APENDIKISI
Wuprofwetu waDanyeli Chiwashimwineñahu Dehi Kwinza kwaMesiya
KAPROFWETU Danyeli wadiñaku yaaka 500 henohu Yesu kanda yovwaliki. Hela chochu, Yehova wasolweli nsañu kudi Danyeli yatela kumwekesha chikupu mpinji oyu Yesu yakamuwayishawu naspiritu yajila hela kumutonda kwikala Mesiya, hela Kristu. Danyeli amulejeli nawu: “Ilukaku wushinshiki neyi, kufumisha hakwidika izu dakuloñesha nakutuñulula Yerusalema, nakushikija kudi yena awayishawu dehi manji, yowu [Mesiya] Kalamba, kwakekala nyilungu yitanu nayiyedi; ninyilungu makumi atanu nadimu nanyilungu yiyedi.”—Danyeli 9:25.
Hakwila nawu twiluki mpinji yakwinza kwaMesiya, chatachi twatela kwiluka hatachikilili mpinji yikutwaminina kudi Mesiya. Kwesekeja nawuprofwetu, kufuma tuhu “hakwidika izu dakuloñesha nakutuñulula Yerusalema.” Mpinjinyi yatiyakeni ‘kwidika kwezwiidi’? Kwesekeja nansoneki yaBayibolu Nehemiya, izu dakutuñulula mpwembu yanyeñumukili Yerusalema datiyakeni “mumwaka wamakumi ayedi wamwanta Aratasheshe.” (Nehemiya 2:1, 5-8) Antu adiza nsañu janyaka etejaña nawu mwaka wa 474 B.C.E. diwadiña mwaka watachi wakuyula kwaAratasheshe. Kulondelahu, mu 455 B.C.E. dihashikijiliyi yaaka 20 yakuyula kwindi. Ichi dinu tuneluki dehi ntachikilu yawuprofwetu waDanyeli wahosha hadi Mesiya, dikwila nawu mu 455 B.C.E.
Danyeli hakumwekesha kuleha kwampinji yinakutwaminina kukwinza ‘kwaMesiya Kalamba’ nichiyakakuma. Wuprofwetu wahosha hadi “nyilungu yitanu nayiyedi, cheñi ninyilungu makumi atanu nadimu nanyilungu yiyedi”—Yejima hamu nyilungu 69. Iyi mpinji yayilehi ñahi? MaBayibolu amavulu ashimunaña nawu iyi hinyilungu yamafuku atanu nayediku, ilaña hinyilungu yayaaka. Dikwila nawu, mulungu wumu wunakwimenaku yaaka yitanu nayiyedi. Iyi yitoñojoka yanyilungu yayaaka, hela yaaka yitanu nayiyedi yamukuma ayilukili chikupu kudi aYudeya amumpinji yakunyima. Chakutalilahu, aYudeya adiña nakwanakana mwaka waSabata mumwaka wamuchitanu nachiyedi wudi wejima. (Kwidika 23:10, 11) Komana nyilungu 69 yawuprofwetu yinashiki kuchipimu cha 69 chayaaka 7 hamulungu wumu, hela yaaka 483 yejima hamu.
Ichi dinu chuma chitwatela kwila hikuchinda. Neyi tukuchinda kufuma mu 455 B.C.E., yaaka 483 yikututwala kumwaka wa 29 C.E. Iwu diwu mwaka waweni wamupapatishiliwu Yesu nawa wekaliliyi Mesiya! * (Luka 3:1, 2, 21, 22) Komana iku kushikijewa kwawuprofwetu wamuBayibolu hikwakuhayamishaku?
^ para. 2 Kufuma mu 455 B.C.E. kushika mu 1 B.C.E. hadi yaaka 454. Kufuma mu 1 B.C.E. kushika mu 1 C.E. hadi chaaka chimu (kwadiña kwosi chaaka chaziro). Cheñi kufuma mu 1 C.E. kushika mu 29 C.E. hadi yaaka 28. Kubomba iji jinambala jisatu jikutwinka kuvula kwayaaka 483. Dihu ‘hiyamufumishilihu’ Yesu kuhitila mukufwa mu 33 C.E., mumwaka wanyilungu 70 yanyaka. (Danyeli 9:24, 26) Talenu mukanda waPay Attention to Daniel’s Prophecy! kapetulu 11, niInsight on the Scriptures, Volume 2, hamafu 899-901. Nyikanda yejima ayisoneka kudi aYinsahu jaYehova.
