1-3. (a) Indi kukala kwenjili ñahi muchisaka chaAbigayili? (b) Nsañwinyi yitukudiza hadi iwu mumbanda wadimena?

ABIGAYILI wamweni nindi mukwenzi weyala nakameni chikupu. Kudi chuma chamukojejeli kutiya woma. Akeñeleña kumona kukala kwahamesu bwi-i. Kwenjileña akwanjita akushika ku 400, afwilileña kujaha amayala ejima amuchisaka chaNabali, nfumwa Abigayili. Muloñadi?

² Nabali diyi waleteli kukala kweniku. Neyi chelileñayi dikalu, welili yuma yatama nawa watukeni. Ilaña haniyi mpinji watukili muntu walema, mukulumpi wezanvu dawamashidika ashinshika nawa akuluka yitembi. Ñamba yaNabali wumu, hadaha mukwenzi yeniwu wadiña kabiña, wayili kudi Abigayili nawa wakuhweleleli nindi wukuwana njila yakuyipulwishilamu. Hanu dinu mumbanda wumu nateli kulwa nawamashidika?

³ Tusambilenu kudiza nsañu yantesha yahosha hadiwu mumbanda wadimena. Indi Abigayili wadiñanyi? Indi iku kukala kwatachikili ñahi? Nawa chumanyi chitunateli kudizila kuchikuhwelelu chindi?

4. Indi Nabali wadiña muntu wamuchidinyi?

⁴ Abigayili hateleleli kusumbuka neyala wudi neyi Nabaluku. Abigayili wadiña mumbanda wamuwahi nankashi, ilaña Nabali wadiña iyala watama muchima. Kafwampi iwu iyala wadiña waheta. Wadimweneña kulema chikupu, indi antu amakwawu amumweneña ñahi? MuBayibolu mwosi muntu atenawu chatama neyi Nabaluku. Ijina dindi dalumbuluka nawu “Kubula maana” hela “Chisupi.” Komana amutumbili idi ijina kudi anvwali jindi hakuvwalika, tahindi amutumbili chakuliliyi kwesekeja nayililu yindi? Idi ijina damuteleleli kwesekeja nayuma yelileñayi. Nabali “wadiñi wakala watama mwelilañayi mwejima.” Wadiña nakukabisha akwawu nikusheta walwa nawa antu ejima amuchiinineña nawa amuheleli.—1 Sam. 25:2, 3, 17, 21, 25.

5, 6. (a) Munatoñojoki nenu Abigayili wadiña nayililwinyi yasweja kuwaha? (b) Muloñadi Abigayili chasumbukililiyi neyala wamukunkulwayi?

 ⁵ Abigayili wadiña wambukaku chikupu naNabali. Ijina dindi dalumbuluka nawu “Tata Yami Nazañalali.” A tata jawantu amavulu atiyaña kuwaha kwikala namwana wamumbanda walubanji, ilaña tata yawantu wamaana wazañalala chikupu hakwiluka nindi mwanindi wukweti yililu yayiwahi. Kakavulu muntu walubanji hekalaña nayililu yidi neyi kashinshi, maana, wulobu hela chikuhweleluku. Ilaña Abigayili wadiña wambukaku. Bayibolu yamuhamekaña muloña wadiña namaana nilubanji.—Tañenu 1 Samweli 25:3.

⁶ Antu amakwawu makonu anateli kuhayama chasumbukiliyi ona mumbanda wamaana neyala wamukunkulwayi. Anukenu nenu anvwali amavulu kunyaka atondeleleña anyanawu mumbanda wakusumbula hela iyala wakusumbuka nindi. Hela neyi anvwali anayitondeli wanyi, ateleleli kwiteja nawu anyanawu adisumbuli. Komana anvwali jaAbigayili akeñeleña kumusumbwisha mwanawu muloña akomokeli maheta aNabali nimpuhu yindi? Tahindi amusumbwishili muloña wawuzweñi? Hela chochu, maheta hiyamuleñeleli Nabali kwikala iyala wamuwahuku.

7. (a) Chumanyi chatela kutondolwelawu anvwali makonu neyi anakukeña kudizisha anyanawu kulonda amoneña maluwi munjila yayiwahi? (b) Chumanyi chafwilileñayi Abigayili kwila?

⁷ Anvwali akweti maana adizishaña anyanawu nakanañachima kulonda amoneña maluwi munjila yayiwahi. Hiyakakejaña anyanawu kusumbuka hela kusumbula muloña wamali hela kuyikanjikija kutachika kudiluka neyala henohu achidi atwansi chakwila akukañanya kuzata nyidimu yazataña mumbanda hela iyalaku. (1 Kor. 7:36) Chineli Abigayili wadiña wasumbuka dehi, hatwesheli cheñi kutoñojoka yuma yamuchidiwuku. Hela chochu, wasumbukili naNabali nawa wafwilileña kuzata nañovu kulonda yekali mumbanda wamuwahi.

8. Indi Nabali watukilinyi, nawa munateli kuhosheladi nenu welili mwawusupi?

⁸ Nabali waletesheli yuma yimukalili Abigayili chikupu. Nabali wamutukili Davidi. Davidi wadiña kambuña Yehova washinshika awayishiluwu manji kudi kaprofwetu Samweli nakumwekesha nawu diyi atondeluwu kudi Nzambi kulonda yamusinsi Sawulu hawanta. (1 Sam. 16:1, 2, 11-13) Davidi washakamineña muchinkalampata nawamashidika indi 600 ashinshika muloña wamutemukileña Mwanta Sawulu wamutiyilili ichima nawa wakeñeleña kumujaha.

9, 10. (a) Davidi niantu jindi akabakeneneña mwiluña damuchidinyi? (b) Muloñadi Nabali chateleleliyi kusakilila hachuma cheliliyi Davidi niantu jindi? (Talenu cheñi tunsona twaheshina muparakalafu 10.)

⁹ Nabali washakamineña kuMawoni ilaña wazatilileña kwakwihi  naKarameli, * hadaha wadiña nampata kweniku. Iyi nyisumba yadiña hatupidi-pidi nawa yadiña namunyenvu, kwakuwahi kuhembela anyikoku nawa dikwahembeleleñayi Nabali yimuna yindi 3,000. Ilaña antu hiyadiminineña kunidi iluñaku. Kukabeta kambwela dikwadiña chinkalampata chaParani. Kumusela kwadiña njila yaya kuKaluñalwiji kaMuñwa yahitili muchinkalampata mwadiña yinekineki nimayeñu. Davidi niantu jindi akabakeneña hakwila nawu ahandi munidi isaña, chakadi nikujina adiña nakukeñakeña yakudya nikuumika kukala kwakuvula. Kakavulu adiwanineña nawanyikwenzi abiñileña yimuna yasamaheta Nabali.

¹⁰ Indi ana amashidika adikita ayilileña ñahi atubiña? Adi kwiyaña nyikoku mumpinji mumpinji, ilaña hiyeyileñaku. Ilaña ahembeleña chiwahi nyikoku niañamba jaNabali. (Tañenu 1 Samweli 25:15, 16.) Anyikoku niatubiña amweneña kukala nankashi. Kwadiña ayisumi amavulu, nawa ñinza yakukabeta kambwela yaIsarela yadiña kwakwihi, chakwila mazanvu awamakombi akumatuña acheñi enjileña nakwiya. *

11, 12. (a) Indi Davidi wamwekesheli ñahi kalemesha hamazu amutemesheleliyi Nabali? (b) Indi Nabali wakwili ñahi chatama hamazu atemesheliyi Davidi?

¹¹ Mudimu wakudyisha ana antu ejima muchinkalampata wadiña wakala chikupu. Ifuku dimu Davidi watemesheli antu ikumi kudi Nabali nakulomba yakudya. Davidi watondeli mpinji yayiwahi. Yadiñi mpinji yakutewula nyikoku, mpinji yayawija nawa yavulileñawu antu kuhana. Davidi wazatishili mazu amawahi akalemesha. Waditeneni nindi “mwaneyi Davidi,” hadaha wamulemesheli Nabali muloña welukili nindi himukulumpi. Indi Nabali wakwili nindidi?—1 Sam. 25:5-8.

¹² Wahilili nankashi. ‘Wayitalumokeleli’ neyi chashimwiniyi mukwenzi atenawu kumatachikilu hakumulumbulwila Abigayili iyi nsañu. Nabali wachifwa watobeli chikupu hamankendi, menji nimbiji yindi. Wamusekesheli Davidi neyi muntu wabula kulema nawa wamwesekejeli nañamba watemukili kudi mwanta windi. Nabali watoñojokeleña neyi Sawulu wamuheleli Davidi. Awa mayala ayedi hiyamumweneña Davidi neyi chamumweneñayi Yehovaku. Nzambi wamukeñeli Davidi nawa hamumweneña neyi ñamba wadikañaku, ilaña neyi mwanta wawaIsarela wakumbidi.—1 Sam. 25:10, 11, 14.

13. (a) Indi Davidi wasambilili kwiladi chamutukiluwu kudi Nabali? (b) Indi chishina chekala haYakoba 1:20 chamwekeshañadi hachuma cheliliyi Davidi?

 ¹³ Davidi wahilili chamulejeluwu antemesha jindi mazu aNabali. Wayilejeli antu jindi nindi, “Manyekenu wejima wenu mpoku jenu jatubali.” Chadiloñesheliyi kuya nakulwa, Davidi walombweli amayala 400 kuya nakulukuka. Wasanyikili kujaha amayala ejima muchisaka chaNabali. (1 Sam. 25:12, 13, 21, 22) Davidi watamishili wanyi chahililiyi, ilaña watamishili chafuukwiluhu kuya nakujahana. Bayibolu yahoshaña nawu: ‘Kuzuwa kwawantu hikwaletaña kuloña kwaNzambuku.’ (Yak. 1:20) Hanu dinu Abigayili wadi kupulwisha ñahi akwetala dindi?

14. (a) Njilanyi yasambililiyi Abigayili kumanisha kukala kwaleteliyi Nabali? (b) Chumanyi chalema chitwadizilaña hachaambu chadiña hakachi kaNabali naAbigayili? (Talenu cheñi tumazu twaheshina.)

¹⁴ Tunamoni dehi chuma cheliliyi Abigayili hakwila nawu yamanishi iku kukala. Kwambukaku nanfumwindi Nabali, yena watiyililili. Ona ñamba wahosheli hadi Nabali chamulejeluwu iyi nsañu nindi: “Himuntu wamukunkulwayi hosi niniwu watweshaña kuhosha ninduku.” * (1 Sam. 25:17) Chawushona, Nabali wadimweneña neyi walema chikupu chakwila hakeñeleña kutiyililaku. Makonu antu amavulu adisambaña muniyi njila. Ilaña iwu mukwenzi weyala welukili nindi Abigayili wadiña wambukaku, dimuloña wamulejeleliyi iku kukala.

15, 16. (a) Indi Abigayili wamwekesheli ñahi nawu wadiña neyi mumbanda washinshika watenawu mumukanda waYishimu? (b) Muloñadi chuma cheliliyi Abigayili chichamwekeshaña nawu hadikañili nawunlomboli wanfumwinduku?

¹⁵ Abigayili watoñojokeli nikuzatilahu swayi. Twatañaña nawu, “Abigayili hakunyakala.” Muniyi nsañu twawanaña iyi nhoshelu yakwila nawu “kunyakala” ayizatisha kapampa kawana hakumutena iwu mumbanda. Waloñesheli yawana yakumwinka Davidi niantu jindi. Yawana yaloñesheliyi hadiña mankendi, vinyu, nyikoku, yesekelu yatidiku yakwocha, nyikanji yanyikabu yavinyu yawuma nimankendi achikuyu. Eñañi, Abigayili welukili chikupu yuma yadiñiyi nayu nawa wadiña nakutala nyidimu yamwitala, neyi chadiña mumbanda washinshika watenenuwu mumukanda waYishimu chimwahitili  yaaka. (Yish. 31:10-31) Watemesheleñahu dehi yakudya nawañamba jindi, yena wadiña nakulondela hanyima. Twatañaña nawu ‘ilaña nfumwindi Nabali kumulejamu nehi.’—1 Sam. 25:18, 19.

¹⁶ Komana chaya mukwila nawu Abigayili wadikañili nawunlomboli wanfumwindi? Inehi, anukenu nenu Nabali wamwilili kambuña Yehova wawayishewa katama, chumichi chadi kujahisha antu amavulu akadi muloña mwitala daNabali. Neyi Abigayili wabulili kuzatilahu, komana niyena wadi kwikala namuloña hachuma cheliliyi nfumwindi? Haniyi mpinji wafuukwiluhu kumwovwahila Nzambi kubadika kumwovwahila nfumwindi.

17, 18. Indi Abigayili welilidi chamuweniyi Davidi, wahoshelidi nawa mazwindi amushikili ñahi Davidi hamuchima?

¹⁷ Chakadi nikuleha, Abigayili wamubulakeni Davidi niantu jindi. Wanyakeli cheñi kusuluka hachimbulu nakudibuka kudi Davidi. (1 Sam. 25:20, 23) Nawa wamulejeli Davidi yuma yejima yadiña kumuchima windi nakumulembelela chikupu kulonda yamutiyili nfumwindi luwi niantu amwitala dindi. Mazwindi amushikililidi Davidi hamuchima?

¹⁸ Waditwikili muloña wavulumwini nfumwindi nawa wamulombeli Davidi nindi yamwanakeni. Nawa wamulejeli nindi nfumwindi wadiña wamukunkulwayi neyi mwaya ijina dindi, hadaha wamulejeleña Davidi nindi hatela kumusha muntu wamuchidiwu kumuchimaku. Mazu ahosheliyi amwekesheleña nawu wakuhweleleli nindi Davidi wamwimeneneñaku Yehova nawa waasileña “njita jaYehova.” Washimwini cheñi nindi welukili chakaniniyi Yehova nindi wukamwinka Davidi wanta, muloña welili nindi: “Yehova . . . nakukunjiki dehi kwikala nlomboli yawaIsarela.” Kubombelahu, wamulembeleli Davidi kulonda yabuli kwila chuma chikumuleñela yekali namuloña wamashi hela kwila ‘chuma chakumuneñesha,’ hadaha wateneneña hakwikala nachinleji chamuchima chikumukabishaña. (Tañenu 1 Samweli 25:24-31.) Awa mazu amawahi amushikili hamuchima.

19. Indi Davidi welili ñahi namazu amulejeliyi Abigayili, nawa muloñadi chamuhamekeleliyi?

¹⁹ Chumanyi cheliliyi Davidi? Wetejeli yuma yaleteliyi Abigayili nawa wahosheli nindi: “Kisu kisu Yehova Nzambi yaIsarela nakutemeshi lelu nindi wumbulakani. Maana eyi ayikiswili nkisu, nineyi aweni akukiswili nkisu, yeyi wunanlekeshi nikumwaña mashi lelu.” Davidi wamuhamekeli hawulobu wamwekesheliyi hakunyakala kumubulakana, nawa wahosheli nindi wamulekesheli kumwaña mashi. Wamulejeli nindi, “Yaña kweyi kwitala deyi chachiwahi” nawa wahosheli cheñi nindi: “Natiyi dehi mwizu deyi.”—1 Sam. 25:32-35.

20, 21. (a) Chumanyi chayikomweshaña chelili Abigayili yafunti kudi nfumwindi? (b) Indi Abigayili wamwekesheli ñahi wulobu nikashinshi hakutonda mpinji yayiwahi yakuhosha naNabali?

²⁰ Chelili nayi dehi, Abigayili watela watoñojokeleña chahanjekeluwu nawa wamweni chaambu chadiña hadi Davidi muntu washinshika nawa waluwi nanfumwindi watama muchima. Ilaña hatwalekeluhu kutoñojoka hayumiyuku. Twatañaña nawu: “Abigayili hakwinza kudi Nabali.” Hakwikala mumbanda wasumbuka, wafuntili kudi nfumwindi nawa watwalekeluhu kukalakala nyidimu yindi hakumina ñovu jindi. Wateleli kumuleja Nabali hayawana yamwinkeliyi Davidi niantu jindi. Nabali wateleli kwiluka. Wateleli cheñi kumuleja nfumwindi hakukala kwaleteliyi, henohu kanda yatiyili kudi antu acheñi, muloña chumichi chadi kuleta nsonyi chikupu. Hela chochu, hateleleli kumuleja haniyi mpinjuku. Wadiña nakudya chawija neyi mwanta nawa washeteli nankashi.—1 Sam. 25:36.

²¹ Wamwekesheli cheñi wulobu nikashinshi hakuhembelela kushika nintetemena chashetulukiliyi nfumwindi. Muloña wadiña mumesu achaaña wadi kutiya chashimwineñayi ñodindi, ilaña hichadiña chaswayuku muloña wahilileña swayi. Hela chochu, wamulejeli nsañu yejima yamwekeni. Chakadi nikujina wakuhweleleli nindi wukuhila, hadaha nikumweta. Ilaña washakamini tuhu ngungwa-a, chakadi nikudinyinkesha.—1 Sam. 25:37.

22. Chumanyi chamumwekeneni Nabali, nawa tunateli kudizila kwodi hadi antu akabishaña eni kwawu?

²² Chumanyi chamumwekeneni iwu iyala? “Muchima windi mwivumu wumufwa nipuchi, hakubalumuka neyi chikwelola.” Hadaha wakatili chikatu chakalepa. Hela chochu, chimwahitili mafuku ikumi wafwili, bayi neyi wafwili nachikatuku. Bayibolu yatulejaña nawu: “Yehova hakumweta Nabali, yofwa nikufwa.” (1 Sam. 25:38) Chamutendeluwu munjila yaloña, kukala kwamweneñayi Abigayili mumaluwi kwamanini. Hela chakwila Yehova hamwinaña antu jindi makonu kuhitila mukujahana muchihayamishaku, iyi nsañu yatulejaña chikupu nawu Nzambi wamonaña antu akabishaña eni kwawu. Yehova waletaña wuñaji hampinji yatelela.—Tañenu Luka 8:17.

23. Nkiswinyi yikwawu yatambwililiyi Abigayili, nawa wamwekesheli ñahi nawu hahimpili yililu yindi chelukiliyi nindi wakekala ñoda Daviduku?

²³ Abigayili amukiswilili cheñi chelili yalubuki kudi iyala watama. Chatiyiliyi nawu Nabali nafwi, Davidi watemesheli antu nindi amwihwili Abigayili. Wakwili nindi: ‘Tala  ami kambuñeyi ninduñu yambala yakuweleshaña nyendu yambala yawambuña mwanta wami.’ Chakadi nikujina, hahimpili yililu yindi chelukiliyi nindi wakekala ñoda Daviduku; wadihanini kwikala nduñu yawambuñindi. Twatañaña cheñi nawu wanyakeli kudiloñesha kulonda yayi kudi Davidi.—1 Sam. 25:39-42.

24. Abigayili wamweni kukalanyi mumaluwi indi amaha, nawa nfumwindi niNzambi yindi wamumweneña ñahi?

²⁴ Chumichi hichayili mukwila nawu chasumbukiliyi naDavidi hamweneña kukalaku. Davidi wadiña namumbanda mukwawu Ahinowami. Hela chakwila Nzambi wetejeli wuhadi, ambanda ashinshika akunyima amweneña kukala. Nawa Davidi wachidiña kanda yekali mwanta, nawa wadi kumona kukala henohu kanda yatachiki kumukalakela Yehova neyi mwanta. Abigayili wamukwashileña Davidi muchihandilu chindi chejima nawa wamuvweleli mwana weyala, welukili nindi wasumbukili neyala wamulemesheli nawa wamukiñileña. Hampinji yimu wamupulwishili kudi akwakulukuka. (1 Sam. 30:1-19) Dichi Davidi wamwimbujoleli Yehova Nzambi wakeña nawa walemesha ambanda amaana, omika nawa ashinshika.