CHIBALU 3
Yuma Yatukatishaña Kumuchima—Neyi Tukweti “Muloña”
“Muhela wumu wamuchipompelu chetu wantwambilili nindi namwiyili mali. Antu muchipompelu chelukiluwu atachikili kumuhakwilaku. Nkumininaku, iwu muhela wanlejeli nindi watambwilili nsañu yamwekesheli nawu iyami namunoneleleli malindi wanyi. Hela chakwila wadanakeneni, natoñojokeleña nami kwila nimwanakena nehi muloña wachuma chañililiyi chankatili kumuchima.”—Linda.
KOMANA ninenu mudi neyi Linda, waneñesheliwu nankashi kudi mukwawu mukwakwitiya? Chawushona, antu amakwawu aluwankanaña nankashi nayuma yayikoñañawu kudi akwawu chakwila alekaña nikumukalakela Nzambi. Ninenu nawa dichimudi?
Kudihu Wunateli ‘Kutwambula Kukukeña kwaNzambi’?
Kuhosha hohu chalala, chatukalilaña kwanakena mukwetu mukwakwitiya wunatukatishi kumuchima. Muloña, akwaKristu atela kukeñañana. (Yowanu 13:34, 35) Neyi mukwetu mukwakwitiya natutamishi, kumuchima kwatatashanaña nikuyeña.—Masamu 55:12.
Hela chochu, Bayibolu yahosha nawu kwekala mpinji yekalañawu akwaKristu “namuloña namukwawu.” (Akolosi 3:13) Neyi chuma chamuchidiwu chinatumwekeni, chatukalilaña kuwana njila yakukumanishilamu. Kudihu chuma chinateli kutukwasha? Talenu nshimbi jisatu jamuNsona:
Tata yetu wamwiwulu weluka yuma yejima. Yehova wamonaña yuma yejima yamwekanaña, kushilahu niyuma yatama yatumwekenaña nichiyatuneñeshaña. (Aheberu 4:13) Cheñi, Yehova watwakamenaña neyi tunaneñi. (Isaya 63:9) Hetejaña ‘yihuñu hela kukala’ hela chuma chikwawu, hela tuhu ñamba yindi wumu, ‘yatwambuli kukukeña kwaNzambiku. (Aroma 8:35, 38, 39) Komana kwila tumwimbujola kuhitila mukubula kwiteja chuma hela muntu kutwambula kudi Yehovaku?
Kwanakena bayi neyi hikwiteja chiluwaku. Neyi twanakena antu atuvulumunaña, hichinayi mukwila nawu tunakeheshi hela tuneteji chiluwa chinakoñuwuku. Mwatela kwanuka nenu, Yehova hetejaña nshidiku, ilaña wanakenaña neyi muntu nabalumuki. (Masamu 103:12, 13; Habakuki 1:13) Neyi nakutuleja nindi twanakeneña akwetu, dikwila nawu Yehova nakutuleja nindi tumwimbujoleña. “[Hatuhililaña] hilee-ku.”—Masamu 103:9; Matewu 6:14.
Neyi tuleka kuhemba nkunyi, tukuhetelamu. Munjilanyi? Toñojokenu hanichi chakutalilahu. Munona niilola, hadaha dalemaku chantesha, mudisha nimuchikasa iku munachololi. Hadaha chikasa chikuma hela munadilami hakapinji kanti. Indi neyi mutwalekahu nakudilama hadi mpinji yeneni? Komana mukutwesha kudilama hadi jiminiti, ora nakubadikahu? Chakubula nikujinoka, chikasa chikuyuma nankashi! Ilaña dinu, kulema kwelola hikukuhimpaku. Chimwatwalekahu nakudilama, dikutachika kulemenaku. Dichatiyañayi nimuntu wahembaña nkunyi. Chitwatwaleka nakuhemba nkunyi, hela tuhu hakachuma kantesha, tukutachika kuyandilamu. Dimuloña waweni chatulejelañayi Yehova nindi tuleki kuhemba nkunyi. Chihandilu chetu chikuwaha neyi tuleka kuhemba nkunyi.—Yishimu 11:17.
Neyi tuleka kuhemba nkunyi, tukuhetelamu
“Natiyili Neyi Yehova Yomweni Wahosheleña Nanami”
Chumanyi chamukwashili Linda kubula kufuntisha katama nakatama hachuma chamukoñeluwu kudi mukwawu mukwakwitiya? Hakachi kayuma yikwawu, Linda watoñojokeli hachahosha Nsona kutalisha hakwanakena. (Masamu 130:3, 4) Linda welukili chikupu nindi neyi tukwanakenaña akwetu, ninetu Yehova wukutwanakenaña, ichi dichuma chamukwashili nankashi. (Aefwesesa 4:32–5:2) Wahosheli kutalisha kunawa mazu amukwashili nindi: “Natiyili neyi Yehova yomweni wahosheleña nanami.”
Mukuhita kwampinji, Linda hahembeli cheñi nkunyiku. Wamwanakeneni ona muhela chikupu nawa iwu muhela diyi ibwambu dindi chikupu. Linda watachikili kudikita chikupu mumudimu waYehova. Mwatela kwiluka chikupu nenu Yehova nakukeña kuyikwasha ninenu.
