Fwikijaku chumichi: Hampinji yinakuhemayi nawamabwambu jindi, Katiki naasi ngunja yinayi nakubalula windu yambala.

Neyi yeyi wadiña Katiki, wadi kwila ñahi?

WUKWETI NJILA JISATU:

1. Kutemuka.

2. Kutwambila mukwenu.

3. Kuleja mwini windu yuma yamwekana, nikumuleja neyi wukufweta.

Muchima wukukudimba nakutonda Njila 1. Ilaña chikuwaha neyi wukwiteja yiluwa yeyi, hela chakwila wunabaluli windu hela yuma yikwawu.

1. Dichuma chachiwahi kwila.

   Bayibolu yahosha nawu: “Tunakufwila kwikala ashinshika muyuma yejima.”—Aheberu 13:18.

2. Kakavulu antu anakenaña antu etejaña yiluwa yawu.

   Bayibolu yahosha nawu: “Muntu wabutaña nyiloña yindi hakamona kuwahaku; ilaña muntu wukwiteja nindi navulumunaña, hakuyileka, wakamona kwanakena.”—Yishimu 28:13.

3. Sweje-e dinu kwamutiyishaña Nzambi kuwaha.

   Bayibolu yahosha nawu: “Yehova wamonaña muntu waheña, nindi hichishimashima; ilaña yena wayaña hampuña nawakwakwoloka.”—Yishimu 3:32.

Karina wudi nayaaka 20, wesekeli kusweka itiketi kudi atata yindi damwinkeliwu muloña wakutemwisha motoka nankashi. Ilaña watwalekelihu wanyi kudisweka. Karina wahosheli nindi, “chimwahitili chaaka chimu, atata adimweni idi tiketi dadiña nejina dami. Neñilili mukukala kweneni!”

Wadizilili kwodi? Karina wahosheli nindi: “Kusweka yiluwa kwakwojejaña yuma kutaminaku hohu. Hela wusweki chamuchidinyi, wakamwenamu jakala mukuhita kwampinji!”

Ichi dinu toñojokaku hachiluwa chiwakoñeli chaaka chinamani kulonda waakuli malwihu analondelihu.

Bayibolu yahosha nawu: “Wejima wetu twaluwañeshaña kakavulu.” (Yakoba 3:2, tumazu tudi mufutunoti) Kwesekeja nachitunamoni, neyi witeja yiluwa yeyi nawa wuhimpa hohenohu, wukumwekesha neyi wadizoza nawa wunapami.

Njila yamuchiyedi hikudizila kuyiluwa yeyi. Kansi wamumbanda wejina daVera wahosheli nindi: “Nadizilaña kuyiluwa yami nawa nayimonaña nami yinateli kunkwasha kwikala muntu wamuwahi chakwila nakatwesha kumanisha kukala kukwawu mpinji yacheñi.” Tushinshiki chiwunateli kwila mwenimu.

Wusenda nkinga yawatata yeyi nawa wuyijaha. Wukwila ñahi?

• Kumwenahu nawa nakukuhwelela neyi atata yeyi akwiluka wanyi.

• Kuyileja atata yeyi chuma chinamwekani.

• Kuyileja atata yeyi yuma yamwekana ilaña kutwambila muntu wacheñi.

Wufweluka matesiti muloña wadiña nakutaña wanyi. Wukwila ñahi?

• Kwabila matesiti.

• Kwiteja neyi natañaña wanyi.

• Kutwambila ntañishi neyi wakuhela.

 Ichi dinu toñojokaku hayakutalilahu yinafumihu nawa esekaku kufwikija neyi yeyi wadiña (1) atata yeyi ni (2) ntañishi yeyi. Atata yeyi nintañishi yeyi adi kukumona ñahi neyi witeja yiluwa yeyi namuchima wumu? Adi kukumona ñahi neyi wusweka yiluwa yeyi?

Chadiña chiluwanyi chenochu?

Welili ñahi nachiluwa chenochu?

• Nachiswekeli.

• Natwambilili muntu wacheñi.

• Netejeli namuchima wumu.

Neyi wetejeli chiluwa cheyi wanyi, watiyili ñahi chihahitili mpinji?

• Natiyili kuwaha—muloña kwosi welukili!

• Nadakameneni—muloña nateleli kuhosha walala.

Wadi kumanisha ñahi iku kukala munjila yayiwahi?

Chumanyi chiwadizilili kuchiluwa cheyi?

Muloñadi antu amavulu chiyabulilañawu kwiteja yiluwa yawu?

Antu akukumona ñahi neyi wukutwalekañahu nakusweka yiluwa yeyi, ilaña akukumona ñahi neyi witeja yiluwa yeyi?—Luka 16:10