1, 2. Indi Petulu wakuhweleleli yumanyi hampinji yahosheleñayi Yesu muKaperinawu, ilaña yumanyi yamwekeni?

PETULU wakameneni chatalileñayi antu atañishileñayi Yesu. Adiña musinagogi kuKaperinawu. Petulu washakamineña muniwu mukala; kukabeta kaluwunda kachikumu chaKaluñalwiji kaÑaliliya dikwazatilileñayi mudimu windi wakukwata anshi; amabwambu jindi amavulu, antaña jindi niakwawu mwazatilileñawu ashakamineña kweniku. Chakadi nikujina, Petulu wakuhweleleli nindi antu amuKaperinawu akumwiluka Yesu nawu diyi Mesiya nawa nindi akutiya kuwaha kudizila nsañu yaWanta waNzambi kudi muntu wabadika antañishi ejima. Yumiyi hiyazatikiluku.

² Antu amavulu alekeli kutiyilila. Amakwawu ataadikileña nsañu yatañishileñayi Yesu. Hela chochu, chuma chamutiyishili Petulu kutama nankashi hichuma cheliluwu atumbanji twaYesu amakwawu. Hiyatwalekeluhu kutiya kuwaha nansañu yalala yayiha yayidizishileñayi Yesuku. Haniyi mpinji aneñeli nawa ahilili. Amakwawu ahosheli nawu mazu aYesu adiña akala. Chakaaninuwu kumutiyilila afumini musinagogi, nawa alekeli kumulondela Yesu.—Tañenu Yowanu 6:60, 66.

3. Indi chikuhwelelu chaPetulu chamukwashili ñahi kapampa kakavulu?

³ Chamukalilili Petulu niakwawu apostolu. Petulu watiyishishili wanyi yuma yahosheliyi Yesu hadina ifuku. Chakadi nikujina, welukili nindi mazu aYesu adiña akala neyi kuyilumbulula nehi. Hanu dinu Petulu welilidi? Bayi neyi diyi mpinji yatachi yamwesekeluwu neyi chakwila wadiña wamukeña Mwanta winduku; nawa hiyadiña mpinji yakukumishakuku. Tushinshikenu chikuhwelelu chaPetulu chichamukwashili kwikala washinshika chili wamweni kukala kwamuchidiwu.

4, 5. Indi Yesu welileña ñahi yuma munjila yabulili kukuhwelelawu antu?

⁴ Yuma yelileñayi Yesu niyahosheleñayi yamuhayamishileña Petulu kapampa kakavulu. Mpinji yikwawu, Mwanta windi welileña yuma nikuhosha nsañu munjila yabulili kukuhwelelawu antu. Mwahitili hohu ifuku dimu kufuma hadiishiliyi Yesu mazaza awantu muchihayamisha. Afwilileña kumudiisha wanta muloña wachihayamisha chakoñeliyi. Ilaña, wahayamishili antu amavulu chawombolokeliyi nakuyileja atumbanji twindi nindi akandami muwatu kulonda ayi kuKaperinawu. Chayileñawu atumbanji hamenji nawufuku, Yesu wayihayamishili cheñi muloña wendeleña hamankanda aKaluñalwiji kaÑaliliya, nawa wamudizishili Petulu chuma chalema kutalisha hachikuhwelelu chindi.

⁵ Chikwelili ntetemena awanini mazaza awantu anayilondeli dehi kwijiya. Hela chochu, antu alondeleli muloña afwilileña nawu Yesu yayidiishi cheñi muchihayamisha bayi neyi akeñeleña nawu adizili kudi yenaku. Yesu wayizuwilili hamuloña wakukeña yuma yakumujimba. (Yow. 6:25-27) Watwalekeluhu kutañisha ayina nsañu musinagogi kuKaperinawu, Yesu watañishili cheñi yuma yabulili kukuhwelela antu kulonda yayidizishi nsañu yalala yalema yamwenuwu antu nawu yakala.

6. Chakutalilahwinyi chashimwiniyi Yesu, nawa antiyilili jindi elilidi?

⁶ Yesu hakeñeleña antu enzi kudi yena muloña wakwila wayidiishiluku, wakeñeleña eluki nawu Nzambi nateli kuyinka wumi wahaya nyaka neyi chakwila akuhwelela mumulambu waYesu nikulondela chakutalilahu chindi. Washimwini chakutalilahu chadesekejeliyi yomweni namanina, mankendi afumini mwiwulu mumafuku aMosi. Chelili amakwawu akaani, wazatishili chakutalilahu chatiyakana nakulumbulula nindi antu ateleleli kudya mujimba windi nikunwa mashindi kulonda aheti wumi wahaya nyaka. Yesu chahosheliyi yumiyi antu ahilili nankashi. Amakwawu ahosheli nawu: “Mazu awa akala; wukutwesha kutiyamu hinyi?” Atumbanji twaYesu amavulu alekeli kumulonda. *—Yow. 6:48-60, 66.

7, 8. (a) Petulu wachidiña kanda yatiyishishi mudimwinyi waYesu? (b) Indi Petulu wakwili ñahi lwihu lwayihwiluwu apostolu kudi Yesu?

⁷ Indi Petulu welilidi? Niyena watiyishili wanyi mazu ahosheliyi Yesu. Wachidiña kanda yeluki nindi Yesu wateleleli kufwa kulonda yeli yuma yafuukulayi Nzambi. Komana Petulu niyena wakeñeleña kuleka kumulondela Yesu neyi ana atumbanji abulili kashinshi  amushili Yesu hadina ifuku? Inehi, Petulu wadiña nachililu chalema chamukwashili kwikala wambukaku nanana antu. Hichililwinyi chenichi?

⁸ Yesu wayilili apostolu indi nindi: “Ninenu nawa keña muyi kwenu, tahindi?” (Yow. 6:67) Wehwili apostolu 12, ilaña Petulu diyi wakwili. Diyi wavulileña kuhosha. Petulu watela diyi wadiña mukulumpi hakachi kawu. Kafwampi, wadiña wahamuka hakuhosha hakachi kawu; nawa chamwekana neyi Petulu hashintajalileña kushimuna yuma yatoñojokeleñayuku. Haniyi mpinji, watoñojokeleña awa mazu amawahi nawa alema akwila nawu: “[Mwanta], tukuya kudinyi? Eyi yeyi wukweti mazu awumi wahaya nyaka.”—Yow. 6:68.

9. Indi Petulu wamwekesheli ñahi nindi wamukuhweleleli Yesu?

⁹ Komana awa mazu ayizañaleshaña wanyi? Chineli Petulu wamukuhweleleli Yesu, chumichi chamukwashili kwikala nachililu chalema chikupu, kashinshi. Petulu welukili chikupu nindi Yesu diyi Chamwinu wumu hohu watemesheliyi Yehova nawa nindi Yesu wadiña nakwamwina antu kuhitila muyuma yahosheleñayi, yuma yatañishileñayi haWanta waNzambi. Petulu welukili nindi chili kwadiña yuma yabulili kutiyishishayi, kwosi kwateleleli kuyayi neyi chakwila wakeñeleña kwikala nawuselewa waNzambi ninkisu yawumi wahaya nyaka.

10. Tunateli kwimbujola ñahi chikuhwelelu chaPetulu makonu?

¹⁰ Komana ninenu mwamukuhwelela? Chawushona, antu amavulu makonu ahoshaña nawu amukeña Yesu ilaña hiyamukuhwelelaku. Hakwila nawu tumukuhweleli Yesu, twatela kukeña ntañishilu yindi neyi chayikeñeliyi Petulu. Twatela kudiza ntañishilu yindi, kutiyishisha muyalumbulukila nikuyizatisha muchihandilu chetu, chili tunayitiyishishi wanyi hela neyi yinambukuku nayuma yitwakeñaña. Neyi twikala ashinshika tukaheta wumi wahaya nyaka neyi chakeñañayi Yesu.—Tañenu  Masamu 97:10.

11. Yesu niatumbanji twindi ayileña kudihi?

¹¹ Chamanishiliyi kutañisha, Yesu nawapostolu indi niatumbanji amakwawu ayili kukabeta kambwela kwakulehi. Mutu waMpidi yaHerimoni yadiña kuñinza yakabeta kaluwunda Ketuña Dachikaninu, mpinji yikwawu wamwekeneña chili antu adi haKaluñalwiji kaÑaliliya nawa mpidi yeniyi yadiña namayimakanza. Yesu niatumbanji twindi ayileña kunyikala yadiña kwakwihi naKesareya muFwilipi, nawa ashikili kwakwihi naMpidi yaHerimoni. Chadiñawu muniyi mpata yayiwahi amweneña Ituña Dachikaninu kukabeta kaluwunda, Yesu wayihwili atumbanji twindi lwihu lwalema.

12, 13. (a) Muloñadi Yesu chakeñeleñayi kwiluka mazaza chiyamwilukiluwu? (b) Petulu wamwekesheli ñahi chikuhwelelu chikupu hampinji yamwakwiliyi Yesu?

 ¹² Wakeñeleña kwiluka chatoñojokeleñawu, dichi wayihwili nindi, “Mazaza elaña nawu yaminyi?” Tunateli kufwikija Petulu chamutalileñayi Yesu nawa welukili nindi Mwanta windi wadiña naluwi nimaana asweja. Yesu wakeñeleña kwiluka antu chamwilukiluwu. Atumbanji twaYesu akwili ilu lwihu nakushimuna yuma yaheña yahosheleñawu hadi Yesu. Ilaña Yesu wakeñeleña kwiluka yuma yayivulu. Komana atumbanji twindi akeñeliyi niwena atoñojokeleña mwaheña? Wayihwili nindi, “Indi enu aweni mwelaña nenu yaminyi?”—Luka 9:18-20.

¹³ Petulu diyi wanyakeli kwakula cheñi. Washimwini hatooka to-o, chuma chatoñojokeleñawu atumbanji amavulu. Wahosheli nindi, “Yeyi Kristu, Mwana kaNzambi wamumi.” Yesu wazañaleli hampinji yamuhamekeleñayi Petulu. Yesu wamulejeli Petulu nindi Yehova Nzambi diyi waletesheli antu akweti chikuhwelelu chikupu atiyishishi iyi nsañu yalala yalema bayi muntuku. Petulu amukwashili kwiluka nsañu yimu yalala yalema henohu Yehova kanda yayimwekeshi, nsañu yakumwilukilaku Mesiya akaninuwu dehi hela Kristu.—Tañenu Matewu 16:16, 17.

14. Yesu wamwinkeli Petulu nyidimwinyi yalema?

¹⁴ Iwu Kristu diyi ateneneñawu muwuprofwetu wakunyaka nawu ilola dalekeluwu antuñi. (Mas. 118:22; Luka 20:17) Yesu wadiña nakutena iwu wuprofwetu hampinji yashimwineñayi nindi Yehova wakatuñila chipompelu hanidi ilola delukiliyi Petulu nindi diyi Kristu. Kuhiñahu wamwinkeli Petulu nyidimu yalema muchina chipompelu. Bayi neyi Yesu wamwinkeli Petulu wukulumpi kubadika apostolu amakwawu, neyi chatañishaña akwakwitiya amakwawuku, ilaña wamwinkeli nyidimu. Wamwinkeli Petulu “nsapi jawanta.” (Mat. 16:19) Petulu wadiña nakukooleka kwakuleñela antu akuyitachi yisatu yashiyashana kwikala nakuchiñeja kwakwiñila muWanta waNzambi, tachi aYudeya, kuhiñahu aSamariya nkumininaku aJentili hela antu abulili kwikala aYudeya.

15. Chumanyi chaletesheli Petulu kumukaanda Yesu, nawa wahosheli mazwinyi?

¹⁵ Hela chochu, chimwahitili mafuku Yesu washimwini nindi antu anenkuwu yayivulu akakeñelaku nawa yayivulu, nawa Petulu wadiña hakachi kwawantu enkeluwu nyidimu yayivulu.  (Luka 12:48) Yesu watwalekeluhu kushimuna nsañu yalala yalema hadi Mesiya, kushilahu niyuma yadiñayi kwakwihi nakukabakana nichakafwayi muYerusalema. Petulu watiyili kutama hakutiya yuma yamuchidiwu. Petulu wamutweli Yesu kumbadi nakumukaanda nindi: ‘Chinjila Mwanta. Bayi neyi wakamona yumiyuku!’—Mat. 16:21, 22.

16. Indi Yesu wamufumbili Petulu ñahi, nawa mazu aYesu anateli kutukwasha ñahi wejima wetu?

¹⁶ Petulu watoñojokeleña nindi wamukwashileña Yesu, dichi watela wahayamini Yesu chamwakwiliyi. Wamufutaleleli Petulu nakutala atumbanji amakwawu, hadaha niwena atoñojokeleña mwomumu nawa wahosheli nindi: ‘Eyi Satana hitaku kunyima yami, wudi chuma chakunhukesha, muloña hiwunati muchima kuyuma yaNzambuku, wunati muchima kuyuma yawantu.’ (Mat. 16:23; Maku 8:32, 33) Mazu aYesu atukwashaña wejima wetu. Twanyakalaña kutoñojoka yitoñojoka yawuntu kubadika kutoñojoka neyi chatoñojokañayi Nzambi. Neyi twila mwenimu, chili tunakukeña kumukwasha muntu, tunateli kumukolesha muntu chakubula kwiluka kulonda eli chuma chamuzañaleshaña Satana chatela yeli chuma chamuzañaleshaña Nzambi. Hanu dinu Petulu welilidi?

17. Indi Yesu watalishili mudihi hakumwila Petulu nindi “hitaku kunyima yami”?

¹⁷ Petulu watela welukili nindi Yesu hamuteneneña nindi Satana Diyaboluku. Kafwampi, Yesu hahosheli naPetulu neyi chahosheliyi naSatanaku. Yesu wamwilili Satana nindi: “Fumaku”; ilaña Petulu wamwilili nindi: “Hitaku kunyima yami.” (Mat. 4:10) Yesu wamuhañili wanyi kapostolu windi wamweniyi nindi wadiña nayililu yayiwahi, ilaña wamufumbili hohu Petulu muloña watoñojokeleña mwaheña haniyi nsañu. Petulu wateleleli kuleka kumukañesha Yesu nawa wateleleli kumukwasha.

18. Indi Petulu wamwekesheli ñahi nawu wadiña washinshika, nawa tunateli kumwimbujola ñahi?

¹⁸ Komana Petulu wataadikili chili kuhila? Inehi, wetejeli chamufumbiluwu. Wamwekesheli cheñi nawu wadiña washinshika. Antu ejima amulondaña Kristu akeñekaña kufumbewa mpinji yikwawu. Neyi twitejaña mwatufumbañawu nikudizilaku tukutwalekahu kukundama kwakwihi naYesu Kristu nikudi Tata yindi Yehova Nzambi.—Tañenu Yishimu 4:13.

19. Yesu wahosheli mazwinyi akuhayamisha, nawa Petulu watela watoñojokeli nindidi?

¹⁹ Chihahitili kapinji, Yesu wahosheli mazu amakwawu akuhayamisha nindi: “Nukuyileja chalala nami kudi amakwawu anemani kunu, hiyakafwaku chiña anamoni dehi Mwana kamuntu chakwinzayi muwanta windi.” (Mat. 16:28) Chakadi nikujina, awa mazu amusañumwini Petulu kukeña kwilukilahu yuma yikwawu. Indi Yesu watela watalishili mudihi? Hadaha Petulu watoñojokeli nindi chineli anafumi tuhu hakumufumba nashaluhu dehi kukooleka kwadimena kwamuchidiwu.

20, 21. (a) Lumbululenu chimwenu chamweniyi Petulu. (b) Indi nsañu yahanjekeluwu ana antu amwekeni muchimwenu yamukwashili ñahi Petulu?

²⁰ Chimwahitili mulungu wumu, Yesu wayitwalili aYakoba, Yowanu niPetulu “hampidi yayilehi” hadaha Mpidi yaHerimoni hadiña jikilomita 25 kufuma kwadiñawu. Hadaha yadiña mpinji yawufuku, chineli awa amayala asatu adiña nakunoñoka. Ilaña  Yesu chalombeliyi, kwamwekeni chuma chaletesheli aleki kunoñoka.—Mat. 17:1; Luka 9:28, 29, 32.

²¹ Yesu watachikili kuhimpa iku anakumumona. Kumesu indi kwatachikili kutoñeka chejeji, nawa kwaswejeli kutoñeka neyi itañwa. Mahinindi niwena aswejeli kutooka. Kuhiñahu antu ayedi amwekeni hamu naYesu, wumu wemeneneñaku Mosi mukwawu Elija. Ahanjekeli nindi hansañu ‘yakufumahu kwindi kwatoñweluwu kushikija muYerusalema,’ hadaha kufwa nikusañuka kwindi. Petulu welukili nindi waluwañesheli hampinji yatoñojokeliyi nindi Yesu hateleleli kukaba nikufwaku.—Luka 9:30, 31.

22, 23. (a) Indi Petulu wamwekesheli ñahi muzañalu? (b) Petulu, Yakoba niYowanu atambwilili wulokwinyi wukwawu hawuna wufuku?

²² Petulu niyena wakeñeleña kwikala muchina chimwenu chekomwesha, hadaha wakeñeli nindi chitwalekuhu. Chamwekeni neyi Mosi niElija amushili Yesu. Dichi Petulu wahosheli nindi: “Mwanta chachiwahi chitudi kunu; tutuñi yisolu yisatu; chimu cheyeyi, chimu chaMosi, chikwawu chaElija.” Kafwampi awa ambuña Yehova amwekeni muchimwenu afwili dehi hiyateleleli kuyituñila yisoluku. Petulu welukili wanyi yuma yahosheleñayi. Komana himwakeñaña kwikala namuntu wukweti muzañaluku?—Luka 9:33.

²³ Petulu, Yakoba niYowanu atambwilili wuloku wukwawu hawuna wufuku. Mwiwulu mwamwekeni ivu denjili nakuyizeñamina hana hampidi. Mwivu mwafumini izu daYehova Nzambi. Wahosheli nindi: “Diyi Mwanami nakeña, mutiyililenu yena.” Chimwenu chamanini nawa adiñi nkawawu naYesu hampidi.—Luka 9:34-36.

24. (a) Indi chimwenu chakubalumuka chamukwashili ñahi Petulu? (b) Indi etu makonu tunateli kuhetelamu ñahi muchimwenu chakubalumuka?

²⁴ Achina chimwenu chakubalumuka chadiña chawana chabadika kuwaha kudi Petulu niwejima wetu. Chimwahitili yaaka wasonekeli hakukooleka kwamweniyi hawuna wufuku kwakumona Yesu mukulema neyi Mwanta wamwiwulu nihakwikala hakachi ‘kawayinsahu akumona wukeleñi windi namesu.’ Achina chimwenu chashikijili wuprofwetu wawuvulu washimwinuwu Mwizu daNzambi nawa chakolesheli chikuhwelelu chaPetulu kulonda yomiki kweseka kwakuvulu kwamweniyi kumbidi. (Tañenu 2 Petulu 1:16-19.) Chimwenu chakubalumuka chinateli kukolesha chikuhwelelu chetu, neyi tufwana Petulu nakutwalekahu kwikala ashinshika kudi Mwanta watutondelayi Yehova, kudizila kudi yena, kwiteja kufumba kwindi nikumulondela Yesu mpinji yejima.