Komana mpinji jikwawu chakukalilaña kwovwahila anvwali jeyi?— Mpinji yikwawu chakalaña. Wuneluki ntahi neyi Yesu wamwovwahilileña Yehova nianvwali jindi?— Yuma yeliliyi yinateli kukukwasha kulonda wovwahileña anvwali jeyi hela chakwila chinateli kukukalila kuyovwahila. Tudizenu kulonda twiluki.

Henohu Yesu kanda yenzi hamaseki, wadiña naTata yindi, Yehova, mwiwulu. Ilaña Yesu wadiña cheñi nawanvwali jindi hanu hamaseki. Majinawu adiña aYosefu niMariya. Wuneluki chiyekaliluwu anvwali jindi?—

Yehova wafumishili wumi waYesu mwiwulu nakuwisha mwivumu daMariya kulonda Yesu yasemuki nakushakama hanu hamaseki. Chumichi chadiña hichihayamisha! Yesu wakulili mwivumu daMariya neyi chochakulaña anyana ejima mumavumu awamama jawu. Chimwahitili tukweji tutanu natuwana, Yesu wasemukili. Dichekaliluwu aMariya ninfumwindi Yosefu, anvwali jaYesu hanu hamaseki.

Chashikijiliyi Yesu yaaka 12, welili chuma chamwekesheli nawu wamukeña Tata yindi, Yehova. Chumichi chamwekeni hampinji yendeliyi Yesu nianvwali jindi lwendu lwalulehi lwakuya kuYerusalema nakwanakana Paseka. Hampinji yafuntileñawu, aYosefu niMariya hiyamumweni Yesuku. Wuneluki kwadiñayi?—

A Yosefu niMariya afuntili swayi kuYerusalema nakumukeña Yesu. Adakameneni nankashi muloña amumweni wanyi. Chimwahitili mafuku asatu, amuwanini mutembeli. Wuneluki chayililiyi Yesu mutembeli?— Muloña wakeñeleña kudiza hadi Tata yindi, Yehova. Wamukeñeli Yehova nawa wakeñeleña kumutiyisha kuwaha. Chakuliliyi Yesu watwalekeluhu kumwovwahila Yehova. Yesu wovwahilileña nihampinji yakala nawa wadi kukabakana. Komana Yesu wayovwahilileña aYosefu niMariya?— Eña, Bayibolu yatulejaña nawu wayovwahilileña.

Chumanyi chiwukudizila kudi Yesu?— Watela kuyovwahila anvwali jeyi nihampinji yakala. Wunateli kuyovwahilaña?—