KUHWELELENU nenu Yehova wukuyikwasha neyi mufunta kudi yena. Wukuyikwasha kuumika neyi munaneñi, kumanisha kukala kwayikatishaña kumuchima nikwikala nakuwunda kwamuyitoñojoka nimumuchima muloña wakwikala nachinleji chitooka. Mukwikala cheñi neyena dakumukalakela Yehova hamu nawakwenu akwakudifukula. Kukala kumukweti kudi neyi kwadiña nawakwaKristu amunkulakaji yakusambila asonekeleliyi kapostolu Petulu nindi: “Mwapwapukilaña neyi anyikoku, ilaña katataka munafunti kudi kabiña, mukwakuhemba wumi wenu.”—1 Petulu 2:25.

Mukuwahisha nankashi neyi mufunta kudi Yehova. Muloñadi? Mukutiyisha muchima waYehova kuwaha. (Yishimu 27:11) Neyi chimuneluki, Yehova watiyaña kuwaha hela kutama, dichi yilwilu yetu yamuzañaleshaña hela kumuneñesha. Hela chochu, Yehova hatukanjikijaña nindi chiña tumukeñi hela kumukalakelaku. (Kuhituluka 30:19, 20) Nkuluñaña wumu wadiza Bayibolu nindi: “Kwosi muntu wunateli kukwenzunwina muchima weyuku. Chiña eyi aweni hohu.” Dichi neyi tukudifukulaña kudi Yehova chakufuma hamuchima wakukeña, dikwila nawu tunateli kwenzununa muchima wetu. Neyi twila mwenimu, tukumwinka chawana chalema, dikwila nawu kashinshi ketu, nawa tukumutiyisha kuwaha nankashi. Kwosi chuma chinateli kwesekana namuzañalu wutwatiyaña hamuloña wakudifukula kudi Yehova munjila yatelela.—Yilwilu 20:35; Chimwekeshu 4:11.

Kubombelahu, chimwatachika cheñi kudifukula, himwakatiya cheñi nzala yakuspirituku. (Matewu 5:3) Munjilanyi? Antu mukaayi adihulaña nawu, ‘Muloñadi chitwekalilaku?’ Afwilaña kwiluka ñakwilu yamalwihu ahosha hachatuleñeleliwu. Antu afwilaña kwiluka muloña Yehova wayileñeli muniyi njila. Watuleñeli nindi twikaleña namuzañalu hakumukalakela. Kwosi chuma chikwawu chatela kutuzañalesha chikupu chinabadiki hamuzañalu wutwatiyaña hakwiluka netu tunakudifukula kudi Yehova chakufuma hamuchima.—Masamu 63:1-5.

Mwani ilukenu nenu Yehova nakukeña mufunti kudi yena. Mukwiluka ñahi? Toñojokenu ntahi: Amanakwetu alombeli chikupu hakwila iyi buloshuwa ayisoneki chiwahi. Hamwaha ayileteleli kudi mukulumpi mukwaKristu hela kudi mukwenu mukwakwitiya. Mwekalili nampwila yakuyitaña nikwiteja chiyinahoshi. Wunsahu wejima iwu wunakumwekesha nawu Yehova hayilalamenaku. Ilaña, nakuyiswija chiwahi kulonda mufunti kudi yena.—Yowanu 6:44.

Tunateli kuzañalala hakwiluka netu Yehova halalamenaña ambuñindi anajimbaliku. Ichi dichuma chenjili nakwilukayi muhela Donna. Wahosheli nindi: “Natachikili kuselumuka chovu-chovu muchalala, ilaña navulileña kutoñojoka mazu ekala haMasamu 139:23, 24, ahosha nawu: ‘Ntali chachiwahi, eyi Nzambi, wiluki muchima wami; ñeseki, wiluki yitoñojoka yami; Wumoni neyi mudami mwekala kwenda kwakuluwa, wunlomboli munjila yahaya nyaka.’ Nelukili nami hinekala kabadi ketuñaku, kanteleleli wanyi, nawa nelukili nami nateleli kwikala mukuloñesha kwaYehova. Natachikili kutoñojoka nami Yehova hanshili kankawamiku; nateleleli kuwana hohu njila yakufuntilamu kudi yena. Nidi namuzañalu nankashi chinafunta.”

Kulomba kwetu kudi kwakwila nawu ninenu mukudiluñisha cheñi “muzañalu waYehova.” (Nehemiya 8:10) Himwakaditoñesha neyi mufunta kudi Yehovaku.