Fwikijaku chumichi: Chinamoniyi akwawu akashikola ayedi hiyakwinza kudi yena, Kawumba hakutiya nimwivumu busu-u. Munonu mulungu, anamukakeji kapampa kayedi kunwa makanya. Aka dikakwikala kamuchisatu kumukakeja.

Kansi weyala watachi hakuhosha nindi:

Hakukonkomwena hezu dakwila nawu “ibwambu” kuhitila mukumunyanchila nadisu iku nakufumisha chuma mwitumba nakumwinka Kawumba.

Kawumba hakumona makanya muchikasa chaniwu kansi weyala. Aha dinu Kawumba hakuswejelaku kwakama.

Neyi yeyi wadiña Kawumba, wadi kwila ñahi?

Komana amabwambu jaKawumba anatoñojokihu chikupu hayuma yinakwilawu? Komana anafuukuli yuma yakufuma hanyichima yawu? Inehi. Kuhosha hohu chalala, anovwahili ikakeja dawakwawu. Anakukeña nawu ayitiyeña kuwaha kudi akwawu, dihanafumi hiyakwiteja kuyiyuula kudi akwawu.

Neyi wamweni kukala kwokumu, wadi kutondahu ñahi njila yacheñi kulonda wukañeshi ikakeja dawakwenu?

1. DILOÑESHI

   Bayibolu yahosha nawu: “Muntu wadihoñeshaña mumuchima wamonaña katama, hakubatama; ilaña abula maana ayaña tuhu kwawu, hiyakumwenamu jakala.”—Yishimu 22:3.

   Kakavulu, wunateli kwilukila chadimu kukala kudi kumbidi. Chakutalilahu, twili netu wunamoni izanvu dawakwenu akashikola mumwatañilaña adi hambidi, nawa anakunwa makanya. Neyi wudiloñesha nakukala kudi hambidi, wukwiluka mwakwilila.

2. TOÑOJOKAKUHU

   Bayibolu yahosha nawu: “Ikalenuña nachinleji chamuchima chachiwahi.”—1 Petulu 3:16.

   Dihuli neyi, ‘Nakatiya ñahi mukuhita kwampinji neyi nilondelaña izaza dawantu?’ Mwamweni, wunateli kuleka kutiyisha akwenu nsonyi hakapinji kanti. Hela chochu, wukutiya ñahi chimukuhita mpinji? Komana wukuleka yuma yiwakuhwelela kulonda wutiyishi kuwaha akwenu akashikola?—Kwidika 23:2.

3. TONDAKUHU

   Bayibolu yahosha nawu: “Muntu wukweti maana watiyaña woma.”—Yishimu 14:16.

   Mukuhita kwampinji, twatela kufuukulahu nikwiteja yuma yikafumamu. Bayibolu yashimuna antu afuukwili chiwahi adi neyi Yosefu, Yoba niYesu. Yahosha cheñi hadi antu afuukwili chatama adi neyi Kena, Esawu niYudasi. Wukwila ñahi?

Bayibolu yahosha nawu: “Ilaku chachiwahi.” (Masamu 37:3) Neyi watoñojokahu dehi hayuma yikafumamu nikufuukulahu chuma chimu, kushimuna yuma yiwakuhwelela kunateli kwikala kwapela nawa mwakafuma yuma yayiwahi.

Bayi wakamaku, hiwatela kuyidizisha amabwambu jeyiku. Kuhosha nakuhamuka nezu dimu hohu neyi INEHI kukukwashana. Hela wunateli kuhanjeka nawu munjila yayiwahi neyi:

• “Ami kunchindilaku nehi!”

• “Hinelaña yumoyuku!”

• “Nukwila ochu wanyi!”

Kajindilu kekalahu hikwakula mukunyakashana nawa nachikuhwelelu. Neyi wukwila mwenimu, wukuhayama akwenu chiyakukushiyawu swayi!

Wunateli kwila ñahi neyi akwenu anakukusupisha? Wukwila ñahi neyi ahosha nawu, “Yumanyi yinatami, wudi nawoma?” Ilukaku oku kusupisha chikudi, hikakeja dabula kukala nankashi. Wunateli kwila ñahi? Wukweti njila jiyedi jakwila.

• Wunateli kwiteja kusupisha. (“Diimu, inakutiya woma!” Kuhiñahu mulumbulwili chinaleteshi.)

• Wunateli kukañesha ikakeja. Hoshaku chuma chinaleteshi wukaani nawa ilaku akwenu akutiyishishi. (“Natoñojokeleña nami enu himwatela kunwa makanyaku!”)

Neyi akwenu akutwalekahu kukusupisha, fumakuhu! Ilukaku chumichi, neyi wukushakamahu mpinji yayilehi, ikakeja dikuswejelaku. Neyi wukufumahu, wukumwekesha neyi wunakaani akwenu kukuhimpa.

Kuhosha hohu chalala, hiwukutwesha kuswama nekakejaku. Ilaña wunateli kutondahu yuma yiwunakukeña, yiwunakwimenaku, nikudiyuula eyi aweni. Kuhiñahu, yuma yiwukutondahu yinashindameni hadi eyi aweni!—Yoshuwa 24:15.