MUMUKANDA weyi waBayibolu, indi Masamu 83:18 ayibalumuna nawudi? MuNew World Translation of the Holy Scriptures yazatisha iyi vasi ñane: “Kulonda antu eluki nawu, ijina deyi yeyi Yehova yeyi hohu, Mukwakubadika heseki dejima.” Kubalumuna kwamaBayibolu amavulu kwazatishaña nhoshelu yadifwanaku. Hela chochu, kubalumuna kwakuvulu hiyazatishaña ijina daYehovaku, ahiñishañahu nkumbu jidi neyi “Mwanta” hela “Wahaya nyaka.” Chumanyi chatela kuzatishewa muniyi vasi? Nkumbu tahindi ijina Yehova?

Iyi vasi yahosha hadi ijina. MuchiHeberu chacheni chakutachika mwasonekeleliwu Bayibolu nankashi, ijina dahalwindi dadimena damwekanaña haniyi vasi. Adisonekeleña ñane יהוה (YHWH) munsona jachiHeberu. MuLunda, idi ijina kakavulu aditenaña nawu “Yehova.” Komana idi ijina damwekanaña muvasi yimu hohu yamuBayibolu? Inehi. Damwekanaña muNyikanda yachiHeberu yatachi mukamwihi namapampa 7,000!

Ijina daNzambi dalema ñahi? Toñojokaku hakulomba kwachitalilu kwaheniyi Yesu Kristu. Kwatachikaña ñane: “Tata yetu wekala mwiwulu, ijina deyi dijili.” (Matewu 6:9) Mpinji yikwawu, Yesu walombeli kudi Nzambi nindi: ‘Tata, lemeshaku ijina deyi.’ Hakwakula, Nzambi wahosheli kufuma mwiwulu, nindi: “Nadilemeshi dehi, nakadilemesha nawa cheñi.” (Yowanu 12:28) Mwalala, ijina daNzambi dalema nankashi. Muloñadi dinu akwakubalumuna amakwawu chiyashiyañahu idi ijina mukubalumuna kwawu kwaBayibolu nakuhiñishamu nkumbu?

Chinakumwekana neyi hadi nyiloña yiyedi. Muloña watachi wudi wakwila nawu, amavulu ahoshaña nawu idi ijina hidatela kuzatishewaku muloña ntenenu yayeni yatachi hiyayiluka makonuku. ChiHebelu chakushankulu achisonekeleña chakadi mavawelu. Komana, kwosi muntu niwumu makonu watela kuhosha chachiwahi ochu antu amumpinji yaBayibolu chiyateneneñawu YHWH. Hela chochu, komana ichi chatela kutukañesha etu kuzatisha ijina daNzambi? Mumpinji yaBayibolu, ijina Yesu atela aditeneneña nawu Yeshua hela  tuhu Yehoshua​—kwosi muntu niwumu watela kuhosha mwalalaku. Hanu dinu, antu mukaayi kejima makonu azatishaña ijina Yesu munyichidi yamboka-mboka, nikuditena kwesekana nachekala idimi dawu. Hiyajinokaña hakuzatisha idi ijina hamuloña wakwila nawu hiyeluka ntenenu yadu yamuyaaka nkulakaji yatachiku. Chochimu, neyi chakwila wuya kwituña dacheñi, watela kuwana neyi ijina deyi aditenenaña tuhu mwacheñi mumuchidi wukwawu. Hanu dinu, kubula kwiluka ntenenu yakushankulu yejina daNzambi himuloña wakulekelahu kudizatishaku.

Kakavulu, muloña wamuchiyedi wuyahanaña hakufumishamu ijina daNzambi muBayibolu wabombelamu kusweja kushimbula kwachisemwa chawaYudeya. Amavulu akuhwelela nawu ijina daNzambi hiyatela kuditenaku. Iyi yitoñojoka yashindamena nankashi hakuzatisha chatama nshimbi yamuBayibolu yahosha nawu: “Kutena ijina daYehova Nzambi yeyi namaswimbu, chinjila; muloña Yehova hakayiñisha muntu watenaña ijina dindi namaswimbuku.”​—Kwidika 20:7.

Iyi nshimbi yalekesha kuzatisha ijina daNzambi chatama. Komana yalekesha kuzatisha ijina dindi nakalemesha? Inehi. Ansoneki aBayibolu yachiHeberu (“Chitiyañenu Chachikulu”) ejima adiña amayala achikuhwelelu adiña nakuhemba nshimbi yaheniyi Yehova kudi aIsarela akushankulu. Hela chochu, azatishileña ijina daNzambi kakavulu. Chakutalilahu, adishili nimumasamu amavulu iyembileñawu chatiyakana kudi mazaza awakwakudifukula. Yehova Nzambi wayilejeli niakwakudifukula indi kutambika hejina dindi, nawa antu achikuhwelelu atiyilili. (Yoweli 2:32; Yililu 2:21) Dichi, eniKristu makonu hiyajinokaña hakuzatisha ijina daNzambi nakalemeshaku, neyi cheliliyi Yesu.​—Yowanu 17:26.

Hakuhiñisha ijina daNzambi nankumbu, akwakubalumuna Bayibolu akoñaña chiluwa cheneni chikupu. Aleteshaña Nzambi kumwekana neyi wekala kwakulehi nawa hekala neyi muntuku, henohu Bayibolu yakoleshaña antu kwikala ‘nampuña naYehova.’ (Masamu 25:14) Toñojokaku hadi ibwambu deyi yiwadikunda nindi chikupu. Wukudikunda nindi ñahi neyi chakwila kanda wiluki ijina debwambu deyi? Chochimu, neyi antu akushakama chakubula kwiluka ijina daNzambi, Yehova, anateli kukundama ñahi chikupu kudi Nzambi? Kubombelahu, neyi antu hiyanakuzatisha ijina daNzambiku, hiyanateli kwikala nakwiluka kwakuwahi kwanochu chidalumbulukaku. Ind ijina daNzambi dalumbulukadi?

 Nzambi yomwenindi walumbulwili kulumbuluka kwejina dindi kudi ñamba yindi wachikuhwelelu Mosi. Hampinji yehwiliyi Mosi hejina daNzambi, Yehova wakwili nindi: “Ami yami mwomunekalila kwami.” (Kwidika 3:14) Kubalumuna kwaRotherham kwazatisha awa mazu ñana: “Ami nakekala mwomunakeñi kwikala.” Komana Yehova nateli kwikala mwomunateliyi kwikala kulonda kushikija nkeñelu yindi.

Twili netu wunateli kwikala mwomuwunakeñeli kwikalila. Chumanyi chiwukwilila amabwambu jeyi? Neyi chakwila wumu yakata nankashi, wunateli kwikala ndotolu wakuluka yitembi nakumuuka. Neyi mukwawu yakankila mali, wunateli kwikala samaheta nakumukwasha kumanisha kukala kwindi. Chalala chidi nawu, wudi namwakukumina munochu chiwukwikala. Wejima wetu tudi namwakukumina. Chiwukudizaña Bayibolu, wukuhayama hakumona ochu Yehova chekalañayi mwejima mukukeñayi hakwila yashikiji yikaninu yindi. Nawa chamuzañaleshaña hakuzatisha ñovu jindi kudi antu amukeña. (2 Kushindulula 16:9) Iji mbadi jajiwahi jawuntu waYehova hiyajiluka kudi owu abula kwiluka ijina dinduku.

Mwamweni, ijina Yehova atela kudizatisha muBayibolu. Kwiluka chidalumbuluka nikudizatisha chachiwahi mukudifukula kwetu hiwukwashu wañovu chikupu hakukundama kwakwihi naTata yetu wamwiwulu, Yehova. *