BAYIBOLU hiyatulejaña mpinji yavwalikiliyi Yesuku. Hela chochu, yatulejaña chikuma chatiyakana hakwila tukunkululi netu havwalikili muDecemberku.

Toñojokaku hachilaaka champinji chichadiña muBetelemi, mwavwalikililiyi Yesu. Kakweji wawaYudeya waKisilevi (wesekana naNovember/December) wadiña kakweji wamuchilaaka chamashika ninvula. Kakweji walondeleleñahu wadiña kakweji waTebeti (December/​January). Wadiña hikakweji wachilaaka chamashika hayina mpinji yamwaka, nimpinji yantesha yanvula yachishika mumaluña amapidi. Twayenu tutali chatulejaña Bayibolu kutalisha hampinji yachilaaka chadina iluña.

Nsoneki yaBayibolu Ezera wamwekesha nindi Kisilevi chalala wadiña kakweji wachilaaka chamashika ninvula. Hanyima yakuhosha nindi izaza dapompeli muYerusalema ‘mukakweji kamuchitanu nachiwana [Kisilevi] hefuku dakakweji damakumi ayedi,’ Ezera hakushimuna nindi antu adiñi ‘nakuzaala . . . hansañu yanvula.’ Kutalisha kuchilaaka chadiñaku hayina mpinji yamwaka, antu  apompeli ahosheli awenawu nawu: ‘himpinji yanvula, hitunatweshi kwimana hanzuku.’ (Ezera 10:9, 13; Yeremiya 36:22) Dimuloña waweni atubiña ashakamineña muyina mpata yaBetelemi chelileñawu neyi ashika mukakweji waDecember wena nianyikoku yawu hiyakaminineña mwisañaku!

Bayibolu yashimunaña nawu, atubiña adiña mwisaña nakubiña nyikoku yawu hawufuku wavwalikiliyi Yesu. Mwamweni, nsoneki waBayibolu Luka wamwekesha nindi hayina mpinji, atubiña adiñi “mwisaña nakuhemba nyikoku yawu nawufuku” kwakwihi naBetelemi. (Luka 2:8-12) Ilukaku neyi atubiña adiña nakushakama mwisaña, bayi neyi nakwendujola hohu hanji namwaanaku. Adiña nanyikoku yawu mumasaña nawufuku. Komana iku kulumbulula kwakushakama mumasaña kunesekani nampinji yachilaaka chanvula nimashika amuBetelemi muDecember? Inehi, hikunesekanuku. Komana chilaaka chadiñaku hampinji yakuvwalika kwaYesu chinakumwekesha nawu havwalikili muDecemberku. *

Izu daNzambi datulejaña hatoka to-o mpinji yafwiliyi Yesu, ilaña yatulejaña yikuma yanti yakumwekesha mpinji yavwalikiliyi. Ichi chinatwanukishi mazu aMwanta Solomoni: “Ijina dadiwahi dabadika malasha evumba dadiwahi, niifuku dakufwa dabadika dakuvwalika.” (Mukwakutaŋisha 7:1) Hichidi chakuhayamaku, ochu Bayibolu chiyahanaña yikuma yayivulu hansañu yakufwa nimudimu waYesu ilaña yahana yikuma yantesha hohu hampinji yakuvwalika kwindi.