Kudi Anakwetu niAhela:

Kukeña kutwamukeña Nzambi niakwetu antu kwatusañumunaña ‘kuya nakwilisha antu akunyuza yejima ekali atumbanji, nikuyipapatisha.’ (Mat. 28:​19, 20; Maku 12:​28-31) Kukeña kwekala nañovu. Kunateli kukwasha antu adi “nanyichima yashinshika yakukeña kwikala nawumi wahaya nyaaka.”—Yilw. 13:48.

Kunyima, twadiña nakuhembela kumutu mazu itukuhosha nawantu anatuloñesheliwu hela kuhana hohu nyikanda. Ilaña chayinu mpinji twatela kuwahishaku njila jetu jakuhanjekelamu nawantu. Tunakukeña kumwekeshela antu kukeña kuhitila mukuhosha hanyitu yansañu yakeñawu. Dikwila nawu twatela kwikala ababala kulonda tuhimpeña nsañu kwesekesha nakukala kunakumonayi muntu itunawani niyuma yinakukeñayi. Ayinu broshuwa yikutukwasha ñahi kwila mwenimu?

Muyinu broshuwa mudi nyitu yansañu yakudiza 12 munashimuniwu yilwilu yitwatela kwikala nayu hakwila tumwekesheña kukeña nikwilisha atumbanji. Kudiza kwejima kunafumi munsañu yamuBayibolu mwamwekesheliyi Yesu hela akaKristu akusambila chilwilu chimu mumudimu wakushimwina. Chuma chitunakufwila, bayi neyi hikuhembela mazu itwatela kuhosha kumutuku, ilaña hikukeña njila yashiyashana mutwatela kumwekeshela antu kukeña. Hela chakwila twatela kumwekesha yilwilu yejima mumudimu wakushimwina, tukuhosha nankashi hayilwilu yimu yalema nankashi yitwatela kumwekesha hakutachika kuhanjeka nawantu, hakufuntila, hela hakudizisha antu Bayibolu.

Chimukudizaña kudiza hikudiza, toñojokenu nankashi chimunateli kumwekesha ochu chilwilu hampinji yimunakuhanjeka nawantu mwiluña denu. Fwilenu kumukeña chikupu Yehova niantu. Kukeña, kukuyikwasha kuzata chiwahi mudimu wenu wakwilisha atumbanji, kubadika njila yidi yejima yimunateli kuzatisha.

Twatiyaña kuwaha kukalakela hamu nanenu mukunuñañana. (Zef. 3:9 tth) Yehova ayikiswili chikupu chimukuswejelañaku kukeña antu nikwilisha atumbanji!