LWIHU 9
Komana Nateli Kukuhwelela Nami Yuma Yadileñeli Yayeni?
WADI KWILA ÑAHI?
Fwikijaku chumichi: Nsanji naluwankani. Wakuhwelela mudi Nzambi nimukuleña. Ilaña dalelu ntañishi yindi wabawologi wataadikaña nakuhosha nindi ntañishilu yakwila nawu yuma yadileñeli yayeni yalala, nawa nindi yashindamena hakusandujola kwawasayantisiti. Nsanji hanakukeña kumwekana kusupaku. Hakudihoshesha nindi ‘Neyi asayantisiti anamwekeshi nawu mwalala yuma yadileñeli yayeni, yaminyi mwaka niyijinoki?’
Neyi yeyi wadiña Nsanji, komana wadi kwiteja neyi yuma yadileñeli yayeni muloña wakwila nyikanda yamwekesha nayu iyi nsañu yalala?
SAMBILAKU KUTOÑOJOKAHU!
Antu anakuditaadikisha kutubadi twejima tuyedi avula kuhosha hayuma yakuhwelelawu chakadi kwiluka chuma chaletesha akuhweleli yumoyu.
-
Antu amakwawu akuhwelela mukuleña muloña dichayilejawu kuchechi yawu.
-
Antu amakwawu akuhwelela nawu yuma yadileñeli yayeni muloña dichayitañishiliwu kushikola.
MALWIHU 6 AKUTOÑOJOKAHU
Bayibolu yahosha nawu: “Itala dejima kudi muntu wadituñaña, ilaña waleñeli yuma yejima, hiNzambi.” (Aheberu 3:4) Komana twatela kukuhwelela awa mazu?
Yitoñojoka yakwila nawu kwosi Nleñi waleñeli wumi yidi hohamu nayitoñojoka yakwila nawu idi itala kwosi wadituñili
ANTU AHOSHAÑA NAWU: Yuma yejima yekaliliku muloña wachuma chimu chavumini nañovu mukukasumwisha.
1. Hinyi hela chumanyi chaletesheli ichi chivumina?
2. Nhoshelu yimu yidihi yashikila, yakwila nawu yuma yejima kwosi kuyafumini, hela yuma yejima yafumini kudi muntu?
ANTU AHOSHAÑA NAWU: Antu afuma kudi anyama.
3. Neyi antu afumini kudi atunyama adi neyi ampombu, hanu dinu muloñadi antu niampombu chiyambukilawu chikupu muyitoñojoka?
4. Muloñadi nituyuma twanyanya twekala mumujimba chitwekalila twakuhayamisha?
ANTU AHOSHAÑA NAWU: Mwalala yuma yadileñeli yayeni.
5. Hanu dinu muntu wahoshaña muniyi njila, wakeñakeñahu dehi wunsahu walala yomweni?
6. Antu añahi akuhwelela nawu yuma yadileñeli yayeni muloña wakwila ayilejeli nawu antu ejima adiza akuhwelela?
Julia wahosheli nindi: “Neyi wahitaña mwivunda nawa wuwana itala dadiwahi, komana wukuhosha neyi, ‘Idi itala ochidawaha! Idi itala datuñikili muloña nyitondu yatela yachañukilili mwiluña datelela.’ Inehi! Kwila chitwesheka nehi. Hanu dinu, muloñadi wutwatela kukuhwelela netu yuma yejima yamukuleña yenjili hohu?”
Gwen wahosheli nindi: “Fwikijaku muntu nakuleji nindi mwitala dakupulintila mwabaluka chuma nawa wulombu wasamukila hambañu yetala nikusiliñibodi nakutuñika dikishonali yamukuma. Komana wukukuhwelela chumichi?”
MULOÑADI WUTWATELA KUKUHWELELA MUDI NZAMBI?
Bayibolu yinakukoleshi nawu wuzatishi ‘wuswa weyi wakutoñojoka.’ (Aroma 12:1) Dikwila nawu watela wanyi kukuhwelela mudi Nzambi kushindamena
-
HACHIWATIYAÑA (Natoñojokaña nami kwatela kwekala muntu wañovu nankashi)
-
HAKUKULUWAÑESHA KUDI AKWENU (Nashakamaña mwiluña mwekala akwakwitiya)
-
HEKAKEJA (Anvwali jami ankulishili kukuhwelela mudi Nzambi, dichi hinadiña namwakwililaku)
Ilaña, watela kwiluka chikupu yuma yakuletesha wukuhweleli.
Teresa wahosheli nindi: “Neyi nidi mushikola nakutiyilila chinakulumbululayi ntañishi kutalisha hamujimba chiwazataña, nakuhwelelaña chikupu nami kwekala Nzambi. Chidi chejima chamujimba chikweti mudimu wuchazataña, kushika nikukachidi kanyanya nawa iyi yiidi yavula kuzatika chakadi etu kwiluka. Mwamweni mujimba wamuntu wekala wakuhayamisha!”
Richard wahosheli nindi: “Neyi nimona itala deneni nawa dadilehi, mbopolu hela motoka, nadihulaña nami’ Hinyi watuñili ichi?’ Chakeñekaña antu adiza hakwila nawu atuñi motoka, muloña yuma yanyanya yayivulu yakeñekaña kuzatila hamu munjila yayiwahi hakwila nawu motoka yendi. Nawa neyi kudi watuñaña nyotoka, dikwila nawu ninetu kudi watuleñeli.”
Anthony wahosheli nindi: “Chinadizili nankashi sayansi, natachikili kuleka kukuhwelela nami yuma yadileñeli yayeni. . . . Ami halwami nateli kuhosha nami, muntu watela kwikala ‘nachikuhwelelu’ nankashi hakwila yakuhweleli nindi yuma yadileñeli yayeni kubadika wukukuhwelela mudi Nleñi.”
YUMA YAKUTOÑOJOKAHU
Hela chakwila anasandujoli hadi yaaka yayivulu, asayantisiti kanda awani njila yakulumbulwilamu nawu yuma yadileñeli yayeni yatela kwitejawu ejima wawu. Neyi asayantisiti anakukañanya kuditeja hansañu yakwila nawu yuma yadileñeli yayeni nawa wena diwu akuluka yitembi, komana chikutama kujinoka iyi nsañu?
