KAPETULU 8
Chipompelu “Chekalili muKuwunda”
Sawulu wadiña nakukabisha antu chatama nekali mukakushimwina wadikita
Kushindamena haYilwilu 9:1-43
1, 2. Yumanyi yafwilileña kwilayi Sawulu muDamakasa?
IZANVU dawamayala hidikushika kwakwihi naDamakasa, kunakukeñawu kukoña chuma chatama. Anakuya nakuyikokomona atumbanji twaYesu mumatala awu, kuyikasa, kuyila chatama nikuyikokañesha nakuyitwala kuYerusalema kulonda adimoni nachota chaSanihedirini.
2 Sawulu, wunakulombola idi izanvu, wudi dehi namashi kumakasa indi. a Hanashimbuli wanyi, wamona nikwiteja akwawu aYudeya chamwasañawu Stefwanu malola, kambanji wadihana waYesu. (Yilw. 7:57–8:1) Nakumini wanyi hohu hakukabisha atumbanji twaYesu ashakamaña muYerusalema, Sawulu nalomboli izanvu kulonda ayi nakukeñakeña atumbanji amakwawu munyisumba yikwawu. Nakukeña chikupu kujiyisha izanvu dakwitiya datenañawu nawu “Njila.—Yilw. 9:1, 2; talenu chikasha chinakwila nawu “ Wuswa Wadiñayi Nawu Sawulu muDamakasa,” hefu 61.
3, 4. (a) Yumanyi yamumwekeneni Sawulu? (b) Malwihwinyi itukuhanjekahu?
3 Neyi mukulabula kwadisu, chejeji chatamuka chinamutoñekeli Sawulu. Antu anakuyayi nawu anamoni chejeji nawa anashali kamukanwa boku. Sawulu, anaputishiwu mesu, nadimbuki hamaseki. Sawulu wunakukañanya kumona natiyi izu kufuma mwiwulu nawu: “Sawulu, Sawulu, muloñadi chiwunakunkabishila?” Sawulu nahayami nawa nehuli nindi: “Yeyinyi Mwanta?” Chinamwakuliwu Sawulu chinamuhayamishi chikupu: “Yami Yesu iwunakukabisha.”—Yilw. 9:3-5; 22:9.
4 Yumanyi yitunakudizila kumazu aYesu akusambila amulejeliyi Sawulu? Kushinshika hayuma yamwekeni hampinji yabalumukiliyi Sawulu kunateli kutukwasha ñahi? Yumanyi yitukudizila kuchazatishili chipompelu mpinji yakuwunda hanyima yakwila Sawulu nabalumuki?
“Muloñadi Chiwunakunkabishila?” (Yilwilu 9:1-5)
5, 6. Yumanyi yitunakudizila kumazu aYesu amulejeliyi Sawulu?
5 Yesu chamwimikiliyi Sawulu munjila yaya kuDamakasa, wamwihwili wanyi nindi: “Muloñadi chiwunakukabishila atumbanji twami?” Ilaña neyi chitunamoni, wahosheli nindi: “Muloñadi chiwunakunkabishila?” (Yilw. 9:4) Eña, watiyaña neyi makabisha anakukabishawu atumbanji twindi, anakumukabisha yena.—Mat. 25:34-40, 45.
6 Neyi anakuyikabisha muloña wakumukuhwelela Kristu, ilukenu nenu Yehova niYesu aneluki kukala kumunakumona. (Mat. 10:22, 28-31) Chayinu mpinji hiyanateli kufumishahu kukala kutunakumonaku. Anukenu nenu, Yesu wamweneñaku Sawulu chadibombeliyi mukumujaha Stefwanu nawa wamumweni chakokañesheliyi atumbanji ashinshika mumatalawu muYerusalema. (Yilw. 8:3) Ilaña, Yesu helilihu chuma chidi chejimaku. Hela chochu, Yehova, kuhitila mudi Kristu, wamwinkeli Stefwanu niatumbanji amakwawu ñovu yakutwalekahu kwikala ashinshika.
7. Chumanyi chimwatela kwila kulonda muumikeña makabisha?
7 Ninenu munateli kuumika makabisha neyi mulondela iyi yuma: (1) Fwilenuña kwikala ashinshika hela mudi mukweseka kwamuchidinyi. (2) Mulombenu Yehova kulonda ayikwashi. (Fwili. 4:6, 7) (3) Bayi muditendaku, shiyenu yuma yejima mumakasa aYehova. (Rom. 12:17-21) (4) Mukuhwelelenu Yehova nenu nateli kuyinka ñovu yakuumika sampu mpinji yakufumishahu kukala yinashiki.—Fwili. 4:12, 13.
“Sawulu, Manakwami, Mwanta . . . Nantemeshi” (Yilwilu 9:6-17)
8, 9. Ananiya watiyili ñahi hamudimu wamwinkeliwu?
8 Hanyima yakwakula lwihu lwaSawulu lwakwila nawu, “Yeyinyi Mwanta?” Yesu wamulejeli nindi: “Nyamukaku wuyi mumusumba nawa akukuleja yuma yiwatela kwila.” (Yilw. 9:6) Sawulu wabulileña kumona haniyi mpinji amutwalili kuDamakasa, kweniku wajiñili mafuku asatu chakadi kuda nawa wadiña nakulomba. Hayoyeniyi mpinji, Yesu wahosheli hadi Sawulu nakambanji wadiña muniwu musumba, iyala wejina daAnaniya, iyala dakuwaha “ateneneñawu chiwahi kudi aYudeya ejima ashakamineña” muDamakasa.—Yilw. 22:12.
9 Toñojokenu chatiyiliyi Ananiya! Haniyi mpinji, Mutu wachipompelu, Yesu Kristu asañwiliwu, wahosheli nindi nawa wamwinkeli mudimu walema. Amulemesheli chikupu hakumwinka iwu mudimu, ilaña wadiña wakala! Chamulejeliwu nawu ayi nakuhosha naSawulu, Ananiya wakwili nindi: “Mwanta, natiyi antu amavulu chinakuhoshawu hadi iwu muntu, hayuma yejima yatama yakoñeliyi kudi akakujila eyi muYerusalema. Nawa anamwinki wuswa kudi akulumpi jawatupristu wakukwata antu ejima anakutambika hejina deyi.”—Yilw. 9:13, 14.
10. Yumanyi yitwadizilaña kudi Yesu chahanjekeliyi naAnaniya?
10 Yesu hamuzuwilili Ananiya hakushimuna yitoñojoka yindiku. Hela chochu, Yesu wamulejeli chatiyakana, yuma yatela kwilayi. Nawa Yesu wamulemesheli, muloña wamulejeli chaletesheli amuleji kuzata iwu mudimu. Yesu wahosheli hadi Sawulu nindi: “Iwu iyala namutondi kulonda ashimuni ijina dami kunyuza, kushilahu nikudi anyanta nianyana kaIsarela. Muloña nukumuleja chakadi kuhita mumbadi yuma yayivulu yatela kukabakanayi hamuloña wejina dami.” (Yilw. 9:15, 16) Ananiya washikeneni kumwovwahila Yesu. Wayili nakumukeñakeña Sawulu mukakukabisha, nawa wamulejeli nindi: “Sawulu, manakwami, Mwanta Yesu wamwekana kudi eyi munjila hiwenzaña nantemeshi kulonda wutachiki kumona cheñi nawa winzali naspiritu yajila.”—Yilw. 9:17.
11, 12. Yumanyi yitwadizilaña kunsañu yamwekeni yinakundami Yesu, Ananiya niSawulu?
11 Kudi yuma yayivulu yamwekeni yinakundami Yesu, Ananiya niSawulu. Chakutalilahu, Yesu nakulombola mudimu wakushimwina, neyi chochashimwiniyi. (Mat. 28:20) Hela chakwila Yesu hahoshaña kanwa-nakanwa namuntu wudi wejima makonuku, ilaña walombolaña mudimu wakushimwina kuzatisha nduñu washinshika, atondayi kwakamena amwitala dindi. (Mat. 24:45-47) Kuhitila muwunlomboli Wezanvu Dalombolaña, akakushimwina niapayiniya ayitemeshaña kuya nakukeñakeña antu anakukeña kumwiluka Kristu. Neyi chitwashimuna mukapetulu kanafumihu, antu amavulu alombaña nawu ayendeli nawa mwamweni aYinsahu jaYehova ayendelaña.—Yilw. 9:11.
12 Ananiya wovwahilili nakwiteja iwu mudimu nawa mwafumini yuma yayiwahi. Komana mwovwahilaña lushimbi lwakushimuna chikupu wunsahu, hela chakwila iwu mudimu wayakamishaña? Amakwawu chayikalilaña kuya nakushimwina kwitala nikwitala nikudibulakana nawantu abula kwilukawu. Amakwawu niwena chayikalilaña kushimwina antu kumaluña awu kwelilañawu jibizininsi, mumukwakwa hamafoni hela kusoneka nyikanda. Ananiya walekeli kutiya woma nawa amwinkeli mudimu wakumukwasha Sawulu kutambwila spiritu yajila. b Ananiya watwesheli kuzata mudimu windi muloña wamukuhweleli Yesu nawa wamumweneña Sawulu nindi himanakwindi. Kumufwana Ananiya, ninetu tunateli kuleka kutiya woma neyi tumukuhwelela Yesu netu diyi wunakulombola mudimu wakushimwina, tutiyilaña antu wushona nikumona antu atutiyishaña woma netu anateli kwikala amanakwetu.—Mat. 9:36.
“Watachikili Kushimwina . . . Hadi Yesu” (Yilwilu 9:18-30)
13, 14. Neyi munakudiza Bayibolu, nawa kanda mupapatishewi, yumanyi yimukudizila kudi Sawulu?
13 Chakadi kumba mpinji, Sawulu watachikili kuzatisha yuma yadiziliyi. Hanyima yakumuuka, wetejeli kumupapatisha nawa watachikili kudikunda nawatumbanji amakwawu muDamakasa. Ilaña kudi chuma chikwawu cheliliyi. “Hohenohu watachikili kushimwina mumasinagogi hadi Yesu nindi, iwu diyi Mwana kaNzambi.”—Yilw. 9:20.
14 Neyi munakudiza Bayibolu ilaña kanda mupapatishewi, kwila muzatilahu swayi nehi kulonda mutachiki kuzatisha yuma yimunadizi neyi cheliliyi Sawulu? Sawulu, wadimweneni mesu kapu chihayamisha chamukoñeleliwu kudi Kristu, nawa chumichi chamukwashili kutwalekahu kuhimpa. Ilaña kudi antu amakwawu amweni yihayamisha yakoñeliyi Yesu. Chakutalilahu, izanvu dawaFwarisi damweni chokiliyi iyala walepa chikasa, nawa izanvu deneni dawaYudeya delukili nawu Yesu namusañuli Lazaru mudi afu. Ilaña, amavulu akaanini kumulondela, nawa amakwawu amuheleli nikumuhela. (Maku 3:1-6; Yow. 12:9, 10) Kwambukaku, Sawulu wabalumukili. Muloñadi Sawulu chabalumukililiyi henohu amakwawu akañenyi kubalumuka? Muloña wamutiyileña Nzambi woma kubadika antu nawa wasakilili hawushona wamumwekesheleliwu kudi Kristu. (Fwili. 3:8) Ninenu neyi mwila chuma chochimu, kwosi chuma hela chimu chikuyikañesha kutachika mudimu wakushimwina hela kupapatishewaku.
15, 16. Yumanyi yeliliyi Sawulu mumasinagogi, nawa aYudeya muDamakasa elili ñahi?
15 Fwikijenu chatiyiliwu antu, amakwawu anahili, amakwawu anahayami, hakutiya nawu Sawulu natachiki kushimuna nsañu hadi Yesu mumasinagogi. Adihwili nawu: “Iwu muntu hidiyi ona wakabishileña antu amuYerusalema atambikaña hanidi ijinaku?” (Yilw. 9:21) Chahimpiliyi yitoñojoka yindi hadi Yesu, Sawulu walumbulwileña “chiwahi nindi iwu diyi Kristu.” (Yilw. 9:22) Ilaña kulumbulula chiwahi hidikwakwashaña antuku. Hikunateli kuhimpa yitoñojoka yawantu yakakela kutushidikilu hela nyichima yawantu adivwimbaku. Hela chochu, Sawulu hazeyeliku.
16 Chimwahitili yaaka yisatu, aYudeya muDamakasa atwalekelihu kulwisha naSawulu. Nkumininaku, afwilileña kumujaha. (Yilw. 9:23; 2 Kor. 11:32, 33; Ñal. 1:13-18) Chelukiliyi aka kafunta, Sawulu watemukili nawa wafumini mumusumba, wetejeli kumuzenzumwina muchimpaaya mwipwata dampwembu. Luka wateneni antu amukwashili Sawulu hawuna wufuku nindi “atumbanji [twaSawulu].” (Yilw. 9:25) Awa mazu anakumwekesha nawu antu amakwawu atiyili chahosheleñayi Sawulu muDamakasa etejeli yuma yashimwinineñayi nawa ekalili akakumulondela Kristu.
17. (a) Antu elaña ñahi nachalala chamuBayibolu? (b) Chumanyi chimwatela kutwalekahu kwila, nawa muloñadi?
17 Chimwatachikili kulejaku antaña jenu, amabwambu jenu niantu amakwawu yuma yayiwahi yimwadizileña, hadaha mwatoñojokeleña nenu akushikena kwiteja muloña chalala chamuBayibolu chatiyakana. Hadaha amakwawu etejeli, ilaña amavulu nehi. Mwamweni, antaña jenu atachikili kuyimona nawu mudi achilumbu. (Mat. 10:32-38) Hela chochu, neyi mutwalekañahu kutoñojoka chikupu haNsona nikwikala nayilwilu yayiwahi yawakaKristu, antu ayikañeshaña anateli kubalumuka kumbidi.—Yilw. 17:2; 1 Pet. 2:12; 3:1, 2, 7.
18, 19. (a) Baranaba chamukwashiliyi Sawulu, yumanyi yayiwahi yafuminimu? (b) Tunateli kumwimbujola ñahi Baranaba niSawulu?
18 Sawulu cheñililiyi muYerusalema, atumbanji akuhweleli wanyi chahosheleñayi nindi ichi nekali dehi kambanji. Hela chochu, Baranaba chayilejeliyi nindi Sawulu nekali dehi kambanji, apostolu etejeli nawa washakamini nawena hadi mpinji yayilehi. (Yilw. 9:26-28) Sawulu wadiña wababala, ilaña hatiyileña nsonyi yakushimwina nsañu yayiwahiku. (Rom. 1:16) Washimwinini chakadi woma muYerusalema, mwomwiluña mwatachikililiyi kukabisha atumbanji twaYesu Kristu. AYudeya muYerusalema chayihayamishili chelukiliwu nawu muntu wawu nayibalumukilimu, dichi afwilileña kumujaha. Mukanda waYilwilu wahosha nawu: “Anakwindi chelukiliwu chumichi, akunkumukili nakumutwala [Sawulu] kuKesareya, kuhiñahu amutemesheli kuTarusa.” (Yilw. 9:30) Sawulu wovwahilili nshimbi jaYesu jahaniniyi muchipompelu. Iyi nshimbi yamukwashili Sawulu nichipompelu.
19 Anukenu Baranaba wazatili nañovu kulonda amukwashi Sawulu. Chuma cheliliyi chayikwashili awa ambuña aYehova kwikala nawubwambu wawuwahi hakachi kawu. Kufwana Baranaba, ninenu mwafwilaña kukwasha amaha adi muchipompelu chenu, kuzata nawu mumudimu wakushimwina nikuyikwasha kulonda apaminiku? Mukufuma yuma yayiwahi chikupu neyi mwila mwenimu. Neyi mudi mukakushimwina wansañu yayiwahi wamuha, kufwana Sawulu, ninenu mwetejaña kuyikwasha? Neyi muzataña nawakakushimwina anashimbuli, mukuwahishaku njila jenu jakushimwinamu, mukwikala namuzañalu nawa wubwambu wenu wukukolelaku chikupu.
“Amavulu Etiyili” (Yilwilu 9:31-43)
20, 21. Ambuña aNzambi akunyima niamakonu anazatishi ñahi chiwahi ‘mpinji yakuwunda’?
20 Hanyima yakwila Sawulu nabalumuki nawa nawomboloki, “chipompelu chejima muYudeya nimuÑaliliya nimuSamariya chekalili mukuwunda.” (Yilw. 9:31) Atumbanji azatishili ñahi chiwahi iyi mpinji yakuwunda? (2 Tim. 4:2) Mukanda waYilwilu wahosha nawu ‘adiña nakukolelaku.’ Apostolu niamayala amakwawu alombweleña akolesheli chikuhwelelu chawatumbanji nawa alombweleña chelili chipompelu chitwalekihu “kumutiya Yehova woma nikushakama kwesekeja nakukundeja kwaspiritu yajila.” Chakutalilahu, Petulu wazatishili iyi mpinji kulonda akoleshi atumbanji adiña mutawuni yaLida muChaana chaSharoni. Chazatiliyi nañovu muniyi tawuni antu “amwitiyili Mwanta.” (Yilw. 9:32-35) Atumbanji aluwankeni wanyi nakusha maana kuyuma yakumujimba, ilaña ashili muchima hakudakamena wumu namukwawu nikushimwina nsañu yayiwahi. Nawa chuma chafuminimu chipompelu “chasemunwineña.”
21 Muyaaka yamuma 1990, aYinsahu jaYehova mumatuña amavulu eñilili ‘mumpinji yakuwunda.’ Nfulumendi jajivulu jadiña nakukabisha antu jaNzambi hadi yaaka yayivulu jalekeli nawa mudimu wakushimwina walekesheliwu awitejeli. AYinsahu amavulu akolekeleli aka kapinji kulonda ashimwini antu amavulu nawa mwafumini yuma yayiwahi.
22. Munateli kuzatisha ñahi chiwahi kusubuka kumukweti?
22 Komana munakuzatisha chiwahi kusubuka kumukweti? Neyi mwashakamaña mwituña mwetejawu kudifukula, Satana nakukeña nindi mufwileña maheta chatela mutwamijeñaku Wanta. (Mat. 13:22) Bayi muluwankanaku. Zatishenu chiwahi mpinji yakuwunda yimukweti, yoyinu mpinji. Zatishenu iyi mpinji kulonda mushimwini chikupu wunsahu nikutuña chipompelu. Anukenuña nenu yuma yinateli kuhimpa neyi mukulabula kwadisu.
23, 24. (a) Yumanyi yitwadizilaña kuyuma yamumwekeneni Tabita? (b) Yumanyi yitwatela kufwilaña kwila?
23 Talenu chuma chamumwekeneni kambanji Tabita, hela Dokasi. Washakamineña muYopa, tawuni yadiña kwakwihi naLida. Iwu muhela washinshika wazatishili chiwahi mpinji yindi nimaheta indi, “wazatileña nyidimu yayiwahi yayivulu nawa wahanineña yawaana yaluwi.” Ilaña neyi mukulabula kwadisu wakatili nawa wafwili. c Kufwa kwindi kwaneñesheli atumbanji amavulu adiña muYopa, sweje-e antuluwa enkeleñayi yawaana. Chashikiliyi Petulu kwitala kwadiña chipenji, wakoñeli chihayamisha chadiña kanda achikoñeñahu dehi kudi apostolu aYesu Kristu. Petulu walombeli nawa wamusañwili Tabita mudi afu! Munateli kufwikija muzañalu watiyiliwu antuluwa niatumbanji chelili Petulu ayitambiki mukapeka mwadiña mufu nakuyinka Tabita wamumi? Ichi chihayamisha chayikolesheli nakukala kwenjileña hambidi! Nawa ichi chihayamisha “chatiyakeni muYopa mwejima, nawa antu amavulu etiyili mudi Mwanta.”—Yilw. 9:36-42.
Munateli kumwimbujola ñahi Tabita?
24 Twadizilañaku yikuma yiyedi yalema kuniyi nsañu yamumwekeneni Tabita. (1) Tunateli kufwa mpinji yidi yejima. Dichi chalema nankashi kwikala nejina dadiwahi hituchidi amomi! (Mukwa. 7:1) (2) Kusañuka kukekala kwoku. Yehova wamweni nyidimu yayivulu yakoñeliyi Tabita, nawa wamukiswilili. Wakanuka nyidimu yetu yejima yitwakoñeli nawa wakatusañula neyi tufwa henohu Amagedoni kanda yishiki. (Heb. 6:10) Hela chakwila tudi “mumpinji yakala” hela tunakudiluñisha “mpinji yakuwunda,” twatela kushimuna chikupu wunsahu hadi Kristu.—2 Tim. 4:2.
a Talenu chikasha chinakwila nawu “ Sawulu kaFwarisi,” hefu 62.
b Kakavulu, apostolu diwu adiña nawuswa wakuhana yawaana yaspiritu yajila. Hela chochu, haniyi mpinji chinamwekani neyi Yesu wamwinkeli Ananiya wuswa wakumwinka Sawulu yawaana yaspiritu yajila. Chelili Sawulu abalumuki, amwambwili hadi mpinji yayilehi wadimweneña nawapostolu 12 wanyi. Ilaña wadiña nakushimwina muniyi mpinji. Dichi Yesu wamweni nindi Sawulu nekali dehi nañovu yakutwalekahu kushimwina.
c Talenu chikasha chinakwila nawu “ Tabita—‘Wazatileña Nyidimu Yayiwahi Yayivulu,’” hefu 67.
