CHIBALU 4
Kudinka Nyiloña—‘Ntookeshi kuNshidi Yami’
“Mudimu wuneñilili wakwashili chisaka chetu kwikala nachihandilu chachiwahi, ilaña wanletesheli cheñi nitachiki kwila yuma yatama. Natachikili kwanakana mafuku akunooka, kudiñija munsañu jamatuña nikuya kuchechi. Nadiña Chinsahu chaYehova wazeya hadi yaaka 40. Chakotokeleña yaaka, natachikili kutoñojoka nami Yehova kwila yañanakena nehi. Natoñojokeli nami navulumwini nankashi. Hela chochu, chalala nachilukili henohu kanda nitachiki kukoña yiluwa.”—Martha.
KUDINKA nyiloña hichiteli cheneni. Davidi wasonekeli nindi: “Kuluwa kwami kunabadiki nihamutu wami; kuneli neyi chiteli chalema, kunabadiki nimuñovu jami.” (Masamu 38:4) AkwaKristu amakwawu azeya nankashi muloña wakusweja kudinka nyiloña, amonaña nawu Yehova kwila yayanakena nehi. (2 Akorinda 2:7) Komana dimu? Hela chakwila munakoñi nshidi yahamesu bwi-i, komana mudi kwakulehi naYehova chakwila kwila yayanakena nehi? Inehi!
“Inzenu Tutiyañanenu”
Yehova hombaña chisayikila akwanshidi anabalumukiku. Ilaña wakundamaña kwakwihi nawena. Muchishimu chamwana wajimbeli, Yesu wamwesekejeli Yehova natata yawantu wukweti kukeña wadiña namwanindi wafumini muchisaka nakufwila yuma yamukunkulwayi. Mukuhita kwamafuku, iwu mwana watoñojokeli kufunta hetala. “Hadiñiyi [mwanindi] wuchidi maaya, tata yindi hakumumona, hakutiya wushona, hakuya lufuchi, hakumukumbata nikunshiñu, hakumupwepujola.” (Luka 15:11-20) Komana munakukeña kukundama kwakwihi naYehova ilaña munakutoñojoka nenu ‘muchidi mpata maaya’? Kufwana tata yawantu wamuchishimu chaYesu, Yehova wukuyitiyila wushona. Nakufwila nindi mufunti cheñi.
Munateli kwiladi neyi mumona nenu nshidi yenu yeneni nankashi nawa yayivulu chakwila Yehova hakutwesha kuyanakenaku? Mwani talenu mutambi waYehova wasonekawu haIsaya 1:18 nawu Yehova nindi: “Inzenu tutiyañanenu, hela neyi nshidi jenu jichinana, jakatooka to-o neyi mpeza.” Hela tuhu nshidi yinakumwekana neyi wulombu wuchinana wunalamati hehina ditooka, Yehova nateli kuyanakena.
Yehova hanakukeña nindi mukabakaneña hamuloña wakudinka nyiloña. Hanu dinu munateli kwikala ñahi mukuwunda kulonda Nzambi yayanakeni nawa mwikali nachinleji chitooka? Talenu yuma yiyedi yeliliyi Mwanta Davidi. Chatachi, wahosheli nindi: “Nukwiteja kudi Yehova nyiloña yami.” (Masamu 32:5) Anukenu nenu, Yehova nayitambiki dehi nindi mwinzeña kudi yena mukulomba nawa ‘mutiyañani.’ Itejenu iwu mutambi. Mulejenu Yehova nshidi yimwakoñeli nichimunakutiya. Davidi walombeli nachikuhwelelu muloña wachiluwa chakoñeliyi nindi: “Ntookeshi nshidi yami. . . . Muchima wachikeka dehi puchi wadishona hiwukuwusekeshaku, eyi Nzambi.”—Masamu 51:2, 17.
Chamuchiyedi, Davidi watambwilili wukwashu kufuma kudi ñimenu atondeluwu kudi Nzambi, kaprofwetu Natani. (2 Samweli 12:13) Makonu, Yehova watwinka akulumpi muchipompelu adizishawu kukwasha akwanshidi anabalumuki kwikala cheñi nawubwambu wawuwahi naYehova. Neyi muyilejamu akulumpi, akuzatisha Nsona nawa akulomba chakufuma hamuchima kulonda awundishi muchima wenu, nikufumisha yitoñojoka yatama kulonda mukoli kuspiritu.—Yakoba 5:14-16.
Yehova nakukeña nindi mwikali mukuwunda muloña wakwikala nachinleji chitooka
‘Wunakooleki Yowu Anaanakenuwu Muloña Windi’
Eña, munateli kutoñojoka nenu chikuyikalila nankashi kumulejamu Yehova Nzambi nshidi yimunakoñi hela kulejamu akulumpi. NiDavidi watoñojokeleña mwenimu. “Wamweneni zo o” hadi mafuku amavulu chakadi kushimuna nshidi jindi. (Masamu 32:3) Nkuminaku, wamweni wuloku wafumaña mukudishimwina nshidi yakoñeliyi nikuzatila hanochu chiluwa.
Davidi wahetelelumu nankashi muloña wekalili namuzañalu cheñi. Wasonekeli nindi: “Wunakooleki yowu anaanakenuwu muloña windi, ananakenuwu nshidi yindi.” (Masamu 32:1, NW, tumazu twaheshina) Walombeli cheñi nindi: “Eyi [Yehova], jikula nyivumbu yami; kanwa kami katiyakeshi mazu akukushimeka.” (Masamu 51:15) Davidi watachikili kuleja antu amwiluki Yehova muloña amwanakeneni nshidi jindi nawa wahamekeli haluwi lwaNzambi.
Yehova nakukeña nindi mwikali mukuwunda muloña wakwikala nachinleji chitooka. Nakukeña cheñi nindi mulejeña antu amwiluki ninkeñelu yindi, bayi kudinkaña nyiloñaku ilaña chakufuma hamuchima namuzañalu. (Masamu 65:1-4) Anukenu nakuyitambika nindi ‘wukujimañesha nyiloña yenu, kulonda kwinzi yilaaka yakuhizumwisha yakuleta ñovu yafumaña kudi Yehova yomweni.’—Yilwilu 3:19.
Ichi dichamumwekeneni Martha. Washimwini nindi: “Mwanami weyala watwalekeluhu nakuntemeshela magazini aKaposhi Kakutalila niAwake! Chovu-chovu, natachikili kumwiluka cheñi Yehova. Ilaña chankalili nankashi hakwila nami nilombi nami añanakeni hanshidi jejima jinakoñeli. Nkumininaku, nalombeli kudi Nzambi nami yañanakeni. Nelukili wanyi nami munahiti yaaka 40 hakwila nifunti kudi Yehova. Chuma chammwekeneni chinakumwekesha nawu hela hakuhita yaaka yayivulu, muntu nateli kumukalakela cheñi Nzambi nakwikala mukukeña kwindi.”
