1, 2. Indi nkoñi wumu wendaña wamonaña ñahi antu atenawu muBayibolu adiña nachikuhwelelu, nawa muloñadi awa antu chiyatela kwikala amabwambu amawahi?

HANYIMA yakutiyilila mpanji yawantu amavulu yahanini nkoñi wendaña wakula dehi, mumbanda mukwaKristu wahosheli nindi: “Wahoshaña hadi antu ashimunawu muBayibolu neyi kwiji hiyamabwambu jindi amakulu.” Eñañi, iwu mana kwetu wadiza Izu daNzambi hadi yaaka yayivulu nankashi nawa wazatishaña Bayibolu hakutañisha antu, chakwila neyi nakuhosha hadi amayala niambanda adiña nachikuhwelelu atenawu muBayibolu, watiyakanaña neyi nakuhosha hadi amabwambu jindi amakulu.

² Komana antu atenawu muBayibolu hiyanateli kwikala amabwambu jenu amawahuku? Komana mwayimonaña nenu hiyantu imwatela kukwata nawu wubwambu? Fwikijenu chimwatela kutiya neyi munakwenda nikuhanjeka nawu mpinji yeneni kulonda muyiluki awa amayala niambanda adi neyi Nowa, Abarahama, Luti, Elija niEsita. Fwikijenu awa antu chiyanateli kuyikwasha muchihandilu chenu, kuyifumba nikuyikolesha namazu awu amawahi.—Tañenu Yishimu 13:20.

3. (a) Tunateli kuhetelamu ñahi mukudiza nsañu yahosha hadi amayala niawambanda adiña nachikuhwelelu atenawu muBayibolu? (b) Tukuhanjeka hamalwihwinyi?

³ Kafwampi, hampinji ‘yakasañulawu antu aloña,’ kwakekala wulunda wawuwahi wamuchidiwu. (Yil. 24:15) Hela chochu, niyinu mpinji tunateli kuhetela mukudiza nsañu yahosha hadi amayala niawambanda achikuhwelelu atenawu muBayibolu. Munjilanyi? Kapostolu Petulu wakwili chiwahi nindi: ‘Ikalenu akwakwimbujola akuswana yikaninu nakukuhwelela nakudiwunjika.’ (Heb. 6:12) Chitukudizaña nsañu yahosha hadi amayala niambanda adiña nachikuhwelelu, tushinshikenu hamalwihu antesha atukwashaña kutoñojoka hamazu aPawulu: Indi chikuhwelelu hichumanyi nawa muloñadi wutwatela kwikala nachikuhwelelu? Tunateli kwimbujola ñahi antu atenawu muBayibolu?

4. Indi antu atoñojokaña nawu chikuhwelelu hichumanyi, nawa muloñadi chatoñojokelañawu mwaluwa?

⁴ Chikuhwelelu hichililu chachiwahi hama, chililu chalemesheluwu chikupu amayala niambanda ejima itukudiza muwunu mukanda. Antu amavulu eluka wanyi mwatalisha chikuhwelelu, atoñojokaña nawu hikukuhwelela hohu chakubula kumona wunsahu walala. Kafwampi atoñojokaña mwaluwa. Kwikala nachikuhwelelu hikwatalisha mukwila nawu muntu yakumini dakukuhwelela hohuku. Kukumina dakukuhwelela hohu kwatama. Muntu  nateli kukuhwelela lelu chikukucha nehi, nikwitiya hohu nawu Nzambi wekala kwoku kwashikilamu wanyi muloña ‘andemoni niwena etiyaña, hiyakuzaala nikuzaala.’—Yak. 2:19.

5, 6. (a) Chikuhwelelu chetu chashindamena hayumanyi yiyedi yitwabulaña kumona? (b) Indi chikuhwelelu chetu chatela kukola ñahi? Lumbululenu.

⁵ Kwikala nachikuhwelelu hikwatalisha mukwila nawu muntu yakumini dakukuhwelela hohuku. Anukenu Bayibolu chiyalumbulula chikuhwelelu. (Tañenu Aheberu 11:1.) Pawulu wahosheli nindi chikuhwelelu chashindamena hayuma yiyedi yitwabulaña kumona. Chatachi, chikuhwelelu chashindamena hayuma yalala yamakonu “yakadi kumonewa.” Mesu etu hiyanateli kumona yuma yalala yekala mwiwulu, chidi neyi Yehova Nzambi, Mwanindi hela Wanta wunakuyuula mwiwulu chayinu mpinjuku. Chamuchiyedi, chikuhwelelu chashindamena hayuma “yalala yitwachiñejaña” yichidi kanda yimwekani. Hitunateli kumona ituña dadiha dinakuleta Wanta waNzambi katatakaku. Komana chumichi chinayi mukwila nawu kwosi wunsahu walala niyuma yitwachiñejañaku?

⁶ Inehi. Pawulu walumbulwili nindi chikuhwelelu chalala chashindamena hachikuku chakola. Chahosheliyi nindi chikuhwelelu ‘hikutalila yuma yalala,’ wazatishili nhoshelu yatela kutenawu nawu ‘hitayito didi.’ Fwikijenu muntu nafuukuluhu kuyinka itala. Nateli kuyinka chipapilu chetala nakuhosha nindi, “Itala denu dadiha idi.” Hela chochu, bayi neyi natalishi mukwila nindi mukushakamaña hachina chipapiluku; ilaña natwali mukwila nindi ichi chipapilu hiwunsahu wunakumwekesha chikupu nawu itala dinekali denu muloña neyi mudi nachipapilu hohamu nakuheta itala. Chochimu, chikuhwelelu chetu chatuleñelaña kukuhwelela netu yuma yejima yakanayi Nzambi Mwizu dindi yashikijewa dehi.

7. Indi chikuhwelelu chalala chakeñekañadi?

⁷ Dichi chikuhwelelu chalala chashindamena hayuma yitwakuhwelela niyuma yejima yitweluka hadi Yehova Nzambi. Chikuhwelelu chatukwashaña kumumona netu hiTata yetu wukweti kukeña nikukuhwelela netu yikaninu yindi yejima yikashikijewa. Hakwila twikali nachikuhwelelu chalala twatela kwiluka yuma yayivulu. Chikuhwelelu chakeñekaña kuchikolesha neyi chakeñañayi muntu kudya hakwila yahandi. Twatela kuchimwekeshela munyidimu, mukunkulwayi chikufwa.—Yak. 2:26.

8. Indi chikuhwelelu chalemenadi?

⁸ Indi chikuhwelelu chalemenadi? Pawulu washimwini ñakwilu yatiyakana. (Tañenu Aheberu 11:6.) Neyi hitukweti chikuhweleluku, hitunateli kukundama kudi Yehova hela kumuzañaleshaku. Dichi chikuhwelelu chalema nankashi neyi tunakukeña kwila chuma chachiwahi chatela kwilayi muntu wejima wukweti maana: kukundama nikumulemesha Tata yetu wamwiwulu, Yehova.

9. Indi Yehova wamwekeshaña ñahi nindi weluka nindi twatela kwikala nachikuhwelelu?

⁹ Yehova weluka nindi twakeñaña kwikala nachikuhwelelu chikupu, dichi watwinka yakutalilahu yatudizishaña chitwatela kwikala nachikuhwelelu nikuchimwekesha. Waloñesha chipompelu chawakwaKristu mwekala  yakutalilahu yawantu ekala nachikuhwelelu alombolaña. Izu dindi dahosha nawu: ‘Imbujolenu chikuhwelelu chawu.’ (Heb. 13:7) Nawa watwinka yuma yayivulu. Pawulu wasonekeli hadi ‘izaza deneni dawayinsahu,’ amayala niambanda akushankulu atwimikila chakutalilahu chachiwahi chakwikala nachikuhwelelu. (Heb. 12:1) Kwekala ambuña Yehova ashinshika amavulu kubadika atenayi Pawulu mumukanda waAheberu kapetulu 11. MuBayibolu mwekala nsañu yayivulu yahosha hadi amayala niambanda, atwansi niakulumpi akweti yihandilu yashiyashana amwekesheli chikuhwelelu chikupu nawa nsañu yawu yinateli kutudizisha yuma yayivulu mukanu kaayi mudi antu abula chikuhwelelu.

10. Indi kudiza nkawetu kunateli kutukwasha ñahi kwimbujola amayala niambanda ashinshika atenawu muBayibolu?

¹⁰ Himunateli kumwimbujola muntuku chiña neyi mumushinshika chikupu. Chimukutañaña mukanda wunu, mukumona nenu anasandujoli chikupu kulonda ayikwashi kushinshika chikupu awa amayala niambanda adiña nachikuhwelelu. Tunayikoleshi netu chimukutañaña musandujoli nankashi haniyi nsañu yawamayala niambanda adiña nachikuhwelelu. Chimukudizaña nkawenu sandujolenu chikupu muBayibolu kuzatisha nyikanda yikwawu yimukweti. Hampinji yimunakutoñojoka chikupu hansañu yimunakudiza, esekenu kufwikija iluña ninsañu yinakundami kunsañu yinatenuwu muBayibolu. Fwikijenu nenu munakumona iluña, munakutiya yivuminu, epulenu ivumba neyi kwiji mudi kwoku. Sweje-e dinu, esekenu kutiya chatiyileñawu antu anashimunuwu. Chimwatiya neyi chatiyileñawu awa amayala niambanda ashinshika mukuyiluka chikupu, amakwawu anateli kwikala neyi amabwambu jenu amakulu.

11, 12. (a) Munateli kukundama ñahi kwakwihi naAbarama naSarayi? (b) Munateli kuhetelamu ñahi muchakutalilahu chaHana, Elija niSamweli?

¹¹ Neyi muyiluka chikupu mukufwila kuyimbujola. Chakutalilahu, fwikijenu munakutoñojoka kutachika kuzata mudimu wawuha. Kuhitila mukuloñesha kwaYehova, anayileji kuzata nañovu mumudimu wakushimwina munjila jamboka-mboka. Hadana anayileji kuya nakuzatila swayi-swayi kwiluña kunakukeñeka akwakushimwina amavulu, hela anayileji kuzatisha njila jakushimwinamu jimwabula kwiluka hela jimwabula kukeña. Chimukutoñojokaña hamudimu nikulombelahu, chikuyikwasha neyi mutoñojoka chikupu hachakutalilahu chaAbarama. Abarama naSarayi etejeli kushiya chihandilu chawu chachiwahi muUri nawa ayikiswilili. Neyi mwila yuma yelileñawu, chakadi nikujina mukwiluka nenu munayiluki nankashi.

¹² Munateli kutiya ñahi neyi muntu imwadikunda nindi yayila katama nawa muneña chakwila himunakukeña kuya nakupompaku? Neyi mutoñojoka chakutalilahu chaHana nichabuliliyi kwiteja yililu yaPenina yimukañeshi kudifukula kudi Yehova, chikuyikwasha kufuukulahu  chiwahi nawa Hana wukwikala ibwambu denu chikupu. Neyi munaneñi muloña munakutoñojoka nenu mwashikilamu wanyi, munateli kukundama kwakwihi naElija chimukudizaña hakukala kwamweniyi nichamukundejeluwu kudi Yehova. Nawa atwansi amonaña ikakeja dawakwawu akashikola elaña yuma yatama anateli kukundama kwakwihi naSamweli hanyima yakudiza cheliliyi nayuma yatama yakoñeleña anyana kaEli hatabanaka.

13. Komana kwimbujola chikuhwelelu chawantu atenawu muBayibolu, kukuleñela chikuhwelelu chenu kwikala chamukunkulwayi? Lumbululenu.

¹³ Komana kwimbujola chikuhwelelu chawantu atenawu muBayibolu, kukuleñela chikuhwelelu chenu kwikala chamukunkulwayi? Inehi. Anukenu nenu, Izu daYehova datukoleshaña kwimbujola antu akweti chikuhwelelu. (1 Kor. 4:16; 11:1; 2 Tesa. 3:7, 9) Kubombelahu, antu amakwawu itukudiza muwunu mukanda embujoleli chikuhwelelu chawantu ashinshika adiñaku henohu wena kanda. Chakutalilahu, mukapetulu 17 kawunu mukanda tukadiza hamazu ahosheliyi Mariya amwekeshaña nawu hadaha wahosheli mazu aHana, nawa wamumweneña neyi hichakutalilahu chatela kwimbujolayi. Komana chumichi chamwekeshaña nawu Mariya hadiña nachikuhwelelu chakolaku? Inehi. Ilaña chakutalilahu chaHana chamukwashili Mariya kukolesha chikuhwelelu chindi kulonda yekali nejina dadiwahi naYehova Nzambi.

14, 15. Yumanyi yikwawu yidi muniwu mukanda nawa tunateli kuyizatisha ñahi?

¹⁴ Iwu mukanda anawusoneki kulonda wuyikwashi kukolesha chikuhwelelu chenu. Tupetulu tunalondeluhu tunafumi muyibaaba yatachikili kusonekawu muyibaaba yaKaposhi Kakutalila ka 2008 nakushika mu 2013, yinakwila nawu “Imbujolenu Chikuhwelelu Chawu.” Hela chochu, anasonekumu nsañu yikwawu. Kapetulu kadi kejima kakweti malwihu atela kutukwasha kuhanjekahu nikuzatisha nsañu yitunadizi. Anashumu nyevulu yayiwahi yayivulu muniwu mukanda nawa yayikulu anayitoheshi nikuyiwahisha. Mudi cheñi yuma yatela kutukwasha yidi neyi mpinji yamwekeni yuma nijimapu. Mukanda wunakwila nawu Imbujolenu Chikuhwelelu Chawu, anawusoneki kulonda tuwuzatisheña hakudiza nkawetu, kudiza kwachisaka nikudiza hachipompelu. Yisaka yayivulu yinateli cheñi kudiluñisha kutañila hamu jimpanji chatiyakana.

¹⁵ Dichi wunu mukanda wuyikwashi kwimbujola chikuhwelelu chawambuña Yehova ashinshika akushankulu. Nawa wuyikwashi kulonda mwikali nachikuhwelelu chakola hampinji yimunakukundama kwakwihi naTata yenu wamwiwulu, Yehova.