KAPETULU 7
Kushimwina “Nsañu Yayiwahi Hadi Yesu”
Fwilipu himukakushimwina itwatela kwimbujola
Kushindamena haYilwilu 8:4-40
1, 2. Chumanyi chamwekeni chelili akakukabishana ayilekeshi antu jaNzambi kushimwina nsañu yayiwahi muyaaka nkulakaji yakusambila?
IKABISHA dasweja dinatachiki, nawa Sawulu natachiki “kukabisha” chipompelu, izu dinakumwekesha nawu idi ikabisha daswejeli chikupu. (Yilw. 8:3) Atumbanji atemukili nawa amakwawu atachikili kutoñojoka nawu Sawulu wukuyikabisha chikupu. Hela chochu, akaKristu chatemukiliwu nakupalañenamu kudi chuma chachiwahi chafuminimu. Chumanyi chenichi?
2 AkaKristu apalañeneni mumaluña ashiyashana, “atachikili kushimwina nsañu yayiwahi yezu” mumaluña mwatemukililiwu. (Yilw. 8:4) Fwikijenu! Idi ikabisha hidakaañesheli nsañu yayiwahiku ilaña daletesheli nsañu yayiwahi kutaanda. Chayipalañesheliwu atumbanji nakushiya nyikala yawu, awa akakukabishana aletesheli amavulu kutiya nsañu yayiwahi mumaluña ashiyashana. Neyi chitukumona dichuma chinakumwekana nimunanu mafuku.
“Antu Apalañeneni Mumaluña Ashiyashana” (Yilwilu 8:4-8)
3. (a) Fwilipu wadiña hinyi? (b) Muloñadi muSamariya chabulili kushimwinamu, ilaña Yesu henohu kanda ayi mwiwulu wahosheli nindi chumanyi chakamwekena antu amudi iluña?
3 Fwilipu wadiña hakachi kawantu “apalañeneni mumaluña ashiyashana.” a (Yilw. 8:4; talenu chikasha chinakwila nawu “ Fwilipu ‘Mukakushimwina,’” hefu 53.) Wayili kuSamariya, musumba weneni wabulili kushimwinawu, muloña mpinji yimu Yesu walejeli apostolu indi nindi: “Bayi mwiñila mumusumba wejima wawaSamariyaku; ilaña, muyeña hohu kudi anyikoku ajimbala amwitala daIsarela.” (Mat. 10:5, 6) Hela chochu, Yesu welukili nindi, mukuhita kwampinji, antu amuSamariya akatiya nsañu yayiwahi muloña henohu kanda ayi mwiwulu wahosheli nindi: “Mwakekala ayinsahu jami muYerusalema, muYudeya nimuSamariya mwejima nikwakumina iseki dejima.”—Yilw. 1:8.
4. ASamariya elili ñahi chayishimwininiwu kudi Fwilipu, nawa chumanyi chaletesheli eteji?
4 Fwilipu wawanini mukala waSamariya wunatookashani “dehi to-o, anashiki dehi hampinji yakwaañula.” (Yow. 4: 35) Nsañu yindi yayikokweleña antu adiña nakushakama kweniku, muloñadi? AYudeya atiyañeneña wanyi nawaSamariya nawa amavulu ayiheleli. Kwambukaku, aSamariya enjili nakwiluka nawu nsañu yayiwahi yadiña yawantu ejima kwambukaku nachakuhweleleliwu aFwarisi, muloña wena adiña nachaambu nawa atoñojokeleña nawu abadika antu amakwawu. Fwilipu wayishimwinini aSamariya neyena nawa chakadi chaambu, chuma chinakumwekesha nawu wadiña wambukaku nanawa amwekesheleña chaambu nawa adiwileña akwawu. Dichaletesheli mazaza awantu muSamariya amutiyilili Sawulu “namuchima wumu.”—Yilw. 8:6.
5-7. Shimunenu yakutalilahu yinakumwekesha akaKristu chayipalañesheliwu chichaletesheli nsañu yayiwahi kutanda.
5 Makonu neyi chichadiña muyaaka nkulakaji yakusambila, ikabisha hidinayikañeshi antu jaNzambi kushimwinaku. Hayaaka yinahitihu, akaKristu anayitwali kumaluña acheñi hela kuyikasa. Ilaña chumichi chinaleteshi nsañu yayiwahi kushika kudi antu kunawa maluña. Chakutalilahu, mumpinji Yanjita Yakayi Yamuchiyedi, aYinsahu jaYehova ashimwinini nankashi muyilombu yawaNazi. KaYudeya wumu wawanini aYinsahu jaYehova wahosheli nindi: “Kuhamuka kwamwekesheliwu aYinsahu jaYehova akasiliwu kwanletesheli nikuhweleli nami chikuhwelelu chawu chashindamena haNsona, nawa ninami nekalili Chinsahu.”
6 Mpinji yikwawu ashimwinineña niantu ayikabishileña nawa etejeleña. Chakutalilahu chelili Chinsahu wejina daFranz Desch amutwali kuGusen chilombu chadiña muAustria, wadizili Bayibolu nakapokola wumu. Azañaleli chikupu chadiwaniniwu hanyima yayaaka yiyedi hakupompa kweneni kwaYinsahu jaYehova wejima wawu anekali akakushimwina ansañu yayiwahi.
7 Chuma chochimu chamwekeni chelili akaKristu atemukili kwituña dacheñi muloña wekabisha. Chakutalilahu muyaaka yamu 1970, chelili aYinsahu jaYehova akuMalawi atemukili kuMozambique atachikili kushimwina kweniku. Chelili kuMozambique atachiki kuyikañesha, mudimu wakushimwina watwalekelihu. Francisco Coana wahosheli nindi: “Etu amavulu atukwatili nikutukasa kapampa kakavulu muloña wamudimu wetu wakushimwina. Hela chochu, chelili antu amavulu eteji nsañu yetu yaWanta, twelukili chikupu netu Nzambi nakutukwasha neyi chakwashileñayi akaKristu amuyaaka nkulakaji yakusambila.”
8. Kuhimpika kwansañu yayiyuulu niyuma kunaleteshi ñahi antu kutiya nsañu yayiwahi?
8 Hela chochu, bayi neyi makabisha diwu hohu analeteshi akaKristu kutaanda mumatuña acheñiku. Kuhimpika kwansañu jayiyuulu, kukala kwayuma nikwena kunaleteshi Nsañu yaWanta kutaanda kudi antu akumadimi amavulu. Nimumatuña amakwawu mwekala njita nawa mwakala yuma antu anabukili kumatuña kudi chachiwahi nawa anatachiki kudiza Bayibolu kunawa matuña kunayiwu. Awa antu kakavulu ahoshaña madimi ambokamboka, dichi chakeñekaña kuyishimwina mumadimi awu. Komana munakufwila kushimwina antu “akunyuza yejima, kunyichidi yejima, kudi antu ejima nikumadimi ejima” mwiluña denu?—Chim. 7:9.
“Nyinkenuhu Ninami Iwu Wuswa” (Yilwilu 8:9-25)
“Shimona chamweniyi nindi apostolu anakwinka antu spiritu yajila kuhitila mukuyinañika makasa, wayinkeli mali.”—Yilwilu 8:18.
9. Shimona wadiña hinyi, nawa chumanyi chaletesheli aswini kwakwihi naFwilipu?
9 Fwilipu wakoñeli yinjikijilu yayivulu muSamariya. Chakutalilahu wokili ayifwayi nikufumisha andemoni. (Yilw. 8:6-8) Muntu wumu watiyili kuwaha nayawana yadiña naFwilipu. Wadiña Shimona, mukakupanda alemesheliwu kudi antu chakwila ahosheleña hadi yena nawu: “Iwu muntu diyi Ñovu jaNzambi.” Shimona wadimweneni ñovu yayeni yaNzambi, chamweniyi yihayamisha yakoñeliyi Fwilipu nawa Shimona wekalili mukakwitiya. (Yilw. 8:9-13) Chumanyi chaletesheli ekali mukaKristu?
10. (a) Yumanyi yeliliwu aPetulu naYowanu muSamariya? (b) Chumanyi cheliliyi Shimona hamweniyi atumbanji amaha atambwili spiritu yajila helili aPetulu naYowanu ayinañiki makasa?
10 Apostolu chelukiliwu nawu muSamariya antu anakuvulilaku, atemesheliku Petulu niYowanu. (Talenu chikasha chinakwila nawu “ Petulu Nazatishi ‘Nsapi jaWanta’””) Chashikiliwu awa apostolu ayedi anañikili makasawu hadi atumbanji amaha, wejima wawu hamuntu-hamuntu atambwilili spiritu yajila. b Shimona chamweniyi chumichi, wahayamini. Wayilejeli apostolu nindi: “Nyinkenuhu ninami iwu wuswa kulonda muntu wejima inukunañika makasa atambwili spiritu yajila.” Wayinkeli mali nakutoñojoka nindi nateli kulanda iwu wuswa wafumini kudi Nzambi!—Yilw. 8:14-19.
11. Indi Petulu namufumbi ñahi shimona nawa Shimona nelidi?
11 Petulu wamwakwili Shimona chakadi kumuhita mumbadi. Kapostolu wamulejeli nindi: “Siliva yeyi yikisikili hamu naneyi aweni, muloña eyi wunakutoñojoka neyi watela kutambula chawaana chaNzambi namali. Muniyi nsañu, eyi hiwukwetimu mbadi hela mudimuku, muloña muchima weyi woloka wanyi kumesu aNzambi.” Nkumininaku, Petulu wamulejeli Shimona nindi abalumuki nawa alombi kulonda amwanakeni. Petulu wahosheli nindi: “Mulembeleli Yehova kulonda neyi chinatwesheki, akwanakeni hayitoñojoka yatama yidi [“kafuta keyi kadi,” New Jerusalem Bible] mumuchima weyi.” Shimona hadiña muntu watamaku; wakeñeleña kwila chuma chaloña, ilaña haniyi mpinji, wetejeli kufwila kwatama kumuluwañeshi. Wayilejeli apostolu nindi: “Nlembelelenuku kudi Yehova kulonda yuma yimunahoshi yibuli kummwekena.”—Yilw. 8:20-24.
12. Izu dakwila nawu “Shimona” datalisha mudihi, nawa chumichi chinamwekeshi ñahi nawu himuhetu mudi akaKristendomu?
12 AKristu makonu atela kudizila kuchamufumbiliwu Shimona kudi Petulu. Kafwampi antu atachikili kuzatisha izu dakwila nawu “Shimona” muloña wanichi chuma chamwekeni. Izu dakwila nawu Shimona adizatishaña kutalisha kukulanda hela kulandisha yifulu sweje-e munsañu jakwitiya. Munsañu yakunyaka yawakakusekesha amuKristendomu, yenzala nayuma yamuchidiwu. The Encyclopædia Britannica yanaamba 9 (1878) yahosha nawu: Neyi hiyakutonda Papa chinamwekani neyi amavulu afweteleña mali hakwila nawu ayinki ichi chifulu. Amavulu atiyileña nsonyi wanyi kwila chuma chamuchidiwu, nawa antu ejima amweneña yuma yejimiyi.”
13. AkaKristu anateli kutondolwela ñahi nshidi yakulanda hela kulandisha yifulu muchipompelu?
13 AkaKristu atela kwikala asoñama kulonda abuli kukoña nshidi yakulanda hela kulandisha yifulu muyipompelu. Chakutalilahu, bayi esekaña kuyikokola kulonda ayitiyeña kuwaha kuhitila mukuyinka yawana hela kusweja kuyihameka ejima akweti yifulu muchipompelu kulonda ayinki kukoolekaku. Cheñi akweti wuswa muchipompelu bayi amwekeshaña chaambu kuhitila mukusweja kukeña akweti mahetaku. Yuma yejima iyi yatama. Mwamweni, ambuña aNzambi ejima atela kwikala ‘adikehesha’ nakuhembelela spiritu yaYehova kulonda yiyinki kukooleka. (Luka 9:48) Antu jaNzambi bayi afwilaña ‘kudikeñela kulema kwawu aweniku.’—Yish. 25:27.
“Nsañu Yiwunakutaña, Wunayiluki?” (Yilwilu 8:26-40)
14, 15. (a) Indi “ntuñu kaEtiyopiya” wadiña hinyi, nawa Fwilipu wamuwanini kudihi? (b) KaEtiyopiya welili ñahi namazu amulejeliwu kudi Fwilipu, nawa muloñadi chitukuhoshela netu amupapatishili wanyi wamwisu? (Talenu tumazu twaheshina.)
14 Kañelu kaYehova wamulombweli Fwilipu kuya mumukwakwa wafuma kuYerusalema nakuya kuGaza. Neyi Fwilipu wadiña nakutoñojoka muloña waweni watela kuyilayi iku, chakadi nikujina ñakwilu yindi ayakwili chadimweniyi nantuñu kaEtiyopiya iyala wadiña nakutaña “mukanda wakaprofwetu Isaya nezu datiyakana.” (Talenu chikasha chinakwila nawu “ ‘Ntuñu’ Munjilanyi”? hefu 57.) Spiritu yaYehova yamulombweli kuya nakumuwana iwu iyala mwikalu. Wamwihwili iwu kaEtiyopiya iku nakuya lufuchi kwikalu nindi: “Nsañu yiwunakutaña, wunayiluki?” Iwu iyala wamwakwili nindi: “Nateli kuyiluka ñahi chakadi muntu wakunlumbulwila?”—Yilw. 8:26-31.
15 KaEtiyopiya wamulejeli Fwilipu kukandama mwikalu. Atela ahanjekeli nsañu yayiwahi! Kufwana antu amavulu iwu kaEtiyopiya welukili wanyi “mukoku” hela “kambuña” ashimunawu muwuprofwetu waIsaya. (Isa. 53:1-12) Hela chochu, hayileñawu Fwilipu wamulumbulwili iwu ntuñu kaEtiyopiya nindi iwu wuprofwetu washikijeweli hadi Yesu Kristu. Kufwana antu apapatisheweli haPentekosta 33 C.E., iwu kaEtiyopiya wadiña wabalumuka dehi nakwikala kaYudeya, washikeneni dakwiluka chuma chatela kwilayi. Wamwilili Fwilipu nindi: “Talaña! Menji awa; chumanyi chikunkañesha kupapatishewa?” KaEtiyopiya amupapatishili kudi Fwilipu chakadi kumba mpinji! c (Talenu chikasha chinakwila nawu “ Kupapatishewa ‘Mumenji Amavulu’”) kufuma henaha Fwilipu amwinkeli mudimu wukwawu muAshidoti, kweniku watwalekelihu kushimwina nsañu yayiwahi.—Yilw. 8:32-40.
16, 17. Añelu atukwashaña ñahi mumudimu wakushimwina makonu?
16 Makonu, akaKristu niwena akweti mudimu neyi wazatiliyi Fwilipu. Kakavulu ashimwinaña nsañu yaWanta kudi antu awanañawu neyi anakwenda sweje-e wunsahu wamumpanji. Chavula kumwekana, awanaña antu akweti nyichima yashinshika chakadi nikuyikuhwelela. Twatela kukuhwelela chuma chamuchidiwu muloña Bayibolu yashimuna hatooka nawu añelu alombolaña mumudimu wakushimwina kulonda nsañu yishiki “kunyuza yejima, kunyichidi yejima, kumadimi ejima nikudi antu ejima.” (Chim. 14:6) Yesu washimwineñahu dehi nindi añelu akalombolaña antu anakushimwina nsañu yayiwahi. Muchakutalilahu chindi chatidiku namatahu, Yesu wahosheli nindi mumpinji yakumuna, dikwila nawu mumpinji yakukuma kwanshakaminu yamakonu, “akakumuna hiyañelu.” Wabombelelihu nindi iyi yileñaleña yakuspiritu “yakakuñwija nikufumisha muWanta windi yuma yejima yahukeshaña niantu akoñaña yuma yatama.” (Mat. 13:37-41) Hampinji yoyimu, añelu akapompesha answana amuWanta nawa kuhiñahu “izaza deneni” “danyikoku amakwawu,” owu anakukokelayi Yehova mukuloñesha kwindi.—Chim. 7:9; Yow. 6:44, 65; 10:16.
17 Chuma chinakumwekesha nawu añelu azataña iwu mudimu, antu itwawanaña mumudimu wakushimwina ahoshaña nawu adiña nakulomba nawu Nzambi ayikwashi. Talenu chakutalilahu chimu chawakakushimwina ayedi ayili nakushimwina nakansi wanyanya. Awa aYinsahu ayedi chelileña nawu akombokeña mumudimu wakushimwina, ilaña iwu kansi wakeñeleña kuya kwitala dikwawu. Kafwampi, wayili kunidi itala nakudondomwena! Kansi wamumbanda wedikili munidi itala, dichi awa aYinsahu ayedi ayili nakuhosha nindi. Ahayamini hakutiya iwu mumbanda nakulumbulula nindi wadiña tuhu nakulomba nindi kwinzi tuhu muntu nakumudizisha Bayibolu. Atachikili kumudizisha Bayibolu.
“Nzambi, neyi wekala kwoku nkwashi”
18. Muloñadi chitwatela kushaku chikupu muchima kunsañu yakushimwina?
18 Chineli mudi muchipompelu, mukweti mudimu wakuzatila hamu nawañelu mudimu weneni wakushimwina mukaayi kejima. Twatela kulemesha chikupu iwu mudimu. Chimwatwalekahu kudikita neyena muniwu mudimu, mukwikala namuzañalu chimukutwalekahu kushimwina “nsañu yayiwahi yaYesu.”—Yilw. 8:35.
a Iwu hikapostolu Fwilipu wanyi. Ilaña, hiFwilipu itwatena muKapetulu 5 kawunu mukanda wadiña hakachi “kawamayala 7 akweti yilwilu yayiwahi” atondeliwu kulonda hefuku-hefuku ayanzañeneña yakuda antuluwa akaKristu ahosheleña chiGiriki niaHeberu muYerusalema.—Yilw. 6:1-6.
b Kakavulu, atumbanji amaha ayiwayishileña hela kutambwila spiritu yajila hayipapatishileñawu. Chumichi chayikwashileña kwikala nakuchiñeja kwakuyuula neyi anyanta nawa atupristu naYesu mwiwulu. (2 Kor. 1:21, 22; Chim. 5:9, 10; 20:6) Hela chochu, awa atumbanji amaha, hiyayiwayishili hachipapatishuku. Kutambwila spiritu yajila, kwikala nayawana muchihayamisha kwekaliliku hanyima yakwila aPetulu naYowanu anayinañiki awa akaKristu amaha makasa.
c Iwu iyala kaEtiyopiya hapapatisheweli chakadi kwiluka chuma chadiña nakwilayiku. Chineli wadiña wabalumuka dehi nakwikala kaYudeya, wadiña weluka dehi Nsona kushilahu niwuprofwetu waMesiya. Chineli wadiña weluka dehi nsañu hamudimu wukwetiyi Yesu, wateleleli kupapatishewa chakadi kumba mpinji.