1. Muloñadi wutukukeñela kudiza hadi añelu?

KWILUKA muntu kakavulu kwabombelamu kwilukahu yuma yimu yakundama kuchisaka chindi. Chochimu, kumwiluka Yehova Nzambi chabombelamu kwiluka chiwahi chisaka chindi chawañelu. Bayibolu yayitenaña añelu nawu “anyana kaNzambi.” (Yoba 38:6) Akweti mudimu wamuchidinyi munkeñelu yaNzambi? Azatahu dehi mudimu munshakaminu yawantu yakunyima? Komana añelu atakalela wumi weyi? Neyi dimu, munjilanyi?

2. Indi añelu afumini kudihi, nawa adi añahi?

² Bayibolu yahosha mapampa kakavulu hadi añelu. Tutalenu ntahi nsona jantesha kulonda tudizuhu yuma yayivulu hadi añelu. Indi añelu afumini kudihi? Akolose 1:16 yahoshaña nawu: “Mudi yena [Yesu Kristu] dimu mwaleñeleluwu yuma yejima, niyamumawulu niyahamaseki.” Dikwila nawu, yileñaleña yejima yakuspiritu yatenañawu nawu añelu ayileñeli kudi Yehova Nzambi kuhitila mudi Mwanindi wawedi. Indi añelu ekala añahi? Bayibolu yamwekeshaña nawu yihita nayihita yawañelu ayileñeli, nawa ejima akweti ñovu.​—Masamu 103:20. *

3. Indi Yoba 38:4-7 yatulejañadi hadi añelu?

 ³ Izu daNzambi Bayibolu, datulejaña nawu mpinji yaleñeliwu maseki, “anyana kaNzambi ejima hiyakudikuwa nakuzañalala.” (Yoba 38:4-7) Añelu adiña kwoku henohu antu kanda ayileñi, henohu tuhu nimaseki kanda ayileñi. Ichi chibaba chamuBayibolu chinakumwekesha nawu añelu akweti yuma yatiyañawu, muloña chahoshaña nawu ‘hiyakudikuwa hamu namuzañalu.’ Ilukaku neyi ‘anyana kaNzambi ejima’ azañaleli hamu. Hayina mpinji añelu ejima adiña chisaka chimu chakwatankana chamukalakeleleña Yehova Nzambi.

4. Indi Bayibolu yamwekeshaña ñahi nawu añelu achikuhwelelu akamenaña nyidimu yawantu?

⁴ Kufuma tuhu mpinji yamweniwu chadiña nakuleñawu antu akusambila, yileñaleña yakuspiritu yachikuhwelelu yashaku maana nankashi hakuvula kwachisaka chawantu nihakwila nkeñelu yaNzambi. (Yishimu 8:30, 31; 1 Petulu 1:11, 12) Hela chochu mukuhita kwampinji, añelu achimweni neyi antu amavulu amuchisaka chawantu alekeli kumukalakela Nleñi yawu wukweti kukeña. Chakubula nikujina ichi chayineñesheli añelu achikuhwelelu. Munjila yikwawu, mpinji yidi yejima neyi muntu wumu wukufunta kudi Yehova, “kumesu awañelu . . . kwekalaña muzañalu.” (Luka 15:10) Chineli añelu akweti kanañachima kakwakamena nshakaminu yawantu amukalakelaña Nzambi, tunateli kutiyishisha muloña waweni wazatishilañayi Yehova añelu mapampa kakavulu hakukiña ambuñindi ashinshika ahamaseki. (Tañenu Aheberu 1:7, 14.) Toñojokaku haniyi yitalilu yikwawu.

5. Yitalilwinyi yawukwashu wawañelu yitwawanaña muBayibolu?

⁵ Añelu ayedi amukwashiliku iyala waloña Loti nianyanindi awambanda ayedi kupuluka kujilumuka kwanyisumba yatama yaSodoma naGomora nakuyifumisha mudina iluña. (Kutachika 19:15, 16) Chimwahitili yaaka, kaprofwetu Danyeli amuumbilili muwina wawanyitupa, ilaña wapulukili nakuhosha  nindi: “Nzambi yami natemeshi kañelu kindi, najiki mutunwa twawanyitupa.” (Danyeli 6:22) Muyaaka nkulakaji yakusambila C.E., kañelu wamufumishili kapostolu Petulu mukaleya. (Yililu 12:6-11) Kubombelahu, añelu amukolesheli Yesu hampinji yatachikiliyi mudimu windi wahamaseki. (Maku 1:13) Nawa kwakwihi nakufwa kwaYesu, kañelu wamumwekeneni Yesu “nakumukolesha.” (Luka 22:43) Wukwashu wamuchidiwu wawañelu watela wamukolesheli Yesu nankashi hayina mpinji yalema muwumi windi.

6. (a) Indi añelu akiñaña ñahi antu jaNzambi makonu? (b) Malwihwinyi yitukukeña kutoñojokahu?

⁶ Makonu, añelu hiyamwekanaña hatoka kudi antu jaNzambi ahamasekiku. Hela chakwila antu hiyanateli kuyimona añeluku, añelu jaNzambi añovu akiñaña antu jindi, sweje-e kuwubanji wakuspiritu. Bayibolu yahoshaña nawu: ‘Kañelu kaYehova wayituñilaña amwakamaña musumba kwi-ndo, wayipulwishaña.’ (Masamu 34:7) Muloñadi awa mazu chiyatela kwikala akutukundeja? Muloña kudi yileñaleña yatama yakuspiritu yinakukeña kutukisañana! Hiyanyi? Afuma kudihi? Munjilanyi munakukeñelawu kutukatishilawu? Hakuwana ñakwilu yanawa malwihu, tusambilenu kutala hachuma chamwekeni hakutachika kwansañu yanyaka yawantu.

7. Indi Satana washikili kuchipimwinyi hakufumisha antu kudi Nzambi?

⁷ Neyi chitwadizili muKapetulu 3 kawunu mukanda, kañelu wumu wekalili nampwila yakuyula akwawu dichi wadikañili naNzambi. Nkumininaku iwu kañelu wekalili Satana Diyabolu. (Chimwekeshu 12:9) Kwakwihi nayaaka 1,600 hanyima yakumudimba Evu, Satana watwesheli kufumisha antu amavulu nankashi kudi Nzambi shiyahu tuhu antu antesha achikuhwelelu adi neyi, Abeli, Enoki niNowa.​—Aheberu 11:4, 5, 7.

8. (a) Indi añelu amakwawu ekalili ñahi andemoni? (b) Hakwila nawu apuluki Dibaji damumafuku aNowa, chumanyi cheliliwu andemoni?

⁸ Mumafuku aNowa, añelu amakwawu adikañili naYehova.  Ashiyili iluña dawu dachisaka chaNzambi chamwiwulu nakwinza hamaseki, nakuvwala nyijimba yawuntu. Muloñadi? HaKutachika 6:2, twatañañahu netu: “Anyana kaNzambi amayala amweni anyana kawantu awambanda nawu akweti lubanji, asumbula niañodi jawu, ejima akeñeliwu.” Ilaña Yehova Nzambi hatiyili kuwaha nanzatilu yanawa añelu nikutama kwafumineña mudantu kutwalekahuku. Waleteli dibaji heseki dejima nakujilumuna antu ejima atama nakupulwishaku hohu ambuñindi achikuhwelelu. (Kutachika 7:17, 23) Hakwila añelu adikañili hela andemoni, ayikanjikijili kushiya nyijimba yawu yawuntu nakufunta  mwiwulu neyi yileñaleña yakuspiritu. Adishili awenawu kukabadi kaDiyabolu, wekalili ‘mwanta wawandemoni.’​—Matewu 9:34.

9. (a) Chumanyi chayimwekeneni andemoni mpinji yafuntiliwu mwiwulu? (b) Chumanyi chitukutoñojokahu kutalisha hadi andemoni?

⁹ Hampinji yafuntiliwu añelu akwakudikaña mwiwulu, ayihembeli neyi antu ahañawu neyi chochidi mwanta wawu Satana. (2 Petulu 2:4) Hela chakwila hiyatweshaña kuvwala cheñi nyijimba yawuntuku, ilaña achidi kuleta wufwinda watama chikupu kudantu. Cheñi nawa, kuhitila muwukwashu wanawa andemoni, Satana “wadimbaña antu ampata yamwishina yejima.” (Chimwekeshu 12:9; 1 Yowanu 5:19) Munjilanyi? Kakavulu andemoni azatishaña jinjila jaloñeshawu jakudimba nachu antu. (Tañenu 2 Akorinda 2:11.) Twayenu tutalihu jinjila jikwawu.

10. Kupanda hichumanyi?

¹⁰ Hakudimba antu, andemoni azatishaña kupanda. Yililu yakupanda hikudibomba hamu nawandemoni hela muntu yomweni wukuhanjekaña nawandemoni hela wukuzatisha muntu wacheñi hakwila mwenimu. Bayibolu yakanisha kupanda nawa yatukonkomwenaña kulonda tudihembi kuyuma yejima yendelaña hamu nakupanda. (Aŋalija 5:19-21) Andemoni azatishaña kupanda neyi chochazatishañawu ndisha kudi ayibinda yanshi. Chibinda wanshi wazatishaña ndisha yashiyashana hakukwata nachu inshi yashiyañana. Chochimu, aspiritu atama azatishaña jinjila jashiyañana jakupanda hakwiñija nachu antu ejima ashiyashana muyililu yawu.

11. Indi kuhoña hichumanyi, nawa muloñadi chitwatelela kukwitondolwela?

¹¹ Muchidi wumu wandisha yazatishañawu andemoni hikuhoña. Kuhoña hichumanyi? Hikufwila kwiluka yuma yakumbidi hela chuma chakubula kwiluka. Nyichidi yikwawu yakuhoña diyi iyi: kuhoña natukumbukumbu, ñombu yachibanjilu, kulumbulula yilota, kuhoña natutumbwa nikulumbulula nyifunda yamumakasa. Hela tuhu antu amavulu atoñojokaña nawu kuhoña hikwafwanaku, Bayibolu yamwekeshaña  nawu akwakushimuna jakumbidi azatilaña hamu nawandemoni. Chakutalilahu, Yililu 16:16-18 yashimuna hadi ‘ndemoni wakuhoña’ wadiña nakumwilisha kansi wamumbanda kuhoña “ñombu.” Ilaña wajimbesheli iyi ñovu chelili anamufumishi dehi ndemoni.

12. Muloñadi chichekalila chafwana kuhanjeka nawafu?

¹² Njila yikwawu yadimbilañamu andemoni antu yidi yakuhitila mukuyikolesha kulonda ahanjekeña nawafu. Antu anakudila kufwa kwamuntu wakeñawu kakavulu ayidimbaña nayitoñojoka yatama hansañu yawantu afwa dehi. Mukwakupesha nateli kuhosha nsañu yalema hela nateli kuhosha izu didi neyi damuntu ona wafwa dehi. Nkumininaku, antu amavulu hiyakwiteja nawu afu mwalala amomi nawa nawu neyi akuhoshaña nawu chikukwashaku antu amomi kuumika wushona wawu. Ilaña “kukundeja” kwamuchidiwu kwakutwamba nankashi nawa kwafwana. Muloñadi? Muloña andemoni anateli kwimbujola izu damuntu wafwa dehi nakumuleja mukwakupesha nsañu yamuntu wafwa dehi. (1 Samweli 28:3-19) Kubombelahu, neyi chitwadizili muKapetulu 6 afu aleka dehi kuhanda.  (Masamu 115:17) Dichi “muntu wejima wahanjekaña nawafu” amudimbaña kudi aspiritu atama nawa nakukoña mwaheña kwesekeja nankeñelu yaNzambi. (Tañenu Kuhituluka 18:10, 11; Isaya 8:19) Dichi, babalaku kulonda wukani iyi ndisha yafwana yazatishañawu andemoni.

13. Chumanyi chelawu antu amavulu adiña nawoma wawandemoni?

¹³ Aspiritu atama hiyadimbaña antu hohuku, ilaña achinishaña nikuyichinisha. Makonu, Satana niandemoni jindi aneluki nawu akweti hohu “mpinji yantesha” yinashaliku henohu kanda ayijilumuni, dichi anasweji kuzuwa kubadika chadiñawu. (Chimwekeshu 12:12, 17) Hela chochu, makombakaji awantu adiña nawoma wawaspiritu atama hiyadi cheñi nawomaku. Alekeli ñahi? Indi muntu nateli kwila ñahi hela chakwila wudi dehi muyililu yakuhoña?

14. Kufwana eniKristu amuyaaka nkulakaji yakusambila amuEfwesesa, tunatweshi kulubuka ñahi kufuma kudi aspiritu atama?

¹⁴ Bayibolu yatulejaña chakudikaña nawaspiritu atama nichakuleka kutiyañana nawu. Toñojokaku chakutalilahu chaweniKristu amuyaaka nkulakaji yakusambila amumusumba waEfwesesa. Amakwawu adiña akwakuhoña henohu kanda ekali eniKristu. Chafuukwilihu kuleka kuhoña, chumanyi cheliliwu? Bayibolu yahoshaña nawu: “Amakwawu amavulu elilaña tufuta twacheñi nitwacheñi, hiyakupompesha nyikanda yawu nakuyochela hatooka.” (Yililu 19:19) Kuhitila mukocha nyikanda yawu mwadiña tufuta, ana eniKristu amaha emikili chakutalilahu kudi owu anakukeña kudikaña nawaspiritu atama makonu. Antu anakukeña kumuzatila Yehova atela kuleka yuma yejima yendelaña hamu nakuhoña. Iyi yuma yinabombelimu nyikanda, magazini, nyevulu, nyivwimbimbi nitumina twakoleshaña kwila yuma yakuhoña kulonda yileteña ikoku nimuzañalu. Yuma yikwawu,  hinyikalu hela chuma chidi chejima chavwalañawu kulonda kudikiña nachu kuyuma yatama.​—1 Akorinda 10:21.

15. Hakwila tudikañi nañovu yawaspiritu atama, chumanyi chitwatela kwila?

¹⁵ Chimwahitili yaaka hanyima yakwila eniKristu amuEfwesesa ocha dehi nyikanda yawu yatufuta, kapostolu Pawulu wayisonekeleli nindi: ‘Twalwishaña . . . nawaspiritu atama.’ (Aefwesesa 6:12) Andemoni hiyalekeli kulwishaku. Atwalekelihu nakulwisha kulonda ekali nachifulu cheneni. Chumanyi chikwawu chateleli kwilawu ana eniKristu? Pawulu wahosheli nindi: “Chuma chinabadiki chochakukwata nkebu yakukuhwelela, yimukutwesha kujima nachu nyivu yakesi yamukwakutama [yaSatana] yejima.” (Aefwesesa 6:16) Neyi nkebu yetu yachikuhwelelu yikusweja kukola, dikwila nawu nikudikaña kwetu nañovu yawaspiritu atama kukwikala kweneni chikupu.​—Matewu 17:20.

16. Tukutwesha ñahi kukolesha chikuhwelelu chetu?

¹⁶ Hanu dinu, tunatweshi kukolesha ñahi chikuhwelelu chetu? Kuhitila mukudiza Bayibolu. Kukola kwampwembu kwashindamena nankashi hakukola kwachikuku chayu. Munjila yoyimu kukola kwachikuhwelelu chetu kwashindamena nankashi hakukola kwayikuma yachu, dikwila nawu kwiluka walala Wezu daNzambi, Bayibolu. Neyi tukutañaña nikudiza Bayibolu mafuku ejima, chikuhwelelu chetu chikwikala chakola. Kufwana yina mpwembu yakola, chikuhwelelu chamuchidiwu chikutukiña kuwufwinda wawaspiritu atama.​—1 Yowanu 5:5.

17. Chumanyi chinakukeñeka hakwila nawu tudikañi nawaspiritu atama?

¹⁷ Chumanyi chikwawu chateleli kwilawu ana eniKristu amuEfwesesa? Akeñekeleña kukiñewa kukwawu muloña ashakamineña mumusumba wenzeli kulombelela andemoni. Dichi Pawulu wayilili nindi: “Lombenuña mudi spiritu mafuku ejima, nikulomba nikulembelela kwejima.” (Aefwesesa 6:18) Chineli ninetu twashakamaña mwituña denzala nakulomba kwawandemoni, kulomba chikupu kudi Yehova kulonda atukiñi hichuma chalema hakudikaña nawaspiritu atama. Eña, twatela kuzatisha ijina daYehova mukulomba kwetu. (Tañenu Yishimu 18:10.)  Dichi, twatela kutwalekahu kulomba kudi Nzambi kulonda ‘yatwamwini kudi mukwakutama,’ Satana Diyabolu. (Matewu 6:13) Yehova wukwakula kulomba kwamuchidiwu kwaheshina damuchima.​—Masamu 145:19.

18, 19. (a) Muloñadi chitwatela kukuhwelela kushinda munjita yitunakwasa nayileñaleña yatama yakuspiritu? (b) Lwihwinyi lukwakulewa mukapetulu kanalondelihu?

¹⁸ Aspiritu atama afwana, ilaña hitwatela kuyichinaku neyi tudikaña naDiyabolu nakukundama kwakwihi naNzambi kuhitila mukwila nkeñelu Yindi. (Tañenu Yakoba 4:7, 8.) Ñovu yawaspiritu atama yanyanya. Ayibabesheli mumafuku aNowa, nawa anakutalila kusompesha kwakukumisha kudi kumbidi. (Yuda 6) Anukaku cheñi neyi, tukweti ikiñu dawañelu añovu aYehova. (2 Anyanta 6:15-17) Awa añelu anakukeña etu tushindi chikupu hakudikaña nawaspiritu atama. Munjila yikwawu añelu aloña anakutukolesha. Dichi twayenu tukundamenu kwakwihi naYehova hamu nachisaka chindi chayileñaleña yakuspiritu yachikuhwelelu. Tutondolwelenu cheñi jinjila jejima jakuhoña nakuzatisha mpinji yejima kufumba Kwezu daNzambi. (1 Petulu 5:6, 7; 2 Petulu 2:9) Ichi chikutuletesha kwikala nachikuhwelelu chakushinda njita yitunakwasa nayileñaleña yatama yakuspiritu.

¹⁹ Muloñadi Nzambi chetejelayi aspiritu atama nikutama kunakuleta makabi amavulu hadantu? Ilu lwihu akulwakula mukapetulu kanalondelihu.