1, 2. Kudihi kutunatweshi kuwana chiswamu chachiwahi makonu?

DESEKEJI neyi wunakwenda munjila hefuku dinakunoka nvula yampepela nawa yamuzowa. Iwulu dineyili bwi-i. Iwulu hidikukenashana, nzaji hiyikwanduka nikwanduka, kulondelahu nvula yitachika nikunoka chikupu. Hiwukunyakashana nakweseka kukeñakeña iluña dakwiyama. Kukashimuka, hiwukumona chifufu kunjila. Chifufu chenichi chakola nawa mwawuma chiwahi chikupu. Ochiwunateli kulemesha idi iluña diwuneyamimu!

² Tunakushakama mumpinji yayihuñu. Nshakaminu yamukaayi yenda yitaminaku chikupu. Ilaña kudi chifufu mwawuma, chiswamu chatela kutukiña chiwahi kuyuma yinatweshi kutukatisha haya nyaka. Hichumanyi? Talaña chuma chatañishaña Bayibolu: “Nukumutena Yehova nami, Diyi chiswamu chami, diyi mpwembu yami, diyi Nzambi yami, inakuhwelela.”​—Masamu 91:2.

3. Tunateli kumwilisha ñahi Yehova kwikala chiswamu chetu?

³ Chitoñojoki! Yehova, Nleñi nawa Mwanta wakuleña kwejima, nateli kwikala chiswamu chetu chakutukiña. Nateli kutuhemba chiwahi, muloña yena wukweti ñovu kubadika muntu wudi wejima hela chuma chejima chinateli kutukatisha. Hela  chakwila anatukatishi Yehova nateli kufumishahu yuma yejima yatama. Tunateli kumwilisha ñahi Yehova kwikala chiswamu chetu? Twatela kumukuhwelela. Kubombelahu, Izu daNzambi datukonkomwenaña nawu: “Dihembenu kulonda mushakami mukukeña kwaNzambi.” (Yuda 21) Mwamweni, twatela kushakama mukukeña kwaNzambi, nakuhemba mpanda yakukeña naTata yetu wekala mwiwulu. Kulondelahu tunatweshi kukuhwelela netu Yehova diyi chiswamu chetu. Hanu dinu munjilanyi mutukutuñila mpanda yamuchidiwu?

4, 5. Jinjilanyi jikwawu mwamwekeshelañayi Yehova kukeña kudetu?

⁴ Hakwila nawu tushakami mukukeña kwaNzambi, twatela kwiluka chamwekeshañayi Yehova kukeña hadetu. Toñojokaku hayuma yimu yatañishaña Bayibolu yiwunadizi nawukwashu wawunu mukanda. Hamu neyi Nleñi, Yehova watwinka iseki kwikala mukala wetu wawuwahi. Wenzesha iseki nayakudya yayivulu nimenji, yuma yaleñayi yomweni, niwumi wawanyama wakuzañalesha, nimaluña amawahi. Hakwikala Nsoneki yaBayibolu, Nzambi watwisolwelaña ijina dindi niyililu yindi. Kubombelahu, Izu dindi damwekeshaña nawu watemesheli Mwanindi wakeñayi hamaseki, nakumwiteja Yesu yakabakani nikutufwila. (Yowanu 3:16) Indi ichi chamukunkulu chinalumbulukidi kudetu? Chatwinkaña chikuhwelelu chachiwahi chakumbidi.

⁵ Chikuhwelelu chetu champinji yakumbidi chashindamena cheñi hachuma chikwawu chatwililayi Nzambi. Yehova wukweti nfulumendi yamwiwulu, yaWanta wawuMesiya. Wukamanisha yihuñu yejima nawa wukabalumuna iseki kwikala paradisa. Chitoñojoki! Tunatweshi kushakama muparadisa mukuwunda nimumuzañalu haya nyaka. (Masamu 37:29) Chayinu mpinji, Nzambi watwinka nshimbi yakutwilombola ochitwatela kushakama chachiwahi chakatataka. Watwinka cheñi chamukunkulu chakulomba, muniyi njila tunatweshi kuhanjeka nindi mpinji yejima nawa kudi kwejima. Iji hinjila jantesha hohu mwamwekeshelañayi Yehova kukeña kudi antu ejima nikudeyi halweyi.

6. Wunateli kwiteja ñahi kukeña oku kunamwekeshiyi Yehova hadeyi?

 ⁶ Lwihu lwalema luwatela kutoñojokahu dilwi ilu: Munjilanyi munukwitejela kukukeña kwaYehova? Antu amavulu atela kuhosha nawu, “Eña, natela kumukeña Yehova ninami nawa.” Nineyi dichiwatoñojokaña? Yesu wahosheli nindi ilu lushimbi dilwabadika nshimbi jejima: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” (Matewu 22:37) Chalala wukweti nyiloña yayivulu yakumukeña Yehova Nzambi. Komana kutoñojoka neyi wukweti kukeña kwamuchidiwu diyuma yejima yiwatela kwila kulonda wili neyi wamukeña Yehova namuchima weyi, niwumi, ninamaaneyi ejima?

7. Komana kudihu yuma yikwawu yinakukeñeka hakumukeña Nzambi kubadika kutiya hohu? Lumbululaku.

⁷ Neyi chinalumbululiwu muBayibolu, kumukeña Nzambi kwabadika kukeña kwakutiya hohu. Hela chakwila yitoñojoka yakumukeña Yehova yalema, yitoñojoka yamuchidowu hintachikilu hohu yakukeña kwalala kuwamukeña. Musokwa wamukabu wekala walema hakukula kwamutondu wasoñaña nyikabu. Neyi chakwila wakeñeleña mukabu, komana wadi kutiya kuwaha neyi muntu wakwinkeli musokwa waweni? Inehi! Chochimu, yitoñojoka yakumukeña Yehova Nzambi hintachikilu hohu. Bayibolu yatañishaña nawu: “Kumukeña Nzambi yowu kwila mwatulejañayi; mwatulejañayi himwakalaku.” (1 Yowanu 5:3) Kuhosha chalumbuluka, kumukeña Nzambi chiña tusoñaña nyikabu yayiwahi. Iyi nyikabu yatela kumwekena muyililu.​—Tañenu Matewu 7:16-20.

8, 9. Tunatweshi kumwekesha ñahi kukeña kwetu nikusakilila kudi Nzambi?

⁸ Twamwekeshaña kukeña kwetu kudi Nzambi neyi tuhemba nshimbi jindi nakuzatisha yishina yindi. Kwila mwenimu hichuma chasweja kukalaku. Chatela kwila yikali hichisenda, nshimbi jaYehova ajituña kulonda jitukwasheñaku kushakama nshakaminu yayiwahi nawa yamuzañalu.  (Isaya 48:17, 18) Kuhitila mukushakama nshakaminu yakwantankana hamu nanshimbi jaYehova, dikwila nawu tunakumwekesha kudi Tata yetu wamwiwulu netu twasakililaña chikupu hayuma yejima yatwililayi. Chawushona nankashi, makonu antu antesha hohu mukaayi diwu anakumwekesha kusakilila kwamuchidiwu. Hitunakukeña kwikala antu abulaña kusakilila neyi chadiñawu antu adiñaku hampinji yadiñayi Yesu hamasekiku. Yesu wokili akwambumba ikumi, ilaña wumu hohu diyi wafuntili nakumusakilila. (Luka 17:12-17) Chalala twatela kwikala neyi ona muntu wumu wasakililaña, bayi neyi ana atanu nawana abulaña kusakililaku!

⁹ Nshimbinyi jaYehova jitwatela kuhemba? Twahoshahu dehi hanshimbi jajivulu muwunu mukanda, ilaña tuhitilukenumu munshimbi janti. Kuhemba nshimbi jaNzambi chikutwikwasha kushakama mukukeña kwaNzambi.

10. Lumbululaku chichalemena kutwalekahu kwikala nakwiluka hadi Yehova Nzambi.

¹⁰ Kudiza hadi Yehova hinjila yimu yalema nankashi yakukundaminamu kwakwihi nayena. Hinjila yatela kutwalekahu  chikupu. Neyi wadiña hanzi nawufuku henohu kunatuti nankashi dichi wunakwota kesi, komana wadi kuleka kesi kunyekumuka nkumininaku kajima nikujima? Inehi. Watela kutwalekahu kusonsela nchawa kulonda kesi kabutukeña chikupu. Wumi weyi wunateli kushindamena hakusonsela hejiku! Neyi chochahembaña nchawa kesi, munjila yoyimu ‘nikwiluka Nzambi’ kwaleteshaña kukeña kwetu kutwamukeña Yehova kukolelaku.​—Yishimu 2:1-5.

11. Chumanyi chafumini mudi atumbanji twaYesu hantañishilu yindi?

¹¹ Yesu wakeñeli atumbanji twindi nindi ahembi kukeña kwawu kwakudi Yehova hamu Niizu Dindi dalema dawalala dadumi chikupu. Cheliliyi nasañuki dehi, Yesu wayidizishili atumbanji twindi ayedi wuprofwetu wukwawu wamuNyikanda yachiHeberu yashikijilewi hadi yena. Chumanyi chafuminimu? Nkumininaku elili nawu: ‘Twatiyilahu munyichima yetu mumavumu busu, chadiñi nakutulejayi munjila, chadiñi nakutulumbulwilayi Nyikanda yajila.’​—Luka 24:32.

12, 13. (a) Hakachi kawantu amavulu makonu, chumanyi chinakumwekana kutalisha hakukeña kwamukeñawu Nzambi nikwakeñawu Bayibolu? (b) Tukutwesha kukañesha ñahi kukeña kwetu kubula kukeha?

¹² Chiwatachikili kudiza chuma chacheni chatañishaña Bayibolu, komana hiwatiyili neyi muchima weyi watachikili kubidima namuzañalu, mpwila yakukeña kudiza, nikumukeña Nzambiku? Chakubula nikujina, dichi watiyili. Antu amavulu dichatiyañawu niwena. Kukala kudi hakuhemba kuna kukeña kwakweni kulonda kwikali kwakumi nawa kwakola. Hitunakukeña kulondela njila yakaayi kamakonuku. Yesu washimwineñahu dehi nindi: “Kukeña kwawantu amavulu kwakaya nakukeha.” (Matewu 24:12) Munjilanyi muwukukañeshela kukeña kweyi kwakudi Yehova nikwachalala chaBayibolu kubula kukeha?

¹³ Twalekakuhu kudiza hakwiluka kwaYehova Nzambi niYesu Kristu. (Yowanu 17:3) Toñojokaku chikupu hayuma yiwunakudiza kufuma Mwizu daNzambi, nakudihula eyaweni neyi: ‘Chumichi chinakundizishadi kutalisha hadi Yehova Nzambi? Muloñanyi wukwawu wukunkojeja ami kumukeña namuchima wami wejima, nayitoñojoka yejima niwumi wejima?’ (Tañenu 1 Timotewu 4:15) Kutoñojoka kwamuchidiwu kukuletesha kukeña kweyi kwakudi Yehova kutwalekahu nakubidima chikupu.

14. Indi kulomba kunatweshi kutwikwasha ñahi kuhemba kukeña kwetu kwakudi Yehova kwakumi?

 ¹⁴ Njila yikwawu yakuhembelamu kukeña kweyi kwakudi Yehova kutwalekahu nakubidima hikulomba mpinji yejima. (1 Atesalonika 5:17) MuKapetulu 17 kawunu mukanda, twadizili netu kulomba hichawana chalema chakufuma kudi Nzambi. Chochiwakolaña chikupu wulunda wawantu neyi enda atiyashana, niwulunda wetu naYehova wukwikala wakola nawa wawumi neyi chakwila tulombaña kudi yena mpinji yejima. Chidi chalema nankashi neyi kulomba kwetu hikukwikalaña kwakubula kutoñojokaku​—nakufuntila funtila mumazu wowamu abula kulumbuluka mpinji yejima. Twatela kuhosha naYehova neyi chahoshañayi mwana natata yindi wukweti kukeña. Mwamweni, twatela kuhosha nakalemesha, ilaña akasunuka, nakashinshi nawa chakufuma mumuchima. (Masamu 62:8) Eña, kudiza Bayibolu kwahalwetu nikulomba kwakufuma mumuchima hiyuma yalema mukudifukula kwetu nawa yikutukwashaku kushakama mukukeña kwaNzambi.

15, 16. Muloñadi chitwatela kumwena mudimu wakushimwina waWanta neyi hikukoleka nawa neyi hiheta?

¹⁵ Kudiza Bayibolu kwahalwetu nikulomba hiyililu yakudifukula yitwatela kwilaña kwakankawetu. Hela chochu, tutalenu hanjila yimu yakudifukwilamu yitwakalakelaña kudi antu amavulu: kuhosha kudi antu amakwawu hayuma yitwetiya. Washimwinahu dehi chalala chamuBayibolu kudi antu acheñi? Neyi washimwinahu dehi, wadiña nakukoleka kwakuwahi. (Luka 1:74) Neyi tushimwina chalala chitwadiza dehi hadi Yehova Nzambi, dikwila nawu tunakuzata mudimu walema nankashi wayinkawu eniKristu alala ejima—wakushimwina nsañu yayiwahi yaWanta waNzambi.​—Tañenu Matewu 24:14; 28:19, 20.

¹⁶ Kapostolu Pawulu wamweni mudimu windi neyi chuma chalema, wawiteneneña nindi iheta. (2 Akorinda 4:7) Kuhosha nawantu hadi Yehova Nzambi nihankeñelu yindi dimudimu wasweja kuwaha yiwatela kwila. Himudimu wasweja kuwaha kudi Mwanta wabadika anyanta ejima, nawa waletaña iheta dasweja kuwaha kubadika ditwatambulaña kunyidimu yikwawu. Kuhitila mukuzata  iwu mudimu, wunakukwasha antu ashinshika kukundama kwakwihi naTata yetu wekala mwiwulu nawa kulonda atachiki kwenda munjila yaya kuwumi wahaya nyaka! Mudimu wetu wekala wawuwahi nankashi. Kubombelahu, kushimwina hadi Yehova niHezu dindi chikukolesha chikuhwelelu cheyi eyaweni nikukeña kweyi kwakudi  yena kukukola. Yehova walemeshaña ñovu jeyi. (Aheberu 6:10) Kukalakala mudimu wamuchidiwu mpinji yejima kukukwasha kushakama mukukeña kwaNzambi.​—Tañenu 1 Akorinda 15:58.

17. Muloñadi mudimu wawiniKristu makonu chiwunekalili wakunyakashana?

¹⁷ Chidi chalema kwanuka netu mudimu wakushimwina waWanta wudi wakunyakashana. Bayibolu yahoshaña nawu: “Shimunaku mazu mukunyakashana.” (2 Timotewu 4:2, NW) Muloñadi kwila mwenimu chikunekalili kwakunyakashana makonu? Izu daNzambi datulejaña nawu: “Ifuku daYehova deneni didi kwakwihi, didi kwakwihi, didi nakunyakala nankashi.” (Zefwaniya 1:14) Mwamweni, mpinji yinakunyakala nankashi kulonda Yehova yokaleti kukumisha kwayinu mpata yejima yamakonu. Antu atela kuyikonkomwena! Atela kwiluka nawu ayinu diyi mpinji yakutonda Yehova hamu neyi Mwanta wawu. Kukuma kwadinu ituña ‘hikwakalabaku.’​—Habakuki 2:3.

18. Muloñadi chitwatela kudifukula kudi Yehova hadi antu amavulu hakuhanjeka hamu naweniKristu alala?

¹⁸ Yehova nakukeña nindi tudifukuleña kudi yena hatooka nikuhanjekaña hamu naweniKristu alala. Dimuloña waweni Izu dindi chidahoshelaña nawu: “Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi. Bayi tuleka kupompa neyi chelañawu amakwawuku, chiña kudilejaleja, chisweji nankashi nanichi chimunamoni ifuku odu hidikwinza nakuswila kwakwihi.” (Aheberu 10:24, 25) Chitwapompa hamu nawakwetu akwakwitiya hakupompa kwawiniKristu, tukwikala nakukoleka kwakuwahi kwakuhameka nikudifukula kudi Nzambi yetu yitwakeña. Twadituñaña cheñi wumu namukwawu nikudikolesha.

19. Tunatweshi kuzata ñahi hakwila nawu tukoleshi mpanda yakukeña muchipompelu chawiniKristu?

¹⁹ Hampinji yitukuhanjekaña hamu nawakwakudifukula amakwawu aYehova, dikwila nawu tunakukolesha mpanda yakukeña niwulunda muchipompelu. Chikwikala chalema kudi etu kushinshika hayililu yayiwahi yidi mudi wumu namukwawu neyi chamonañayi Yehova yililu yayiwahi mudi etu. Bayi wukuhwelela kuloña mudi akwenu akwakwitiyaku. Anukaku neyi antu ejima akweti yipimu yashiyashana mukukula lwakuspiritu nawa  wejima wetu twaluwañeshaña. (Tañenu Akolose 3:13) Fwilaku kukolesha wulunda nawantu amukeña Yehova chikupu, nawa wakamona kwila neyi wunakukula lwakuspiritu. Mwamweni, kudifukula kudi Yehova hamu nawana kweyi akuspiritu niahela chikukwasha kushakama mukukeña kwaNzambi. Indi Yehova wafwetaña ñahi antu amulombaña chakashinshi nawa ashakama mukukeña kwindi?

20, 21. “Wumi walala” hichumanyi, nawa muloñadi chiwunekalili hikuchiñeja kwakuwahi?

²⁰ Yehova wayifwetaña wumi ambuñindi ashinshika, hanu dinu wumi wamuchidinyi? Komana hiwudi wamumi chakatatakaku? Etu amavulu twatela kuhosha chikupu netu ñakwilu yidi yakwila nawu tudi amomi. Hela chochu, twonaña, twadyaña, nawa twanwaña. Chalala tudi amomi. Nawa hampinji yitudi namuzañalu nankashi, twatela nikuhosha netu, “Ichi dinu chalala tunakuluña nawumi chikupu!” Ilaña, Bayibolu yamwekeshaña yitoñojoka yalema nawu, chalala kwosi muntu niwumu wunakuhanda makonuku.

²¹ Izu daNzambi datukonkomwenaña ‘kukwatisha kuwumi, wowu wumi walala chikupu.’ (1 Timotewu 6:19) Awa mazu amwekeshaña nawu “wumi walala” hichuma chitunakuhweleli kuheta kumpinji yakumbidi. Eña, neyi tunekali dehi awanina, dihu twamba kekala amomi kwesekeja nayitoñojoka yayeni yezu, muloña tukashakamaña neyi chochakeñeliyi Nzambi hakutachika nindi tuhandeña. Ifuku dimu kumbidi twamba kashakama muparadisa hamaseki nawumi wawuwahi, mukuwunda, nimuzañalu, nkumininaku tukadiluñisha “wumi walala”​—wumi wahaya nyaka. (1 Timotewu 6:12) Iku kuchiñeja komana hikunekali kwakuwahiku?

22. Munjilanyi muwunatwesheli ‘kukwatila kuwumi, wowu wumi walala chikupu’?

²² Munjilanyi mutunateli ‘kukwatisha kuwumi, wowu wumi walala chikupu’? Mumazu wowamu, Pawulu wakonkomweneni eniKristu nindi “ilenuña chachiwahi” nawa nindi “swejenu kwila nyidimu yayiwahi.” (1 Timotewu 6:18) Mwamweni, yuma yayivulu yashindamena hanochu chitwazatishaña chalala chitwadiza kufuma muBayibolu. Komana Pawulu watwalili mukwila nindi twahetaña “wumi walala” kuhitila mukuzata nyidimu yayiwahi? Inehi, muloña chikuhwelelu chachiwahi chamuchidiwu chashindamena  ‘haluwi’ lutwatambwilaña kufuma kudi Nzambi. (Aroma 5:15) Hela chochu, Yehova watiyaña kuwaha kuyifweta antu amukalakelaña nachikuhwelelu. Nakukeña kukumona eyi nakuhanda “wumi walala.” Antu akushakama mukukeña kwaNzambi atela kukuhwelela nawu akekala nawumi wamuzañalu, mukuwunda nawa nawumi wahaya nyaka.

23. Muloñadi chichinekalili chalema kushakama mukukeña kwaNzambi?

²³ Wejima wetu twatela tudihula netu, ‘Komana nadifukulaña kudi Nzambi munjila yashayi muBayibolu?’ Neyi tudesekaña mafuku ejima nakumwekesha nawu twadifukulaña kudi Nzambi munjila yamuchidiwu, dikwila nawu tudi munjila yayiwahi. Tunatweshi kukuhwelela netu Yehova diyi chiswamu chetu. Wamba kahemba antu jindi ashinshika chiwahi hamafuku akukuminina amakabi ayinu mpata yamakonu yayikulu. Cheñi nawa, Yehova wakatwiñija mwituña dajila dadiha didi kwakwihi. Owu muzañalu wutukekala nawu hakumona oyu mpinji! Owu muzañalu wutukatiya hakwila nawu twatondeli chuma chachiwahi munanu mafuku akukuminina! Neyi wukutonda chuma chamuchidiwu makonu, dikwila nawu wukadiluñisha “wumi walala,” wumi wudi neyi wuna wakeñeliyi Yehova Nzambi nindi wikaliku, haya nyaka!