1, 2. Muloñadi chitwatela kumona kulomba neyi hikukoleka kweneni, nawa muloñadi chitwatela kwilukila chatañishaña Bayibolu hansañu yakulomba?

ISEKI danyanya nankashi neyi kudesekeja namawulu. Kudi Yehova, “welili nimawulu nimaseki,” nyunza yawantu yidi neyi imata damenji didi mumbeketi. (Masamu 115:15; Isaya 40:15) Hela chochu, Bayibolu yahoshaña nawu: “Yehova wudi kwakwihi nawantu ejima akumutambika, nawejima akumutambika chalala chakubula kutwamba. Wukwila mwakeñawu amwakama, wukutiya nawa chakubilelawu, wukuyamwina.” (Masamu 145:18, 19) Toñojokaku ochichinalumbuluki! Nleñi watwesha yejima wudi kwakwihi nanetu nawa wukututiya neyi ‘tukumutambika muwalala.’ Oku kukoleka kutukweti kwakuhoshaña naNzambi mukulomba!

² Hela chochu, neyi tunakukeña netu Yehova yatiyeña kulomba kwetu, twatela kulomba kudi yena munjila yetejayi. Tunatweshi kwila ñahi mwenimu chakubula kutiyishisha chatañishaña Bayibolu hansañu yakulomba? Chikwikala chalema kudetu kwiluka chahoshaña Nsona haniyi nsañu, muloña kulomba kwatukwashaña kukundama kwakwihi naYehova.

3. Muloñanyi wumu walema wutwatela kulombela kudi Yehova?

³ Muloña wumu walema wutwatela kulombela kudi Yehova  wudi wakwila nawu watukoleshaña kwila mwenimu. Izu Dindi datukoleshaña nawu: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila. Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Afwilipi 4:6, 7) Chalala hitunakukeña kudiwula kuloñesha kwamuchidiwu kwatuloñeshelawu kudi Nyuli Wabadika wakuleña kwejimaku!

4. Indi kulomba mpinji yejima kudi Yehova kwakoleshaña ñahi wulunda wetu nayena?

⁴ Muloña wukwawu wutwatela kulombela wudi wakwila nawu, kulomba mpinji yejima kudi Yehova hinjila yimu mutwakoleshelaña wulunda wetu nayena. Amabwambu alala hiyahanjekaña hohu neyi anakukeña chumaku. Ilaña, amabwambu amawahi adakamenaña, nawa niwulunda wawu wakolaña kuhitila mukwikala akasunuka hakuhosha yitoñojoka yawu hayuma yinakukeñawu niyuma yatiyañawu. Munjila yikwawu, iyi yuma yidi hohamu kutalisha kuwulunda wetu naYehova Nzambi. Nawukwashu wawunu mukanda, wunadizi yuma yayivulu kutalisha hayuma yatañishaña Bayibolu kutalisha hadi Yehova, yililu yindi, ninkeñelu yindi. Wunashiki hakumwiluka neyi himuntu yomweni. Kulomba kwakwinkaña  kukoleka kwakumulejamu Tata yeyi wekala mwiwulu yitoñojoka yeyi niyitoñojoka yamukachi kamuchima weyi. Kwila mwenimu, wunakukundama kwakwihi chikupu naYehova.—Yakoba 4:8.

5. Chumanyi chinakumwekesha nawu Yehova hatiyaña kulomba kwejimaku?

⁵ Komana Yehova watiyaña kulomba kwejima? Toñojokaku ochayilejeliyi aIsarela akwakudikaña amumafuku akaprofwetu Isaya: “Mwalala, hela mukuvulisha kulomba hinukutiyaku; makasenu anenzali mbe namashi.” (Isaya 1:15) Dikwila nawu yililu yikwawu yinateli kwilisha Nzambi kubula kutiya kulomba kwetu. Hakwila nawu kulomba kwetu akutiyeña chiwahi kudi Nzambi, twatela kuwanisha yuma yimu yinakukeñeka.

6. Hakwila nawu Nzambi yotiyi kulomba kwetu, chumanyi chalema chinakukeñeka, nawa tunatweshi kuchiwanisha ñahi?

⁶ Chuma cheneni chinakukeñeka chindi chakwila nawu, twikali nachikuhwelelu. (Tañenu Maku 11:24.) Kapostolu Pawulu wasonekeli nindi: ‘Chakadi kukuhwelela hichinatweshi kumutiyisha [Nzambi] kuwahaku; muntu wukwinza kudi Nzambi chiña etiya nindi wudi kwoku, nindi wasomwenaña antu amukeñakeñaña.’ (Aheberu 11:6) Kwiluka hohu netu Nzambi wudi kwoku, nawa netu watiyaña nikwakula kulomba dikwikala nachikuhwelelu chalalaku. Chikuhwelelu chamwekanaña kuhitila munyidimu yetu. Twatela kumwekesha wunsahu wahatooka to-o netu tukweti chikuhwelelu kuhitila munshakaminu yetu yamafuku ejima.​—Yakoba 2:26.

7. (a) Muloñadi chitwatela kwikala nakalemesha neyi hitukuhosha naYehova mukulomba? (b) Neyi tunakulomba kudi Nzambi, tunatweshi kumwekesha ñahi kudizoza nikashinshi?

⁷ Yehova wakeñaña cheñi nindi antu enzaña kudi yena mukulomba atela kulomba nakudizoza nawa nakashinshi. Komana hitukweti muloña washikila wakudizoza neyi tunakuhosha naYehovaku? Hampinji yekalañawu antu nakukoleka kwakuhosha namwanta hela nakajiña mpata, mpinji yejima ahoshaña nakavumbi muloña eluka nawu himuntu wukweti  chifulu chalema. Indochu etu twatela kumwekesha ñahi kalemesha hakwinza kudi Yehova mukulomba! (Masamu 138:6) Nawa cheñi ‘hiNzambi Watwesha Yejima.’ (Kutachika 17:1) Neyi hitukulomba kudi Nzambi, njila yitukumulombelamu chiña yimwekeshaña nawu twadizoza nakwiluka chifulu chetu kumesu indi. Kudizoza kwamuchidiwu kukutwilisha kulomba kwakufuma kunyichima yetu nakashinshi, nakutondolwela chaaku chakulomba kwakufuntila-funtilamu.​—Matewu 6:7, 8.

8. Tunatweshi ñahi kuzatila hamu nayuma yitunakulomba?

⁸ Chuma chikwawu chinakukeñeka hakwila nawu Nzambi yotwitiyeña, twatela kuzata kwesekeja nakulomba kwetu. Yehova wakeñaña nindi twileña yuma yejima yitunatweshi kwila kulonda kuzatila hayuma yitunakulomba. Chakutalilahu, neyi tukulomba netu, “Twinki kudya kwetu kutukukeña lelu,” twatela kuzata nañovu hamudimu wudi wejima wutwatela kuzata. (Matewu 6:11; 2 Atesalonika 3:10) Neyi tukulomba wukwashu hakushinda kuzeya kwakumujimba, twatela kwikala asoñama nakutondolwela yuma yejima yatela kututwala mukweseka. (Akolose 3:5) Kubombelahu haniyi yuma yalema yinakukeñeka, kudi malwihu anakukeñeka nawu tuyakuli kutalisha kukulomba.

9. Twatela kulomba kudinyi, nawa kuhitila mudinyi?

⁹ Twatela kulomba kudinyi? Yesu wadizishili atumbanji twindi kulomba kudi “Tata yetu wekala mwiwulu.” (Matewu 6:9) Komana kulomba kwetu kwatela kuya hohu kudi Yehova Nzambi. Hela chochu, Yehova wakeñaña nindi twiluki chifulu chaMwanindi wumu hohu, Yesu Kristu. Neyi chitwadizili muKapetulu 5, Yesu amutemesheli hamaseki hamu neyi ifutu danyiloña kulonda atukuli kufuma kunshidi nikukufwa. (Yowanu 3:16; Aroma 5:12) Diyi atondawu kwikala Kapristu Muneni nawa Nsompeshi. (Yowanu 5:22; Aheberu 6:20) Dichi dinu, Nsona yatulejaña  kulomba kuhitila mudi Yesu. Yesu yomweni wahosheli nindi: ‘Ami yami njila, yami walala, yami wumi. Kwosi muntu niwumu wukwinza kudi Tata chiña yahitili mudami.’ (Yowanu 14:6) Hakwila nawu kulomba kwetu akwitiyi, chiña tulomba kuhitila mudi Mwanindi.

10. Hampinji yitunakulomba, muloñadi chikukubulila kukeñeka kwikala neluña dimu dakwimena hela dakushakama?

¹⁰ Komana twatela kusha mujimba mwiluña dadimena hampinji yitunakulomba? Inehi. Yehova hakeñaña kusha mujimba mwiluña dadimenaku, hela makasa hela mujimba wejimaku. Bayibolu yatañishaña nawu chetejewa kulomba munjila yashiyashana. Ichi chinabombelimu kushakama, kubandama, kufukama, nikwimana. (1 Kushindulula 17:16; Nehemiya 8:6; Danyeli 6:10; Maku 11:25) Chuma chalema, bayi neyi hinjila yadimena yatela kumonawu kudi antuku, ilaña yililu yayiwahi yamuchima. Hampinji yitunakuzata nyidimu yetu yamafuku onsu hela neyi tunaholokeli mukukala kwakukasumwisha, twatela kulomba wumweneni kwejima kutudi. Yehova watiyaña kulomba kwamuchidiwu hela chakwila antu yitudi nawu hiyatela kutumonaku.—Nehemiya 2:1-6.

11. Yumanyi yakumujimba yatukabishaña yinashikili kulomba?

¹¹ Chumanyi chitunateli kulomba? Bayibolu yalumbulula nawu: “Tukwiluka netu neyi tukulomba chuma chamwaya muchima windi, [Yehova] wukututiya.” (1 Yowanu 5:14) Dichi twatela kulomba chuma chidi chejima chinakwendela hamu nankeñelu yaNzambi. Komana hikeñelu yindi yakwila nawu tulombeña kutalisha kuyuma yinakutukabisha? Eñañi! Kulomba kudi Yehova chidi neyi kuhosha nebwambu deyi yiwakeña. Tunatweshi kuhosha chakubula woma, ‘nakwichila nyichima yetu’ kudi Nzambi. (Masamu 62:8) Chachiwahi kulomba spiritu yajila muloña yikutukwasha kwila yuma yaloña. (Luka 11:13) Twatela kulomba cheñi wunlomboli hakufuukula kwamaana niñovu hakumika makabi. (Yakoba 1:5) Neyi tunavulumuni twatela kulomba kwanakena kushindamena hefutu danyiloña damulambu waKristu. (Aefwesesa 1:3, 7)  Ilaña dinu, yuma yatukundama etwaweni bayi yikalaña yuma yakulomba kwetu hohuku. Hitwatela kulomba hayuma yetu hohuku, ilaña twatela kulombelañaku niantu acheñi—amuchisaka chetu hamu niakwetu akwakudifukula.​—Yililu 12:5; Akolose 4:12.

12. Tunateli kusha ñahi yuma yinakundami kudi Tata yetu wamwiwulu mwiluña datachi mukulomba kwetu?

¹² Nsañu yinakundami kudi Yehova Nzambi yatela kwikala yatachi kuhosha mukulomba kwetu. Chalala tukweti muloña wakumuhameka nikumusakilila kufuma hankelelu yanyichima yetu hamuloña wakuwaha kwindi kwejima. (1 Kushindulula 29:10-13) Yesu waheni kulomba kwachitalilu kwasonekawu haMatewu 6:9-13, mwatudizishiliyi kulomba nawu ijina daNzambi dijili (Tañenu.) Nindi Wanta waNzambi winzi nawa mazu anahiñimu nindi, muchima windi awili hamaseki neyi chawilañawu mwiwulu. Yesu wasambilili kutena iyi nsañu yalema yinakundami kudi Yehova kufumahu dinu hakutena hayuma yakumujimba. Munjila yoyimu neyi tukumwinka Nzambi mwiluña datachi mukulomba kwetu, dikwila nawu tunakumwekesha netu hitwasha maana kunshakaminu yetu hohuku.

13. Indi Nsona yamwekesha ñahi kutalisha hakuleha kwakulomba kwetejewa?

¹³ Kulomba kwetu kwatela kulehi ñahi? Bayibolu hiyashimuna chatela kuleha kulomba kwahalweyi hela kwahadantu amavuluku. Kwatela kwikala hakachi kakulomba kwakwihi kutwalombaña henohu kanda tudyi yakudya nakulomba kwakukulehi kwahalwetu kutwechilaña nyichima yetu kudi Yehova. (1 Samweli 1:12, 15) Hela chochu, Yesu watanyishili antu adihamekeleña awenawu nawu aloña, alombeleña kulomba kwakulehi kwakudimwekesha kumesu awakwawu. (Luka 20:46, 47) Kulomba kwamuchidiwu hikwamuzañaleshaña Yehovaku. Chuma chalema chidi chakwila nawu tulombeña yuma yinakufuma munyichima yetu. Dichi, kuleha kwakulomba kwetejewa kunateli kushiyañana kwesekeja nayuma yinakukeñeka niyuma chiyidi.

14. Indi Bayibolu yatalisha mudi neyi hiyikutukolesha ‘kulomba nakutwalekahu,’ nawa ichi chinekali ñahi chakukolesha?

 ¹⁴ Twatela kulomba mapampa kañahi? Bayibolu yatukoleshaña ‘kulomba nakutwalekahu,’ nawa ‘nakukakela kukulomba chakadi kuzeya,’ cheñi nawu, “Bayi muleka kulombaku.” (Matewu 26:41; Aroma 12:12; 1 Atesalonika 5:17) Dimu tuhu, ilaña awa mazu hiyanatwali mukwila nawu tulombeña kudi Yehova kapinji kejima kamunodu ifukuku. Ilaña, Bayibolu yinakutukolesha nawu tulombeña mpinji yejima, nakutwalekahu kumuhameka Yehova hakuwaha kwindi kwamwekeshañayi kudetu nikukeña wunlomboli windi, kukudenja, niñovu. Komana hichinakutukolesha hakwiluka nawu Yehova hasha chipimu hanochatela kuleha hela mapampa kañahi kutwatela kuhosha nindi mukulombaku? Neyi chalala twasakililaña hakukoleka kwakulomba, twakekala nampinji yayivulu yakulomba kudi Tata yetu wamwiwulu.

15. Muloñadi chitwatelela kuhosha netu “Amena” hakukumisha kulomba kwahalwetu nihakulomba kwahadi antu amavulu?

¹⁵ Muloñadi chitwahoshelaña netu “Amena” hakukumisha kulomba? Izu dakwila nawu “amena” dalumbuluka nawu “chalala,” hela nawu “chikali chochenochu.” Yakutalilahu yamunsona yamwekeshaña nawu chashikilamu kuhosha nawu “Amena” hakukumisha kulomba kwahalwetu hela kwakwimena antu amavulu. (1 Kushindulula 16:36; Masamu 41:13) Kuhitila mukuhosha nawu “Amena” hakukumisha kulomba kwetu, tukumwekesha netu mazu etu twayihosha nakashinshi. Neyi tuhosha netu “Amena”—nañovu hela wumweneni—hakukumisha kulomba kwamuntu wunemeniku antu amavulu, tunamwekeshi netu tuneteji mazu analombiyi.​—1 Akorinda 14:16.

16. Kukuhwelelanyi kutunateli kwikala naku kutalisha kukulomba?

¹⁶ Komana chalala Yehova wakulaña kulomba? Eña, wakulaña! Tukweti chikuma chakola hakukuhwelela netu ‘Mukwakutiya mwalombañawu antu’ wakulaña kulomba kwalala kwalombaña yihita yawantu. (Masamu 65:2) Yehova nateli kwakula kulomba kwetu mujinjila jashiyashana.

17. Muloñadi chitwatela kuhoshela netu Nzambi wazatishaña añelu jindi niambuñindi ahamaseki hakwakula kulomba kwetu?

 ¹⁷ Yehova wazatishaña añelu jindi niambuñindi ahamaseki hakwakula kulomba. (Aheberu 1:13, 14) Kudi yakuhumañana yayivulu yawantu adiña nakulomba kudi Nzambi kulonda ayikwashi kutiyishisha Bayibolu nawa chakubula kuhita mpinji ayiwanini kudi ambuña aYehova. Yakuhumañana yamuchidiwu yamwekeshaña wunsahu wakulombolewa nawañelu mumudimu waWanta wakushimwina. (Chimwekeshu 14:6) Hakwakula kulomba kwetu kutwalombaña hampinji yitunakankili chikupu, Yehova watela kwilisha  mwiniKristu kwinza nakutukwasha.​—Yishimu 12:25; Yakoba 2:16.

18. Indi Yehova wazatishaña ñahi spiritu yindi yajila hamu Nezu dindi hakwakula kulomba kwawambuñindi?

¹⁸ Yehova Nzambi wazatishaña cheñi spiritu yindi yajila hamu Nezu dindi Bayibolu hakwakula kulomba kwawambuñindi. Nateli kwakula kulomba kwetu kwawukwashu kulonda tumiki kweseka kuhitila mukutwinka wunlomboli niñovu yaspiritu yajila. (2 Akorinda 4:7) Kakavulu ñakwilu yakulomba kwetu kutalisha hawulomboli yafumaña muBayibolu, mwatukwashilañayi Yehova hakufuukula kwamaana. Nsona yatela kutukwasha yinateli kuwanewa hampinji yitunakudiza Bayibolu halwetu nihakutaña nyikanda yawiniKristu yidi neyi wunu mukanda. Yikuma yamunsona yitunakukeña kutoñojokahu yatela kuletewa kudetu kuhitila muyuma yinakuhoshewa hakupompa kwawiniKristu hela mazu akuhoshayi eluda watwisha maana muchipompelu.—Aŋalija 6:1.

19. Chumanyi chitunateli kwanuka neyi kulomba kwetu kunamwekani neyi hiyanakwakuliku?

¹⁹ Neyi Yehova wukumwekana neyi nalabi kwakula kulomba kwetu, hichinayi mukwila nawu nakañanyi kwakulaku. Ilaña, twatela kwanuka netu Yehova wakulaña kulomba kwendelaña hamu nankeñelu yindi nawa hampinji yashikila. Weluka yuma yitwakeñaña nichakutwikwasha kubadika ninetu aweni. Kakavulu watwitejaña kulonda ‘tutwalekihu nakulomba, kukeñakeña,  nikudondomwena.’ (Luka 11:5-10) Nyikoyu yamuchidiwu yamwekeshaña kudi Nzambi nawu mpwila yetu yalala chikupu nawa nichikuhwelelu chetu chalala. Kubombelahu, Yehova nateli kwakula kulomba kwetu munjila yitunabuli kukuhwelela. Chakutalilahu, nateli kwakula kulomba kwetu kutalisha hakweseka kumu, bayi neyi wukufumisha kuna kukalaku, ilaña wukutwinka ñovu yakumika nachu.​—Afwilipi 4:13.

20. Muloñadi chitunateleli kusakilila hansañu yakukoleka kwalema kwakulomba?

²⁰ Ochitwatela kusakilila netu Nleñi wakanu kaayi nimawulu wudi kwakwihi nawantu ejima akumutambika munjila yayiwahi mukulomba! (Tañenu Masamu 145:18.) Twatela kulombaña kudi Yehova mpinji yejima muloña hikalemesha keneni kudetu neyi tukulombaña kudi yena. Neyi tukwila mwenimu, twakekala namuzañalu wachikuhwelelu chakukundama mpinji yonsu kwakwihi naYehova, Mukwakutiya mwalombañawu antu.