KAPETULU 17
“Wahanjekeleña Nawu Kuzatisha Nsona”
Hakwila twikali antañishi amawahi yuma yejima yitwahoshaña yatela kushindamena haBayibolu neyi cheliliwu aBereya
Kushindamena haYilwilu 17:1-15
1, 2. Anyi anakufuma kuFwilipi nakuya kuTesalonika, nawa yumanyi yinakutoñojokawu?
PAWULU niamabwambu jindi Silasi naTimotewu anakufuma kuFwilipi nakuya kuTesalonika. Anakwenda lwendu lwamakilomita 130 kuhita mujimpidi, anakuhita munjila yayiwahi yatuñawu kudi aRoma, mudi luntu lwaluvulu lunakwenda muniyi njila, mudi amashidika, akakulanda nakulandulula niakawukalawenu. Muniwu mukwakwa mwendaña antu amavulu nawa mudi ipumba dawantu anakuhosha, datuwalu nidatufumbu twamakalu. Ilu lwendu lwapela wanyi, sweje-e kudi aPawulu naSilasi. Muloña achidi kutiya kuyeña kwatubama twayivupoliliwu hachidiñawu muFwilipi.—Yilw. 16:22, 23.
2 Awa amayala akuleka ñahi kutoñojoka halwendu lwawu lwalulehi? Kuhanjeka dichuma chikuyikwasha. Hela chochu, achidi kwanuka yuma yamwekana muFwilipi chelili mukakuhemba kaleya nichisaka chindi ekali akakwitiya. Chuma chamwekana chinayikwashi awa amayala kutwalekahu kushimwina izu daNzambi. Hela chochu, chinakuswinawu kwakwihi namusumba waTesalonika, hadaha anakutoñojoka chikuyilawu aYudeya muwuna musumba. Komana akuyilukuka, nikuyeta, neyi chayilawu muFwilipi?
3. Chumanyi chitunateli kudizila kudi Pawulu chatwalekelihu kwikala wahamuka nikushimwina?
3 Chimwahitili mpinji, Pawulu walumbulwili chatiyileñayi mumukanda wayisonekeleliyi akaKristu muTesalonika nindi: “Hela chakwila twasambilili kukabakana nikutukabisha muFwilipi, neyi chimweluka, Nzambi watukwashili kwikala ahamuka hakuyishimwina enu nsañu yayiwahi yaNzambi hitwamweneña ikañesha dasweja.” (1 Tes. 2:2) Dichi chinamwekani neyi Pawulu wadakameneneña kwiñila mumusumba waTesalonika, sweje-e hamuloña wachuma chamwekeni muFwilipi. Munateli kutoñojoka neyi chatoñojokeli Pawulu? Komana chayikalilaña kushimwina nsañu yayiwahi? Pawulu wamushindameneni Yehova kulonda amukoleshi nikumukwasha kwikala wahamuka. Kwiluka chuma chamukwashili Pawulu chinateli kuyikwasha kwila chuma chochimu.—1 Kor. 4:16.
“Wahanjekeleña nawu Kuzatisha Nsona” (Yilwilu 17:1-3)
4. Muloñadi chitukuhoshela netu Pawulu washakamini muTesalonika kubadika hanyilungu yisatu?
4 Mukanda waYilwilu wahosha nawu Pawulu hadiñayi muTesalonika, washimwinini musinagogi hamaSabata asatu. Komana chumichi chinayi mukwila nawu washakamini mumusumba hadi nyilungu yisatu? Inehi mwani. Tuneluki wanyi mpinji yeñililiyi musinagogi kufuma hashikiliyi. Kubombelahu, nyikanda yaPawulu yashimuna nawu iku wuchidi muTesalonika, yena niamabwambu jindi azatileña kulonda adikwasheña. (1 Tes. 2:9; 2 Tes. 3:7, 8) Cheñi, hadi mpinji yashakaminiyi kweniku, Pawulu watambwilili wukwashu kayedi kufuma kudi amanakwindi muFwilipi. (Fwili. 4:16) Dikwila nawu washakamini muTesalonika kubadika hanyilungu yisatu.
5. Pawulu wayishinjilili ñahi antu?
5 Pawulu wamwekesheli kuhamuka, dichi washimwinini antu apompeli musinagogi. Neyi chelileñayi mpinji yejima, “wahanjekeleña nawu kuzatisha Nsona, wayilumbulwilileña nakuyileja kuzatisha nsona nindi, chateleleli Kristu kukabakana nikumusañula mudi afu, nakuhosha nindi: ‘Iwu diyi Kristu, iwu Yesu innakuyishimwina.’” (Yilw. 17:2, 3) Ilukenu nenu Pawulu hakeñeleña nindi ayizañaleshi antu adiña nakumutiyililaku; wakeñeleña nindi atoñojokihu chikupu haniyi nsañu. Welukili nindi antu enjileña musinagogi adiña eluka Nsona nawa ayilemesheli. Chuma chashalili hohu hikutiyishisha Nsona. Dichi Pawulu wahanjekeli nawu nakuyilumbulwila nikumwekesha muNsona nindi Yesu wakuNazareta wadiña Mesiya akaniniwu hela Kristu.
6. Yesu wahanjekeleña ñahi nawantu kuzatisha Nsona, nawa mwafumini yumanyi?
6 Pawulu welili neyi chelileñayi Yesu wazatishileña Nsona hakutañisha. Chakutalilahu, chatañishileñayi kumaluña kwadiña antu amavulu, Yesu wayilejeli akakumulondela nindi kwesekeja nachahosha Nsona, Mwana kaMuntu watela kukabakana, kufwa nikumusañula mudi afu. (Mat. 16:21) Hanyima yakumusañula Yesu wamwekeni kudi atumbanji twindi. Mwamweni, chuma chamwekeni chamwekesheli nawu wahosheli mwalala. Hela chochu, Yesu wayilejeli cheñi wunsahu wukwawu wawuvulu. Kutalisha hadi atumbanji amakwawu twatañaña netu: “Wayilumbulwilili yuma yahoshawu hadi yena muNsona jejima kutachikila kumazu aMosi nimazu awaTuprofwetu ejima.” Yumanyi yafuminimu? Atumbanji ahayamini nakuhosha nawu: “Komana nyichima yetu mukachi hiyatatashanaña chahoshañayi nanetu munjila nichatubakwilañayi chikupu Nsonaku?”—Luka 24:13, 27, 32.
7. Chalemenadi kuzatisha Nsona hampinji yitunakutañisha?
7 Nsañu yekala Mwizu daNzambi yikweti ñovu. (Heb. 4:12) Yuma yatañishañawu akaKristu makonu yashindamena hanidi Izu, neyi cheliliyi Yesu, Pawulu niapostolu amakwawu. Ninetu twahanjikaña nawantu, kuyilumbulwila munatalisha Nsona nikuyileja wunsahu wayuma yitwatañishaña kuhitila mukuyibakwila Bayibolu nakuyileja chiyahosha. Nsañu yitwatañishaña yetu wanyi. Chitwazatishaña Bayibolu mpinji yejima twayikwashaña antu kwiluka nawu hitwatañishaña jidi muyitoñojoka yetuku, ilaña yitoñojoka yaNzambi. Kubombelahu, twanukaña netu nsañu yitwashimwinaña yaMwizu daNzambi. Hinsañu yatela kukuhwelelawu. Chineli muneluki iyi nsañu, kwila mwikala ahamuka hakushimwina neyi cheliliyi Pawulu nehi?
“Amakwawu . . . Etiyili” (Yilwilu 17:4-9)
8-10. (a) Antu elili ñahi muTesalonika nansañu yayiwahi? (b) Muloñadi aYudeya amakwawu chamutiyililiwu Pawulu ichima? (c) Indi aYudeya akakudimbulula elili ñahi?
8 Pawulu wadiña wamona dehi mazu aYesu nindi alala, akwila nawu: “Nduñu habadika nkaaka yindiku. Neyi anankabishi ami, akayikabisha ninenu nawa; neyi anahembi mazu ami, akahemba nimazu enu nawa.” (Yow. 15:20) Ichi dichuma chamweniyi Pawulu muTesalonika, amakwawu etejeli Izu, ilaña amakwawu akaanini. Luka wasonekeli hadi ana etejeli namuchima wumu nindi: “Amakwawu hakachi kawu [aYudeya] etiyili [nakwikala akaKristu] nawa atachikili kuzatila hamu naPawulu, Silasi niaGiriki amavulu adifukwileña kudi Nzambi, kubombelahu niambanda amakwawu alema niwena dicheliliwu.” (Yilw. 17:4) Chakadi nikujina, awa atumbanji atiyili kuwaha chatiyishishiliwu Nsona.
9 Hela chakwila amakwawu atiyili kuwaha namazu aPawulu, amakwawu amuhilili. AYudeya amakwawu muTesalonika amutiyilili Pawulu nanochu chakokweliyi izaza deneni “dawaGiriki amavulu.” Awa aYudeya ayishinjilili aGiriki abulili kwikala aYudeya, kwiteja yuma yakuhweleleliwu aYudeya, dichi ayitañishili nyikanda yachiHeberu nawa atoñojokeleña nawu awa aGiriki adiña atumbanji twawu. Hela chochu, chamwekeni neyi Pawulu wayikokweleña aGiriki nakuyifumisha kudi wena, momwenamu musinagogi! AYudeya azuwili chikupu.
“Akeñeleña . . . ayidishi nakuyileta kwizanvu dawakamadombu.” —Yilwilu 17:5
10 Luka nakutuleja chuma chikwawu chamwekeni, nindi: “AYudeya chatiyiliwu ichima, afumbili amayala atama adiña nakuhitañana hachisankanu nawa atuñili izanvu dawakamadombu datachikili kuleta ipumba mumusumba. Dichi alukukili itala daYasoni nakukeñakeñamu aPawulu naSilasi kulonda ayidishi nakuyileta kwizanvu dawakamadombu. Chakañenyiwu kuyiwana, akokañeshelelimu Yasoni nianakwetu amakwawu nakuyitwala kudi anyuuli amusumba, iku anakubidika nawu: ‘Awa antu analeti kukala heseki hejima, anenzi nikunu, nawa Yasoni nayitambwili mwitala dindi. Awa amayala ejima adikañaña nanshimbi jaKesari nawa ahoshaña nawu kudi mwanta mukwawu, Yesu.’” (Yilw. 17:5-7) Yumanyi yadi kufumamu neyi idi izanvu dayilukukili aPawulu niamabwambu jindi?
11. Nyiloñanyi yamwinkeliwu Pawulu hamu niakwawu akakushimwina nsañu yaWanta, nawa awa amwinkeleña muloña atoñojokeleña halushimbinyi? (Talenu tumazu twaheshina.)
11 Neyi izanvu dawantu dinazuwi chikupu delaña yuma yatama. Anateli kukatishañana, kukisa yuma, nawa kwosi wunateli kuyikañesha neyi kaloña kanenzali. Iyi diyi njila yazatishiliwu aYudeya kulonda ayikisañani aPawulu naSilasi. Hanyima yakwila aYudeya analeteshi mumusumba mwikali “ipumba,” esekeli kuyishinjila nawu awa antu akweti muloña weneni. Muloña watachi wadiña nawu Pawulu niakwawu akakushimwina aWanta “analeti kukala heseki hejima,” hela chakwila Pawulu niamabwambu jindi hiyaletelihu ipumba muTesalonikaku! Muloña wamuchiyedi wayinkeliwu wadiña weneni chikupu. Awa aYudeya ayitadikishili nawu awa amishonali ahosheleña nawu kudi Mwanta mukwawu, Yesu, chakwila afumpileña lushimbi lwamuwanta. a
12. Chumanyi chinakumwekesha nawu muloña wayitwikiliwu akaKristu kudi aTesalonika mwadi kufuma chuma chatama?
12 Anukenu nenu akulumpi jakwitiya niwena amwinkeli Yesu muloña yowumu. Kudi Pilatu amulejeli nawu: “Iwu muntu twamuwana nakuluwañesha muza wetu . . . waditenaña nindi diyi Kristu mwanta.” (Luka 23:2) Hadaha Pilatu watiyileña woma nindi, nyuuli wawanta waRoma wukutoñojoka nindi nakuhakwilaku mwanta mukwawu, dichi wamujahili Yesu. Munjila yoyimu, nyiloña yayinkeleñawu akaKristu muTesalonika mwadi kufuma yuma yatama. Mukanda wumu wahosha nawu: “Kutwambila muntu muniyi njila kwadiña kwafwana, muloña ‘neyi atiya nawu muntu nakudikaña naNyuuli kakavulu amujahileña.’” Komana aka kafuta katama kakwatiliwu kazatikili?
13, 14. (a) Muloñadi izanvu dawakamadombu chidakañenyenyi? (b) Kapostolu Pawulu wazatishili ñahi kufumba kwaKristu nawa tunateli kumwimbujola ñahi?
13 Idi izanvu dakañenyi kulekesha mudimu wakushimwina muTesalonika. Muloñadi? Chatachi, aPawulu naSilasi ayiwanini wanyi. Kubombelahu, anyuuli amumusumba akaanini nawu iwu muloña walala wanyi. Hanyima yakufweta mali amuumbiliku Yasoni niamanakwetu amakwawu aleteliwu kudi wena. (Yilw. 17:8, 9) Pawulu walondeleli kufumba kwaYesu kwakwikala “ababala neyi tupela nawa akadi muloña neyi tupompa,” dichi wayili kwiluña dacheñi nakutwalekahu kushimwina. (Mat. 10:16) Chakadi nikujina, kuhamuka kwamwekesheli Pawulu kwatalishili wanyi mukwila nawu wadiña wabula kusoñama. AkaKristu makonu anateli kumwimbujola ñahi?
14 Makonu anlomboli jamachechi, aswikijaña anlomboli jamatuña kulonda ayinyamukili aYinsahu jaYehova. Ayitwambilaña aYinsahu jaYehova nawu anakudikaña nanfulumendi, nikubalumukilamu ituña dawu. Nawa azatishaña iyi njila kulonda akokoli anyuli, kulonda ayikabishi aYinsahu. Kufwana akakukabishanaa adiñaku, mumafuku awapostolu. Awa akakudimbulula ichima didu dayileteshaña kwila mwenimu, etu akaKristu alala twatondwelelaña kukala kutunateli kuholokelamu. Nawa twatondolwelaña kudiñija munyiloña nawantu amuchidi awa, ilaña twafwilaña kutwalekahu namudimu wetu mukuwunda hamwaha kufuntaku mpinji yacheñi neyi analeki kuzuwa.
Akeñeleña “Kudiza Nankashi” (Yilwilu 17:10-15)
15. Indi akaBereya elili ñahi nansañu yayiwahi?
15 Hakwila ayikiñi aPawulu naSilasi, ayitemesheli kuBereya, hadi makilomita 65. Chashikiliwu hohu, Pawulu wayili musinagogi nakuhanjeka nawantu apompeli. Watiyili kuwaha kuwana antu akeñeleña kutambwila chalala! Luka wasonekeli nindi aYudeya akuBereya “akeñeleña kudiza nankashi kubadika antu amuTesalonika, muloña wena atambwilili izu namuchima wawu wejima, adiña nakutalatala muNsona hefuku-hefuku nakanañachima kulonda amoni neyi yumiyi yalala hela nehi.” (Yilw. 17:10, 11) Komana awa mazu anakumwekesha nawu awa akaTesalonika atambwilili chalala achilemesheli wanyi? Inehi mwani. Chimwahitili mpinji, Pawulu wayisonekeleli nindi: “Chalala, ichi cheñi dichuma chatuleteshaña tumusakilileña Nzambi chakadi kuleka, muloña chimwatambwilili izu daNzambi dimwatiyili kudi etu, himwaditambwilili neyi izu dawantuku, ilaña neyi izu daNzambi, neyi chidekala dalala, odu dinakuzatika nimudi enu akakwitiya.” (1 Tes. 2:13) Hanu dinu, chumanyi chaletesheli aYudeya muBereya kukeña kudiza nankashi?
16. Muloñadi chichinateleli kuyitena aBereya netu “akeñeleña kudiza nankashi”?
16 Hela chakwila akaBereya atiyileña nsañu yabuliliwu kutiyahu, hiyajinokeleña hela kwikala akalishaku; hela hiyakuhweleleli chakadi wunsahuku. Chatachi, atiyilili nakanañachima yuma yahosheleñayi Pawulu. Kuhiñahu, hiyakwesekeja yuma yadiziliwu muNsona nayuma yayikwashiliyi Pawulu kutiyishisha. Kubombelahu, azatili nañovu kudiza izu daNzambi, bayi haSabata hohuku, ilaña mafuku ejima. Nawa elili mwenimu “namuchima wejima,” azatishili mpinji yawu nakukeñakeña chahosha Nsona kwesekeja nayuma yadiziliwu. Nkumininaku, adizozeli nawa ahimpili muloña “amavulu hakachi kawu etiyili.” (Yilw. 17:12) Dichaletesheli Luka ayiteni nindi “akeñeleña kudiza nankashi”!
17. Muloñadi chitwatela kuyimbujolila akaBereya, nawa tunateli kutwalekelahu ñahi kwila mwenimu nihanyima yakwila akakwitiya?
17 AkaBereya elukili wanyi nawu chetejeliwu nsañu yayiwahi akachisoneka Mwizu daNzambi nawa tunateli kudizilaku makonu. Elili chuma chakuhweleliyi Pawulu nindi anateli kwila nawa chakeñeleñayi Yehova Nzambi nindi eli. Munjila yoyimu, dichuma chitwayikoleshaña antu netu eleña, netu asandujoleña chikupu Mwizu daNzambi kulonda chikuhwelelu chawu chishandameneña chikupu Hezu daNzambi. Hanyima yakwila tunekali dehi akakwitiya, komana chinayi mukwila nawu twatela kuleka kwikala namuchima wakukeña kudiza nankashi? Chuma chasweja kulema twatela kukeña kudiza nankashi kulonda tumwiluki Yehova nikuzatisha yuma yatañishañayi. Neyi twilaña mwenimu, dikwila nawu tunakumwiteja Yehova kutuwumba nikutudizisha kwesekeja nachakeñañayi. (Isa. 64:8) Dichi akutuzatishaña nawa tukumuzañaleshaña Tata yetu wekala mwiwulu.
18, 19. (a) Muloñadi Pawulu chafumininiyi muBereya, nawa chumanyi chatwalekeliyi kwila chitunateli kumwimbujola? (b) Anyi ayiliyi nakushimwinayi Pawulu, nawa kudihi?
18 Pawulu washimbwili wanyi muBereya. Twatañaña netu: “AYudeya amuTesalonika chatiyiliwu nawu Pawulu nakushimwina mazu aNzambi nimuBereya, ayili kwenoku nakusañumuna mazaza awantu nikuyitiyisha kutama. Hohenohu, anakwetu amutemesheli Pawulu kuya kukaluñalwiji, ilaña Silasi niTimotewu ashalili kwenoku. Hela chochu, antu amushinjikijileñaku Pawulu amushikijili kuAtenisi, nawa afuntilimu hanyima yakuyileja nawu ayileji aSilasi naTimotewu enzi kudi Pawulu swayi-swayi.” (Yilw. 17:13-15) Awa akakudimbulula nsañu yayiwahi alekeli wanyi kuyiletela amanakwetu kukala! Amuhañili Pawulu muTesalonika; amulondeleli nikuBereya nawu eseki kusañumuna antu kulonda aleti kukala, ilaña hiyatwesheliku. Pawulu welukili nindi wudi neluña deneni dakushimwina; wayili kwacheñi nakushimwinaku. Dichi ninetu makonu bayi twiteja chuma chidi chejima chitukañeshi kuzata mudimu wakushimwinaku!
19 Hanyima yakushimwina chikupu wunsahu kudi aYudeya muTesalonika nimuBereya, Pawulu welukili nindi chalema nankashi kwikala wahamuka hakushimwina nikuhanjeka nawantu kuzatisha Nsona. Ninetu dichitwatela kwila. Ichi Pawulu wayili nakushimwina kudi akanyuza amuAtenisi. Akwila ñahi nansañu yinakutañishayi muniwu musumba? Tukamona, chumichi mukapetulu kanalondelihu.
a Kwesekeja namuntu wumu wadiza Bayibolu, wahosheli nindi haniyi mpinji kwadiña lushimbi lwaKesari lwakulekesha muntu wunakushimuna yuma yakumbidi chidi neyi “mwanta wamuha hela wanta, sweje-e wanta wunateli kufumishahu owu wanta wudihu hela kwinka muloña wanta wunakuyuula.” Dichi ayilumbu jaPawulu atiyishishili wanyi nsañu yatañishileñayi kapostolu chakwila atoñojokeli nawu yinakufumpa luna lushimbi. Talenu chikasha chinakwila nawu “ Kesari niMukanda waYilwilu,” hefu 137.