1, 2. Lwihwinyi luwatela kudihula eyaweni hanyima yakufuma munsakililu yakutwamba, nawa muloñadi chiwunatoñojokeli neyi chumichi chalema?

TWILI netu wuneluki neyi muntu wumu mukuswamujoka nashi wulembi wafwana mwishima denu damenji, nawa niwumi wawantu wudi dehi mukukala. Chumanyi chiwukwila? Chakadi nikujinoka, wukuleka kunwa mudina ishima nakusempa ishima dacheñi. Hela neyi wunadisempi, watela kudihula ilu lwihu lwalema neyi, ‘Komana ninami nakwatiki kuwulembi tahindi?’

² Chuma chochimu chinakumwekana kutalisha kunsakililu yakutwamba. Bayibolu yatañishaña nawu kudifukula kwamuchidiwu akwitamisha nantañishilu yatama niyililu yatama. (2 Akorinda 6:17) Dimuloña waweni chichinekalili chalema kudeyi kufuma ‘muBabiloni Muneni’ wanta wetuña wansakililu yakutwamba. (Chimwekeshu 18:2, 4) Kwiji wuneli dehi mwenimu? Neyi welamu dehi, watela kuhamekewa. Ilaña yuma yayivulu yinabombelewimu kubadika hakudambula hela kuleka kwikala munsakililu yakutwamba. Mukuhita kwampinji, watela kudihula eyaweni neyi, ‘Kudihu tuyuma twamunsakililu yakutwamba twashala mudami? Toñojokaku haniyi yakutalilahu.

3. (a) Indi Bayibolu yahoshaña nawudi hansañu yakuzatisha yifwikija, nawa muloñadi mmwenu yaNzambi chiyatela kwikala yakala kuyiteja kudi antu amakwawu? (b) Chumanyi chiwatela kwila nayuma yejima yiwukweti oyu yendelaña hamu nakudifukula kwakutwamba?

³ Antu amakwawu ekala nayifwikija hela nyiyombu mumatalawu hadi yaaka yayivulu. Indi eyi wukweti yifwikija ninyiyombu mwitala deyi? Neyi wukweti, watela kutoñojoka neyi hichenyi hela chaluwa kulomba kudi Nzambi chakadi wukwashu wayuma yamwekanaña. Wunatweshi nikuditiya neyi wunadibombi kuniyi yuma. Ilaña Nzambi diyi wunahoshi ochiwatela kudifukula kudi yena. Nawa Bayibolu yatañishaña nawu Nzambi hanakukeña nindi tuzatisheña yifwikijaku. (Tañenu Kwidika 20:4, 5; Masamu 115:4-8; Isaya 42:8; 1 Yowanu 5:21) Komana wunateli kukolela ngu-u mukudifukula kwalala kuhitila mukukisañana yuma yejima yiwukweti yendelaña hamu nakudifukula kwakutwamba. Esekaku chikupu kuyimoni neyi chochayimonañayi Yehova—neyi hiyuma ‘yayishimashima.’​—Kuhituluka 27:15.

4. (a) Tuneluki ñahi netu kudifukula kudi ankakulula kwamukunkulwayi? (b) Muloñadi Yehova chalekesheliyi antu jindi kudiñija mukupesha kwanyichidi yejima?

⁴ Kudifukula kudi ankakulula nikwena kwawanikaña nankashi  munsakililu yakutwamba yayivulu. Henohu kanda adizi chalala chaBayibolu, antu amakwawu akuhweleli nawu afu ekala muwanta wakamonewaña nawa nawu anatweshi kukwasha hela kukatisha amomi. Hadaha wadiña nakuzata nañovu kulonda wuyitisheña kuwaha ankakulula jeyi afwa dehi. Kwesekeja nachiwadizili muKapetulu 6 kawunu mukanda, afu hiyekala amomi kwiluña dacheñiku. Dikwila nawu kweseka kuhanjeka nawu kwamukunkulwayi hohu. Mazu ejima akutiyakana neyi anafumi kudi ayetu afwa dehi, mazwawa mwalala anafumi kudi andemoni. Hela chochu, Yehova walekesheli aIsarela kweseka kuhosha nawafu hela kudiñija munyichidi yikwawu yakupesha.​— Tañenu Kuhituluka 18:10-12.

5. Chumanyi chiwukwila neyi chakwila kuzatisha yifwikija hela kudifukula kudi ankakulula dikwadiña munsakililu yeyi yakunyima?

⁵ Neyi wadiña nakudifukula kuyifwikija hela kudifukula kudi ankakulula mpinji yakunyima, chumanyi chiwatela kwila? Tañaku nakutoñojoka hayibaba yamuBayibolu yikukuleja ochayimonañayi Nzambi yumiyi. Lombaku kudi Yehova mafuku ejima hansañu yakufwila kwikala wakola ngu-u mukudifukula kwalala, nakumulomba kulonda yakukwashiku kutoñojoka neyi chatoñojokañayi.​—Isaya 55:9.

6, 7. (a) Chumanyi chacheni chanakanañawu haKrisimansi, nawa atumbanji twaYesu atachi adiña nakwanakana chidika chenichi tahindi? (b) Kwanakana yidika yamafuku akuvwalika kwadiña nakwendela hamu nayidikanyi hampinji yawatumbanji twaYesu atachi?

⁶ Kudifukula kwamuntu kunateli kuluwankana nansakililu yakutwamba neyi yinakwendela hamu namafuku akunooka aya mpuhu. Chakutalilahu, toñojokaku hadi Krisimansi. Krisimansi, hadaha ayanakanaña nawu hikuvwalika kwaYesu Kristu, nawa ayanakanaña kwakwihi nansakililu yejima yahoshaña nawu hiyeniKristu. Ilaña kwosi wunsahu wunakumwekesha nawu atumbanji twaYesu atachi adiña nakwanakana ifuku dakunooka damuchidiwuku. Mukanda waSacred Origins of Profound Things wahoshaña nawu: “Chimwahitili yaaka nkulakaji yiyedi hanyima yakuvwalika kwaKristu, kwosimuntu welukili, nawa antu antesha hohu diwu adiña nampwila yakwiluka mpinji yayeni yavwalikiliyi.”

 ⁷ Hela chakwila atumbanji twaYesu adiña eluka ifuku dadeni davwalikiliyi, hiyateleli kudanakanaku. Muloñadi? Muloña The World Book Encyclopedia yahoshaña nawu, eniKristu atachi “atoñojokeleña nawu kwanakana ifuku dakuvwalika kwamuntu hichaaku chawasenji.” Yidika yamafuku akuvwalika yashimunawu muBayibolu wowenana awanyanta ayedi abulileña kudifukula kudi Yehova. (Kutachika 40:20; Maku 6:21) Yidika yamafuku akuvwalika yadiñaku cheñi hakulemesha anzambi akutwamba. Chakutalilahu, haMay 24, eniRoma adiña nakwanakana ifuku dakuvwalika danzambi wamumbanda Diana. Hefuku dalondeleleñamu, adiña nachidika chakuvwalika kwanzambi yawu wetañwa, Apollo. Komana, yidika yamafuku akuvwalika yadiña nakwendela hamu nakulombelela akishi, bayi nawuKristuku.

8. Lumbululaku kukwantankana kudi hakachi kakwanakana ifuku dakuvwalika nakupesha.

⁸ Kudi muloña wukwawu waletesheli eniKristu amunkulakaji yanyaka yatachi kubula kwanakana kuvwalika kwaYesu. Atumbanji twindi atela elukili nawu kwanakana ifuku dakuvwalika kwadiña nakwendela hamu nakupesha. Chakutalilahu, aGriki niaRoma akushankulu amavulu akuhweleli nawu spiritu wadiña nakuwanika hakuvwalika kwamuntu nawa diyi wadiña nakumukiña ona muntu mukuhanda kwindi kwejima. Mukanda waThe Lore of Birthdays wahoshaña nawu: “Iyi spiritu yadiña nakafuta kakwatankana hamu nanzambi wukweti ifuku davwalikiliyi owu muntu.” Mwalala, Yehova hanateli kuzañalala nachidika chidi chejima chinateli kukwantankesha Yesu hamu nakupeshaku. (Isaya 65:11, 12) Hanu dinu, muloñadi antu amavulu chanakaninañawu Krisimansi?

9. Indi ifuku daDecember 25 aditondeli ñahi kwikala ifuku dakwanakana kuvwalika kwaYesu?

⁹ Chimwahitili yaaka nkulakaji yayivulu kufuma hampinji yadiñayi Yesu hamaseki, antu atachikili kwanakana kuvwalika kwindi haDecember 25. Ilaña idi hidadiña ifuku davwalikiliyi  Yesuku, kuvwalika kwaYesu kwatela kwadiñaku muOctober. * Hanu dinu muloñadi chatondeleliwu December 25? Antu makwawu aditeneneña kwikala eniKristu mukuhita kwampinji “afuukwili ifuku desekana hamu nachidika chawasenji chawaRoma adiña nakwanakana ‘ifuku dakuvwalika kwetañwa abulileña kushindawu.’” (The New Encyclopædia Britannica) Mumpinji yachishika, hana habulaña kusweja itañwa kutenda, asenji elileña yidika kulonda itañwa dayinkaña iyena nichejeji difunti cheñi kufuma kwiluña dadilehi kudinayi. Atoñojokeli nawu December 25, didi ifuku datachikili kufunta itañwa kudayili. Hakulwisha kulonda abalumuni asenji, akulumpi jansakililu atondeli ichi chidika nakuchimwekesha kwikala neyi “chaweniKristu.” *

10. Mpinji yakunyima, muloñadi antu amakwawu chabulileñawu kwanakana Krisimansi?

¹⁰ Ntachikilu yawusenji yaKrisimansi ayilukili dehi. Hamuloña wakubula kwikala nantachikilu yamunsona, Krisimansi ayilekesheli muEngland nimumatuña amakwawu ayulileñawu kudi akaAmerica muyaaka nkulakaji ikumi nayitanu nayiyedi. Yowu muntu wadiña nakushala hamukala chakubula kuzata hefuku daKrisimansi adiña nakumubabesha. Nkumininaku, tushidikilu twanyaka twavulili cheñi nawa abombelelihu nitushidikilu tukwawu twatuha. Krisimansi yekalili cheñi ifuku deneni dakunooka, nawa dichidi dalema mumatuña amavulu. Muloña wakwila Krisimansi yendelaña hamu nansakililu yakutwamba, antu anakukeña  kumuzañalesha Nzambi hiyanakanaña Krisimansi hela mafuku akunooka amakwawu afuma kukudifukula kwawusenjiku. *

11. Muloñadi antu makwawu chanakaninañawu mafuku akunooka, hanu chumanyi chitwatela kumona neyi dichalema nankashi?

¹¹ Amakwawu etejaña nawu mafuku akunooka adi neyi Krisimansi akweti ntachikilu yawusenji, ilaña atoñojokaña nawu kuyanakana hichuma chatamaku. Hela chochu, antu amavulu hiyanakutoñojoka hansañu yakudifukula kwakutwamba hampinji yanakwanakanawu mafuku akunookaku. Cheñi nawa awa mafuku ayinkaña yisaka kukoleka kwakwinza hamu. Ichi dichiwatiyaña nineyi? Neyi dimu, dikwila nawu wakeña chisaka, bayi neyi kukeña nsakililu yakutwamba yaleteshaña kwimana wakola mukudifukula kwalala kumwekana kukalaku. Ilukaku neyi Yehova, yomweni watachikili chisaka, nakukeña eyi wikali nakukwantakana kwakuwahi nawantaña jeyi. (Aefwesesa 3:14, 15) Wunatweshi kukolesha mpanda yeniyi mujinjila jetejayi Nzambi. Kutalisha hachuma chatela kwikala chalema kudi etu, kapostolu Pawulu wasonekeli nindi: ‘Shinshikenu hayuma yamutiyishaña Mwanta kuwaha.’​—Aefwesesa 5:9.

12. Lumbululaku muloña wutwatela kutondolwela tushidikilu niyidika yikweti ntachikilu yamajilu.

¹² Hadaha watoñojokaña neyi ntachikilu yamafuku akunooka hiyikweti yishina yayeni yakwila nawu ayanakaneña nikuleluku. Komana ntachikilu mwamweni yalema? Eñañi! Chakutalilahu: Twili netu wamweni switi yidi mumufolu. Wadi kuyinona yina switi nakuyidya tahindi? Inehi! Yina switi yidi namajilu. Neyi chochidi yina switi, mafuku akunooka niwena amwekanaña kuwaha, ilaña afuma mumaluña amajilu. Hakwila nawu twimani ngu-u mukudifukula kwalala, twatela kwikala nammwenu yidi neyi yina yakaprofwetu Isaya walejeli akwakudifukula alala nindi: “Bayi mukunka kuchuma chamajiluku.”​—Isaya 52:11.

13. Kukalanyi kwatela kumwekana hampinji yiwukubula kudibomba mujamafuku akunooka?

¹³ Kukala kunateli kumwekana hampinji yiwunakufuukula kubula kudibomba mujamafuku akunooka. Chakutalilahu, akwenu wazataña nawu chimu atela kwihula muloña yiwabulilaña kudibomba munyidimu yikwawu yamafuku akunooka kuwazatilaña. Chumanyi chiwukwila neyi anakwinki chawaana chahaKrisimansi? Chatela kwikala chaluwa neyi wuchitambula? Indi neyi mwinikweyi hetiya muwetiyeyiku? Chumanyi chiwatela kwila kulonda kumona kwila nawu anyaneyi abuli kuneña hamuloña wakubula kwanakana mafuku akunooka?

14, 15. Chumanyi chiwatela kwila neyi anakwimushi kwimusha kwahefuku dakunooka hela neyi muntu wumu nakukeña kukwinka chawaana?

¹⁴ Kashinshi kakawahi kakeñekaña kulonda wiluki mwakumanishila kukala kudi kwejima. Neyi chakwila anakwimushi kwimusha kwahefuku dakunooka, eyi kuminaku dakumusakilila ona wunakwimushi. Indi neyi wunakuhosha namuntu yiwamonaña hela yiwazataña nindi mpinji yonsu. Neyi chidi mwenimu, wunateli kufuukula kuhoshahu jajivulu. Munjila jejima, chiña wubabala. Bayibolu yababeshaña nawu: “Kuhosha kwenu kwikali naluwi, kwakutoweja namuñwa mafuku ejima, kulonda mwiluki mwakwakwila antu ejima.” (Akolose 4:6) Babalaku, bayi wusekesha antu acheñiku. Ilaña, babalaku hakulumbulula ñimenu yeyi. Lumbululaku chiwahi neyi hiwunakukana kupompa hela kuhana chawaanaku, ilaña yileji neyi wukadibombamu muniyi nyidimu mpinji yacheñi.

¹⁵ Indi neyi kudi muntu wunakukeña kukwinka chawaana? Jajivulu jashindamena kwesekeja nampinji chiyidi. Mukwakuhana nateli kuhosha nindi: “Neluki nami hiwanakanaña ifuku dakunookaku. Hela chochu, nakeñi nami wutambuli ichi chawaana.” Wunateli kufuukula neyi kutambula chawaana hampinji yamuchidiwu hichidi neyi kwikalamu nambadi munsañu jamafuku akunookaku. Eña, neyi mukwakuhana heluka chekala kwitiya kweyiku, wunateli kuhosha neyi hiwanakanaña mafuku akunookaku. Ichi chikukwashaku kulumbulula muloña waweni yiwukwitejela chawaana bayi kuhana chawaana kudi muntu haniyi mpinjiku. Munjila  yikwawu, chikubadika kuwaha kubula kutambula ochu chawaana neyi anachihani nayitoñojoka yinakumwekesha chikupu nawu hiwakakela kuyuma yiwetiyamuku hela nawu watela kutambula hohu kulonda wikali nayuma.

16. Wunatweshi kwikala ñahi wababala neyi hiwukuhosha hansañu yamafuku akunooka?

¹⁶ Indi neyi antu amuchisaka hiyakuhwelela muyuma yiwakuhweleleyiku? Cheñi nawa, watela kubabala. Hikwatela nikwidika ntadi hansañu yanyichidi yejima yatushidikilu hela yidika oyu antaña jeyi yinatondiwu kwanakanawuku. Ilaña, watela kulemesha mwanafuukuliwu neyi chochiwunakukeña niwena nawu alemeshi muwunafuukuli. (Tañenu Matewu 7:12.) Bayi wila chidi chejima chikuletesha wudibombimu mwifuku dakunookaku. Hela chochu, babalaku neyi hiwukuhosha hansañu yinabuli kukundama kuchidika chacheni. Eña, mpinji yonsu watela kuzata munjila yikubula kukabisha chinleji chachiwahi chamuchima.​—1 Timotewu 1:18, 19.

17. Wunatweshi kukwasha ñahi anyaneyi kubula kutiya chineñi neyi anamoni nawu akwawu anakwanakana mafuku akunooka?

¹⁷ Chumanyi chiwatela kwila kulonda anyaneyi abuli kuneña hamuloña wakubula kwanakana mafuku akunooka abula kwikala munsona? Jajivulu jashindamena hayuma yimwelaña mafuku amakwawu amuchaaka. Anvwali amakwawu abulañaku mpinji yakuhana yawaana kudi anyanawu. Chawaana chimu cheneni chiwunateli kuyinka anyaneyi himpinji yeyi nikuyisha kashinshi kakumwekesha kukeña.

18. Indi kuwanika kukupompa kwawiniKristu kukukwasha ñahi kwimana ngu-u mukudifukula kwalala?

¹⁸ Hakwila nawu wumuzañaleshi Nzambi, watela kukana kudifukula kwakutwamba nakwimana ngu-u mukudifukula kwalala. Indi kwimana ngu-u mukudifukula kwalala kwabombelamu mwodi? Bayibolu yahoshaña nawu: “Tuditoñojokenu muntu himuntu, kulonda tusañumuni akwetu kukeñañana nakwila  nyidimu yayiwahi. Bayi tuleka kupompa neyi chelañawu amakwawuku, chiña kudilejaleja, chisweji nankashi nanichi chimunamoni ifuku odu hidikwinza nakuswila kwakwihi.” (Aheberu 10:24, 25) Kupompa kwawiniKristu himpinji yamuzañalu yiwatela kudifukula kudi Nzambi munjila yetejayi. (Masamu 22:22; 122:1) Hakupompa kweniku, kwekalaña ‘kukwashañana kwachikuhwelelu’ naweniKristu ashinshika.​—Aroma 1:12.

19. Muloñadi chichekalila chalema kulejaku antu amakwawu hayuma yiwunadizi kufuma muBayibolu?

¹⁹ Njila yikwawu muwunateli kwimena ngu-u mukudifukula kwalala, hikuhosha nawantu amakwawu hayuma yiwunadizi kufuma mukudiza kwaBayibolu nawaYinsahu jaYehova. Antu amavulu ‘anakushikoka nikudila’ chikupu hamuloña wakutama kunakumwekana mukaayi lelu dinu. Hadaha wunelukihu antu amakwawu anakushikoka nikudila. Muloñadi chiwukubulila kuhosha nawu hansañu yakuchiñeja kweyi kwashindamena haBayibolu kwampinji yakumbidi? Hampinji yiwukuhanjeka naweniKristu alala nikuhosha nawantu acheñi hakuwaha kwachalala chaBayibolu kuwunadizi, wukuchiwana neyi kufwila kwejima kwatushidikilu twansakililu yakutwamba twashalili mumuchima weyi twakamana mukuhita kwampinji. Ilukaku neyi wakekala namuzañalu chikupu nawa wakatambula nkisu yayivulu neyi chakwila wimana ngu-u mukudifukula kwalala.—Malaki 3:10.