Kufuma tuhu kuwansi windi, Samweli washakamineña nikuzatila hatabanaka, henjileña antu nakudifukula kudi Yehova. Wuneluki chenjiliyi Samweli hatabanaka? Tusambilenu kudiza hadi mama yaSamweli, Hana.

Hana washakamini yaaka yayivulu chakadi kwikala namwana muloña wadiña nshinta, hela chochu wakeñeleña chikupu kwikala namwana. Dichi walombeli kudi Yehova nakumulembelela nindi yamukwashi. Wamukanini Yehova nindi neyi yekala namwana wakamutwala hatabanaka yakashakameña nikuzatileñahu. Yehova wakwili kulomba kwindi nawa wavweli mwana weyala. Wamutumbili nindi Samweli. Chashikijiliyi Samweli yaaka yisatu, Hana wamutweli hatabanaka nakumuzatila Nzambi neyi chochakaniniyi.

Eli diyi wadiña kapristu muneni hatabanaka. Anyanindi awamayala niwena dihazatileñawu. Anukaku, tabanaka yadiña itala daNzambi dakudifukwilamu nawa antu azatilileñahu ateleli kwikala nayililu yayiwahi. Ilaña anyana kaEli elileña yuma yatama nankashi. Samweli wamweneña yuma yelileñawu. Komana Samweli niyena welileña yuma yatama neyi anyana kaEli?— Inehi, welileña yuma yayiwahi neyi chamudizishiluwu anvwali jindi.

Wunatoñojoki neyi Eli wadi kuyiladi anyanindi ayedi?— Wadi kuyibabesha. Nawa wadi kuyilekesha kuzatila hetala daNzambi. Ilaña hayibabesheli anyaninduku, dichi Eli nianyanindi amuhilishili Yehova. Yehova wayibabesheli.

Ifuku dimu nawufuku henohu Samweli wakama, watiyili muntu nakumutambika nindi: ‘Samweli!’ Wayili lufuchi kudi Eli, ilaña Eli wahosheli nindi: ‘Ami hinakutambikiku.’ Amutambikili cheñi mapampa kayedi. Chamutambikiluwu cheñi kamuchisatu, Eli wamulejeli nindi neyi akutambiki cheñi wuhoshi neyi:  ‘Hoshaña Yehova, inakutiya.’ Dicheliliyi Samweli. Yehova wamwilili Samweli nindi: ‘Muleji Eli neyi nikubabesha chisaka chindi muloña wayuma yatama yinakwilawu.’ Wunatoñojoki neyi chamupeleleli Samweli kumuleja Eli iyi nsañu?— Hichadiña chapelaku. Hela chakwila Samweli watiyileña woma, welili mwamulejeli Yehova. Yehova welili chuma chahosheliyi. Anyana kaEli ayedi ayijahili, Eli niyena wafwili.

Samweli wadiña nayililu yayiwahi yitwatela kwimbujola. Welileña yuma yayiwahi hela chakwila wamweneña antu elileña yuma yatama. Ndochu eyi? Wukwikala neyi Samweli nakutwalekahu kwila yuma yayiwahi? Neyi wila mwenimu, wukumuzañalesha Yehova nianvwali jeyi.