1, 2. (a) Indi Mariya amwimushili ñahi kudi mwenyi? (b) Chumanyi chafuukwiliyi Mariya nawa chihandilu chindi chahimpili munjilanyi?

MARIYA wahayamini chamweniyi mwenyi weñilili mwitala dawu. Hakeñeleña tata yindi hela mama yinduku. Wamwendeleli yena. Welukili chikupu nindi hanafumi kuNazaretaku. Mumusumba wanyanya chidi neyi musumba wawu enyi ashikeneneña dakuyiluka. Iwu mwenyi wadiña wambukaku hama. Wahosheli naMariya munjila yambukaku nindi: “Kolaku, eyi anakutiyili luwi lwakubadika, Yehova wudi naneyi.”—Tañenu Luka 1:26-28.

² Bayibolu dichiyatulejaña hadi Mariya, mwana kaHeli, wamumukala waNazareta muÑaliliya. Nsañu yamuBayibolu yahosha hadi Mariya yatachikila hampinji yafuukwiliyi chuma chalema chikupu. Mariya amoteli kudi Yosefu mukwakusoña, bayi neyi wadiña samahetaku ilaña wadiña muntu wamukuhweleleli Nzambi chikupu. Hadaha wakuhweleleli nindi chihandilu chindi chikekala chapela, wakazataña nikumukwasha nfumwindi Yosefu hakwakamena chisaka chawu hamu. Hela chochu, iwu mwenyi wamwendeleli wamwinkeli mudimu wafumini kudi Nzambi, nawa mudimu weniwu wahimpili chihandilu chindi.

3, 4. Hakwila nawu tumwiluki Mariya, yumanyi yitwatela kudiwula, nawa twatela kushinshika hayumanyi?

³ Antu amavulu ahayamaña hakwiluka nawu Bayibolu yatuleja wanyi nsañu yayivulu hadi Mariya. Yatuleja nsañu yantesha hohu hankulilu yindi, yililu yindi nawa yatuleja wanyi chamwekenañayi. Ilaña, nsañu yashimunawu Mwizu daNzambi hadi Mariya yalema nankashi.

⁴ Hakwila nawu tumwiluki Mariya, twatela kushinshika yuma yayivulu kubadika hayuma yayivulu yatañishaña yipompelu hadi Mariya. Dichi bayi tusha maana hanjila jiyamulumbulwilañamu Mariya kudi antu amavuluku. Twatela cheñi kudiwula ntañishilu yamuyipompelu yamulemeshaña iwu mumbanda wadizoza yakwila nawu “Mama yaNzambi” nawa nawu “Mwanta waMumbanda waMwiwulu.” Ilaña twatela kushinshika hayuma yahosha Bayibolu. Yatulejaña nsañu  yalema hachikuhwelelu chindi nichitwatela kwimbujola chikuhwelelu chindi.

5. (a) Yumanyi yitunateli kudizila kuchuma cheliliyi Mariya chamwimushiluwu kudi Gabireli? (b) Chumanyi chalema chitunateli kudizila kudi Mariya?

⁵ Mwenyi wamwendeleli Mariya hadiña muntuku. Wadiña kañelu Gabireli. Chamuteneniyi nindi ‘eyi anatiyiluwu luwi lwakubadika,’ Mariya ‘wakameneni nankashi’ hanawa mazu nawa watoñojokeleña chamwimushiluwu muniyi njila. (Luka 1:29) Amutiyilili luwi kudinyi? Mariya wakuhweleleli wanyi nindi anateli kumulemesha kudi akwawu antu neyi mwana kasamaheta waya mpuhu. Ilaña kañelu wahosheli nindi amulemesheli kudi Yehova Nzambi. Walemesheli chumichi. Hela chochu, hadinkeli wanta nindi wudi dehi nawuselewa waNzambuku. Chakutalilahu chaMariya chatudizishaña nawu twatela kuzata nañovu hakwila twikali nawuselewa waNzambi nawa bayi tudinka wanta nakumona netu twekala dehi nawuselewa waNzambuku. Nzambi wadikañaña nawakwakudinka wanta, ilaña wakeña nawa wakwashaña akwakudizoza.—Yak. 4:6.

6. Indi kañelu wamwinkeli Mariya mudimwinyi walema?

⁶ Eñañi, Mariya wateleleli kudizoza muloña kañelu wamwinkeli mudimu walema. Walumbulwili nindi Mariya wukavwala mwana wukekala walema nankashi hadi antu ejima. Gabireli wahosheli nindi: “Yehova Nzambi wakamwinka itanda datata yindi Davidi dawanta; wakekala mwanta wakumutaña waYakoba haya nyaka; wanta windi hiwamba kakumaku.” (Luka 1:32, 33) Chakadi nikujina Mariya welukili chikaninu chaNzambi chamukaninuwu Davidi henohu kuchidi yaaka 1,000, nindi mwanindi wumu wakayuula haya nyaka. (2 Sam. 7:12, 13) Dichi mwanindi wukekala Mesiya watalilileñawu antu jaNzambi hayaaka yayivulu.

7. (a) Indi lwihu lwehwiliyi Mariya lwamwekesheli nawu wadiña nayililu yamuchidinyi? (b) Indi atwansi makonu anateli kudizila kwodi kudi Mariya?

⁷ Sweje-e dinu, kañelu wamulejeli Mariya nindi mwanindi “akamutena nawu Mwana kaMukwakubadika.” Indi mumbanda nateli kuvwala ñahi Mwana kaNzambi? Mwamweni, indi Mariya nateli kuvwala ñahi mwana? Amoteli kudi Yosefu ilaña wadiña kanda yamusumbuli. Dihafumini Mariya kumwihula chakubula kuhita mumbadi nindi: ‘Chumichi chikutwesheka ñahi, chineli kanda nikameñahu dehi neyala?’ (Luka 1:34) Ilukenu nenu Mariya washimwini nindi kanda yakameñahu dehi neyala chakubula kutiya nsonyi. Chatela yatiyi nsonyi, Mariya wahosheli namuzañalu nindi wachidiña kanda yadimoneñahu  dehi neyala. Makonu, atwansi amavulu adikamaña nawa asehaña akwawu abulahu dehi kudikama. Chalala kaayi kanahimpiki. Hela chochu, Yehova habalumukañaku. (Mal. 3:6) Neyi chochadiña mumafuku aMariya, walemesha antu akakelaña kunshimbi jindi jaloña.—Tañenu Aheberu 13:4.

8. Indi Mariya wavwalili ñahi mwana wawanina hela chakwila hadiña wawaninaku?

⁸ Hela chakwila wadiña kambuña Nzambi washinshika, Mariya hadiña wawaninaku. Hanu dinu wadi kuvwala ñahi mwana wawanina, Mwana kaNzambi? Gabireli walumbulwili nindi: ‘Spiritu yajila yakenza hadeyi; ñovu jaMukwakubadika jakakuzeñamina; dichi mwana iwakavwala akamutena nawu wajila, Mwana kaNzambi.’ (Luka 1:35) Kujila kwalumbuluka nawu “kutooka.” Anvwali asambwishaña anyanawu kubula kuwanina. Hakwili ichi chuma chizatiki, Yehova wakoñeli chihayamisha chadimena. Watuntulwili wumi waMwanindi kufuma mwiwulu nakuwisha mwivumu daMariya nawa wazatishili ñovu yindi yazatikaña hela spiritu yajila, ‘kumuzeñamina’ Mariya, kulonda mwana yabuli kwikala nehuji didi dejima danshidi. Komana Mariya wakuhweleleli yuma yamukaninuwu kudi kañelu? Welilidi?

9. (a) Muloñadi akwakudiwula chaluwañeshañawu hakujinoka nsañu yaMariya? (b) Gabireli wakolesheli ñahi chikuhwelelu chaMariya?

⁹ Antu amavulu kushilahu niakwakusandujola hadi Nzambi amuKristendomu, ajinokaña nawu muntu wabulahu dehi kukama neyala hanateli kuvwala mwanaku. Hela chakwila ataña chikupu akañanyaña kutiyishisha nsañu yalala nawa yapela. Neyi chahosheliyi Gabireli nindi, ‘kwosi chuma chahoshañayi Nzambi chabulaña kushikijewaku.’ (Luka 1:37) Mariya wetejeli mazu amulejeliyi Gabireli nindi alala, muloña wadiña chañadima wachikuhwelelu chikupu. Hela chochu, chikuhwelelu chadiñayi nachu hichatalishili mukwila nawu wakuminineña dakwiteja hohuku. Neyi chochekala muntu wejima watoñojokaña, Mariya wakeñeleña wunsahu watela kukuhwelelayi. Dichi Gabireli wamulejeli Mariya wunsahu wukwawu. Wamulejeli nsañu yantaña yindi Elizabeta wadiña kashinakaji, elukiluwu hampinji yayilehi nawu wadiña nshinta. Nzambi wamuleñeleli kwimita muchihayamisha.

10. Muloñadi wutukubula kutoñojoka netu Mariya wadiña wahamuka washikeneni dakwiteja kukalakala mudimu windi?

¹⁰ Hanu dinu Mariya welilidi? Wadiña namudimu wateleleli kukalakalayi nawa wakuhweleleli nindi Nzambi wakakoña yuma yejima yahosheliyi Gabireli. Bayi tutoñojoka netu Mariya wadiña wahamuka washikeneni dakwiteja kukalakala iwu mudimuku. Kafwampi amoteli kudi Yosefu, dichi wateleleli kutoñojoka haniyi nsañu. Komana Yosefu wukukeña kumusumbula neyi yeluka nindi wudi nevumu? Cheñi  nawa mudimu weniwu wadiña wakala. Wateleleli kuhemba Mwana kaNzambi, wakeñeliyi nankashi nawa walema chikupu hayileñaleña yindi yejima. Wateleleli kumwakamena hampinji yachidiñayi nkemba nikumukiña mukaayi katama. Eñañi, wadiña mudimu wakala.

11, 12. (a) Indi antu ahamuka nawa ashinshika mpinji yikwawu elilidi namudimu wakala wayinkeluwu kudi Nzambi? (b) Indi Mariya chamwakwiliyi Gabireli wamwekesheli nindi wadiña muntu wamuchidinyi?

¹¹ Bayibolu yahosha nawu niantu ahamuka nawa ashinshika mpinji yikwawu ashintajalili kwiteja mudimu wakala wayinkeliyi Nzambi. Mosi wakaanini nindi heluka kuhosha chiwahi chakwila yakalakali neyi mukwakumuhoshelaku Nzambuku. (Kwid. 4:10) Yeremiya wakaanini nindi wadiña “kansi” hakutwesha kukalakala mudimu wamwinkeliyi Nzambuku. (Yere. 1:6) Yona niyena watemukili mudimu windi. (Yona 1:3) Hanu dinu Mariya welilidi?

¹² Nimakonu antu ejima akweti chikuhwelelu eluka chetejeliyi munjila yakudizoza nikwovwahila. Wamulejeli Gabireli nindi: ‘Tala ami kambuñambala kaYehova wamumbanda; mwonsu muwunahoshi mumwekani kudami.’ (Luka 1:38) Kambuña wamumbanda wadiña ñamba wakehelamu nankashi; chihandilu chindi chejima chashindameneni hadi mwanta windi. Mariya wamukuhweleli chikupu Mwanta windi, Yehova. Welukili nindi wukumukiña, wekala washinshika kudi antu amwovwahilaña, nawa nindi wakamukiswila hampinji yakadikitañayi iwu mudimu wakala.—Mas. 18:25.

13. Chakutalilahu chaMariya chinateli kutukwasha ñahi neyi tumona netu mudimu wunatwinkiyi Nzambi wakala nawa hitukutwesha kuwuzataku?

¹³ Mpinji yikwawu Nzambi watwinkaña mudimu wamwekanaña neyi wakala nawa hitukutwesha kuwuzataku. Hela chochu, watwinka wunsahu wawuvulu Mwizu dindi watela kutuleñela kumukuhwelela chikupu neyi cheliliyi Mariya. (Yish. 3:5, 6) Komana tukumukuhwelela Yehova? Neyi tumukuhwelela wamba katukiswila, watwinka yuma yayivulu yikutuleñela kumukuhwelela chikupu.

14, 15. (a) Indi Yehova wamukiswilili ñahi Mariya chayiliyi nakuyihempula aElizabeta naZekariya? (b) Indi mazu aMariya asonekawu haLuka 1:46-55 amwekeshaña nawu wadiña muntu wamuchidinyi?

¹⁴ Mazu amulejeliyi Gabireli hadi Elizabeta amukwashili Mariya chikupu. Hadi ambanda ejima amukaayi, welukili nindi Elizabeta diyi wunateli kutiyishisha chatiyileñayi muloña niyena wemitili muchihayamisha. Mariya wanyakeli kuya kwituña damapidi kuYuda, hadaha wendeli lwendu lwamafuku asatu hela awana. Cheñililiyi mwitala  daElizabeta nakapristu Zekariya, Yehova wamulejeli Mariya wunsahu wukwawu wakolesheli chikuhwelelu chindi. Elizabeta watiyili chamwimushiluwu kudi Mariya, hohenohu mwana wadiñi mwivumu dindi hakutuntoka namuzañalu. Wenzeli spiritu yajila nawa wamuteneni Mariya nindi “mama yaMwanta wami.” Nzambi wamulejeli Elizabeta nindi mwana kaMariya wakekala Mwanta windi, Mesiya. Kubombelahu, amoneneni kulonda yamuhameki Mariya hakwikala wovwahila nawa washinshika nindi: ‘Mumbanda wakuhwelela nakooleki.’ (Luka 1:39-45) Eñañi, yuma yejima yamukaninuwu Mariya kudi Yehova yashikijeweli.

¹⁵ Mariya niyena wahosheli. Mazu ahosheliyi ayisoneka Mwizu daNzambi. (Tañenu Luka 1:46-55.) Diwu mazu amavulu ahosheliyi  Mariya asonekawu muBayibolu nawa amwekeshaña yuma yayivulu hadi yena. Mazwindi amwekeshaña nawu wamuhamekeli Yehova chikupu hakumwinka kukooleka kwakwikala mama yaMesiya. Amwekeshaña nawu wamukuhweleleli Yehova chikupu chahosheliyi nindi wababeshaña adinkaña wanta niakwañovu nawa wakwashaña adizoza niatuzweñi afwilaña kumukalakela. Amwekeshaña cheñi nawu wadiña weluka chikupu nyikanda yajila. Kwesekeja nakuchinda kumu, wateneni Nyikanda yachiHeberu kapampa 20. *

16, 17. (a) Indi Mariya nimwanindi amwekesheli yililwinyi yitwatela kwimbujola? (b) Mariya chamuhempwiliyi Elizabeta chatwanukishaña nkiswinyi?

¹⁶ Mwamweni, Mariya watoñojokeleña chikupu Hezu daNzambi. Wadiña wadizoza muloña wafuukwiluhu kuhosha hansañu yamuNyikanda yajila chatela yahosheña hayuma yatoñojokeleñayi yomweni. Mwanindi wadiña mwivumu hayina mpinji niyena wamwekesheli yililu yoyimu yakudizoza, hakuhosha nindi: ‘Yuma yinatañishaña hiyamami awenuku, yambala yanona wantemesheli.’ (Yow. 7:16) Dichi twatela kudihula netu: ‘Komana nalemesha chikupu nikwakama Izu daNzambi? Tahindi nakeñaña yitoñojoka nintañishilu yami?’ Mariya wadiña nayitoñojoka yayiwahi.

¹⁷ Mariya washakamini naElizabeta kwakwihi natukweji tusatu, chakadi nikujina adikolesheleña nankashi. (Luka 1:56) Nsañu yamuBayibolu yahosha hadi Mariya chayiliyi nakuhempula yatwanukishaña hankisu yafumaña mukukwata wubwambu. Neyi tukwata wubwambu nawantu amukeña Yehova Nzambi yetu, tukupama kuspiritu nawa tukukundama kwakwihi nayena. (Yish. 13:20) Nkumininaku, Mariya wafuntili kumukala wawu. Indi Yosefu wadi kwiladi chelukayi nindi Mariya wudi nevumu?

18. Indi Mariya wamulejeli Yosefu nsañwinyi nawa Yosefu welilidi?

¹⁸ Chakadi nikujina Mariya hahembeleleli nindi antu eluki nawu wudi nevumu mwaka dinu yamulejeña Yosefuku. Ilaña wateleli kumulejamu Yosefu. Henohu kanda yamulejumu, watela watoñojokeleña chikwilayi iwu muntu wamwakama Nzambi hansañu yikumulejayi. Hela chochu, wayili nakumuleja yuma yejima yamumwekeneni. Neyi chimuneluki, Yosefu watela waluwankeni chikupu. Wakeñeleña kumukuhwelela iwu chañadima akeñeliyi, ilaña wamweni nindi wadiña washinshika wanyi. Bayibolu hiyahosha hayuma yatoñojokeleñayi Yosefu mumuchima winduku. Ilaña yahosha nawu wafuukwiluhu kumuseña, muloña hayina mpinji antu adota ayimweneña neyi adisumbula dehi. Hela chochu, hakeñeleña kumutiyisha nsonyi kudi antu nawu  neli wuvumbuku, dichi wafuukwiluhu kumuseñela kumbadi. (Mat. 1:18, 19) Mariya waneñeli chikupu hakumona iwu muntu wamuwahi chalulutileñayi hakutiya iyi nsañu. Ilaña, Mariya hamutwikili Yosefu muloña hakubula kumukuhwelelaku.

19. Indi Yehova wamukwashili ñahi Yosefu kwila chuma chachiwahi?

¹⁹ Yehova wamukwashili Yosefu chiwahi kulonda yakoñi chuma chachiwahi. Kañelu kaNzambi wamulejeli Yosefu kuhitila muchilota nindi Mariya wemitili muchihayamisha. Chumichi chamuleñeleli Yosefu kutulisha muchima. Yosefu welili chuma chelili Mariya hakusambila, welili chuma chakeñeleñayi Yehova nindi yeli. Wamusumbwili Mariya nawa wadiloñesheli kukalakala mudimu wadimena wakwakamena Mwana kaYehova.—Mat. 1:20-24.

20, 21. Antu adisumbula hela anakukeña kudisumbula anateli kudizilaku yumanyi kudi Yosefu naMariya?

²⁰ Antu adisumbula hela anakukeña kudisumbula atela kudizila kuyuma yeliliyi Yosefu naMariya adiñaku yaaka 2,000 yinahituhu. Yosefu chamweneñayi ñodindi wachidiña kansi nakukalakala nyidimu yindi neyi mama yawantu, watela wazañaleli hachuma chamulejeluwu kudi kañelu kaYehova kwila. Yosefu welukili kulema kwakushindamena hadi Yehova neyi nakufuukulahu yuma yalema. (Mas. 37:5; Yish. 18:13) Chakadi nikujina, wadiña wasoñama nikutiya luwi hakufuukulahu yuma neyi mutu wachisaka.

²¹ Nawa chumanyi chitukudizila kudi Mariya wetejeli kusumbuka naYosefu hela chakwila wamujinokeli? Hela chakwila hakusambila chamukalilili kutiyishisha nsañu yamulejeliyi, Mariya wadiwunjikili nakumutalila kulonda Yosefu yafuukuluhu mwakwilila muloña diyi wadi kwikala mutu wachisaka. Chalala wadizili chuma chachiwahi, chatela kudizawu ambanda akwaKristu makonu. Nkumininaku, iyi yuma yayidizishili aYosefu naMariya kulema kwakuhanjeka chakubula kuhita mumbadi nawa nakashinshi.—Tañenu Yishimu 15:22.

22. Yosefu naMariya alili chikuku chamuchidinyi mumaluwi awu, nawa adiña namudimwinyi?

²² A Yosefu naMariya alili chikuku chachiwahi mumaluwi awu. Wejima wawu amukeñeli Yehova Nzambi nawa afwilileña kumuzañalesha chineli adiña anvwali akameneneña. Kafwampi ayikiswilili chikupu hela chakwila amweni kukala kwakuvula. Adiña namudimu wakumwakamena Yesu, wakulili nakwikala muntu walema chikupu kubadika antu ejima amukaayi.