CHIBALU 9
Difukulenu Kudi Yehova naChisaka Chenu
“Difukulenu Kudi waleñeli niiwulu nimaseki.”—Chimwekeshu 14:7
Neyi chimunadizi muyinu buloshuwa, muBayibolu mudi nshimbi jajivulu jinateli kuyikwasha nichisaka chenu. Yehova nakukeña mwikali namuzañalu. Nakani nindi neyi mukusha nankashi muchima hakudifukula kudi yena, “yuma yejimiyi akayishilaku.” (Matewu 6:33) Nakukeña chikupu nindi mwikali ibwambu dindi. Dichi mpinji yejima dikundenuña naNzambi. Iku hikukooleka kweneni nankashi kukwetuwu antu.—Matewu 22:37, 38.
1 KOLESHENU WUBWAMBU WENU NAYEHOVA
BAYIBOLU YAHOSHAÑA NAWU: “Nukwikala Tata yenu, ninenu mukwikala anyanami amayala nawambanda; dichi chanahoshiyi Yehova.” (2 Akorinda 6:18) Nzambi nakukeña nindi mwikali ibwambu dindi chikupu. Munateli kwikala ibwambu dindi kuhitila mukulomba. Yehova nakukeña nindi ‘mulombeña kudi yena mpinji yejima.’ (1 Atesalonika 5:17) Nakufwila kutiya yitoñojoka nikwakama kwenu kwejima. (Afwilipi 4:6) Neyi munakulombela hamu nawanyanenu, anyanenu akumona nawu mwamukeña Nzambi.
Hela chakwila mwatela kuhoshaña naNzambi, anenu nawa mwatela kutiyilila mwahoshañayi. Munateli kumutiyilila kuhitila mukudiza Izu dindi ninyikanda yashindamena haBayibolu. (Masamu 1:1, 2) Toñojokenuña chikupu hayuma yimwadizaña. (Masamu 77:11, 12) Kuya kukupompa kwawakwaKristu nikwena kwamwekeshaña nawu munakukeña kumutiyilila Nzambi.—Masamu 122:1-4.
Kuleja antu kulonda amwiluki Yehova hinjila yimu yalema yakukoleshelamu wubwambu wenu nayena. Chimwasweja kuleja antu kulonda amwiluki, mukukundama kwakwihi naYehova.—Matewu 28:19, 20.
YUMA YIMWATELA KWILA:
-
Ikalenuña nampinji yakutaña Bayibolu nikulomba hefuku hefuku
-
Wejima wenu muchisaka, twamijenuku nyidimu yakumukalakela Nzambi kubadika yisela niyuma yikwawu
2 DILUÑISHENUÑA KUDIFUKULA KWACHISAKA
BAYIBOLU YAHOSHAÑA NAWU: “Kundamenu kwakwihi naNzambi, niyena wukukundama kwakwihi nanenu.” (Yakoba 4:8) Mwatela kwikala nandandanda yimwatanjika yakudifukula kwachisaka mpinji yejima. (Kutachika 18:19) Ilaña mwatela kuzata nañovu. Nzambi watela kwikala muchisaka chenu. Kwashenu chisaka chenu kulonda ekali nawubwambu wawuwahi naNzambi kuhitila mukuhosha hadi yena ‘chimwakashakamaña mwitala denu, nichimwakendaña munjila, nihakukama, nihakuhinduka.” (Kuhituluka 6:6, 7) Fwilenu kwikala neyi Yoshuwa wahosheli nindi: “Hakwila ami nimutaña wami tukumukalakela kwetu Yehova.”—Yoshuwa 24:15.
YUMA YIMWATELA KWILA:
-
Twalekenuhu nakudizisha ejima adi muchisaka chenu kwesekeja nakukala kukwetuwu
