili nawa ayihañili mwiwulu nakuyinatila hamaseki. Añelu jaNzambi achikuhwelelu azañaleli muloña Satana nawandemoni jindi ayihañili. Hela chochu, antu hiyadi kwikala namuzañalu wamuchidiwuku. Ilaña, Bayibolu yashimwineñahu dehi nawu: ‘Oyu yihuñu yakamona iseki . . . Muloña Diyabolu nayisulukili, wudi nandombu yayeni, chanelukiyi nindi kunashali dehi mpinji yindi yantesha hohu.’​—Chimwekeshu 12:7, 9, 12.

⁵ Mwani shinshikenu hachuma chadi kufuma munjita yamwiwulu. Muloña wakuhila, Satana waleteli yihuñu hadantu adi hamaseki. Neyi chiwukumona, tunakushakama munoyu  mpinji yayihuñu. Ilaña yikutwalekahu wanyi—‘yakapinji kantesha’ hohu. Hela Satana yomweni weluka nindi mpinji yakuleta yihuñu yantesha. Bayibolu yahoshaña haniyi mpinji neyi ‘himafuku akukuminina.’ (2 Timotewu 3:1) Owu muzañalu wutukweti hakwiluka nawu Nzambi wukafumishahu kutama kwaDiyabolu hamaseki! Tutalenu yuma yikwawu yashimwineñahu dehi muBayibolu yinakumwekana makonu. Iyi yinakumwekesha nawu tunakushakama mumafuku akukuminina nawa Wanta waNzambi wukaleta nkisu yahaya nyaka kudi owu amukeña Yehova. Tusambilenu kushinshika hayuma yiwana yayinjikijilu yahosheliyi Yesu nindi yikumwekesha mpinji yitunakushakamamu.

6, 7. Indi mazu aYesu kutalisha kunjita ninzala anakushikijewa ñahi makonu?

⁶ ‘Muza wumu wakanyamuka nakulwa namuza wukwawu, wanta wumu nawanta wukwawu.’ (Matewu 24:7) Muyaaka nkulakaji yinahitihu yihita yawantu anayijahi mumajita. Nsoneki wumu wansañu yanyaka wakuBritain wasonekeli nindi: “Muyaaka yamuma 1900 yadiña yasweja wubanji wakumwaña mashi yasonekewa munsañu yanyaka. . . . Yadiña hinkulakaji yaaka yanjita yakakumaña, yampinji yayihi hohu yakubula njita kumaluña amakwawu.” Chileji chakufuma kudi akaWorldwatch Institute chahoshaña nawu: “Mapampa kasatu antu amavulu ayikatishili  munjita muyaaka nkulakaji yamu 1900 nakuya kumbidi neyi munjita yejima kufuma muyaaka nkulakaji yakutachikilaku AD nakushika mu 1899.” Antu kubadika hayihita 100 anafwi muloña wanjita kufuma tuhu mu 1914. Yihuñu niyikatu yinakumona yihita yawantu anakujimbesha antu akeñawu mukufwa hichuma chakala kutiyishisha.

⁷ ‘Kwamba kaholoka nzala.’ (Matewu 24:7) Akwakusandujola ahoshaña nawu yakudya yinavuliliku nankashi muyaaka 30 yinahitimu. Hela chochu, nzala niyena yinakutwaleka muloña antu amavulu hiyakweti mali ashikilamu akulanda nachu yakudya hela maluña akudiminaku. Yihita yawantu amavulu akabakanaña nanzala yatama. Izanvu daWorld Health Organization desekeja nawu chipilu chajahaña anyana kubadika hayihita yitanu hachaaka hachaaka.

8, 9. Chumanyi chinakumwekesha nawu wuprofwetu waYesu wanyitentanshi niyipupu wunekali walala?

⁸ ‘Kwakaholoka nyitentanshi yayeni.’ (Luka 21:11) Kwesekeja nawa U.S. Geological Survey, ahosheli nawu kufuma tuhu mu 1990 hohu avareji yanyitentanshi 17 hachaaka hachaaka yinekali nañovu nankashi yakukisañana matala nakubalula maseki. Haavareji, nyitentanshi yañovu nankashi  yakisañanaña matala chikupu yaholokaña hachaaka hachaaka. Mukanda wukwawu wahoshaña nawu: “Nyitentanshi yinajahi nkulakaji yayihita yawantu muyaaka 100 yinahitihu, nawa wuya hambidi wajakutuñatuña wunakañeshi chantesha hohu kufwa kwaluntu lwahondekaña munyitentanshi.”

⁹ ‘Kwakaholoka . . . yipupu.’ (Luka 21:11) Hichidi namuloña wakukula mujayihembaku, nyisoñu yayiha niyayikulu yinakuyandisha muchidi wamuntu. Chileji chimu chahoshaña nawu nyisoñu 20 yelukewa chiwahi​—kubombelahu kakohu muneni, mashika, nikapokota muneni​—yinavuliliku nankashi muyaaka makumi yakatataka, nawa nyisoñu yikwawu yinakusweja kukala hakuyuuka nayihemba. Kwakwihi nanyisoñu 30 yayiha yinakumwekana. Yikatu yikwawu hiyikweti yihemba yakuyuuka nachuku nawa yafwana.

10. Yililwinyi yashimwiniwu yidi ha 2 Timotewu 3:1-5 yiwunakumona mudantu makonu?

¹⁰ Hanyima yakwiluka yuma yamaneni yinakumwekana mukaayi, Bayibolu yashimwineñahu dehi nawu kumafuku akukuminina kukekala kuhimpika kwamunshakaminu yawantu. Kapostolu Pawulu walumbulwili chakekalawu antu amavulu. Twatañaña netu: “Kumafuku akukuminina  kwakenza nyaka yakala.” (Tañenu 2 Timotewu 3:1-5.) Munjila yikwawu, Pawulu wahosheli nindi antu akekala

• akwakudikeña

• akwakufwila mali

• abulaña kwovwahila anvwali jawu

• abula kujila

• abula kukeñañana mwasemwakenawu

• abulaña kudihemba

• asweja kuzuwa

• antu akeñaña yakuditiyisha aweni kuwaha, kukeña Nzambi nehi

• kuyitala afwana neyi amwakama Nzambi, hakwinza kwiteja ñovu yachu kwonti kwawu

11. Indi Masamu 92:7 yinalumbululi ñahi chuma chakayimwekena antu atama?

¹¹ Komana antu anekali chenichi mwiluña denu? Chakubula nikujinoka dichadiwu. Kumaluña ejima kudi antu adi nayililu yatama. Ichi chinakumwekesha nawu Nzambi keña yazatihu chuma chimu muloña Bayibolu yahoshaña nawu: “Chelañawu antu atama hiyakumena neyi matahu, niakwakukoña nyidimu yakuluwa hiyakukula lufuchi, komana analondi kuyijilumuna chahaya nyaka.”​—Masamu 92:7.

12, 13. Indi “kwiluka kwalala” kunavuli ñahi muyinu “mpinji yakukuminina”?

¹² Chalala mafuku akukuminina anenzali nayihuñu, neyi chochashimwineñahu dehi muBayibolu. Hela chochu,  mudinu ituña dayihuñu, mudi yuma yayiwahi yinakumwekana mukachi kawantu adifukulaña kudi Yehova.

¹³ Mukanda wamuBayibolu waDanyeli washimwineñahu dehi nawu, ‘Kwiluka kwalala kwakavula.’ Kwiluka kweniku kukamwekana mpinjinyi? Kukekalaku “kumpinji yakukuminina.” (Danyeli 12:4) Sweje-e kufuma mu 1914, Yehova nakwashi antu anakufwila kumukalakela chikupu kutiyishisha Bayibolu. Anatiyishishi chikupu walala walema hadi ijina daNzambi ninkeñelu yindi, ifutu danyiloña damulambu waYesu Kristu, chekalawu afu nikusañuka. Kubombelahu, akwakudifukula aYehova anadizi chakushakama nshakaminu yayiheteshaña nawa yaletaña kalemesha kudi Nzambi. Cheñi nawa anelukishi chikupu mudimu wukakoña Wanta waNzambi ninochiwamba kawahisha yuma hamaseki. Chumanyi chelañawu naniku kwiluka? Ilu lwihu lunatuleti cheñi kuwuprofwetu wukwawu wunakushikijewa munanu mafuku akukuminina.

14. Indi kushimwina kwansañu yayiwahi yaWanta kunatandi ñahi, nawa anyi anakushimwina?

¹⁴ Yesu Kristu wahosheli muwuprofwetu windi ‘wakukuma kwanyaka yamakonu’ nindi: ‘Ninsañu iyi yawanta yayiwahi akayishimwañena mwahita matuña ejima mwashakamawu antu.’ (Tañenu Matewu 24:3, 14.) Kunyeñumuka kaayi kejima nsañu yayiwahi yaWanta​—chekala Wanta, chuma chiwukela nichitwatela kutambula nkisu yaniwu wanta—​enda ayishimwañena kubadika mumatuña 230 nawa kubadika mumadimi 400. Yihita yawaYinsahu jaYehova ata muchima hakushimwina nsañu yayiwahi yaWanta. Afuma “kunyunza yejima, akunyichidi yejima, akumatuña ejima, akumadimi ejima.” (Chimwekeshu 7:9) A Yinsahu alombolaña kudiza kwaBayibolu chawaana kuyihita yawantu anakukeña kwiluka chuma chacheni chatañishaña Bayibolu. Chalala iku hikushikijewa kwakuhayamisha kwawuprofwetu, sweje-e neyi chashimwineñahu dehi Yesu nindi eniKristu alala “akayihela kudi antu ejima”!​—Luka 21:17.

15. (a) Wuneteji neyi tunakushakama mumafuku akukuminina, nawa muloñadi? (b) Indi “Kukumisha” kukalumbulukadi kudi ana adikañaña naYehova ninana ovwahila kuyula kwaWanta waNzambi?

¹⁵ Chineli wuprofwetu wawuvulu wamuBayibolu wunakushikijewa makonu, hiwunakwiteja neyi tunakushakama mumafuku akukumininaku? Hanyima yakushimwina nsañu yayiwahi kushika nihakakeñelayi Yehova, dihakenza “kukumisha.” (Matewu 24:14) “Kukumisha” kunakulumbulula mpinji oyu Nzambi yamba kafumishahu kutama hamaseki. Hakujilumuna antu ejima adikañaña Nindi chakudikeñela, Yehova wamba kazatisha Yesu niañelu akweti ñovu. (2 Atesalonika 1:6-9) Satana niandemoni jindi hiyakahuñumuna nyunza cheñiku. Hanyima yanochu, Wanta waNzambi wukaleta nkisu hadi ejima ovwahilaña kuwunyuli waloña.​—Chimwekeshu 20:1-3; 21:3-5.

16. Chumanyi chikwikala chamaana kudeyi kwila?

¹⁶ Chineli kukuma kwetuña daSatana kudi kwakwihi, twatela kudihula etwaweni netu, ‘Chumanyi chinatela kwila?’ Chidi chamaana kutwalekahu nakudiza jajivulu hadi Yehova nihayuma yakeñañayi kudi etu. (Yowanu 17:3) Dizaku Bayibolu chikupu. Mpinji yejima ikalaku nachaaku chakudikunda hamu nawantu anakukeña kwila nkeñelu yaYehova. (Tañenu Aheberu 10:24, 25.) Ikalaku nakwiluka kwakuvulu kunahaniyi Yehova Nzambi kudi antu mukaayi kejima, nawa himpaku nshakaminu yeyi kulonda wudiluñisha nkisu yaNzambi.​—Yakoba 4:8.

17. Muloñadi kujilumuka kwawantu atama chikwakayishintakesha amavulu chakuhayamisha?

¹⁷ Yesu washimwineñahu dehi nindi antu amavulu akadiwula yinjikijilu yinakumwekesha nawu tunakushakama mumafuku akukuminina. Kujilumuka kwawantu atama kwakenza chakuhayamisha. Antu amavulu akahayama neyi chahayamañawu kwinza kwekombi nawufuku. (Tañenu 1 Atesalonika 5:2.) Yesu wakonkomweneni nindi: “Chadiñi hamafuku  aNowa, dichi chakela nihakenzayi Mwana kamuntu. Muloña chakela neyi mafuku adiñi akuleta kudibaji, adiilaña anwinaña, asumbwilaña, asumbwishilaña, nikwifuku deñililiyi Nowa muwatu, nichenjili dibaji nakuyikumpula wejima wawu, wena kuchiluka nehi; dichi chakela nihakenzayi Mwana kamuntu.”​—Matewu 24:37-39.

18. Kukonkomwenanyi kwaheniyi Yesu kutwatela kutaku maana?

¹⁸ Hela chochu, Yesu walejeli adiña nakumutiyilila nindi: “Babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu, ifuku odu dakenda kayikasumwisha neyi muhetu. Muloña dichi chidakashikena antu ejima ashakama heseki dejima. Tonenuña kwenu hayilaaka yejima nakulembelela, kulonda mwakemiki mushindu, mwakapuluki kuyuma yejimiyi, mwakemani [nakwitejewa] kumesu aMwana kamuntu.” (Luka 21:34-36) Chikwikala chamaana kusha mazu aYesu kumuchima. Muloñadi? Muloña antu akweti nkisu yaYehova Nzambi ‘niyaMwana kamuntu,’ Yesu Kristu, akweti chikuhwelelu chakupuluka kujilumuka kwetuña daSatana nakushakama haya nyaka mwituña dadiwahi dadiha didi kwakwihi nakwinza.​—Yowanu 3:16; 2 Petulu 3:13.