Wunamumoni iwu kansi wamumbanda wudi hamwevulu?— Himwana kaYefwata. Bayibolu hiyashimuna ijina dinduku, ilaña tweluka netu wamuzañalesheli tata yindi niYehova. Tudizenu kulonda tumwiluki nitata yindi Yefwata.

Yefwata wadiña iyala wamuwahi nawa washakamineña namwanindi mpinji yeneni nakumudizisha kulonda yamwiluki Yehova. Wadiña iyala wakola nawa nlomboli wamuwahi. Dichi aIsarela amwilili nawu yekali nlomboli yawu hakuzuña njita nawayilumbu jawu.

Yefwata walombeli wukwashu kudi Nzambi kulonda yashindi. Yefwata wamukanini Yehova nindi neyi yashinda, wukamwinka muntu watachi wakedika  mwitala dindi nakumukinkilila hakufuma kunjita. Iwu muntu wukashakamaña hatabanaka yaNzambi nakumukalakela muchihandilu chindi chejima. Tabanaka yadiña hiluña kwayileñawu antu nakudifukula kudi Nzambi. Yefwata washindili. Wunamwiluki muntu wasambilili kwidika mwitala dindi hafuntiliyi?—

Wadiña mwana kaYefwata wamumbanda. Mwanindi wumu hohu, diyi wahaniniyi Yefwata. Chumichi chamuneñesheli hama. Ilaña anukaku neyi Yefwata wamukanini Yehova. Hohenohu, mwanindi wahosheli nindi: ‘Tata mwamukanini Yehova, dichi ilenu mumwamukanini.’

Mwana kaYefwata niyena waneñeli. Hatabanaka hayileñayi hadi kusumbuka hela kuvwala anyanaku. Ilaña wakeñeleña kwila mwakaniniyi tata yindi kulonda yamutiyishi Yehova kuwaha. Wafuukwiluhu kuhemba chikaninu kubadika kusumbuka hela kuvwala anyana. Wafumini hetala nakuya nakushakama hatabanaka chihandilu chindi chejima.

Wunatoñojoki neyi chuma cheliliyi chamutiyishili tata yindi niYehova kuwaha?— Eña, atiyili kuwaha. Neyi wukumwovwahilaña Yehova nikumukeña, wukwikala neyi mwana kaYefwata. Aneyi nawa wukuzañaleshaña anvwali jeyi niYehova.