KAPETULU 18
“Mukeñakeñenu Nzambi, . . . Nawa Mukumuwana”
Pawulu nahimpi njila yindi yakushimwinamu nawa nakuhosha yuma yinakukeña kutiyililawu antiyilili jindi
Kushindamena haYilwilu 17:16-34
1-3. (a) Muloñadi kapostolu Pawulu chatiyilili kutama muAtenisi? (b) Yumanyi yitukudiza neyi tudiza nsañu yaPawulu?
PAWULU natiyi kutama chikupu. Wudi muAtenisi, muGreece, mwatañishililiwu akakuleja maana, adi neyi Plato, niaAristotle. Atenisi himusumba mudi antu etiya. Adifukuluña kudi anzambi amavulu, dichi kwejima kunakuyayi kudi ankishi, adi mumatembeli, mumaluña mwawanikaña antu amavulu nimunyikwakwa. Pawulu weluka chatiyañayi Yehova Nzambi kudifukula kudi ankishi. (Kwid. 20:4, 5) Kufwana Yehova iwu kapostolu washinshika niyena namwekeshi nindi wayihela ankishi!
2 Pawulu chinakwiñilayi mumaluña akulandishila namoni chuma chakuhayamisha, namoni yifwikija yanzambi Heremisi yayivulu anayitanjiki kuwiñililu. Mumaluña akulandishila munenzali tumaluña twakudifukwila twatuvulu. Indi kapostolu wukutweshaña ñahi kuyishimwina awa antu adifukulaña kudi ankishi amavulu? Komana wukudiwunjika nakumwekesha kalemesha nikuwana yuma yikuletesha atweshi kuhanjeka nanawa antu? Komana wukutwesha kukwasha antu amakwawu kumwiluka Nzambi walala nakutachika kudifukula kudi Yena?
3 Nsañu yahanjekeliyi Pawulu nawantu akweti maana amuAtenisi, tunateli kuyiwana haYilwilu 17:22-31, dichi Pawulu wahanjekeli nawu nakuyishinjila nawa mukubabala. Dichi neyi tudiza nsañu yinakuhosha hayuma yeliliyi Pawulu chinateli kutukwasha kwiluka yuma yikutukwasha nawa yikuletesha tutachiki kuhanjeka nawantu, yikuletesha antu anakututiyilila kutuñojokahu.
Kutañishila “haChisankanu” (Yilwilu 17:16-21)
4, 5. Kudihi kwashimwinineñayi Pawulu muAtenisi, nawa antu amuchidinyi awaniniyi kweniku?
4 Pawulu wayili muAtenisi halwendu lwindi lwamuchiyedi lwawumishonali, mu 50 C.E. a Watachikili kuhanjeka nawaYudeya mumasinagogi neyi chelileñayi mpinji yejima hampinji yayihembeleleñayi aSilasi naTimotewu kulonda afumi kuBereya, Pawulu wayili cheñi nakushimwina kumaketi kwahanjekeleñayi nawantu abulili kwikala aYudeya ashakamineña muAtenisi. (Yilw. 17:17) Maketi yamuAtenisi yadiña yeneni nawa yadiña kwakwihi nampidi yateneneñawu nawu Akiropolisi. Munidi iluña antu elileña yuma yayivulu bayi kulanda nakulandulula hohuku; dadiña cheñi iluña dalema mwabulakeneneñawu antu mumusumba. Mukanda wumu wahosha nawu “idi didadiñi iluña damumusumba mwadiña nakuselujolilawu, kubulakena akakuleja maana niansoneki.” Antu amuAtenisi atiyileña kuwaha kubulakena mwenimu nikuhanjekelamu.
5 Pawulu wawanini antu akala kuchisankanu. Hakachi kanawa antu adiña mazanvu ayedi amutiyilileña adiña Epikureya niaZeno, izanvu dikwawu dawantu akweti maana akuhwelela yuma yambukaku. b AEpikureya akuhwelela nawu yuma yenjiliku hohu chamaposu. Iyi diyi yuma yakuhweleleliwu: “Hiwatela kutiya Nzambi womaku; Muntu neyi nafwi hatiyaña kuyeñaku; Wunateli kwila yuma yayiwahi; Muntu nateli kuumika yuma yatama.” AZeno akuhweleleli nawu chalema kwikala namaana nikwiluka ilaña akuhweleleli nawu Nzambi hiMuntuku. Wejima wawu aEpikureya niaZeno akuhweleleli wanyi mukusañuka neyi chatañishileñawu atumbanji twaKristu. Mwamweni, iyi yitoñojoka yanawa mazanvu ayedi yadiña yambukaku chikupu nachalala chacheni chakuhwelelewu akaKristu, chatañishileñayi Pawulu.
6, 7. Indi aGiriki amakwawu ataña elili ñahi nayuma yatañishileñayi Pawulu, nawa antu elaña ñahi chuma chochimu makonu?
6 Indi aGiriki amweneñawu nawu akamaana elili ñahi nayuma yatañishileñayi Pawulu? Amakwawu azatishili izu datalisha mukwila nawu “sakubobola,” hela “mukakunonojola mbutu.” (Talenu nsañu yakudiza haYilwilu 17:18, nwtsty.) Kutalisha hanidi Izu dachiGiriki, muntu wumu wadiza wahosheli nindi: “Izu dadeni adizatisha hakutena kada kanyanya kayileña nakunonojola, nawa atachikili kudizatisha hakutena antu anonojolileña yakuda niyuma yikwawu hachisankanu. Ilaña chimwahitili mpinji enjili nakudizatisha muchifwikija hakutena muntu wunatiyi nsañu jambokamboka ilaña nakukañanya kukwantakesha chikuma nakuyihosha chachiwahi.” Dichi awa akamaana ahosheleña nawu Pawulu wadiña wamukunkulwayi. Muloña wadiña nakuhosha nsañu yatiyili kudi antu acheñi. Neyi chitukumona Pawulu hatiyili kutama nadina ijina damuteneneniwuku!
7 Nimakonu dichuma chinakumwekana. Etu aYinsahu jaYehova atutenaña namajina amavulu hamuloña wayuma yamuBayibolu yitwakuhwelela. Chakutalilahu, antu amakwawu ataña ahoshaña nawu yuma yadinjililiku hohu yayeni nawa ahoshaña nawu muntu wukweti maana, watela kwiteja. Munjila yikwawu atenaña antu abula kukuhwelela nawu yuma yadinjililiku yayeni nawu adana maana. Antu amuchidawa akojejaña antu kutoñojoka nawu tudi “akakunonojola mbutu” neyi tuyileja chahosha Bayibolu nawa tuyileja niwunsahu wamwekeshaña nawu yuma ayileñeli. Ilaña twatiyaña woma wanyi. Kwambukaku, twekalaña ahamuka neyi tunakuhakwilaku yuma yitwakuhwelela, netu yuma hamaseki ayileñeli kudi Muntu wukweti maana, Yehova Nzambi.—Chim. 4:11.
8. (a) Yumanyi yelili antu amakwawu atiyili chatañishileñayi Pawulu? (b) Pawulu adi kumwila ñahi chamutwaliliwu kudi Areopagasi? (Talenu tumazu twaheshina hefu 142.)
8 Antu amakwawu atiyili Pawulu nakutañisha hachisankanu atiyili nsañu yindi chambukaku. Atoñojokeli nawu, “Nakumwekana neyi himukakushimwina wawanzambi akwacheñi.” (Yilw. 17:18) Komana Pawulu wayilejeleña Atenisi aNzambi acheñi? Iwu wadiña himuloña weneni muloña kunyima, muntu wadiza chikupu Socrates amwinkelimuloña yowumu nawa amujahililihu. Mwamweni, Pawulu amutwalili kudi Areopagasi nawa amulejeli kulumbulula yuma yatañishileñayi yabuliliwu kwiluka akaAtenisi. c Pawulu wukushimwina ñahi antu abula kwiluka Nsona?
“Enu Amayala amuAtenisi, Namoni” (Yilwilu 17:22, 23)
9-11. (a) Pawulu welili ñahi kulonda amoni hakutachikila kuhanjeka nawantu? (b) Tunateli kumwimbujola ñahi Pawulu mumudimu wakushimwina?
9 Anukenu nenu Pawulu watiyili kutama chamweniyi antu anakupesha. Hela chochu, chatela yashikeni kuyileja nindi kupesha kwatama, ilaña yena wawundili. Wazatishili njila yayiwahi kulonda ashinjili antu amutiyilileña amutiyilila. Watachikili nindi: “Dichi Pawulu wemeni mukachi kawaAreopagasi nakuhosha nindi: “Enu amayala amuAtenisi, namoni nami muyuma yejima, munakutiya anzambi woma nankashi kubadika akwenu ejima.” (Yilw. 17:22) Munjila yikwawu Pawulu wahosheleña nindi, ‘Namoni nami mwetiya chikupu.’ Mukubabala, Pawulu wazatishili kanshishi kulonda ayihameki nindi adiña etiya chikupu. Welukili nindi antu amakwawu aputishawu mesu nakwitiya kwakutwamba anateli kwiteja chalala. Pawulu welukili nindi hampinji yimu wakoñeleña yuma “mukubula kwiluka nimukubula chikuhwelelu.”—1 Tim. 1:13.
10 Kuhiñahu Pawulu washimwini nindi wamweni chuma chamwekesheleña nawu Atenisi adiña akeña kwitiya muloña wamweni kameña “kaNzambi Wabula Kwilukewa.” Kwesekeja nawunsahu wumu, “aGiriki niamakwawu atuñileña tumeña twawanzambi abula kwilukewa,’ atiyileña woma nawu hadaha mukudifukula kwawu anashiyihu anzambi amakwawu akutiya kutama.” Aka kameña kamwekeshelaña nawu, Atenisi elukili nawu kudi Nzambi mukwawu abula kwilukawu. Pawulu wazatishili aka kameña kulonda atachiki kuyishimwina nsañu yayiwahi. Walumbulwili nindi: “Yeniwu imunakudifukulaku chakadi kwiluka, diyi innakuyishimwina.” (Yilw. 17:23) Pawulu wahanjekeleña nawu mukubabala nawa wayishikili hamuchima. Hayishimwinineña hadi Nzmabi wamuha hela abula kwilukawu, neyi chahosheleñawu amakwawu. Wayilumbulwileña nindi iwu Nzambi abula kwilukawu hiNzambi walala.
11 Tunateli kumwimbujola ñahi Pawulu mumudimu wakushimwina? Neyi tutalishisha, tunateli kumona wunsahu wunakumwekesha nawu muntu wakeña jakudifukula, hadaha yakuvwala indi kwiji washa mwitala hela hanji chuma chamwakeshaña nawu wetiya. Tunateli kuhosha netu: ‘Namoni nami mwalemesha kwitiya. Nakeñaña kuhosha namuntu wakeña jakwitiya.’ Neyi twiluka yuma yakuhwelelayi muntu mukwitiya, chikutukwasha kwiluka hakutachikila kuhanjeka nindi. Mpinji yejima twanukeña netu chatama kukunkulula mwaluwa hayuma yakuhwelelawu antu. Hakachi kawakwetu akakwitiya amavulu, mpinji yimu adiña mukwitiya kwakutwamba.
Fwilenuña kukeñakeña yuma yelukawu kulonda muyikwashi adizi chalala
Nzambi “Hekala Kwakulehi Nanetu Ejimaku” (Yilwilu 17:24-28)
12. Pawulu welili ñahi hakwila nawu ayikwashi antiyilili jindi?
12 Pawulu wawanini hakutachikila kuhanjeka nawu, komana wukutwalekahu kuyishimwina? Chelukiliyi nindi antu amutiyilileña adiña aGiriki adiza chikupu nawa abula kwiluka Nsona, wahimpahimpileña. Chatachi, watachikili kuhanjeka nawu nsañu yamuBayibolu chakadi kuzatisha Nsona. Chamuchiyedi, wakwashili antiyilili jindi kwiluka nawu wayitiyishishili nawa wadiña neyi wena. Chamuchisatu wazatishileña mazu amunyikanda yachiGiriki nakumwekesha nindi yuma yikwawu yayitañishileñayi wayisonekeleli wena. Ichi lekenu tuhanjekenu hamazu ahosheliyi Pawulu. Chalalanyi chalema chahosheliyi hadi Nzambi wabulili kwilukawu Atenisi?
13. Pawulu walumbulwili nindi mawulu nimaseki ayileñeli kudinyi, nawa yumanyi yalumbulwiliyi munjila yatiyakana?
13 Nzambi waleñeli mawulu nimaseki. Pawulu wahosheli nindi: “Nzambi waleñeli iseki niyuma yejima yekalahu, yena hakwikala Mwanta wewulu niiseki, hashakamaña mumatembeli akutuña namakasa awantuku.” d (Yilw. 17:24) Mawulu nimaseki hiyadinjilili chamaposuku. Nzambi walala diyi Nleñi wayuma yejima. (Mas. 146:6) Kwambukaku nawaAtenisi hela anzambi amakwawu alemesheliwu namatembeli, nyiyombu, nitumeña, Mwanta Wakubadika weleñeli yuma yejima hanateli kushakama mutembeli yakutuña namakasaku. (1 Anya. 8:27) Mazu ahosheliyi Pawulu adiña alala: Nzambi walala wabadika ankishi akutuña namakasa awantu ekalaña mumatembeli akutuña namakasa awantu.—Isa. 40:18-26.
14. Pawulu wamwekesheli ñahi nindi Nzambi hashindamena hadi antuku?
14 Nzambi hashindamenaña hadi antuku. Antu adifukwileña kudi ankishi ayivwikileña ankishi jawu yakuvwala yayiwahi, kuyinka yawana yawuseya, hela kuyiletela yakuda niyakunwanwa, kewili neyi ankishi akeñeleña yumiyi! Hela chochu, aGriki amakwawu akamaana ahanjekeleña naPawulu hadaha akuhweleli nawu nzambi hakukeña chuma kudi antuku. Neyi dichichadiña dikwila nawu etejeli mazu aPawulu akwila nawu Nzambi “hakeñaña kumuzatila namakasa awantu neyi kwiji nakaankili,” chumaku. Eña, kwosi chuma chakumujimba chinateli kumwinkawu Nleñi kudi antu! Ilaña yena wayinkaña antu “wumi niyuma yejima,” kushilahu tuhu nitena, nvula niseki dawushi. (Yilw. 17:25; Kutach. 2:7) Dichi Nzambi, Mukakuhana, hashindamenaña hadi antu atambwilañaku.
15. Indi Pawulu wolweli ñahi yitoñojoka yawaAtenisi yakwila nawu abadika antu abula kwikala aGiriki, nawa chumanyi chitunateli kudizila kuyuma yeliliyi?
15 Nzambi waleñeli muntu. AkaAtenisi akuhweleli nawu adiña abadika antu abulili kwikala aGiriki. Ilaña Bayibolu yahosha nawu hitwatela kudivwimba muloña wetuña hela wekowaku. (Kuhit. 10:17) Pawulu walumbulwili ichi chalala mukubabala nawa munjila yayiwahi. Hahosheliyi nindi, “[Nzambi] waleñeli nyuza yejima yawantu kufuma kudi muntu wumu.” Chakadi nikujina, mazu aPawulu aletesheli antu adiña nakumuyitilila kutoñojokahu. (Yilw. 17:26) Wateneneña nsañu yekala muKutachika yaAdama, nkakulula kwafumini antu ejima. (Kutach. 1:26-28) Chineli antu ejima akweti nkakulula wumu, kwosi ikowa hela ituña dabadika akwawuku. Antu adiña nakumutiyilila Pawulu elukili mwatalishiliyi. Twadizilañaku chuma chalema kuchuma cheliliyi. Hela chakwila twatela kwikala ababala nikutoñojoka hampinji yitunakuzata mudimu wetu wakushimwina, tunakukeña wanyi kuhimpa chalala chamuBayibolu kulonda antu etejeña kwesekeja nachakuhwelelawu.
16. Chumanyi chakeñañayi Nleñi kudi antu?
16 Nzambi wakeñaña nindi antu aswini kwakwihi naYena. Hela chakwila hadi yaaka yayivulu, awantu adiza amutiyilileña Pawulu ahanjekeleña muloña waweni wutwekalilaku, hiyatwesheli kulumbulula chatiyakana haniyi nsañuku. Hela chochu, Pawulu walumbulwili munjila yatiyakana nindi Nleñi wakeñaña antu “amukeñakeñi Nzambi, hadaha akumupapata nakumuwana, kafwampi, yena hekala kwakulehi nanetu ejimaku.” (Yilw. 17:27) Iwu Nzambi abulili kwilukawu Atenisi, anateli kumwiluka. Chalala chidi chakwila nawu, wudi wanyi kwakulehi nawantu anakukeña kumukeñakeña hela anakukeña kumwiluka. (Mas. 145:18) Pawulu wazatishili izu dakwila nawu “nanetu,” chinakumwekesha nawu niyena wudi hakachi kawantu ‘amukeñakeñeleña’ Nzambi “nakumupapata.”
17, 18. Muloñadi antu chatela kuswininawu kwakwihi naNzambi, nawa chumanyi chitwatela kudizila kudi Pawulu kuchahanjekeleñayi nawantu?
17 Antu atela kuditiyaña nawu anateli kuswina kwakwihi naNzambi. Pawulu wahosheli nindi, “twekala nawumi, twendaña nawa twahandaña muloña wayena.” Antu amakwawu adiza ahoshaña nawu Pawulu wadiña nakutena mazu akwila nawu Epimenidesi, mwini Kereta mukakusoneka nkumbu wadiñaku muyaaka 500 B.C.E. nawa “muntu alemesheli nankashi mukwitiya kwawaAtenisi.” Pawulu washimwini cheñi watela kuswininawu kwakwihi naNzambi nindi: “Antu jenu amakwawu akakusoneka nkumbu ahosha nawu, ‘Muloña ninetu tudi anyanindi.’” (Yilw. 17:28) Antu atela kuswina kwakwihi naNzambi; muloña waleñeli muntu wumu kwafuma antu ejima. Hakwila ayishiki hamuchima, Pawulu wazatishili mazu amunyikanda yachiGiriki alemesheliwu antu adiña nakumutiyilila. e Kufwana Pawulu, mpinji yikwawu tunateli kuzatisha mazu amunyikanda yakwituña, maencyclopedia, hela nyikanda yikwawu yetejawu. Chakutalilahu, tunateli kumuleja mazu anafumi mumukanda wumu alemeshawu kulonda tukwashi antu abula kwikala aYinsahu chatachikili yidika yimu yamukwitiya kwakutwamba.
18 Kushika tuhu nihaniyi mpinji, Pawulu wahosheli yikuma yachalala chahosha hadi Nzambi, nakulumbulula chiwahi nsañu yikutiyawu antiyilili jindi. Kapostolu nakukeña antu amuAtenisi anakumutiyilila kwila ñahi nansañu yalema yinakutiyawu? Kushika tuhu nihaniyi mpinji natwalekihu kuyileja.
“Antu Ejima Ashakamaña kuMaluña Ejima . . . Atela Kubalumuka muNyichima” (Yilwilu 17:29-31)
19, 20. (a) Pawulu walumbulwili ñahi nindi chatama kudifukula kudi ankishi akutuña kudi antu? (b) Chumanyi chateleli kwilawu antu amutiyilileña Pawulu?
19 Pawulu wadiña wadiloñesha kukolesha antiyilili jindi kulonda elihu chuma. Kutalisha kunsañu yasonekeliwu munyikanda yachiGiriki, wahosheli nindi: “Dichi, chineli tudi anyana kaNzambi, bayi tutoñojoka netu Nzambi wekala neyi wuru hela siliva hela ilola, neyi chuma chabazawu nawukalawenu ninamaana awantuku.” (Yilw. 17:29) Mwamweni, neyi Nzambi waleñeli antu, hanu dinu muloñadi Nzambi chinateli kwikalilayi neyi ankishi, aleñawu kudi antu? Pawulu wamwekesheli mukubabala nindi chachiwahi wanyi kudifukula kudi ankishi akusoña kudi antu. (Mas. 115:4-8; Isa. 44:9-20) Pawulu chahosheliyi nindi “bayi tutoñojoka netu,” chakadi nikujina chakwashili antu kubula kumutiya kutama.
20 Kapostolu wamwekesheli hatooka nindi atela kwilahu chuma nanochu chahosheliyi nindi: “Nzambi nadiwuli mpinji yawu yakubula kwiluka yuma [nakutoñojoka nindi Nzambi nateli kutiya kuwaha antu adifukulaña kudi ankishi]; ilaña ichi nakushimwina kudi antu ejima ashakamaña kumaluña ejima nindi atela kubalumuka munyichima.” (Yilw. 17:30) Antu amakwawu adiña nakumutiyilila Pawulu hadaha ahayamini hakutiya nakuyileja nindi balumukenu. Ilaña chayilejeliyi hatooka chinakumwekesha nawu Nzambi diyi wayinkeli wumi nawa atela kuwuzatisha chachiwahi. Ateleli kumukeñakeña Nzambi, kwiluka chalala chahosha hadi yena, nikushakama kwesekeja nachakeñañayi Nzambi. Kudi Atenisi, chatalishili mukwila nawu ateleli kuleka nshidi jawu nikudifukula kudi ankishi.
21, 22. Pawulu wakunkulwili nsañu yindi namazwinyi akushinjila, nawa mazwindi atukwashaña ñahi makonu?
21 Pawulu wakunkulwili nsañu yindi namazu akushinjila nindi: “Nzambi natondi dehi ifuku dakusompeshelamu antu ashakama hamaseki hejima munjila yaloña kuzatisha muntu watondayi nawa antu ejima atela kukuhwelela chikupu idi ifuku dakusompesha muloña namusañuli mudi afu.” (Yilw. 17:31) Chelukiliwu nawu ifuku daNzambi dakusompesha dinakwinza ateleli kumukeñakeña Nzambi walala! Pawulu hashimwini Nsompeshi atondawuku. Ilaña, washimwini yuma yamumwekeneni iwu Nsompeshi: Wahandilihu neyi muntu, wafwili nawa amusañwili kudi Nzambi kufuma mudi afu!
22 Tunateli kudizilaku chumanyi kunawa mazu akweti ñovu akunkulwiliyi nachu. Tweluka netu Nsompeshi atondawu kudi Nzambi hiYesu Kristu asañulawu. (Yow. 5:22) Tweluka cheñi netu ifuku dawunsompeshi dayaaka Ikombakaji didi kwakwihi nawa keña dishiki. (Chim. 20:4, 6) Hitwatiyaña woma Ifuku dawuNsompeshiku, muloña tweluka netu dakaleta yuma yayiwahi kudi antu akawanawu ashinshika. Yuma yakumbidi yitwachiñejaña yikamwekana kuhitila muchihayamisha chamwekeni chakusañuka kwaYesu Kristu!
“Amakwawu. . . Etiyili” (Yilwilu 17:32-34)
23. Antu elili ñahi nansañu yahosheliyi Pawulu?
23 Antu elili yuma yamboka-mboka namazu ahosheliyi Pawulu. Chatiyiliwu nsañu yakusañuka kwawafu, amakwawu atachikili kumusupisha. Amakwawu niwena ahosheleña nawu: “Twakatiya cheñi chiwakahosha haniyi nsañu.” (Yilw. 17:32) Hela chochu, antesha atiyilili: “Amayala amakwawu ayili hamu nindi nawa ekalili akakwitiya. Hakachi kawu hadiña Diyonisi, wadiña nsompeshi muchota chaAreopagasi nimumbanda wejina daDamarisi kushilahu niantu amakwawu.” (Yilw. 17:34) Dichitwamoña nimumudimu wetu wakushimwina. Antu amakwawu atusupishaña, ilaña amakwawu amwekeshaña kalemesha hela chakwila aneteji wanyi. Twatiyaña kuwaha neyi amakwawu eteja nsañu yaWanta nawa ekala akakwitiya.
24. Chumanyi chitunateli kudizila kumazu ahosheliyi Pawulu hampinji yemeniyi mukachi kaAreopagasi?
24 Neyi tutoñojoka hamazu ahosheliyi Pawulu, tunateli kudizilaku yuma yayivulu nichakulombola chiwahi yuma chikuletesha antu eteji yuma yitunakutañisha nawu yalala. Kubombelahu, tunadiziliku cheñi netu twatela kwikala adiwunjika nikuzatisha kanshishi neyi tunakukwasha awa antu aputishawu mesu nakwitiya kwakutwamba. Tunateli cheñi kudizilaku ichi chikuma chikwawu chalema netu. Hitwatela kuhimpa chalala chamuBayibolu kulonda tuyitiyishi kuwaha antiyilili jetuku. Neyi twimbujolaña chuma cheliliyi kapostolu Pawulu, tukwikala antañishi amawahi mumudimu wetu wakushimwina. Kubombelahu, akulumpi muyipompelu atela kwikala antañishi amawahi. Dichi dinu tukudiloñesha kulonda tukwashi antu “amukeñakeñi Nzambi . . . nakumuwana.”—Yilw. 17:27.
a Talenu chikasha chinakwila awu “ Atenisi—Musumba waYisemwa Kunyima,” hefu 142.
b Talenu chikasha chinakwila nawu “ AEpikureya Nawa Zeno,” hefu 144.
c Iluña daAkiropolisi dadiña kukabeta kakuchimuswa namujika, nawa Areopagasi dadiña iluña kwabulakeneneñawu akulumpi amuAtenisi. Izu dakwila nawu “Areopagasi” dinateli kutalisha kudi anyuli hela mpidi yayeni. Hela chochu, antu adiza chikupu ambokelamu muyitoñojoka nakwamutwaliliwu Pawulu, amakwawu nawu kudi anyuli hela kwakwihi nampidi hela kwiluña kwabulakeneneñawu anyuli kwacheñi hadaha muagora.
d Izu dachiGiriki “dakaayi” hikoʹsmos, muchiGiriki datalishileña kuyuma yejima yekalaku. Dichaletesheli Pawulu atweshi kuhanjeka nawantu ahosheleña chiGiriki nawa dichaletesheli azatishi idi izu aha.
e Pawulu wafumishili mumukanda wankumbu waPhaenomena, wasonekeliwu kudi mukakusoneka nkumbu kaZeno wejina daAratusi. Mazu wowamu awanikaña cheñi nimunsona jachiGiriki, chidi neyi Heremisi naZewusi, wasonekeliwu kudi kaZeno wejina daCleanthes.
