ENIKRISTU ayileja kwanakana kufwa kwaKristu. Ichi chidika achitenaña cheñi nawu ‘kudya kwaMwanta kwamelela.’ (1 Akorinda 11:20) Chumanyi chaleteshaña ichi chidika kusweja kulema? Mpinjinyi nawa munjilanyi mwatela kuchanakaninawu?

Yesu Kristu watachikili chidikichi hawufuku wawaYudeya waPaseka mu 33 C.E. Paseka hichidika chadiña nakwanakanawu kamu hohu muchaaka, hefuku da 14 dakakweji wawaYudeya waNisani. Hakuwana idi ifuku, aYudeya adiña nakutalila ifuku damuchilaaka chanoña hana hesekanaña wufuku nimwaana. Idi hifuku dekalañaku neyi maora 12 ampinji yamwaana nimaora 12 ampinji yawufuku adi kwakwihi nakwesekana. Kusambilila kwatachi kwakakweji wamuha kwakwihi nanidi ifuku kwamwekesheleña ntachikilu yaNisani. Paseka yekalileñaku neyi munahiti dehi mafuku 14, hanyima yakuhuma kwetañwa.

Yesu wanakanini Paseka hamu nawapostolu indi, nawa wamuhañili Yudasi Isakaroti, nkumininaku  yatachika niKudya kwaMwanta kwaMelela. Ichi chidika chasinsili haPaseka yawaYudeya nawa cheñi chatela kuchanakana kamu hohu hachaaka.

Nsañu yayiwahi yaMatewu yashimunaña nawu: “Yesu hakunona dinkendi, hakukisula nkisu, hakudihumuna, hakuyinka atumbanji nindi, Tambulenu mudyi, weniwu diwu mujimba wami. Hakunona lupasa, hakusakilila, hakuyinka nindi, Nwenumu wejima wenu; muloña diwu mashi ami achitiyañenu, akupwekela antu amavulu kulonda kuyanakena nachu nyiloña.”​—Matewu 26:26-28.

Antu amakwawu akuhwelela nawu Yesu wabalumwini dinkendi nakwikala musunyi windi waweni, nivinyu kwikala mashi indi. Ilaña mujimba waYesu wamusunyi wadiña wakadi nihakutabula hampinji yahanineñayi dinkendi. Komana apostolu aYesu mwamweni adyileña musunyi windi waweni nikunwa mashi indi? Inehi, muloña kwila mwenimu chadikwikala hikudya mbiji yamuntu nawa hikufumpa nshimbi yaNzambi. (Kutachika 9:3, 4; Alevi 17:10) Kwesekeja naLuka 22:20, Yesu wahosheli nindi: “Lupasilu dichi chitiyañenu chachiha chamumashi ami, awa akuyipwekela.” Komana luna lupasa lwalweni lwekalili “chitiyañenu chachiha”? Chumichi kwila chizatika nehi, muloña chitiyañenu hikuditeja, bayi neyi hichuma chakumona namesuku.

Komana jejima dinkendi nivinyu hiyifwikija hohu. Dinkendi demenañaku mujimba wawanina waKristu. Yesu wazatishili dinkendi dashaliliku hachawija chaPaseka. Dinkendi, adituñili chakadi iluñi hela yisiti. (Kwidika 12:8) Bayibolu yinazatishi iluñi neyi chinjikijilu chanshidi hela kutoka. Dikwila nawu dinkendi demenañaku mujimba wawanina walambwiliyi Yesu. Wadiña wakadi nshindi.​—Matewu 16:11, 12; 1 Akorinda 5:6, 7; 1 Petulu 2:22; 1 Yowanu 2:1, 2.

Vinyu yichinana yemenañaku mashi aYesu. Ana mashi analemeshi chikupu chitiyañenu chachiha. Yesu wahosheli nindi mashindi ayipwekesheli kulonda “kwanakena nachu nyiloña.” Antu anateli kwikala aloña kumesu aNzambi nawa anatweshi kukwata chitiyañenu chachiwahi naYehova. (Aheberu 9:14; 10:16, 17) Ichi chitiyañenu chinaleteshi yuma kwikala yaswayi kudi a 144,000 eniKristu achikuhwelelu kuya mwiwulu. Kuna kwiwulu, akakalakalaña neyi anyanta niatupristu hakuleta nkisu kudi antu ejima.​—Kutachika 22:18; Yeremiya 31:31-33; 1 Petulu 2:9; Chimwekeshu 5:9, 10; 14:1-3.

Anyi atela kudyaku kuniyi yifwikija yahaChanukishu? Munjila yatiyakana, wowenana adi muchitiyañenu chachiha—dikwila nawu, wowenana akweti chikuhwelelu chakuya kwiwulu—diwu atela kudya kudinkendi nikunwa vinyu. Spiritu yajila yaNzambi yayishikaña hamuchima nawu anayitondi kwikala anyanta akwiwulu. (Aroma 8:16)  Adi cheñi muchitiyañenu chaWanta hamu naYesu.​—Luka 22:29.

Indochu ana adi nachikuhwelelu chakwikala nawumi wahaya nyaka muParadisa hamaseki? Ovwahilaña lushimbi lwaYesu nawa awanikaña kuKudya kwaMwanta kwaMelela, ilaña enzaña nakalemesha neyi akwakutala, bayi neyi akwakudyaku. Kamu hachaaka, hanyima yakuhuma kwetañwa haNisani 14, aYinsahu jaYehova anakanaña Kudya kwaMwanta kwaMelela. Hela chakwila makombakaji antesha hohu mukaayi kejima diwu ekala nachikuhwelelu chakwiwulu, ichi chidika chekala chalema nankashi kudi eniKristu ejima. Yekalaña himpinji oyu antu ejima yamwekeshañawu kukeña kwakuwahi kwaYehova Nzambi niYesu Kristu.​—Yowanu 3:16.