Fwikijaku chumichi: Mujiña chatalayi muchibanjilu, wadimonaña hohu kutoha. Hela chakwila anvwali niamabwambu jindi amulejaña nawu “mujimba weyi wanyanya” wahoshaña nindi “Inakukeña kwikala namujimba wanyanya.”

Katataka, Mujiña watoñojoka njila yakufumishilamu “2.2 kg” kumujimba windi. Nawa chuma chatela kwilayi hikushakama nanzala hadi mafuku antesha . . .

Neyi watiyili neyi chatiyiliyi Mujiña, wadi kwila ñahi?

Chatama wanyi kwakamena chiwamwekanaña. Kafwampi, Bayibolu yahosha chachiwahi hammwekenu yawambanda amavulu niamayala, kushilahu niSara, Racheli, Yosefu, Davidi niAbigayili. Bayibolu yahosha nawu mumbanda wejina daAbishagi “wadiñi wasweja lubanji.”—1 Anyanta 1:4.

Hela chochu, atwansi amavulu atiyaña kutama nammwekenu yawu. Chumichi chinateli kuyiletela kukala kweneni nankashi. Toñojokaku chumichi:

• Mukusandujola kumu, awanini nawu atwansi awambanda akushika kumapesenti 58 ahosheli nawu adiña nama kg amavulu, henohu mapesenti 17 diwu adiña nama kg amavulu.

• Mukusandujola kukwawu, awanini nawu ambanda akushika kumapesenti 45 adiña nama kg antesha adimweneña nawu atoheli nankashi!

• Hakufwila kutepululaku ma kg, atwansi amavulu anakati chikatu chanzala chakubula kukeña kuda muloña wakutiya woma nawu akutoha.

 Neyi wunatachiki kumona yinjikijilu yakubula kukeña kuda, keñaku wukwashu. Tachikaku kuhitila mukulejamu nvwali hela mukulumpi iwakuhwelela. Bayibolu yahosha nawu: “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.” —Yishimu 17:17.

Mwamweni, wuntu wamukachi diwaleteshaña muntu yamwekaneña chiwahi hela nehi. Shinshikaku hadi Abisalomi mwana kaMwanta Davidi. Bayibolu yahosha nawu:

‘Hikwadiñi muntu walubanji wakwesekana nayenaku. . . . Hadiñi nahataminayuku.’—2 Samweli 14:25.

Ilaña, iwu mukwenzi wadiña wadivwimba, wafwilileña kwila yuma yatama nawa wadiña nfukeji! Dichi, Bayibolu hiyamushimunaña Abisalomi kuwahaku; yamushimunaña kwikala muntu wabula kashinshi nawa mbanji.

Bayibolu yatufumbaña nawu:

“Vwalenu wuntu wawuha.”—Akolosi 3:10.

“Kudiwahisha kwenu bayi kwikala kwahanji yamujimbaku . . . , ilaña kwiikali kwawuntu wakujinda wamumuchima.”—1 Petulu 3:3, 4.

Hela chochu, chatama wanyi kukeña kumwekana chiwahi, ilaña chuma chalema nankashi kubadika mmwekenu yeyi hiwuntu wamukachi. Mukuhita kwampinji, yilwilu yeyi yayiwahi yakuhamekañawu antu, yikukojeja kukutiya kuwaha nankashi kudi antu kubadika neyi wudi namujimba wañovu hela walubanji! Kansi wamumbanda wejina daPhylicia wahosheli nindi: “Antu anateli kunyakala kumona lubanji lwamujimba weyi, ilaña chiwekala mukachi niyilwilu yeyi yayiwahi diyuma yakanukañawu antu nankashi.”

Komana watiyaña kutama nachiwamwekanaña?

Watoñojokahu dehi jakuya nakuwahisha yidi yeyi yamujimba kuhitila mukukuladika hela kwiluka mwakudiila kulonda wutohi hela wukosi?

Chumanyi chiwukuhimpa kutalisha hammwekenu yeyi neyi wadiña nawuswa wakuhimpa? (Tondakuhu yuma yiwunateli kuhimpa.)

• CHIMINU

• SIKELU

• NSUKI

• MMWEKENU YAMUJIMBA

• MMWEKENU YAKUMESU

• IKOWA

Neyi waakula neyi eña hamalwihu ayedi akusambila nawa halwihu lwamuchisatu wafundahu yuma yisatu nakubadikahu, ilukaku neyi: Antu amakwawu atiyaña kuwaha chakumonañawu kubadika chiwadimonaña eyi aweni. Chaswayi kudakamena nankashi hammwekenu yeyi.—1 Samweli 16:7.