Nkumishilu
‘Ikalenu akwakwimbujola akuswana yikaninu nakukuhwelela nakudiwunjika.’—AHEBERU 6:12.
1, 2. Muloñadi chichalemena kukolesha chikuhwelelu makonu? Hanenu chakutalilahu.
CHIKUHWELELU. Hiizu dadiwahi demenañaku chililu chachiwahi nankashi. Hela chochu, neyi tutiya idi izu, tunateli kutoñojoka hezu dikwawu dakwila nawu: “Kunyakala.” Neyi tukweti chikuhwelelu wanyi, twatela kuzata swayi-swayi kulonda twikali nachikuhwelelu. Nawa neyi tukweti chikuhwelelu, twatela kuchikiña nikuchikolesha chakubula kuumba mpinji. Muloñadi?
2 Fwikijenu munakuketwisha chinkalampata cheneni. Munafwi mpwila chikupu. Neyi munawani menji, mwatela kuyihemba chiwahi kulonda abuli kukabuka. Nawa mwatela kutaha amakwawu kulonda ayikwashi nichimukushika kumunakuya. Makonu, tunakushakama muchinkalampata chachifwikija, mukaayi mwekala antu abula chikuhwelelu chalala, chidi neyi ana menji, akala kuwana nawa akabukaña swayi neyi tubula kuyihemba chiwahi nikutahilamu amakwawu. Tukweti kukaankila kweneni; neyi chochitwatela kubula kuhanda chakadi menji, hitunateli kwikala nawunda naYehovaku neyi hitukweti chikuhweleluku.—Rom. 1:17.
3. Indi Yehova watwinka yumanyi yatukwashaña kukolesha chikuhwelelu, nawa yumanyi yiyedi yitwatela kwanuka?
3 Yehova weluka muloña wutwatela kuzatila swayi-swayi kulonda twikali nachikuhwelelu, nawa weluka nindi kwikala nachikuhwelelu chakola hichuma chakala makonu. Chakubula nikujina, dichi chatwinkelayi yakutalilahu kulonda tuyimbujoleña. Yehova wamoneneni kapostolu Pawulu kusoneka nindi: ‘Ikalenu akwakwimbujola akuswana yikaninu nakukuhwelela nakudiwunjika.’ (Heb. 6:12) Dihafuma kuloñesha kwaYehova kutukolesheña kuzata nañovu kulonda twimbujoleña yakutalilahu yawamayala niambanda ashinshika, adi neyi itunadizi muwunu mukanda. Hanu dinu, chumanyi chitwatela kwila? Twatela kwanuka yuma yiyedi: (1) Twatela kutwalekahu kukolesha chikuhwelelu chetu; (2) twatela kutwalekahu kutoñojoka hayuma yitwachiñejaña.
4. Indi Satana wekala ñahi chilumbu wachikuhwelelu chetu, nawa muloñadi wutwatela kubula kuchiina?
4 Twalekenuhu kukolesha chikuhwelelu chenu. Satana hichilumbu muneni wakeñaña kukisañana chikuhwelelu chetu. Nyuuli wakanu kaayi nakojeji kanu kaayi kwikala neyi chinkalampata, chumichi chatukalilaña kutwalekahu kwikala nachikuhwelelu. Watubadika ñovu. Komana twatela kuchiina netu hitunateli kutwalekahu kwikala nachikuhwelelu chakolaku? Inehi. Yehova Hibwambu wabadika wawantu ejima akeñaña kwikala nachikuhwelelu. Watushika nindi Wukutukwashaña, nawa tunateli kudikaña naDiyabolu nawa nateli kututemuka. (Yak. 4:7) Twadikañaña nindi kuhitila mukwikala nampinji yakukolesha chikuhwelelu chetu mafuku ejima. Munjilanyi?
5. Indi amayala niambanda ashinshika atenawu muBayibolu ekalili ñahi nachikuhwelelu? Lumbululenu.
5 Neyi chitunadizi, amayala niambanda ashinshika atenawu muBayibolu hiyavwalikili nachikuhweleluku. Chihandilu chawu chahanaña wunsahu wakwila nawu chikuhwelelu hichililu chamukabu waspiritu yajila yaYehova. (Ŋal. 5:22, 23) Alombeleña nawu ayikwashi nawa Yehova watwalekeluhu kukolesha chikuhwelelu chawu. Anetu nawa twatela kulomba neyi chalombeleñawu, bayi tuvulamena netu Yehova wahanaña spiritu yindi kudi antu alombaña nawa azataña kwesekeja nakulomba kwawu. (Luka 11:13) Komana kudihu yuma yikwawu yitwatela kwila?
6. Tunateli kuhetelamu ñahi mukudiza nsañu yamuBayibolu nkawetu?
6 Muniwu mukanda tunahanjeki hohu hayakutalilahu yawantu antesha adiña nachikuhwelelu chikupu. Kudi amakwawu amavulu nankashi. (Tañenu Aheberu 11:32.) Tukweti yuma yayivulu yitwatela kudiza hadi antu ashinshika atenawu muBayibolu. Neyi tutañaña swayi-swayi nsañu yamuBayibolu yahosha hadi antu adiña nachikuhwelelu, chikuhwelelu chetu chikukola wanyi. Hakwila tuhetelumu chikupu hakutaña, twatela kwikala nampinji yakusandujola munyikanda ninsañu yadikumashana nansañu yitunakutaña muBayibolu. Neyi twanuka netu awa amayala niambanda abula kuwanina ‘atiyileña mutwatiyañetu,’ yakutalilahu yawu yikutukwasha. (Yak. 5:17) Tunateli kwiluka chatiyileñawu hampinji yamweneñawu kukala kudi neyi kutwamonaña.
7-9. (a) Indi amayala niambanda adiña nachikuhwelelu akushankulu adi kutiya ñahi kudifukula kudi Yehova neyi chitwadifukulaña etu makonu? (b) Muloñadi wutwatela kukoleshela chikuhwelelu chetu kuhitila munyidimu?
7 Twakoleshaña cheñi chikuhwelelu chetu kuhitila muyuma yitwafuukulañahu niyitwelaña. Kafwampi ‘chikuhwelelu chakadi nyidimu chafwa.’ (Yak. 2:26) Fwikijenu amayala niambanda itunahanjekuhu chatela kuzañalalawu neyi ayinka kuzata mudimu watwinkayi Yehova makonu!
8 Chakutalilahu, Abarahama wadi kutiya kuwaha nankashi neyi amulejeli nawu yadifukuleña kudi Yehova, bayi hakameña kakutuña namalola katuñiliyi muchinkalampataku, ilaña hakachi kawakwawu akwakudifukula muMatala aWanta amawahi nihakupompa kwamaneni, hashimunañawu nikulumbulula chikupu yikaninu ‘yamweneniyi maaya.’ (Tañenu Aheberu 11:13.) Indi Elija wadi kutiya ñahi neyi amulejeli nawu wukuzataña mudimu, bayi neyi wakujaha atuprofwetu aBayali atama iku nakumukalakela Yehova muchiyuulu chamwanta watama nawa mukwakusekeshaku, ilaña mudimu wakwendela antu mukuwunda nikushimuna nsañu yakukundeja nikuchiñeja? Chakadi kujina amayala niambanda ashinshika atenawu muBayibolu adi kwiteja swayi-swayi mudimu wakudifukula kudi Yehova neyi chitwelaña makonu.
9 Dichi tutwalekenuhu kukolesha chikuhwelelu chetu kuhitila mukuzata nyidimu. Neyi twila mwenimu tukuzatishaña chiwahi yakutalilahu yawamayala niambanda adiña nachikuhwelelu atenawu Mwizu daNzambi donenawu. Neyi chashimwinuwu muNtachikilu, tukukundama kwakwihi nawu neyi amabwambu jetu. Hela chochu, wulunda weniwu wukukola chikupu.
10. Tukekala namuzañalu wamuchidinyi muParadisa?
10 Twalekenuhu kutoñojoka hayuma yimwachiñejaña. Yuma yayikaniniyi Nzambi yachiñejeleñawu amayala niambanda ashinshika yayikwashili kwikala akola. Anenu nawa dichi mwelaña? Chakutalilahu, fwikijenu chimukazañalala hakudimona nawambuña Nzambi ashinshika hampinji ‘yakayisañulawu antu aloña.’ (Tañenu Yililu 24:15.) Malwihwinyi imukakeña kuyihula?
11, 12. Mwituña dadiha, malwihwinyi imwakamwihula (a) Abeli? (b) Nowa? (c) Abarahama? (d) Luti? (e) Abigayili? (f) Esita?
11 Chimwakadimona naAbeli, mukakeña kumwihula chadiñawu anvwali jindi? Hadaha mukamwihula nenu: “Komana wahosheluhu nawakerubi ahembeleña njila yayili muEdeni? Komana akwakwili?” Yumanyi yimukamwihula Nowa? Hadaha mukamwihula nenu: “Komana wayitiyileña aNefwili woma? Wahembeli ñahi anyama ejima adiña muwatu hachaaka chamukuma?” Neyi mwakadimona naAbarahama, hadaha mukamwihula nenu: “Wahanjekeluhu naShemi? Hinyi wakudizishili hadi Yehova? Komana chakukalilili kushiya musumba waUri?”
12 Shinshikenu malwihu imwatela kwihula ambanda ashinshika akasañulawu. “Luti, chumanyi chakusañumwini kwikala mukwakudifukula waYehova?” “Abigayili, komana watiyili woma kumulejamu Nabali chiwamukwashili Davidi?” “Esita, chumanyi chayimwekeneni naModekayi chamanini nsañu yashimunawu muBayibolu?”
13. (a) Indi antu akasañulawu akayihula malwihwinyi? (b) Mwatiyaña ñahi hakuchiñeja kwakudimona nawamayala niambanda ashinshika akushankulu?
13 Hela chochu, awa amayala niambanda ashinshika hadaha akayihula malwihu amavulu. Mukazañalala hakuyileja yuma yalema yamumafuku akukuminina niYehova chakiswilili antu jindi mumpinji yakala. Chakadi nikujina, akatiya kuwaha hakwiluka chashikijiliyi Yehova yikaninu yindi. Mwituña dadiha twakayiluka ambuña Yehova atenawu muBayibolu. Tukekala nawu muParadisa. Dichi twalekenuhu kuzata nañovu kulonda awa antu ekali amabwambu jenu chikupu. Twalekenuhu kwimbujola chikuhwelelu chawu. Diluñishenu hakumukalakela Yehova hamu nawu neyi amabwambu jenu imwakeña haya nyaka.
