1-3. Chilumbwinyi watukupishaña wejima wetu, nawa muloñadi kutoñojoka hayuma yatañishaña Bayibolu chiyinateli kutulubula?

TOÑOJOKAKU neyi chakwila wunakutemuka chilumbu wazuwa. Iwu chilumbu wakola nankashi nawa wudi nalufuchi kukubadika. Wuneluki neyi hakweti luwiku muloña wamumonahu dehi mesu kapu nakujaha amabwambu jeyi amakwawu. Hela wukutemuka chamuchidinyi, ilaña yena nakuswila kwakwihi chikupu naneyi. Hiwukweti chikuhwelelu chakuhandaku. Kukoleka kwakweni, mukwakupulwisha hakwinza kukabadi keyi. Wudi nañovu chikupu kubadika chilumbu cheyi, nawa nasanyiki nindi chiña tuhu yakukwashi. Ichi chikukuletesha kwikala wakasunuka kuniku kukala!

² Munjila yoyimu, anakukupisha kudi chilumbu wamuchidiwu. Wejima wetu anakutukupisha. Neyi chitwadizili mukapetulu kanafumiku, Bayibolu yatenaña kufwa nawu chilumbu. Kwosi niwumu hadetu watela kumutemuka iwu chilumbu hela kulwa nindiku. Wejima wetu twamumonahu dehi iwu chilumbu nakujaha antu yitwakeña. Ilaña Yehova wudi nañovu nankashi kubadika kufwa. Diyi Mukwakupulwisha wukweti kukeña, wunadimwekeshi dehi nindi natweshi kushinda iwu chilumbu. Nawa wasanyika dehi kumujilumuna iwu chilumbu  kufwa, nawa haya nyaka. Bayibolu yatañishaña nawu: “Chilumbu chakukumishaku akanoñeshayi, yowu kufwa.” (1 Akorinda 15:26) Iyi hinsañu yayiwahi!

³ Ichi dinu tusambilenu kuhosha hayuma yitwatiyaña neyi chilumbu kufwa najahi muntu yitwakeña. Kwila mwenimu chikutukwasha kutiyishisha chuma chimu ochikutuzañalesha. Yehova wakana nindi afu akekala nawumi cheñi. (Isaya 26:19) Akayisañula. Iku dikuchiñeja kwakusañuka.

4. (a) Muloñadi kuneña kwaYesu hakujimbesha muntu wakeñayi chikunakututañisha chatiyañayi Yehova? (b) Yesu wamwekesheli wubwambu walema wamuchidinyi?

⁴ Wajimbeshahu dehi muntu yiwakeña mukufwa? Chineñi nikutiya neyi kwosi wakukwasha, hiyuma yakala kuumika. Mpinji yamuchidiwu, twatela kwihula Izu daNzambi kulonda ditukundeji. (Tañenu 2 Akorinda 1:3, 4.) Bayibolu yatukwashaña kutiyishisha chatiyañayi Yehova niYesu hansañu yakufwa. Yesu wadiña nakumwekesha kuloña kwaTata yindi, nawa welukili chichakataña kumuchima hakujimbesha muntu mukufwa. (Yowanu 14:9) Chayileñayi Yesu muYerusalema, wadiña nakumuhempula Lazaru niahelindi, aMariya niMata owu adiña nakushakama mumukala waBetani wadiña kukamwihi. Adiña amabwambu jindi chikupu. Bayibolu yahoshaña nawu: “Yesu wakeñeli Mata nimana kwindi wamumbanda niLazaru.” (Yowanu 11:5) Neyi chitwadizili mukapetulu kanafumiku, Lazaru wafwili.

5, 6. (a) Yesu watiyiliyi ñahi hampinji yadiñayi nachisaka chaLazaru niamabwambu adiña nachineñi? (b) Muloñadi wushona waYesu chiwunekalili wakutukolesha?

⁵ Indi Yesu watiyili ñahi mpinji yafwiliyi ibwambu dindi? Nsona yatulejaña nawu Yesu wayili kudi antaña nimabwambu jaLazaru hampinji yadililañawu kufwa kwaLazaru. Yesu chayimweniyi waneñeli nankashi. Yesu “hakudishishimuna muspiritu, atiya nikukala.” Cheñi nawa nsona yahoshaña nawu, “Yesu hakudila.” (Yowanu 11:33, 35) Komana kudila kwaYesu kwamwekesheli nawu hadiña nachikuhweleluku? Inehi. Yesu welukili chikupu nindi chuma chimu chachiwahi chadiña kwakwihi nakumwekana. (Yowanu 11:3, 4) Hela chochu, chamukatileña kumuchima nikutiya wushona waletaña kufwa.

⁶ Munjila yikwawu, wushona waYesu watukoleshaña. Wushona weniwu watutañishaña  nawu Yesu niTata yindi Yehova, ahela kufwa chikupu. Ilaña Yehova Nzambi natweshi kulwisha nikushinda iwu chilumbu! Tutalenu chuma chamulejeliwu Yesu kudi Nzambi nawu yakoñi.

7, 8. Muloñadi nsañu yaLazaru chiyamwekeni kukala kudi antu akwakutala, indi Yesu welilihu chumanyi?

⁷ Lazaru amujikili mwiyeñu, dichi Yesu wahosheli nindi afumishiku ilola dashinkiliwu kuchinsu. Mata wakanini muloña mwadiña mwahita dehi mafuku awana, nimujimba waLazaru watela watachikili kutoka. (Yowanu 11:39) Kwesekeja nammwenu yawantu, chikuhwelelwinyi chadiñawu nachu?

⁸ Ilola adilañumwiniku, dichi Yesu wabidikili nezu dañovu nindi: “Eyi Lazaru idikakumu!” Chumanyi chamwekeni? “Muntu wadiña wafwa hakwidikamu.” (Yowanu 11:43, 44) Wunatweshi kutoñojoka hamuzañalu watiyiliwu antu kwenakuna? Hela chakwila Lazaru wadiña mwanyikawu weyala, ntaña, ibwambu, hela ntuñi nawu, chuma chelukiliwu yowu nawu wafwili. Ilaña wadiña​—muntu yowumu wakeñawu​—wemeni mukachi kwawu. Ichi chuma chamwekeni neyi chadiña chakala nankashi. Chakubula kujinoka antu amavulu amukumbatili Lazaru namuzañalu. Ochamushindiliwu kufwa!

9, 10. (a) Indi Yesu wamwekesheli ñahi Nsulu yañovu yindi hakumusañula Lazaru? (b) Nkiswinyi yikwawu yafumaña mukutaña nsañu yakusañuka yamuBayibolu?

⁹ Yesu hahoshelihu nindi wakoñeli ichi chihayamisha nañovu yindiku. Mukulomba kwindi henohu kanda amutambiki Lazaru, wahosheli hatooka to-o nindi Yehova diyi wadiña Nsulu yakusañuka. (Tañenu Yowanu 11:41, 42.) Iyi hidiyi mpinji yazatishiliyi Yehova ñovu yindi hohu hakusañula muntu wafwaku. Kusañuka kwaLazaru kwadiña hakachi kayihayamisha yakusañuka yitanu nayiwana kwasonekawu Mwizu daNzambi. * Chachiwahi kutaña nikudiza  hansañu yamuchidiwu. Yatutañishaña nawu Nzambi hekala nachaambuku, muloña antu asañwiliwu adiña atwansi niakulumpi, amayala niambanda, aIsarela niabula kwikala aIsarela. Wenowu muzañalu wunashimuniwu muniyi yibaba! Chakutalilahu, mpinji yasañwiliyi Yesu kansi wamumbanda, anvwali jindi “ahayama nikuhayama kwasweja.” (Maku 5:42) Chalala, Yehova wayinkeli chuma chakuzañalela ochu chakabulawu kuvulamena.

¹⁰ Hela chochu antu asañwiliwu kudi Yesu mukuhita kwampinji afwili cheñi. Komana ichi chinayi mukwila nawu hichadiña chalema kuyisañulaku? Kwakulehi. Iji nsañu jamuBayibolu jamwekesha kulema kwalala nawa jatwinkaña chikuhwelelu.

11. Indi nsañu yakusañuka kwaLazaru yakwashaña ñahi kumwekesha walala wasonekawu haMukwakutaŋisha 9:5?

¹¹ Bayibolu yatañishaña nawu afu “hiyeluka chumaku.” Hiyadi nawumiku nawa hiyakweti yitoñojoka yinakuhanda kudi kwejimaku. Nsañu yaLazaru yashimunaña iwu walala. Chasañukiliyi Lazaru, komana wayizañalesheli antu nayuma yamwiwulu? Indi kwiji watiyishili antu woma nansañu yakaluña kachinana? Inehi. MuBayibolu himudi mazu amuchidiwu ahosheliyi Lazaruku. Hamafuku awana afwiliyi, ‘helukilihu nichumaku.’ (Mukwakutaŋisha 9:5) Lazaru wadiña wakama hohu mutulu twakufwa.​—Yowanu 11:11.

12. Muloñadi chitwatelela kwitejela netu kusañuka kwaLazaru mwalala kwadiña kwoku?

¹² Nsañu yaLazaru yatutañishaña cheñi nawu kusañuka kudi kwoku, bayi neyi hikanuku. Yesu wamusañwili Lazaru kumesu ezaza dawayinsahu. Hela tuhu akulumpi jansakililu amuheleli Yesu, etejeli chikupu nawu chihayamishichi chamwekeni. Ilaña ahosheli nawu: “Tukwila ñahi? muloña iwu muntu [Yesu] hakukoña yinjikijilu yayivulu.” (Yowanu 11:47) Antu amavulu ayili nakutala muntu yasañwiliwu, Lazaru. Chafuminimu, antu amavulu  amukuhweleleli Yesu. Amweni wunsahu walala kuhitila mudi Lazaru nawu Yesu amutemesheli kudi Nzambi. Iwu wunsahu wadiña weneni nawa weletesheli niakulumpi jansakililu awaYudeya amakwawu oma nyichima kufuukulahu kuyijaha mwayedi wawu aYesu niLazaru.​—Yowanu 11: 53; 12:9-11.

13. Wunsahwinyi wutukweti wakwiteja netu Yehova mwamweni natweshi kuyisañula afu?

¹³ Komana chaluwa kwiteja nawu kusañuka kwalala? Inehi, muloña Yesu watañishili nindi kumafuku akumbidi ‘antu ejima adi mumajamu achanukishu’ akayisañula. (Yowanu 5:28) Yehova diyi Nleñi yawumi wejima. Komana chatela kwikala chakala kwiteja netu natweshi kuleña cheñi wumi? Hela chochu, jajivulu jikashindamena hayitoñojoka yaYehova. Komana natweshi kuyanuka antu afwa dehi yitwakeña? Mwiwulu mwenzala tutumbwa twakubula kutwesha kuchinda kudi muntu, ilaña Nzambi watwitenaña hejina-hejina! (Isaya 40:26) Komana Yehova Nzambi natweshi kuyanuka antu afwa deyi yitwakeña hamuntu-hamuntu, nawa natweshi kuyisañula.

14, 15. Neyi chinalumbululiwu hansañu yahosheliyi Yoba, Yehova watiyaña ñahi hansañu yakuyisañula afu?

¹⁴ Indi Yehova watiyaña ñahi hansañu yakusañula afu? Bayibolu yatañishaña nawu Yehova wudi nakufwila kusañula afu. Muntu wachikuhwelelu Yoba wehwili nindi: “Muntu afwi ahandi cheñi?” Yoba wahosheleña hansañu yakuhembelela mwijamu kushika tuhu nimpinji yakamwanukawu kudi Nzambi. Wamwilili Yehova nindi: “Wadi kutambika, ami nadi kwitiya; wunafwili mudimu wakumakaseyi.”​—Yoba 14:13-15.

¹⁵ Chitoñojoki! Yehova wafwilaña chikupu kuyisañula afu. Komana ichi hichinakuzañalesha hakwiluka nawu Yehova watiyaña chamuchidiwuku? Chikekala ñahi haniku kusañuka kudi kumbidi? Anyi akasañulawu, nawa kudihi?

16. Indi afu akayisañula nakushakama nachihandilu chamuchidinyi?

¹⁶ Nsañu yakusañuka yekala muBayibolu yatutañishaña hakusañuka kudi kumbidi. Antu asañwiliwu  ahanu hamaseki ayibombeli cheñi hamu nawantu akeñawu. Kusañuka kudi kumbidi kwakekala kwamuchidi wowumu​—ilaña kukabadika kuwaha. Neyi chitwadizili muKapetulu 3, kufuukula kwaNzambi kudi kwakwila nawu iseki dejima akadilisha kwikala paradisa. Dichi afu hiyakayisañwila mwituña munenzali njita, wubanji, niyikatuku. Akekala nakukoleka kwakushakama haya nyaka hamaseki mukuwunda nawa nachihandilu chamuzañalu.

17. Indi afu añahi akasañulawu?

¹⁷ Anyi amba kasañulawu? Yesu wahosheli nindi “ejima adi mumajamu achanukishu akatiya izu dindi [daYesu] nawa akedikamu.” (Yowanu 5:28, 29, NW) Chochimu, haChimwekeshu 20:13 hahoshaña nawu: “Kaluñalwiji hakulubula afu adiñumu; kufwa nakaluña [Hadesi] hiyakulubula afu adiñumu.” ‘Hadesi’ hiizu datalisha kwijamu kwayaña muchidi wamuntu. (Talenu Apendikisi “Indi Shelu niHadesi Hiyumanyi?.) Awa majamu ejima himwakekala afuku. Mabiliyoni awafu ejima anakunookelamu akekala nawumi cheñi. Kapostolu Pawulu wahosheli nindi: “Kwamba kekala kusañuka kwawaloña nikwawabula kuloña.” (Yililu 24:15) Chumichi chalumbululadi?

18. Anyi anabombeliwu kudi ‘akwakuloña’ owu akasañulawu, nawa iku kuchiñeja kunakukundami ñahi eyi halweyi?

¹⁸ “Aloña” anabombelimu antu amavulu yitwatañaña muBayibolu adiñaku henohu Yesu kanda yenzi hamaseki. Wunatweshi kutoñojoka hadi Nowa, Abarahama, Sara, Mosi, Luti, Esita, niamakwawu amavulu. Awa amayala niambanda adiña nachikuhwelelu chakola hadi Nzambi anayishimuni mukapetulu 11 kamukanda waAheberu. Ilaña ‘akwakuloña’ cheñi anabombelimu niambuña aYehova anakufwa makonu. Namuloña wachikuhwelelu chakusañuka, tunateli kulubuka kuwoma wakufwa.​—Aheberu 2:15.

19. Anyi “abula kuloña,” nawa kukolekanyi oku Yehova naluwi lwindi kwanayinkiyi?

¹⁹ Chakekala ñahi kudi antu ejima abulili kumukalakela hela kumwovwahila Yehova hamuloña wakubula kumwiluka? Iyi yihita yawantu “abula kuloña” hiyakayivulamena hohuku. Niwena  akayisañula nakuyinka mpinji yakudiza hadi Nzambi walala nakumukalakela. Muyaaka ikombakaji dimu, afu akayisañula nakuyinka kukoleka kwakudibomba hamu nawantu achikuhwelelu hanu hamaseki nakumukalakela Yehova. Yikekala mpinji yayiwahi. Iyi mpinji diyatenawu muBayibolu nawu Ifuku daKusompesha. *

20. Indi Gehena hichumanyi, nawa anyi ayañamu?

²⁰ Komana ichi chinayi mukwila nawu antu ejima adiñaku kunyima amba kayisañula? Inehi. Bayibolu yahoshaña nawu afu amakwawu adi “muGehena.” (Luka 12:5) Izu daGehena dafuma kwijina deluña danatilileñawu nswadi hanji yaYerusalema wakushankulu. Nyijimba yawantu afwa ninswadi adiña nakuyoochela kwenakuna. Afu akweti nyijimba yawu yadiña nakumbilawu kweniku ayimweneña kudi aYudeya neyi hiyatela nikuyijiika hela kuyisañulaku. Komana Gehena hichinjikijilu chinashikilimu chakujilumuka kwahaya nyaka. Hela chakwila Yesu wukekala namudimu wakusompesha amomi niafu, Yehova diyi Nsompeshi wakumishaku. (Yililu 10:42) Yehova wakayisañula wanyi antu atama akafwishayi namuloña nawa abulaña kukeña kuhimpa.

21, 22. (a) Muchidinyi wukwawu wakusañuka wekalaku? (b) Hinyi wadiña watachi kutambwila kusañuka kwakwikala nawumi wakuspiritu?

²¹ Bayibolu yalumbulula cheñi hamuchidi wukwawu wakusañuka, nakwikala nawumi neyi chileñaleña chakuspiritu mwiwulu. Chakutalilahu chimu hohu chakusañuka kwamuchidiwu dichasonekawu muBayibolu, kwokusañuka kwaYesu Kristu.

²² Hanyima yakwila Yesu anamujahi dehi hamu neyi muntu, Yehova hetejeli Mwanindi washinshika kushala mwijamuku. (Masamu 16:10; Yililu 13:34, 35) Nzambi wamusañwili Yesu, ilaña hamusañwili neyi muntuku. Kapostolu Petulu walumbulula nindi Kristu ‘amujahili  kumujimba ilaña amuhandishili muspiritu.’ (1 Petulu 3:18) Mwamweni, chadiña chihayamisha cheneni. Yesu wekalili cheñi nawumi neyi muntu wañovu wakuspiritu! (Tañenu 1 Akorinda 15:3-6.) Yesu diyi wadiña watachi kutambwila kusañuka kwalema kwamuchidiwu. (Yowanu 3:13) Ilaña hakekala wakumininakuku.

23, 24. Anyi awanisha “kamukanka kanyanya” kaYesu, nawa kuvula kwawu kunashiki kukuchindanyi?

²³ Chelili neluki dehi nindi keña yafunti mwiwulu, Yesu walejeli atumbanji twindi achikuhwelelu nindi ‘wukuya nakuyiloñeshela mwakushakama’ kwenakuna. (Yowanu 14:2) Yesu wateneni ana akaya mwiwulu neyi ‘kamukanka kindi kanyanya.’ (Luka 12:32) Antu añahi atela kwikala munaka kadizanvu kanyanya kaweniKristu achikuhwelelu? Kwesekeja naChimwekeshu 14:1, kapostolu Yowanu nindi: ‘Nami nitali, hinukumona Mwana kaMukoku [Yesu Kristu] nemani haMpidi yaZiyona, wudi nankulakaji yamakombakaji namakombakaji makumi awana nawana, akweti ijina dindi niijina daTata yindi akusoneka hamahamawu.’

²⁴ Awa eniKristu a 144,000, anabombelimu apostolu aYesu achikuhwelelu, ayisañwilili kuwumi wamwiwulu. Indi kusañuka kwawu kwekalañaku mpinjinyi? Kapostolu Pawulu wasonekeli nindi kwakekalaku hampinji yakenzayi Kristu. (1 Akorinda 15:23) Neyi chiwukudiza muKapetulu 9, tunakushakama muniyi mpinji. Dichi ashalahu antesha hadi a 144,000 anakufwa mumafuku etu ayisañulaña hohenohu nakuya nakwikala nawumi mwiwulu. (1 Akorinda 15:51-55) Hela chochu, antu amavulu akweti chikuhwelelu chakusañuka kumbidi nakwikala nawumi muParadisa hamaseki.

25. Chumanyi chitukudiza mukapetulu kanalondelihu?

²⁵ Eña, Yehova chalala wakamushinda chilumbu chetu kufwa, nawa wukafumahu haya nyaka! (Tañenu Isaya 25:8.) Ilaña wunatweshi kwihula neyi, ‘Ana akasañuka nakuya mwiwulu akelañadi kwenakuna?’ Akatuña chibalu chaWanta wanfulumendi yayiwahi yamwiwulu. Tukudiza jajivulu hansañu yaniyi nfulumendi mukapetulu kanalondelihu.