ANTU ejima akamenaña, kushilahu niantu jaNzambi. Ñimbi yamasamu wasonekeli nindi: ‘Yitoñojoka yakwakamena yanvulili mumuchima.’ (Masamu 94:19) Yesu wahosheli nindi kumafuku akukuminina, “kwakama yuma yawumi” wunu kwakayikañeshaña nankashi kumukalakela Yehova. (Luka 21:34) Indochu enu? Komana munakwakama muloña wakukala kwamali, kukala kwamuchisaka hela yikatu? Yehova nateli kuyikwasha ñahi kuumika?

Hitukutwesha kumanisha nkawetu kukala kwaleteshaña kwakamaku. Kapostolu Pawulu nindi, “Anatushintakeshi mumbadi jejima . . . . tunaluwankani . . . ; anatudimbwishi hamaseki.” Wahosheli cheñi nindi “hitunakañanyi nihakudinyinkeshelaku,” “hiyanatushiyi chisayikilaku” nawa “hiyanatujilumuniku.” Chumanyi chikutukwasha kuumika? “Ñovu jabadika nankashi,” ñovu yafumaña kudi Nzambi yetu wabadika, Yehova.—2 Akorinda 4:7-9.

Toñojokenu chimwekalili ‘nañovu yabadika nankashi’ kunyima. Munakwanukahu wanyi mpanji yayikolesheli chiyayikwashili nankashi kwikala namuchima wakulemesha kukeña kwalala kwaYehova? Yuma yatushiikayi Yehova hiyakolesheli chikuhwelelu chenu hampinji yimwadizishileña antu hayuma yayiwahi yakekala muParadisaku? Neyi tukupompaña nikuleja antu yuma yitwakuhwelela, tukwikala nañovu yakuumika yuma yatuleteshaña kwakama nawa tukwikala awunda muyitoñojoka kulonda tumukalakeleña Yehova namuzañalu.

Kuhosha hohu chalala, himunateli kukoña yuma yejima hampinji yimuku. Chakutalilahu, Yehova watwilaña nindi tusambileña kukeña Wanta nikutwalekahu kukalakala nyidimu yakuspiritu. (Matewu 6:33; Luka 13:24) Indochu neyi munazeyi muloña wekañesha dinakufuma kudi antaña hela amabwambu jenu, mwakata hela mudi nakukala muchisaka? Indi neyi mudimu wenu wakumujimba wunakuyidiila mpinji yimwatela kwikala kuchipompelu nawa wunakuyizeyesha? Neyi munakukeña kuzata yuma yayivulu, ilaña mpinji niñovu yakuyizatilamu yinakehi, mukutachika kwakama. Hadaha mwatoñojokahu dehi nenu Yehova wakeñaña nindi mumwilileña yuma yabadika muñovu yenu.

Yehova wayiluka chiwahi. Hakeñaña nindi tumwinkeña yuma yabadika muñovu jetuku. Nawa weluka nindi hashimbulaña hakwila tukoli cheñi kumujimba nimuyitoñojoka.—Masamu 103:13, 14.

Chakutalilahu, talenu Yehova chamwakameneniyi kaprofwetu Elija. Elija waneñeli nawa watiyili woma chakwila watemukilili mwisaña, komana Yehova wamuzuwilili iwu kaprofwetu nakumuleja nindi chiña yafunti nakuzata mudimu wamwinkeliyi? Inehi. Yehova watemesheli kañelu kindi mapampa kayedi nakumuhindwisha chiwahi Elija nikumwinka yakudya.  Hela chochu, chimwahitili mafuku 40, Elija wachidiña nakwakama nikutiya woma. Chumanyi cheliliyi Yehova kulonda yamukwashi? Chatachi, Yehova wamwekesheli nindi wukumukiña. Chamuchiyedi, Yehova wamukundejeli Elija ‘nezu danyanya, dawunda.’ Nkumininaku, Yehova wamulejeli cheñi nindi kwadiña cheñi antu amavulu adifukwileña kudi Nzambi nakashinshi. Elija wakoleli cheñi nakwikala kaprofwetu wadikita. (1 Anyanta 19:1-19) Chumanyi chitukudizilaku? Chelili Elija yasweji kwakama, Yehova wamuwundilili nawa wamutiyilili wushona. Yehova wahimpa wanyi. Ninetu watwakamenaña munjila yoyimu.

Neyi munakutoñojoka hayuma yimunakukeña kumwinka Yehova, toñojokenu chiwahi. Bayi mwesekejeña yuma yimunakwila makonu nayimwelileña kunyimaku. Chakutalilahu: Mukwakutemuka walekeli kutemuka hadi tukweji hela yaaka yayivulu hakutwesha kutemuka lufuchi hohenohu neyi chatemukileñayi kunyimaku. Ilaña, watachikaña kutemuka chovu-chovu kulonda yekali nañovu nikuumika. AkwaKristu adi neyi akwakutemuka lufuchi. Atemukaña nankeñelu. (1 Akorinda 9:24-27) Komana kwila mwimika chikonkwanyi chakuspiritu chimunamoni nenu mukutwesha kuchila hayinu mpinji nehi? Chakutalilahu, munateli kufuukula nenu mukutachika kupompa. Lombenu kudi Yehova kulonda yayikwashi. Neyi wubwambu wenu naNzambi wunakoli, ‘mukutompa nakutiya chawahayi Yehova.’ (Masamu 34:8) Anukenu nenu yuma yejima yimukwila kulonda mumwekeshi chimwamukeña Yehova, hela chuma chanyanya, Yehova wachilemeshaña.—Luka 21:1-4.

Indi Yehova wamukolesheli ñahi June kulonda yafunti? June nindi: “Natwalekeluhu nakulomba kudi Yehova, nami yankwashi. Mukuwami wamumbanda walenjeli nindi muniyi mbaka mwadiña kupompa kwanyanya. Nayili nakupompaku ifuku dimu hohu. Wenowu muzañalu wunatiyili kwikala hamu nawantu jaYehova! Iku kupompa dichuma chansañumwini chinadiña nakutalila. Chayinu mpinji inakumuzatila Yehova namuzañalu cheñi. Ichi chihandilu chami chikweti nkeñelu. Neluki nami natela kwikala nawamanakwami niahela nikwiteja munakunkwashawu. Nasakililaña muloña nafunta cheñi henohu kuchidi mpinji.”