1, 2. Hanaku yakutalilahu yawantu amweniwu kudi Yehova neyi amabwambu jindi chikupu.

MUNTU wamuchidinyi yiwukutonda kwikala ibwambu deyi? Chakubula nikujinoka wukukeña muntu wudi nammwenu neyi yeyi, wakeña yuma yiwakeña nawa walemesha yuma yiwalemeshaña. Nawa wukukundama kudi muntu wudi nayililu yayiwahi yidi neyi kashinshi niluwi.

² Munsañu yejima yanyaka, Nzambi watondeli antu amu kwikala amabwambu jindi akeñayi. Chakutalilahu, Yehova wamuteneni Abarahama nindi ibwambu dindi. (Tañenu Isaya 41:8; Yakoba 2:23.) Nzambi wamuteneni Davidi nindi “iyala damwaya muchima wami” muloña wadiña muntu wakeña Yehova. (Yililu 13:22) Nawa Yehova wamumweneña kaprofwetu Danyeli neyi ‘himuntu wasweja kukeñewa.’​—Danyeli 9:23.

3. Muloñadi Yehova chatondeleliyi antu amu kwikala amabwambu jindi?

³ Muloñadi Yehova chamweniyi Abarahama, Davidi niDanyeli kwikala amabwambu jindi? Wamulejeli Abarahama nindi: “Wunovwahili mwizu dami.” (Kutachika 22:18) Dikwila nawu Yehova wakundamaña kwakwihi nawantu ovwahilaña nakwila yuma yejima yikuyilejayi. Wayilejeli aIsarela nindi: “Tiyililenu mwizudami niikali Nzambi yenu ninenu mwikali antu ami.”  (Yeremiya 7:23) Neyi wukumwovwahila Yehova, nineyi wukwikala ibwambu dindi!

4, 5. Indi Yehova wamwekeshaña ñahi ñovu jindi hakukwasha antu jindi?

⁴ Toñojokaku hankisu yakwikala ibwambu daNzambi. Bayibolu yahoshaña nawu Yehova watalaña mpinji yatelela ‘kulonda akwashuku nañovu jindi ana adi nanyichima yalala chikupu, kudi yena.’ (2 Kushindulula 16:9) Yehova nateli kumwekesha ñahi ñovu jindi kudeyi? Njila yimu anayishimuni haMasamu 32:8, hitwatañaña nawu: “Nukukuleja [Yehova] maana, nukukuleja ninjila yeyi yiwukwenda; nukukulombola nadisu dami.”

⁵ Iyi nhoshelu yaYehova yakwakamena yaletaña ikoku! Wukukwinka nshimbi yatelela nawa wukukuhembaña hampinji yiwunakuyizatisha. Nzambi nakukeña nindi yakukwashiku kulonda wumiki kutesha kweyi. (Tañenu Masamu 55:22.) Dichi neyi wukumukalakela Yehova namuchima wumu, wunateli kwikala nachikuhwelelu neyi chañimbi wamasamu welili nindi: “Namushi Yehova kumesu ami mafuku ejima. Chadiyi yena kuchikasa chami chachidiilu hijikunkumaku.” (Masamu 16:8; 63:8) Eña, Yehova nateli kukukwashaku kulonda wushakami nshakaminu yamuzañaleshaña. Neyi chiwuneluki, kudi chilumbu chaNzambi wunakukeña nindi yakulekeshi kwila mwenimu.

6. Kutwambanyi kwahosheli Satana kutalisha kudi antu?

⁶ Mukapetulu 11 kawunu mukanda kalumbulwili ochu Satana Diyabolu chalwishiliyi wanta waNzambi. Satana wamutwikili Nzambi muloña wakutwamba nindi Yehova hadiña chiwahiku hakubula kuyiteja Adama niEvu kufuukula awenawu hayuma yayiwahi niyatama. Hanyima yakwila Adama niEvu aneli dehi nshidi nawa chelili iseki dinatachiki dehi kwinzala nawanyanawu, Satana wajinokeli yitoñojoka yawantu ejima. Satana watwambili nindi, “Antu hiyamukalakelaña Nzambi hamuloña wakumukeñaku. Nyinki  mpinji, nawa natweshi kufumisha antu ejima kudi Nzambi.” ’ Nsañu yamuntu wejina daYoba yamwekeshaña nawu ichi dichakuhweleliyi Satana. Indi Yoba wadiñanyi, nawa munjilanyi mwekaliliyi mukukala kwaSatana?

7, 8. (a) Chumanyi cheletesheli Yoba kwambukaku hakachi kawantu amuyina mpinji? (b) Indi Satana wajinokeli ñahi yitoñojoka yaYoba?

⁷ Yoba wadiñaku yaaka 3,600 yakunyima. Wadiña muntu wamuwahi, muloña Yehova welili nindi: “Hikudi wakweseka[na] nindi hamasekuku, iyala walala woloka, muntu waakama Nzambi, waambuka kuyuma yatama.” (Yoba 1:8) Yoba wamutiyishileña Nzambi kuwaha.

⁸ Satana wajinokeli yitoñojoka yaYoba yakumukalakela Nzambi. Diyabolu wamwilili Yehova nindi: “Hiwunamukolekeli [Yoba] niyena, niitala dindi, niyuma yindi yejima ikoli kwi-ndo mbadi jejimaku? Ninyidimu yakumakasindi wunayikiswili nkisu, niyimuna yindi yasemunwina dehi mwituña. Ololaku ntahi chikasa cheyi katataka wukwati hayuma yindi yejima, wutali neyi wukubula kukuhosha chatama kumesu eyi.”​—Yoba 1:10, 11.

9. Indi Yehova welili ñahi nakuna kulwisha kwaSatana, nawa muloñadi?

⁹ Dichi Satana wataadikili nindi Yoba wamukalakelaña Nzambi muloña wayuma yamwinkayi. Diyabolu watwambili cheñi nindi neyi Yoba amweseka, wukudikaña naNzambi. Indi Yehova welili ñahi nakuna kulwisha kwaSatana? Chelili nsañu yabombelelimu yitoñojoka yaYoba, Yehova wetejeli kulonda amweseki Yoba. Muniyi njila, kukeña kwaYoba kwamukeñeliyi Nzambi​—hela kubula kumukeña—​kwadi kumwekana hatooka to-o.

10. Kwesekanyi kwamuhokeleli Yoba, nawa wazatili naku ñahi?

¹⁰ Hohenohu Satana watachikili kumweseka Yoba mujinjila jashiyashana. Ayimuna aYoba amakwawu ayiyili, amakwawu ayijahili. Añamba jindi amavulu ayijahili. Chumichi chaleteli kukala kwamali. Kukala kukwawu kwamuwanini Yoba hampinji yafwiliwu anyanindi ikumi nampepela yasweja. Hela chakwila wadiña naniku kukala, “Yoba havulumwinuku, hamusupishili Nzambiku.”​—Yoba 1:22.

11. (a) Muloñanyi wamuchiyedi wahosheliyi Satana kutalisha hadi Yoba, nawa Yehova wakwili nindidi? (b) Indi Yoba welilihu ñahi kutalisha kumusoñu wakata?

 ¹¹ Satana hazeyeliku. Watela watoñojokeli nindi hela chakwila Yoba natweshi kuumika hanyima yakujimbesha maheta indi, añamba nianyanindi, watela kudikaña naNzambi neyi chakwila yakata. Yehova wamwitejeli Satana kumukabisha Yoba namusoñu watama nawa wawunyeñu. Ilaña chumichi hichaletesheli Yoba kujimbesha chikuhwelelu mudi Nzambiku. Ilaña wahosheli chikupu nindi: “Hinamba kafumisha kashinshi kamuku, nichinamba kafwa.”​—Yoba 27:5.

12. Indi yililu yaYoba yamwekesheli ñahi nawu kulwisha kwaDiyabolu kwakutwamba?

¹² Yoba helukili nindi Satana diyi wakojejeli makabi indiku. Hakubula kwiluka yishina yaDiyabolu yakulwisha wanta waYehova, Yoba wachinini nindi Nzambi diyi wunakojeji makabi indi. (Yoba 6:4; 16:11-14) Hela chochu watwalekelihu kwikala nakashinshi kudi Yehova. Kuhosha kwaSatana kwakwila nawu Yoba wamukalakelaña Nzambi muloña wamaheta akwimwekesheli nawu kwakutwamba muloña Yoba watwalekelihu kwikala washinshika!

13. Chumanyi chamwekeni hamuloña wakwila Yoba wadiña nachikuhwelelu kudi Nzambi?

¹³ Chikuhwelelu chaYoba chaletesheli Yehova kuhana kwakula kwashikilamu kwakulwisha kwaSatana kwakasawuntu. Chalala Yoba wadiña ibwambu daYehova, nawa Yehova wamukiswilili hamuloña wachikuhwelelu chindi.​—Yoba 42:12-17.

14, 15. Muloñadi wutukuhoshela netu kulwisha kwaSatana kunabombelimu Yoba kunakundami niantu ejima?

¹⁴ Nsañu yakwikala nakashinshi kudi Nzambi yajinokeliwu kudi Satana hiyadiña hadi Yoba nkawindiku. Nineyi nawa wunadibombimu. Ichi anachimwekeshi hatooka to-o haYishimu 27:11, ohu hahoshaña Mazu aYehova nawu: “Eyi mwanami, ikalaku mukwamaana, wutiyishaña muchima wami kuwaha, kulonda nakatweshi kwakula muntu wukunsawula.” Awa mazu asonekeliwu yaaka yayivulu hanyima yakufwa kwaYoba, amwekeshaña nawu Satana wuchidi kumusawula Nzambi nawa nakuyinka antu Jindi nyiloña. Neyi tushakama nshakaminu yamuzañaleshaña Yehova, dikwila  nawu tunakukwashaku kwakula muloña waSatana wakutwamba, muniyi njila tunakutiyisha muchima waNzambi kuwaha. Chumichi chinakutiyishi ñahi? Komana hichikuwahaku kwikalamu nambadi hakwakula mazu aSatana akutwamba hela chakwila chikulumbuluka kufutumuka chikupu muchihandilu cheyiku?

¹⁵ Ilukaku neyi Satana wahosheli nindi: ‘Muntu wukuhana yuma yikwetiyi yejima nawumi windi.’ (Yoba 2:4) Hakuhosha nindi “muntu,” Satana walumbulwili hatooka to-o nindi muloña windi hiwunakundami kudi Yoba hohuku, ilaña wunakundami nikudi antu ejima. Ichi hichikuma chalema nankashi. Satana wajinoka dehi kashinshi keyi kakudi Nzambi. Diyabolu nakukeña nindi wudikañi naNzambi nakuleka njila yayiwahi neyi kukala kunakumwekeni. Indi Satana watela kutwesha ñahi chumichi?

16. (a) Jinjilanyi jesekañayi nachu Satana hakufumisha antu kudi Nzambi? (b) Indi Diyabolu nateli kuzatisha ñahi njila jeniji kudeyi?

¹⁶ Neyi chitwahanjekilihu muKapetulu 10, Satana wazatishaña jinjila jajivulu hakufumisha antu kudi Nzambi. Munjila yikwawu, walukukaña “nakukeñakeña akudyayi, neyi mutupa wabulumaña.” (1 Petulu 5:8) Komana kuluwañesha kwaSatana kwatela kumwekana neyi amabwambu jeyi, antaña, hela antu acheñi akudimbulula ñovu yeyi yakudiza Bayibolu nakuzatisha yuma yiwunakudiza. * (Yowanu 15:19, 20) Munjila yikwawu, Satana “wadifwikijaña neyi kañelu kachejeji.” (2 Akorinda 11:14) Diyabolu nateli kuzatisha kukala kukudimba nachu nakukufumisha kuyililu yamuzañaleshaña Nzambi. Natweshi cheñi kuzatisha kuzeya, hekwawu wukuletesheyi kutoñojoka nawu hiwukutwesha kuwanisha yipimu yinakukeñeka hakumuzañalesha Nzambiku. (Yishimu 24:10) Hela chakwila Satana nakuzata neyi ‘mutupa wunakubuluma’ hela neyi “kañelu kachejeji,” kulwisha kwindi kwokumu: Wahoshaña  nindi neyi wukwikala mukweseka wukuleka kumukalakela Nzambi. Wukutwesha kwakula ñahi kulwisha kwindi nakumwekesha kashinshi keyi kudi Nzambi, neyi chelili Yoba?

17. Muloñanyi waweni wutwatela kwovwahila nshimbi jaYehova?

¹⁷ Wunateli kwakula kulwisha kwaSatana kuhitila mukushakama nshakaminu yamuzañaleshaña Nzambi. Chumichi chinabombelimu mwodi? Bayibolu yakulaña nawu: “Wakakeñi Yehova Nzambi yeyi namuchima weyi wejima, nawumi weyi wejima, nañovu jeyi jejima.” (Kuhituluka 6:5) Kukeña kweyi kwakudi Nzambi chikwatwalekahu, wukwikala nampwila yakwila chuma chakeñañayi kudeyi. Kapostolu Yowanu wasonekeli nindi, “Kumukeña Nzambi yowu kwila mwatulejañayi.” Neyi wumukeña Yehova namuchima weyi wejima, wukumona neyi “mwatulejañayi himwakalaku.”​—1 Yowanu 5:3.

18, 19. (a) Yehova wukweti nshimbinyi jikwawu? (Talenu chikasha chinakwila nawu “ Tondolwelaku Yuma Yahelayi Yehova.”) (b) Tuneluki ñahi netu Yehova hakeñaña yuma yayivulu kudetuku?

¹⁸ Nshimbi jaYehova hichumanyi? Nshimbi jikwawu jabombelamu yililu yitwatela kutondolwela. Chakutalilahu, talenu chikasha chidi hefu 122, hadi mutu wunakwila nawu “ Tondolwelaku Yuma Yahelayi Yehova.” Henahana wukuwana yililu yinatanjikiwu yakanishawu chikupu muBayibolu. Chiwatalahu katachi, wukumona neyi yililu yikwawu yinatanjikiwu yatama wanyi. Ilaña hanyima yakutoñojoka chikupu hansona yinatanjikiwu, chakubula kujinoka wukumona maana adi munshimbi jaYehova. Kuhimpa yililu yeyi kunateli kwikala chuma chakala nankashi chiwabulahu dehi kwila. Hela chochu, kushakama nshakaminu yamuzañaleshaña Nzambi yaletaña muzañalu weneni hama. (Isaya 48:17, 18) Nawa hichuma chiwatela kwila. Tuneluki ñahi ichi?

¹⁹ Yehova hakeñaña yuma yayivulu kubadika hayuma  yitunateli kutweshaku. (Tañenu Kuhituluka 30:11-14.) Weluka wuswa wetu nimutwakumina kubadika nichitwadiluka etu aweni. (Masamu 103:14) Kubombelahu, Yehova natweshi kutwinka ñovu yakumwovwahila. Kapostolu Pawulu wasonekeli nindi: “Nzambi washinshika, hakwiteja kuyeseka chabadika muñovu jenuku; chakuyesekawu wukubuzilaku njila yakupulukila, kulonda mutweshi kukakela.” (1 Akorinda 10:13) Hakwila nawu yakukwashiku kuumika, Yehova watela kukwinka “ñovu jabadika nankashi.” (2 Akorinda 4:7) Hanyima yakumika kweseka kwakuvulu, Pawulu welili nindi: “Natweshi kwila yuma yejima mudi Kristu wankoleshaña.”​—Afwilipi 4:13.

20. Yililwinyi yawuNzambi yiwatela kumwekesha, nawa muloñadi chiyalemena?

²⁰ Mwamweni, yuma yayivulu yinakukeñeka hakumuzañalesha Yehova kubadika kuleka hohu yuma yahelayi. Cheñi watela kukeña yuma yakeñayi. (Aroma 12:9) Komana hiwakeñaña kutonda amabwambu jeyi akeña yuma yiwakeña, akweti mmwenu neyi yeyi nawa alemeshaña yuma yiwalemeshaku? Dichuma chakeñayi Yehova. Dichi keñaku yuma yakeñayi Yehova. Yuma yikwawu ayilumbulula haMasamu 15 hitwatañaña hadi antu owu amonañayi Yehova kwikala amabwambu jindi.  (Tañenu Masamu 15:1-5.) Amabwambu jaYehova amwekeshaña yuma yatenañawu muBayibolu nawu “nyikabu yaSpiritu.” Nyikabu yeniyi yabombelamu yililu yidi neyi “kukeña, muzañalu, kuwunda, kukaba kabe-e, luwi, kuwaha, kushinshika, kwovwaha, kudihemba.”​—Aŋalija 5:22, 23.

21. Chumanyi chikukwashaku kwikala nayililu yakeñayi Nzambi?

²¹ Kutaña nakudiza Bayibolu mpinji yejima chikukwasha kwikala nayililu yakeñayi Yehova. Nawa kudiza yuma yakeñayi Nzambi chikukwasha kwesekeja yitoñojoka yeyi nayitoñojoka yaNzambi. (Isaya 30:20, 21) Chiwakolesha kukeña kweyi kwakudi Yehova, mpwila yeyi yakukeña kushakama nshakaminu yamuzañaleshaña Nzambi yikutohelaku.

22. Chumanyi chikumwekana neyi wushakama nshakaminu yamuzañaleshaña Nzambi?

²² Twatela kuzata nañovu hakwila nawu tushakami nshakaminu yamuzañaleshaña Yehova. Bayibolu yesekejaña kuhimpa nshakaminu yeyi nakuvuula wuntu wawukulu nakuvwala wuntu wawuha. (Akolose 3:9, 10) Kutalisha kunshimbi jaYehova, ñimbi wamasamu wasonekeli nindi: “Hakuhembamu hadi wuloku weneni.” (Masamu 19:11) Nineyi nawa wukuwana neyi kushakama nshakaminu yamuzañaleshaña Nzambi yaheteshaña hama. Kwila mwenimu, wukuhana ñakwilu kukulwisha kwaSatana nakuzañalesha muchima waYehova!