Wunawiluki ntahi Wanta wutunakuhoshahu?— Eña, hiWanta waNzambi, Wanta wakabalumuna dinu iseki kwikala paradisa. Wunakukeña kwiluka jajivulu kutalisha haniwu Wanta?—

Wanta wejima wekalaña namwanta. Nawa mwanta wayuulaña antu ejima adi mwituña dindi. Wunamwiluki Mwanta waWanta waNzambi?— Diyi Yesu Kristu. Washakamaña mwiwulu. Katataka yekali Mwanta wakayuulaña antu ejima hamaseki. Wunatoñojoki neyi twakekala namuzañalu neyi Yesu nekali dehi Mwanta wadinu iseki dejima?—

Twakazañalala hama. MuParadisa, antu hiyakazuñaña hela kuya kunjitaku. Antu ejima akadikeña wumu namukwawu. Antu hiyakakataña hela kufwaku. Amputa mesu akamona, anjika matu akatiya, ayifwayi akatachika kwenda. Antu ejima akekala nayakudya yayivulu. Anyama niwena akadikeña wumu namukwawu nawa twakashakamaña nawu mukuwunda. Antu afwa dehi akekala cheñi nawumi. Antu amavulu amayala niambanda iwunadizi muyinu buloshuwa adi neyi Rebeka, Rahaba, Davidi niElija akekala cheñi nawumi. Wunakukeña  wakadimoni nawu neyi anasañuki dehi?—

Yehova wakukeña nawa nakukeña nindi wikali namuzañalu. Neyi wukudizaña hadi Yehova nikumwovwahila, wakashakama haya nyaka muparadisa yayiwahi. Dichuma chiwunakukeña, netu?—