1. Kulombanyi kwaya mpuhu kutukudizahu?

YIHITA yawantu mwahita iseki dejima eluka kulomba kwatenañawu antu amavulu nawu Tata Yetu, hela Kulomba kwaMwanta. Mazu ejima ayedi ahoshaña kutalisha kukulomba kwaya mpuhu kwalombeliyi Yesu Kristu yomwenindi neyi chitalilu. Muniku kulomba mudi mazu amu alema nankashi, nawa kushinshika hakulembelela kusatu kukukwasha kudiza yuma yayivulu hayuma yayeni yatañishaña Bayibolu.

2. Yumanyi yisatu oyu Yesu yatañishiliyi atumbanji twindi nindi alombeña?

² Hakutachika kwaniku kulomba kwachitalilu, Yesu wayilejeli akwakumutiyilila nindi: “Tiyenu chimukulombaña; lombenuña nenu, Tata yetu wekala mwiwulu, ijina deyi dijili. Wanta weyi winzi. Muchima weyi awili hamaseki neyi chawilañawu mwiwulu.” (Matewu 6:9-13) Indi iku kulembelela kusatu kwalema ñahi?

3. Chumanyi chitwatela kwiluka kutalisha kuWanta waNzambi?

³ Tunadizi yuma yayivulu hejina daNzambi, Yehova. Nawa munjila yikwawu tunahoshihu nihankeñelu yaNzambi​—yuma yinakoñiyi niyuma yamba kakoñelayi muchidi wamuntu. Indi dinu Yesu watalishili mudi chatulejeliyi kulomba nindi: “Wanta weyi winzi”? Wanta waNzambi  hichumanyi? Indi kwinza kwawanta kukajilika ñahi ijina daNzambi? Indi kwinza kwaWanta kunadifwani ñahi nakwila kukeña kwaNzambi?

4. Wanta waNzambi hichumanyi, nawa hinyi Mwanta waniwu wanta?

⁴ Wanta waNzambi hinfulumendi yaloñeshawu kudi Yehova Nzambi yidi naMwanta watondawu kudi Nzambi. Indi Mwanta waWanta waNzambi hinyi? Yesu Kristu. Yesu hamu neyi Mwanta himuneni kubadika anlomboli ejima awantu nawa amutenaña nawu “Mwanta wawanyanta antuumba, yowu Mukulumpi wawakulumpi.” (1 Timotewu 6:15) Wukweti ñovu yakwila yuma yabadika kuwaha kubadika nyuli wudi wejima wamuntu, kubadika tuhu nianyuli amonañawu antu nawu asweja kuwaha.

5. Wanta waNzambi wayulilaña kudihi, nawa wakayula chumanyi?

⁵ Wanta waNzambi wukayulila kudihi? Indi Yesu wudi kudihi? Wunatweshi kwanuka chiwadizili neyi Yesu amujahilili hamutondu wakukabishilahu, chalondelelihu amusañwili. Chihaleheli chanti, wakandamini mwiwulu. (Yililu 2:33) Dikwila nawu dikudi niWanta waNzambi​—mwiwulu. Dimuloña waweni chawutenenañawu muBayibolu nawu “wanta wamwiwulu.” (2 Timotewu 4:18) Hela chakwila Wanta waNzambi wudi mwiwulu, wukayula hanu hamaseki.​—Tañenu Chimwekeshu 11:15.

6, 7. Chumanyi chinaleteshi Yesu kwikala Mwanta wabadika?

⁶ Chumanyi chinaleteshi Yesu kwikala Mwanta wabadika? Chikuma chimu chidi chakwila nawu, hamba kafwaku. Kumwesekeja Yesu nawanyanta awuntu, Bayibolu yamutenaña nawu “diyi kanka windi wakafwaña, washakamaña muchejeji chakañanya muntu kushikaku.” (1 Timotewu 6:16) Dikwila nawu yuma yejima yayiwahi yelañayi Yesu yikatwalekahu. Nawa wamba kela yuma yamaneni nawa yayiwahi.

⁷ Toñojokaku haniwu wuprofwetu wamuBayibolu wahosha hadi Yesu: ‘Spiritu yaYehova yakashakama hadi yena, spiritu yamaana niyakashinshi, spiritu yakuleja maana niyañovu, spiritu yakwiluka yakutiya Yehova woma;   chuma chakatiyayi kuwaha yowu kumutiya Yehova woma; hakasompesha chakumona kwanamesu hohuku; hakahoshela chakutiya kwanamatu hohuku; wakasompesha atuzweñi mwaloña, adizoza mwituña wakayihoshela mwoloka.’ (Isaya 11:2-4) Awa mazu anakumwekesha nawu Yesu wakekala waloña nawa Mwanta waluwi nawantu hamaseki. Wunakukeña kwikalahu nanyuli wamuchidiwu?

8. Anyi amba kayula hamu naYesu?

⁸ Walala wukwawu hansañu yaWanta waNzambi diwiwu: Yesu hamba kayula nkawindiku. Wamba kayula nawantu amakwawu. Chakutalilahu, kapostolu Pawulu wamulejeli Timotewu nindi: “Neyi tukutwalekahu nakumika, twamba kayula hamu neyi anyanta.” (2 Timotewu 2:12, NW) Eña, Pawulu, Timotewu, niamakwawu ashinshika owu anatondiwu kudi Nzambi amba kayulila hamu naYesu muWanta wamwiwulu. Antu añahi akekala naniku kukoleka?

9. Antu añahi amba kayula naYesu, nawa Nzambi watachikili kuyitonda mpinjinyi?

⁹ Neyi chinamwekeshiwu muKapetulu 7 kawunu mukanda, kapostolu Yowanu amumwekesheleli chimwenu mwamweniyi ‘Mwana kaMukoku [Yesu Kristu] nemani haMpidi yaZiyona [chifulu chindi chawanta wamwiwulu], wudi nankulakaji yamakombakaji namakombakaji makumi awana nawana, akweti ijina dindi niijina daTata yindi akusoneka hamahamawu.’ Indi awa 144,000 hiyanyi? Yowanu yomweni hakutuleja nindi: ‘Diwu alondaña Mwana kaMukoku kwayañayi kwejima. Diwu akuuliliwu mukachi kawantu ekalili nyikabu yaNzambi niyaMwana kaMukoku yatachi.’ (Chimwekeshu 14:1, 4) Eña, hiyatumbanji twaYesu Kristu akuhwelela atondawu kulonda akayuulili hamu nindi mwiwulu. Hanyima yakuyisañwila kuwumi wamwiwulu, ‘akayula neyi anyanta hamaseki’ hamu naYesu. (Chimwekeshu 5:10) Kufuma tuhu kumafuku awapostolu, Nzambi watondaña eniKristu achikuhwelelu kulonda kuwanisha kuvula kwawa 144,000.

10. Muloñadi iku kuloñesha chikunekalili kwakuwahi kwakwila nawu Yesu nia 144,000 akayuli muchidi wamuntu?

 ¹⁰ Kumuloñeshela Yesu nia 144,000 kulonda akayuuli muchidi wamuntu chachiwahi nankashi. Chuma chimu chidi chakwila nawu, Yesu weluka chichidi hakwikala muntu nichekala makabi. Pawulu wahosheli nindi Yesu “watweshaña kutiya wushona chitwazeyazeyañetu, niyena amwesekeli muyuma yejima neyi chatwesekañawu etu, ilaña mudi yena nshidi [mwosi].” (Aheberu 4:15; 5:8) Akwakuyuula nindi niwena anakukabakana nakumika hamu neyi antu. Kubombelahu, alwisha nakubula kumaninina nawa omikaña nanyichidi yejima yayikatu. Chalala, amba katiyishisha kukala kwanakumonawu antu!

11. Muloñadi Yesu chahosheleliyi nindi atumbanji twindi atela kulomba nawu muchima waNzambi awileña mwiwulu?

¹¹ Hampinji yahosheliyi Yesu nindi atumbanji twindi atela kulomba nawu Wanta waNzambi winzi, wahosheli cheñi nindi atela kulomba nawu muchima windi awili “hamaseki neyi chawilañawu mwiwulu.” Nzambi wudi mwiwulu nawa kukeña kwindi akwilaña mwiwulu mpinji yejima kudi añelu achikuhwelelu. Hela chochu, muKapetulu 3 kawunu mukanda, twadizili netu kañelu watama walekeli kwila mwaya kukeña kwaNzambi nakwilisha Adama niEvu kuvulumuna. Tukadiza nsañu jajivulu jatañishaña Bayibolu kutalisha hadi kañelu watama, watenañawu nawu Satana Diyabolu muKapetulu 10. Satana niyileñaleña yakuspiritu yawañelu owu atondeli kumulonda​—ayitenaña nawu andemoni​—ayitejeli kushakama mwiwulu hakapinji kantesha. Bayi neyi ejima mwiwulu adiña nakwila mwaya kukeña kwaNzambiku. Ichi chenjili nakuhimpika mpinji yatachikili kuyula Wanta waNzambi. Mwanta wamuha waswanyishiliwu, Yesu Kristu, walwili njita naSatana.​—Tañenu Chimwekeshu 12:7-9.

12. Yumanyi yiyedi yinalumbululiwu haChimwekeshu 12:10?

¹² Mazu analondelihu awuprofwetu analumbululi chuma  chamwekeni, nawu: “Nitiya niizu datiyakana mwiwulu nindi, Ichi dinu wamwinu niñovu niwanta waNzambi yetu wunenzi dehi, nikuyula kwaKristu windi; muloña mukwakuyinka ana kwetu nyiloña anamunatili dehi heseki, yowu wayinkaña nyiloña kumesu aNzambi yetu nimwana niwufuku.” (Chimwekeshu 12:10) Wunayimoni yuma yiyedi yalema yinalumbululiwu miniyi vasi yamuBayibolu? Chatachi, Wanta waNzambi wunakuyulewa naYesu Kristu wunatachiki kuyula. Chamuchiyedi, Satana anamunatili hamaseki kufuma mwiwulu.

13. Chumanyi chinafumimu chela Satana amunata dehi kufuma mwiwulu?

¹³ Yumanyi yinafumimu muniyi yuma yiyedi? Kutalisha kuyuma yamwekeni mwiwulu, twatañaña netu: “Dichi enu mawulu, zañalalenu, ninenu mwashakamamu.” (Chimwekeshu 12:12) Eña, añelu achikuhwelelu mwiwulu azañalalaña, muloña Satana niandemoni jindi hiyadi cheñi mwiwuluku, ejima adi mwiwulu amwovwahilaña Yehova Nzambi. Mudi kuwunda kwawanina, kwakamanaña nikukwantankana. Kukeña kwaNzambi anakukwila mwiwulu.

14. Chumanyi chinakuzatika cheneli Satana amumbila dehi hamaseki?

¹⁴ Indi dinu hamaseki hadi ñahi? Bayibolu yahoshaña nawu: ‘Oyu yihuñu yakamona iseki nakaluñalwiji! Muloña Diyabolu nayisulukili, wudi nandombu yayeni, chanelukiyi nindi kunashali dehi mpinji yindi yantesha hohu.’ (Chimwekeshu 12:12) Satana nahili muloña wakumuhaña mwiwulu nawa wukweti kapinji kantesha kanashaliku. Mukuhila kwindi dimwaletelañayi kukala, hela “yihuñu,” hamaseki. Tukudiza haniyi “yihuñu” mukapetulu kanalondelihu. Hakwiluka yumiyi, tunatweshi kwihula netu, Wanta wunateli kwilisha ñahi kukeña kwaNzambi kukwila hamaseki?

15. Nzambi wukweti nkeñelwinyi kutalisha kwiseki?

¹⁵ Anukaku nkeñelu yaNzambi chiyidi kutalisha kwiseki. Wayidizili muKapetulu 3. MuEdeni, Nzambi wamwekesheli nkeñelu yindi yakwilisha adinu iseki kwikala paradisa yenzala namuchidi wamuntu  waloña, wakafwaña. Satana welishili Adama niEvu kwila nshidi, ichi chaluwañesheli kushikija nkeñelu yaNzambi kwiseki, ilaña hahimpili kufuukula kwaNzambiku. Yehova wuchidi kufuukula nindi “Akwakuloña akaswana ituña, akashakamamu haya nyaka.” (Masamu 37:29) Wanta waNzambi diwamba kashikija chumichi. Munjilanyi?

16, 17. Indi Danyeli 2:44 yatulejañadi kutalisha haWanta waNzambi?

¹⁶ Toñojokaku hawuprofwetu wekala haDanyeli 2:44. Aha twatañañahu nawu: “Hamafuku amba kekala anyantowu, Nzambi wamwiwulu wamba kaloñesha wanta wakubula kukisika haya nyaka, wantowu hiyamba kawushiyila antu acheñuku; wakahumonaña mawantawa ejima puchi puchi, nakuyinoñesha, wakemana mbe haya nyaka.” Indi ichi chinakutulejadi kutalisha kuWanta waNzambi?

¹⁷ Chatachi, chinakutuleja nawu Wanta waNzambi awiloñesheli ‘mumafuku amba kekala anyantowu,’ hela henohu mawanta amakwawu achidi kuyula. Chamuchiyedi, chinakutuleja nawu Wanta wukatwalekahu haya nyaka. Hiyamba kawilukuka nakuwihiña kudi nfulumendi yikwawuku. Chamuchisatu, tunamoni netu kwakekala njita hakachi kaWanta waNzambi namawanta akanu kaayi. Wanta waNzambi wukashinda. Nkumininaku, diwu wukekala nfulumendi yimu hohu yikayula muchidi wamuntu. Chikafumamu, antu akadiluñisha wunyuli wabadika kuwaha wabula dehi kwikalawu nawu..

18. Indi njita yakukumishaku yidi hakachi kaWanta waNzambi najinfulumendi yakanu kaayi ayitenaña nawudi?

¹⁸ Bayibolu yidi nayuma yayivulu yakutuleja kutalisha hanjita yakukuminishaku yidi hakachi kaWanta waNzambi nanfulumendi yakanu kaayi. Chakutalilahu, yatañishaña nawu mafuku akuminina chiyakashika, aspiritu atama akatandisha kutwamba kulonda kudimbeka “anyanta ankanu ampata yamunu mwishina yejima.” Nankeñelwinyi? “Kulonda akayipompeshi [anyanta] kunjita yefuku odu deneni daNzambi Watwesha yejima.” Anyanta ahanu hamaseki  akayipompeshela “kumu [kwatenañawu] muHeberu nawu Amagedoni.” (Chimwekeshu 16:14, 16) Muloña wayuma yinahoshiwu munawa mavasi ayedi, kulwa kwakukumishaku kudi hakachi kajinfulumendi jawantu naWanta waNzambi akwitenaña nawu njita yaAmagedoni.

19, 20. Chumanyi chinakukañesha nkeñelu yaNzambi kubula kuzatika hanu hamaseki chayinu mpinji?

¹⁹ Indi Wanta waNzambi wukeladi kuhitila munjita yaAmagedoni? Toñojokaku cheñi hankeñelu yaNzambi kwiseki. Yehova Nzambi wafuukwili nindi iseki dinzali namuchidi wawantu aloña, akumukalakela muParadisa. Chumanyi chinakukañesha chumichi kubula kuzatika chakatataka? Chatachi, tuyakwanshidi, nawa twakataña nikufwa. Hela chochu, twadizili muKapetulu 5, nawu Yesu watufwilili kulonda tukahandi haya nyaka. Hadaha wunanuki mazu asonekawu muNsañu yayiwahi yaYowanu nawu: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.”​—Yowanu 3:16.

²⁰ Kukala kukwawu kudi kwakwila nawu antu amavulu akoñaña yuma yatama. Atwambaña, nikwila wuvumbi. Hiyakeñaña kwila nkeñelu yaNzambiku. Antu elaña yuma yatama akayijilumuna hanjita yaNzambi yaAmagedoni. (Tañenu Masamu 37:10.) Muloña wukwawu wunaleteshi nkeñelu yaNzambi kubula kuzatika hanu hamaseki wudi wakwila nawu jinfulumendi hijinakukolesha antu kuyilaku. Nfulumendi jajivulu jazeya mwenzala wukatu, hela maseleka. Bayibolu yahoshaña hatooka to-o nawu: “Muntu wayulaña mukwawu muntu kulonda kumukatisha.”​—Mukwakutaŋisha 8:9 [NW].

21. Indi Wanta waNzambi wukelisha ñahi nkeñelu yaNzambi kuzatika hamaseki?

²¹ Hanyima yaAmagedoni, muchidi wamuntu wukekala nanfulumendi yimu hohu, yaWanta waNzambi. Wantowu wukela nkeñelu yaNzambi nawa wukaleta nkisu yabadika kuwaha. Chakutalilahu, wukafumishahu Satana niandemoni jindi. (Chimwekeshu 20:1-3)  Ñovu yamulambu waYesu yikazatishewa kulonda antu achikuhwelelu akabuleña kukata nikufwa. Dikwila nawu, hampinji yikayulaña Wanta waNzambi wena akatwesha kushakama haya nyaka. (Tañenu Chimwekeshu 22:1-3.) Iseki akadilisha kwikala paradisa. Nkumininaku, Wanta wukelisha nkeñelu yaNzambi kuzatika hamaseki nawa wukajilika ijina daNzambi. Indi ichi chinakulumbulula chumanyi? Chinakulumbulula nawu mukuhita kwampinji mukuyula kwaWanta waNzambi muntu wejima wamumi wukalemesha ijina daYehova.

22. Muloñadi chitunelukili netu Wanta waNzambi hiwenjili hampinji yadiñayi Yesu hamaseki hela hanyima yakusañuka kwindi hohenohuku?

²² Mpinji yalejeliyi Yesu atumbanji twindi kulomba nindi, “Wanta weyi winzi,” chamwekeni hatooka to-o nawu Wanta wadiña kanda winzi hayina mpinji. Komana wenjili mpinji yakandaminyi Yesu mwiwulu? Inehi, muloña aPetulu niPawulu mwayedi wawu ahosheli nawu cheliliyi Yesu nasañuki dehi, wuprofwetu wahaMasamu 110:1 washikijeweli hadi yena wakwila nawu: “Yehova hakumwila mwanta wami nindi, Shakamaku kuchikasa chami chachidiilu, nichinamba kayila ayilumbu jeyi hiyadi itanda dakunyendu yeyi.” (Yililu 2:32-34; Aheberu 10:12, 13) Kwadiña mpinji yakuhembelela.

23. (a) Wanta waNzambi watachikili kuyula mumwaakanyi? (b) Chumanyi chikuhoshewa mukapetulu kanalondelihu?

²³ Hakuleha kwakushika kumpinjiyi? Muyaaka yakumishaku yamu 1800, atudizi aBayibolu ashinshika achindili nawu  mpinji yakuhembelela yakamana mu 1914. (Kutalisha hanidi ifuku, talenu Apendikisi “1914—Mwaka Walema muWuProfwetu waBayibolu”.) Yuma yinakuzatika mukaayi yatachikili mu 1914 yamwekeshaña nawu kuchinda kwanawa atudizi aBayibolu ashinshika kwadiña kwalala. Kushikijewa kwawuprofwetu wamuBayibolu kunakumwekesha nawu mu 1914, Kristu wekalili Mwanta nawa niWanta waNzambi wamwiwulu dihu watachikili kuyula. Dikwila nawu tunakushakama ‘mukapinji kantesha’ kanashaliku kaSatana. (Chimwekeshu 12:12; Masamu 110:2) Tunatweshi kuhosha nachikuhwelelu netu katatakichi Wanta waNzambi wukukoña nakwilisha nkeñelu yaNzambi kuzatika hamaseki. Komana iyi nsañu hiwunayimoni kwikala yayiwahiku? Wuneteji neyi yalala? Kapetulu kanalondelihu kakukwasha kumona kwila nawu Bayibolu chalala yatañishaña haniyi yuma.