ANTU akuhwelela muntañishilu yawaAnzambi asatu ahoshaña nawu Nzambi wekala mudi antu asatu​—Tata, niMwana, niSpiritu Yajila. Awa antu ejima asatu elukewa nawu wonsu wawu esekana hamu, muñovu yejima, nawa hiyakweti ntachikiluku. Kwesekeja nantañishilu yawaAnzambi asatu, Tata hiNzambi, Mwana  hiNzambi, Spiritu Yajila niyena hiNzambi, henohu kwekala Nzambi wumu hohu.

Antu amavulu akuhwelela mudi Anzambi asatu etejaña nawu hiyakutwesha kulumbulula iyi ntañishiluku. Hela chochu, atela atoñojokaña nawu ayitañishaña muBayibolu. Chidi chalema nankashi kwiluka nawu izu dakwila nawu “Anzambi asatu” hidekala muBayiboluku. Komana yitoñojoka yakwila nawu Anzambi asatu yawanikaña muBayibolu? Hakwila nawu twakuli ilu lwihu, tusambilenu kutala hansona yatemukilañawu antu kakavulu hakutiyakesha Anzambi asatu.

HaYowanu 1:1 hahoshaña nawu: “Hatachi hadiñi Izu, Izu dadiñi naNzambi. Izu dadiñi Nzambi.” (King James Version) Nkumininaku mukapetulu kokamu, kapostolu Yowanu walumbulwili nindi “Izu” diyi Yesu. (Yowanu 1:14) Chineli Izu anaditeni nawu Nzambi, antu amakwawu akunkululaña nawu Mwana niTata yawantu atela kwikala nambadi yaNzambi yowumu.

Anukenu nenu ichi chikunku chaBayibolu asambilili kuchisoneka muchiGriki. Nkumininaku, akwakubalumuna asonekeli mukanda wachiGriki munyichidi yikwawu. Hela chochu, akwakubalumuna Bayibolu amavulu hiyazatishili mukuku wakwila nawu ‘Izu dadiñi Nzambiku.’ Muloñadi? Kushindamena hakwiluka kwawu kwachiGriki chamuBayibolu, ana akwakubalumuna akunkulwili nawu mukuku wakwila nawu “Izu dadiñi Nzambi” atela kudibalumwina mwacheñi. Munjilanyi? Ahanu hadi yakutalilahu yantesha: “Logos [Izu] dadiñi nzambi.” (A New Translation of the Bible) Izu dadiñi kanzambi.” (The New Testament in an Improved Version) “Izu dadiñi naNzambi nawa dadiñi desekana hamu muyililu yakuvwalika.” (The Translator’s New Testament) Kwesekeja naniku kubalumuna kwaBayibolu, Izu hidiyi Nzambi yomweniku. * Ilaña hamuloña wakusweja kwikala nachifulu chabadika hakachi kayileñaleña yaYehova, Izu dinashimuniwu dinatalishi kudi “kanzambi.” Ahanu izu dakwila nawu “nzambi” daya mukwila nawu “mukwa ñovu.”

Antu amavulu hiyeluka chiGriki chamuBayiboluku. Hanu watela kwiluka ñahi mwatalishiliyi kapostolu Yowanu? Toñojokenu hanichi chitalilu:  Ntañishi hashikola hakulumbulula mpanji kudi atudizi twindi. Nkumininaku, atudizi hiyakwikala nayitoñojoka yashiyashana hakutiyishisha kuna kulumbulula. Indi atudizi atela kumanisha ñahi ntadi? Atela kumwihula ntañishi kulonda yoyilejelihu nsañu yikwawu. Chakadi nikujinoka, kwilukilahu yikuma yikwawu yikuyikwasha kutiyisha mpanji chiwahi. Chochimu, hakutiyisha kulumbulula kwaYowanu 1:1, watela kutala muNsañu yayiwahi yaYowanu kulonda wuwanimu nsañu yikwawu yahosha hachifulu chaYesu. Kwiluka yikuma yikwawu yaniyi mpanji kukukwashaku kuwana ñakwilu yayiwahi.

Chakutalilahu, talaku chinatwalekihu Yowanu kusoneka mukapetulu 1, vasi 18: “Hikwekala muntu wamonahu dehi [Watwesha yejima] Nzambuku.” Hela chochu, antu amumona dehi Yesu, Mwana, muloña Yowanu wahosheli nindi: “Izu [Yesu] dabalumukili kwikala muntu; washakamini mukachi ketu, hitukubanjila lubanji lwakulema kwindi.” (Yowanu 1:14, KJ) Indi dinu, Mwana natweshi kwikala ñahi nambadi yaNzambi Watwesha yejima? Yowanu wahosheli cheñi nindi Izu dadiñi ‘naNzambi.’ Indi muntu natweshi kwikala ñahi hamu namuntu mukwawu nawa hampinji yoyimu yekali yowenowu muntu? Kubombelahu, neyi chasonekawu haYowanu 17:3, Yesu wamwekesha hatoka to-o chambu chidi hadi yena naTata yindi wamwiwulu. Wamutena Tata yindi nindi “Nzambi walala wumu hohu.” Kwakwihi nakumashisha Nsañu yindi yayiwahi, Yowanu hakunkulula nakuhosha nindi “Yeniyi anayisoneki kulonda mwitiyi nenu Yesu diyi Kristu, Mwana kaNzambi.” (Yowanu 20:31) Ilukenu nenu Yesu anamuteni nawu Mwana kaNzambi, bayi neyi Nzambiku. Iyi nsañu yikwawu yinashimuniwu muNsañu yayiwahi yaYowanu yamwekeshaña chatelela kutiyisha Yowanu 1:1. Yesu, Izu, “hinzambi” munjila yakwila wukweti chifulu cheneni ilaña hesekana hamu naNzambi Watwesha yejimaku.

Toñojokaku cheñi hachitalilu chantañishi hashikola niatudizi. Toñojokaku neyi atudizi amakwawu achidi nakujinoka hela tuhu hanyima yakutiyilila kukulumbulula kukwawu kwantañishi. Chumanyi chatela kwilawu? Atela kuya kudi ntañishi mukwawu kulonda yayilumbulwili hampanji yoyimu. Neyi chakwila ntañishi wamuchiyedi wukulumbulula neyi chochalumbululayi ona ntañishi watachi, nikujinoka kwawatudizi amavulu kukumana. Chochimu, neyi hiwuneluki chikupu chuma chadiña nakuhoshayi nsoneki yaBayibolu Yowanu kutalisha hakukwantankana kudi  hakachi kaYesu niNzambi Watwesha yejimaku, watela kuya kudi nsoneki mukwawu waBayibolu kulonda wutiyilihu nsañu yikwawu. Chakutalilahu, toñojokaku hansañu yasonekeliwu kudi Matewu. Kutalisha kukukuma kwanshakaminu yamakonu, Matewu wasonekeli mazu aYesu nindi: ‘Ilaña itañwodu hela mpinji oyu hosi wayilukaku, hela añelu amwiwulu, hela Mwana chiña Tata hohu.’ (Matewu 24:36) Indi awa mazu anakumwekesha ñahi nawu Yesu hidiyi Nzambi Watwesha yejimaku?

Yesu wahosheli nindi Tata weluka jajivulu kubadika jelukayi Mwana. Neyi Yesu wadiña nambadi yaNzambi Watwesha yejima, mutenowu wadi kwiluka yikuma yoyimu neyi yoyelukayi Tata yindi. Komana Mwana niTata hiyanatweshi kwesekanaku. Ilaña antu amakwawu atela kuhosha nawu: ‘Yesu wadiña muyedi. Aha nakuhosha neyi muntu.’ Hela neyi chadiña mwenimu, indi spiritu yajila hichumanyi? Neyi yidi nambadi yoyimu yaNzambi hamu neyi Tata, muloñadi Yesu chabuliliyi kuhosha nindi spiritu yeluka yuma yelukayi Tata?

Chiwukutwalekahu nakudiza kweyi kwaBayibolu, wamba keluka yibaba yayivulu yamuBayibolu yahoshaña haniyi mpanji. Yamwekeshaña walala hansañu yaTata, niMwana, nispiritu yajila.​—Masamu 90:2; Yililu 7:55; Akolose 1:15.