CHIBALU 1
“Ajimbala Nakayikeñakeña”
Mukoku naluwankani. Hadaha hampinji yadañayi matahu, waambuka hamukanka wawakwawu. Dichi nakañanyi kumona kunayili akwawu hela kabiña. Kutachika nikwiyila. Najimbeli muchinekineki mudi ayisumi, nawa iwu mukoku wudi muwubanji. Nkumininaku, hakutiya izu damuntu welukayi, kabiña, iwu kabiña hakutemukila kudi mukoku, hakumunona nakumuvuñila muchikowelu chindi nakumusenda kumukala.
YEHOVA kakavulu wadesekejaña naniwu kabiña. Mwizu dindi watushiika nindi: ‘Ami aweni yami nakakeñakeña nyikoku yami, nakayakamenaña.’—Ezekeli 34:11,12.
‘Nyikoku Yinakamenaña’
Indi anyikoku jaYehova anyi? Tuhoshi hohu netu, anyikoku jaYehova hiyantu amukeña nawa adifukulaña kudi yena. Bayibolu yahoshaña nawu: ‘Tudifukulenu, tubandamenu, tufukamenu kumesu aYehova watutuñili; Muloña diyi Nzambi yetu, etu tudi antu akuwudiilu wanyikoku yindi, tudi nyikoku yakamenañayi.’ (Masamu 95:6, 7) Kufwana mukoku walondelaña kabiña, akwakudifukula aYehova niwena afwilaña kulondela Kabiña kawu. Komana awanina? Inehi. Mpinji jikwawu, antu jaNzambi ekalaña neyi ‘nyikoku yinapalañenumu,’ ‘nyikoku yajimbala’ nawa ‘neyi nyikoku yinapwapuki.’ (Ezekeli 34:12; Matewu 15:24; 1 Petulu 2:25) Hela chakwila muntu napwapuki, Yehova hamumbaña chisayikilaku ilaña welukaña nindi ifuku dimu wakafunta.
Komana mwatoñojokaña nenu Yehova wuchidi Kabiña kenu? Makonu Yehova wadimwekeshaña ñahi neyi Kabiña? Talenu njila jisatu:
Watudiishaña kuspiritu. Yehova nindi: “Nakayidiishila kuwudiilu wawuwahi, . . . Akakamaña kwenoku mwidimba dadiwahi akadiilaña . . . hawudiilu wawuwahi.” (Ezekeli 34:14) Yehova kanda yakañanyeñahu dehi kutwinka yakudya yashiyashana yayiwahi yakuspiritu hampinji yatelela. Kudihu chibaaba, mpanji hela vidiyo yimukwanuka yakwili kulomba kwenu? Komana hiyayikwashili kwiluka nenu Yehova wayakamenañaku?
Watukiñaña nikutukwasha. Yehova watushiika nindi: ‘Apwapuka nakayileta cheñi, akotoka nakayikasakasa, azeya nakayikolesha.’ (Ezekeli 34:16) Yehova wakoleshaña antu anazeyeshiwu anakwakamena muloña wakukala kukwetiwu. Wakasakasaña nyikoku yindi yinadikatishi hela yinakatishiwu kudi akwawu akakwitiya kulonda yikoli. Nawa wafuntishaña ejima apwapuka niantu ananeñi.
Watwakamenaña. Yehova nindi: “Nakayipulwisha kwonsu kwanapalañenuwu. . . . Ajimbala nakayikeñakeña.” (Ezekeli 34:12, 16) Yehova wamonaña mukoku wajimbala nindi nateli kuhimpa. Welukaña neyi mukoku najimbali, wamukeñakeñaña nawa wazañalalaña neyi namuwani. (Matewu 18:12-14) Nawa watenaña akwakudifukula indi alala nindi ‘nyikoku yami, nyikoku yinakamenaña.’ (Ezekeli 34:31) Ninenu mudi hakachi kaniyi nyikoku.
Yehova wamonaña mukoku wajimbala nindi nateli kuhimpa. Wazañalalaña neyi namuwani iwu mukoku
“Tubalumwini Mafuku etu Ekali Amaha Neyi Hanyaka”
Muloñadi Yehova chinakuyikeñelayi nakuyila nindi mufunti kudi yena? Muloña nakukeña nindi mwikali namuzañalu. Watushiika nindi anyikoku jindi ‘wakayinokeshela nkisu neyi nvula.’ (Ezekeli 34:26) Ichi chikaninu chakashikijewa. Munadimweni dehi wunsahu enu aweni.
Anukenu chimwatiyili hampinji yimwamwilukili Yehova. Chakutalilahu, mwatiyili ñahi chimwadizili katachi nsañu yayiwahi kutalisha hejina daNzambi ninkeñelu yikwetiyi kutalisha hadi antu? Munakwanuka chimwazañaleleña hakudiwana nawakwenu akwaKristu hakupompa kwanyanya nikwamaneni? Hampinji yimwayili nakushimwina nsañu yayiwahi kudi muntu wamwekesheli mpwila, komana himwazañaleli nankashi hampinji yimwafuntili kwitalaku?
Munateli kwikala cheñi naniwu muzañalu. Ambuña Nzambi akunyima alombeli nawu, ‘Eyi Yehova, tubalumuni tutali kudeyi, ninetu tukubalumuka nakufunta kudi eyi. Tubalumwini mafuku etu ekali amaha neyi hanyaka.’ (Mukeña 5:21) Yehova wakwili kulomba kwawu nawa antu jindi afuntili nakumuzatila namuzañalu chikupu. (Nehemiya 8:17) Dichakayila Yehova ninenu.
Hela chochu, kufunta kudi Yehova hichuma chakala. Talenu kukala kunateli kuyikañesha kufunta kudi Yehova nichimwatela kukwishinda.
