Fwikijaku chumichi: Kavuyi dihanashikiyi hachidika nawa kanda hahiti jiminiti 10, hakutiya anakumutambika kudi muntu welukayi.

Kavuyi hakubalumuka nakutala ibwambu dindi Womba nakwati mabotolu ayedi akwenzununa dehi. Neluki nindi mudi walwa. Womba hakumwinka Kavuyi ibotolu nakuhosha nindi, “Wakula dehi, kwila wudiluñisha nehi?”

Kavuyi hakukeña kukaana, ilaña Womba hibwambu dindi. Nawa Kavuyi nakukeña wanyi ibwambu dindi kutoñojoka nindi wamukunkulwayi. Kubombelahu, Womba himumbanda wukweti yilwilu yayiwahi. Nawa neyi wukunwa, dikwila nawu chatama wanyi. Kavuyi hakudihoshesha nindi, ‘Hiwalwa hohu. Wudi neyi yitumbu yashetana wanyi.’

Neyi yeyi wadiña Kavuyi, wadi kwila ñahi?

Hakwila nawu wufuukulihu chiwahi neyi wudi mukukala kwamuchidiwu, watela kudiiluka. Kwiluka chiwekala kwatalisha kuyuma yiwalemesha niyuma yiwakuhwelela. Neyi wukwikala namaana amuchidiwu, wukwikala nañovu jakuyuula chihandilu cheyi chatela achiyuuleña kudi akwenu.—1 Akorinda 9:26, 27.

Wunateli kwikala ñahi nañovu jamuchidiwu? Neyi wukwakula malwihu analondelihu wukutachika kwikala nañovu.

Kwiluka ñovu niyilwilu yayiwahi yiwukweti, kukukukwasha kwikala nañovu.

CHAKUTALILAHU CHAMUBAYIBOLU: Kapostolu Pawulu wasonekeli nindi: “Hela chakwila hineluka kuhosha chiwahiku, ilaña mukwiluka kwamu, neluka.” (2 Akorinda 11:6) Muloña wakwiluka chikupu Nyikanda Yajila, Pawulu watwesheli kutwalekahu kwikala wakola hampinji yamwesekeliwu. Hetejeli mazu awu akusupisha amuzeyeshiku.—2 Akorinda 10:10; 11:5.

DISHINSHIKI EYI AWENI: Aha heshina, sonekakuhu chawaana hela chuma chiwadiza chiweluka.

Shimunaku chilwilu chalema chiwukweti. (Chakutalilahu, waakamenaña? wekala namuchima wakuhana? akukuhwelela? komana welaña yuma mumpinji?)

Kukola kweleñi kwashindamena hamanuñi adu, munjila yoyimu, neyi witeja kuzeyazeya kweyi kuyuuli chihandilu cheyi kunateli kuhimpa chiwekala.

CHAKUTALILAHU CHAMUBAYIBOLU: Pawulu welukili kuzeyazeya kwindi. Wasonekeli nindi: “Mumuchima wami nazañalalaña chikupu nanshimbi jaNzambi, ilaña namoni lushimbi lukwawu mumujimba wami lunakuzuña nalushimbi lwamuyitoñojoka yami nakuntwala muwunkoli walushimbi lwanshidi.” —Aroma 7:22, 23.

DISHINSHIKI EYI AWENI: Kuzeyazeyanyi kuwunakukeña neyi wukwimanishi?

Komana wukwiñila mutakisi nakumuleja ñendeshi neyi yanyeñumukeña itala hohu sampu manji anamanimu mumotoka yindi? Iwu wukwikala hiwusupi nawa wukufwika mali amavulu!

Yumanyi yiwunadiziliku? Neyi wiluka yuma yiwunakufwila kwila, chikukukwasha kwiluka kunakuya chihandilu cheyi. Dikwila nawu wuneluki kuwunakuya nawa wuneluki chiwukwila hakwila nawu wakashikiku.

CHAKUTALILAHU CHAMUBAYIBOLU: Pawulu wasonekeli nindi: “Ami hinatemukaña neyi kwiji neluki wanyi kwinnakuyaku.” (1 Akorinda 9:26) Chatela yadiñiji muchihandilu chadiñaku hayina mpinji, Pawulu watondelihu yuma yafwilili kwilayi nawa welili kwesekeja namwatondeliyi.—Afwilipi 3:12-14.

DISHINSHIKI EYI AWENI: Aha heshina, sonekakuhu yuma yisatu yiwunakufwila kwila muchaaka chinalondelihu.

Neyi weluka wanyi yuma yiwakuhwelela, wukwilaña yuma nanyichima yiyedi. Kufwana iloñolu, wukuhimpaña yitoñojoka kulonda wufwaneña akwenu, chuma chikumwekeshaña nawu weluka wanyi chiwekala.

Kwambukaku, neyi yuma yiwelaña yashindamena hayuma yiwakuhwelela, wukutwalekahu kwikala chiwekala, hichidi namuloña nayuma yelañawu akwenuku.

CHAKUTALILAHU CHAMUBAYIBOLU: Hadiñayi kampululu, kaprofwetu Danyeli “wafuukwili mumuchima windi” nindi wukwovwahilaña nshimbi jaNzambi hela chakwila wadiña kwakulehi nachisaka chindi niakwawu akwakudifukula. (Danyeli 1:8) Kwila mwenimu, kwamukwashili kwila mwafuukwiliyi. Danyeli wakakeleli kuyuma yakuhweleleliyi.

DISHINSHIKI EYI AWENI: Yumanyi yiwakuhwelela? Chakutalilahu: Komana wakuhwelela neyi kwekala Nzambi? Neyi diimu, muloñadi? Wunsahwinyi wunaleteshi wukuhweleli neyi wekala kwoku?

Komana wakuhwelela neyi nshimbi jaNzambi jahosha hayilwilu yayiwahi jinateli kukukwasha? Neyi diimu, muloñadi?

Komana wunakukeña kwikala neyi chumanyi, wunakukeña kwikala neyi ifu dalelokaña nampepela tahindi wunakukeña kwikala neyi muntondu wemanaña chakola hela chakwila kukwinza mpepela yamuchidinyi? Neyi wukudiluka chiwekala, wukwikala neyi iwu mutondu. Nawa chumichi chikukukwasha kwakula lwihu lwakwila nawu, Nekala ñahi?