MUMADIMI akusambila, Bayibolu yazatisha izu dachiHeberu dakwila nawu sheʼohlʹ nidachiGriki desekana nawu haiʹdes kubadika hamapampa 70. Mazu ejima ayedi akundama kukufwa. MaBayibolu amakwawu azatisha awa mazu nawu “ijamu,” “helu,” hela “ibuku.” Hela chochu, munyichidi yayivulu himwekala mazu atela kwesekena chikupu nanawa mazu achiHeberu hela achiGrikiku. Hanu dinu awa mazu atalisha mudihi? Tusambilenu kutala ochayizatishawu muyibaba yamaBayibolu ashiyashana.

Mukwakutaŋisha 9:10 wahoshaña nawu: “Mwijamu [muShelu] muwukuya mwosi mudimu mwosi kufuukula, mwosi kwiluka, mwosi maana.” Ichi komana chinayi mukwila nawu Shelu yatalisha chikupu kwijamu dimu, hela kumajamu kuna kutwajikaña ayetu yitwakeña? Inehi. Neyi Bayibolu hiyikushimuna chikupu kutalisha kwiluña dakujikila, hela ijamu, yazatishaña mazu amakwawu achiHeberu niachiGriki, bayi neyi sheʼohlʹ hela haiʹdes wanyi. (Kutachika 23:7-9) Cheñi nawa, Bayibolu hiyazatishaña izu dakwila nawu “Shelu” kutalisha kwijamu kuna kwajikañawu antu amavulu hamu, chidi neyi majamu ayisaka hela ijamu dawantu amavuluku.​—Kutachika 49:30, 31.

Iluña damuchidinyi dinu kwatela kutalisha izu dakwila nawu “Shelu”? Izu daNzambi damwekeshaña nawu mazu akwila nawu “Shelu,” hela “Hadesi,” atalisha kuchuma chasweja kubadika ijamu dawantu amavulu. Chakutalilahu, haIsaya 5:14 hashimunaña nawu Shelu ‘yatoheshaña mupwepu windi, hakwasama nimukanwa kindi chakadi kwesekeja.’ Tukuhosha netu, hela chakwila Shelu naminyi afu amavulu ñahi, yena mpinji yejima wamwekanaña kwikala nanzala yayeni yakukeñelahu amakwawu. (Yishimu 30:15, 16) Kwambukaku namaluña adi ejima okwajikañawu afu antesha hohu, ‘Shelu hekutañaku.’ (Yishimu 27:20) Shelu henzalañaku. Hakweti nihakukuminaku. Shelu, hela Hadesi, himaluña amwekanaña ekala kwiluña dimuku. Ilaña, hikumajamu kwayañawu antu ejima, kwiluña dachifwikija kwakamañawu antu amavulu mutulu twakufwa.

 Ntañishilu yaBayibolu hansañu yakusañuka yatukwashañaku kutiyishisha chalumbuluka “Shelu” ‘niHadesi.’ Izu daNzambi dakwantankeshaña Shelu niHadesi nakuna kufwa kwakekala nakusañuka. * (Yoba 14:13; Yililu 2:31; Chimwekeshu 20:13) Izu daNzambi damwekeshaña cheñi nawu antu adi muShelu hela Hadesi anabombelimu antu amuzatilileña Yehova hohuku, ilaña niantu abulileña kumuzatila. (Kutachika 37:35; Masamu 55:15) Hela chochu, Bayibolu yatañishaña nawu kwamba kekala “kusañuka kwawaloña nikwawabula kuloña.”​—Yililu 24:15.