KUDIZA 3
Rahaba Wamukuhweleleli Yehova
Tufwikijenu netu tudi mumusumba waYeriku. Iwu musumba wadiña mwituña daKenani, mwadiña antu abulili kumwiluka Yehova. Dimwashakamineñayi mumbanda wejina daRahaba.
Henohu Rahaba wuchidi kansi, watiyili nsañu jaMosi chambwiliyi menji aKaluñalwiji Kachinana nakuyidisha aIsarela muEjipitu. Watiyili cheñi chayikwashiliyi Yehova kushinda ayilumbu jawu munjita jejima. Ichi natiyi nindi aIsarela anatuñi chilombu kwakwihi naYeriku.
Rahaba waswekeli akwakwendesha ituña muloña wamukuhweleleli Yehova
Ifuku dimu namelela, aIsarela ayedi ayili nakwendesha musumba waYeriku. Ashikeneni kwitala daRahaba. Wayilejeli nindi eñili mwitala. Nawufuku, mwanta wamuYeriku watiyili nawu akwakwendesha ituña aneñili mumusumba, nawu anashikeni kwitala daRahaba. Mwanta watemesheli antu nakuyikwata. Rahaba waswekeli awa akwakwendesha ituña ayedi hewulu detala dindi nawa walejeli antu jamwanta nindi: ‘Akwakwendesha ituña enza, ilaña aya dehi. Neyi mukuyilondela, mukuyiwana.’ Wuneluki Rahaba chinakuyiswekelayi awa akwakwendesha ituña?— Muloña wamukuhweleli Yehova nawa welukili nindi wakayinka aIsarela ituña daKenani.
Henohu akwakwendesha ituña kanda afumi mwitala daRahaba, amukanini nawu yena niantaña jindi akayipulwisha hampinji yikajilumuka Yeriku. Wuneluki nsañu yamulejeluwu Rahaba?— Amulejeli nawu: ‘Nonaku iwu muya wuchinana, wuwikudiki hanji yanjanina yetala deyi. Neyi wila mwenimu, ejima adi mwitala deyi akahanda.’ Rahaba welili mwejima mwamulejeluwu akwakwendesha ituña. Wuneluki yuma yamwekeni?—
Yehova wamupulwishili Rahaba niantaña jindi
Chimwahitili mafuku antesha, aIsarela anyeñumukili musumba wumweneni. Anyeñumukili musumba hadi mafuku atanu nadimu, hefuku kamu. Ilaña hefuku damuchitanu nachiyedi, anyeñumukili musumba katanu nakayedi. Wonsu wawu abidikili nañovu. Yehova wahumwini mbañu jejima jamusumba. Ilaña itala kwakudikiluwu muya wuchina kunjanina dahumukili wanyi. Wunadimoni hamwevulu?— Rahaba nichisaka chindi apulukili.
Yumanyi yiwukudizila kudi Rahaba?— Rahaba wamukuhweleleli Yehova muloña wayuma yayiwahi yatiyiliyi hadi Yehova. Aneyi nawa wunakudiza yuma yayiwahi yayivulu kutalisha hadi Yehova. Wamukuhwelela Yehova neyi Rahaba?— Tuneluki netu wamukuhwelela.
