KAPETULU 21
“Hinikweti Muloña Wamashi Awantu Ejimaku”
Iyena dadiñayi nadu Pawulu mumudimu wakushimwina nichayifumbiliyi akulumpi
Kushindamena haYilwilu 20:1-38
1-3. (a) Shimunenu yuma chiyadiña hampinji yafwiliyi Yutikusa. (b) Pawulu neli yumanyi, nawa chumichi chinamwekeshidi hadi Pawulu?
PAWULU wudi mukapeka kahewulu muTirowasi munenzali antu. Nahoshi nawamanakwetu hadi mpinji yayilehi, chineli iwu wufuku diwu wakukumishaku kwikala nawu. Anashiki mukachi kawufuku. Mukapeka mudi manoñu amavulu anakubutuka, anakuleta iyena nawa hadaha anakuleta niwishi mukachi. Kansi wumu weyala wejina daYutikusa nashakami hawindu. Pawulu nakuhosha, Yutikusa nalezumukili mutulu nawa naholoki kufuma hawindu mukapeka kahewulu!
2 Chineli Luka diyi ndotolu hadaha diyi wunatemuki swayi-swayi hanji nakumupima iwu kansi weyala. Yuma yinatami chikupu. Yutikusa “amunoneli nafwi dehi.” (Yilw. 20:9) Ilaña kunamwekani chihayamisha. Pawulu nadinatili hadi iwu kansi weyala nawa naleji izaza nindi lekenu kuleta ipumba: “Lekenu kuleta ipumba, muloña wamumi.” Pawulu namusañuli Yutikusa!—Yilw. 20:10.
3 Chuma chamwekeni chinakumwekesha ñovu yaspiritu yajila yaNzambi. Pawulu diyi wakojejeli wanyi nawu Yutikusa afwi. Hela chochu, wakeñeleña wanyi kufwa kwaniwu kansi weyala kuluwañeshi iyi mpinji yalema hela kuhukesha antu amakwawu kuspiritu. Pawulu chamusañwiliyi Yutikusa, wakundejeli chipompelu nawa wachinkeli iyena dakutwalekahu kushimwina. Chakadi nikujina, Pawulu walemesheli chikupu wumi wawantu amakwawu. Chatwanukishaña awa amazu akwila nawu: “Hinikweti muloña wamashi awantu ejimaku.” (Yilw. 20:26) Tutalenu yuma yeliliyi Pawulu chiyinateli kutukwasha ninetu.
“Watachikili Lwendu Lwindi Lwakuya kuMasidoniya” (Yilwilu 20:1, 2)
4. Yumanyi yatama yamweniyi Pawulu?
4 Neyi chitwahanjekahu mukapetulu kanafumiku, Pawulu wamweni yuma yakala chikupu. Mudimu wakushimwina wazatiliyi muEfwesesa wakojejeli ipumba. Chakadi nikujina, achiji awuru ashindameneni hakutuña ankishi Atemisi diwu akojejeli idi ipumba! HaYilwilu 20:1 twatañañahu netu, “Ipumba chidamanini, Pawulu watemesheli antu nindi atambiki atumbanji, nawa chelili nayikoleshi dehi nikuyishalisha, watachikili lwendu lwindi lwakuya kuMasidoniya.”
5, 6. (a) Pawulu washakamini mafuku añahi muMasidoniya, nawa yumanyi yayililiyi amanakwetu? (b) Chilwilwinyi chatwalekeliyi kumwekeshelayi Pawulu amanakwindi niahela?
5 Pawulu chayileñayi kuMasidoniya, wemeni kuchikumu chakaluñalwiji muTirowasi nawa washakaminiku hadi mpinji kwenakuna. Pawulu wakuhweleli nindi Titusa, atemesheliwu kuKorinda wukumuwana kwenakuna. (2 Kor. 2:12, 13) Hela chochu, chelukiliyi nindi Titusa wukwinza wanyi, Pawulu wayili kuMasidoniya, hadaha washakaminiku hadi chaaka chimu nikubadikahu “nakuyikolesha chikupu antu ashakamineña mwenomu.” a (Yilw. 20:2) Nkuminaku Titusa wamuwanini Pawulu muMasidoniya, nakumuletela nsañu yayiwahi kutalisha hadi aKorinda cheliliwu namukanda watachi wayitemesheleli Pawulu. (2 Kor. 7:5-7) Chumichi chakojejeli Pawulu kuyisonekela mukanda wamuchiyedi, wutweluka netu mukanda wa 2 AKorinda.
6 Chalema nankashi hakumona Luka nazatishi mazu akwila nawu “nayikoleshi” “[ni]nakuyikolesha chikupu” hampinji yalumbulwileñayi yuma chiyadiña helili Pawulu ayi nakuyikolesha amanakwetu muEfwesesa nimuMasidoniya. Awa amazu anakumwekesha chikupu chakeñeliyi Pawulu amanakwetu niahela! Kwambukaku nawaFwarisi, adiwileña akwawu, Pawulu wamweneña anyikoku neyi akwawu akuzata nawu. (Yow. 7:47-49; 1 Kor. 3:9) Pawulu watwalekelihu kuyilemesha hela chakwila wayifumbileña chikupu.—2 Kor. 2:4.
7. Akulumpi muchipompelu chawakaKristu anateli kwimbujola ñahi Pawulu?
7 Makonu, akulumpi muchipompelu niankoñi añinza amwimbujolaña chikupu Pawulu. Hela chakwila anakumufumba muntu, afwilaña chikupu kumukolesha muntu anakufumbawu. Ankoñi afwilaña chikupu kukolesha bayi kudiwula hela kuyinka nyiloñaku. Nkoñi wañinza wunashimbuli wahosheli nindi: “Amanakwetu niahela amavulu afwilaña chikupu kwila yuma yaloña, ilaña kakavulu atiyaña kutama, atiyaña woma, nikuditiya nawu adana ñovu yakudikwasha aweni.” Akulumpi atela kukolesha manakwawu niahela amuchidi awa.—Heb. 12:12, 13.
“Anamukasili Kafuta” (Yilwilu 20:3, 4)
8, 9. (a) Yumanyi yamukañesheli Pawulu kuzambukila kuSiriya? (b) Muloñadi aYudeya chamuheleliwu Pawulu?
8 Kufuma kuMasidoniya, Pawulu wayili kuKorinda. b Chashakaminiyi tukweji tusatu kweniku wafwilileña kuya kuKenikiri, Kwafwilileñayi kukandama mbopolu yayileña kuSiriya. Kwenakuna, wadi kuya kuYerusalema nakuhana yawaana yahaniniwu amanakwetu yakukwasha amanakwetu adiña mukukankila. c (Yilw. 24:17; Rom. 15:25, 26) Hela chochu, kudi yuma yahimpili mwafuukwiliyi Pawulu. Yilwilu 20:3 yahosha nawu: “AYudeya anamukasili kafuta”!
9 Tukuhayama wanyi hakutiya nawu aYudeya amuhembeleli nkunyi Pawulu, muloña amumweneña nawu himukakusekesha. Hanashimbuli wanyi, mudimu windi wakushimwina wamukwashili Kiripusi kubalumuka, muntu alemeshawu musinagogi yamuKorinda. (Yilw. 18:7, 8; 1 Kor. 1:14) Nawa mpinji yimu aYudeya amuKorinda, amutwikili Pawulu muloña nakumutwala kudi Galiyo, nguvulu waAkaya. Ilaña, Galiyo wakaanini nyiloña yamutwikiliwu nawa chumichi chakojejeli ayilumbu jaPawulu kuhila chikupu. (Yilw. 18:12-17) AYudeya muKorinda atela elukili hela atoñojokeli nawu Pawulu katataka azambuki nakuya kuKenikiri, dichi amubelameneni kwenakuna. Pawulu wukwila ñahi?
10. Komana Pawulu watiyili woma kuya kuKenikiri? Lumbululenu.
10 Hakwila yadikiñi yomweni nimali amwinkeliwu akukwasha nachu atuzweñi, Pawulu wafuukwilihu kubula kuya kuKesareya ilaña wafuntilili njila yahita muMasidoniya. Hela chochu, mukwenda hamaseki mwadiña wubanji wawuvulu. Kakavulu atupondu abalameneneña antu kunsa yanjila. Nimumaluña mwashikenaña akakwenda mwadiña chiwahi wanyi. Hela chochu, Pawulu watoñojokeleña nindi chachiwahi kuzatisha iyi njila kubadika kuya nakumona makabisha muKenikiri. Chasweja kubadika, hayileña nkawindiku. Pawulu wayileña nawamabwambu jindi awana halwendu lwindi lwawumishonali kushilahu niArisitaka, Gayusi, Sekundu, Timotewu, Tirofwimusa niTikikusa.—Yilw. 20:3, 4.
11. Yumanyi yelañawu akaKristu hakwila adikiñi awenawu makonu, nawa yumanyi yeliliyi Yesu Kristu yembujolañawu?
11 Kufwana Pawulu, akaKristu makonu niwena azatishaña njila yinateli kuyikwasha kudikiñilamu awenawu neyi anakushimwina. Mumaluña amakwawu, endaña mumazanvu hela ayedi-ayedi chatela endeña nkawawu. Indi neyi anakuyikabisha elañadi? AkaKristu eluka nawu akayikabisha. (Yow. 15:20; 2 Tim. 3:12) Hela chochu, hiyadishaña aweni mukukalaku. Tuhoshenu hadi Yesu. Mpinji yimu, helili akakudimbulula muYerusalema atachiki kunona malola nawu amwasi, “Yesu waswamini nawa wafuminimu mutembeli.” (Yow. 8:59) Chimwahitili mpinji, helili aYudeya akasi kafuta kakumujaha, “Yesu walekeli kwenda cheñi hatooka mudi aYudeya, ilaña wafumini kwenoku nakuya kwiluña dadiña kwakwihi nesaña.” (Yow. 11:54) Yesu welileñahu chuma kulonda adikiñi yomweni chakala hohu ochu chuma chinakuditadika wanyi nankeñelu yaNzambi. AkaKristu niwena makonu elaña chuma chochimu.—Mat. 10:16.
“Ayikundejeli Chikupu” (Yilwilu 20:5-12)
12, 13. (a) Antu muchipompelu atiyili ñahi chelili Pawulu amusañuli Yutikusa? (b) Kuchiñejanyi kwekala muBayibolu kwakundejaña antu afwisha antaña jawu?
12 Pawulu niamabwambu jindi atela ahitilili muMasidoniya hamu ilaña chinamwekani neyi ambukili. Ilaña, adibulakeneni cheñi kuTirowasi. d Mukanda waYilwilu wahosha nawu: “Chimwahitili mafuku atanu twashikili kwadiñawu muTirowasi.” e (Yilw. 20:6) Kweniku dikwamusañwililiwu kansi weyala Yutikusa, itwashimunahu kumatachikilu akanu kapetulu. Toñojokenu chatiyiliwu amanakwetu hakumona ibwambu dawu akeñawu Yutikusa anamusañuli! Mukanda waYilwilu wahosha nawu, “ayikundejeli chikupu.”—Yilw. 20:12.
13 Hela chochu, yihayamisha yamuchidiwu hiyamwekanaña makonuku. Ilaña, antu ajimbesha antaña jawu mukufwa “ayikundejaña chikupu” nakuchiñeja kwekala muBayibolu kwakusañuka. (Yow. 5:28, 29) Toñojokenu hachumichi: Chineli Yutikusa wadiña wawanina wanyi, wafwili cheñi. (Rom. 6:23) Ilaña antu akasañulawu mwituña dadiha daNzambi akashakamaña haya nyaaka! Kubombelahu antu asañulañawu kuya nakuyuula naYesu mwiwulu, avwalaña nyijimba yakafwaña. (1 Kor. 15:51-53) AkaKristu makonu, awayishewa hela “hiyanyikoku acheñi” ‘akundejewaña chikupu.’—Yow. 10:16.
Yilwilu 20:13-24)
“Hamesu Awantu Nikwitala Niitalaku” (14. Pawulu wayilejeli nindidi akulumpi amuEfwesesa adibulakeniyi nawu muMiletusa?
14 Pawulu niamabwambu jindi afumini kuTirowasi nakuya kuAsosa, kuhiñahu ayili kuMetileni, Chiyosi, Samosi, nikuMiletusa. Pawulu wafwilileña kushika swayi kuYerusalema muloña wafwilileña kushika nampinji henohu Chawija chaPentekosita kanda. Chafwilileñayi kushika kuchawija chaPentekosita chinatukwashi kwiluka chakojejeli akandameña watu wabulili kwimana muEfwesesa hafuntileñayi. Hela chochu chineli Pawulu wakeñeleña kuhanjeka nawakulumpi adiña muEfwesesa, wayilejeli nindi adibulakeni kuMiletusa. (Yilw. 20:13-17) Chashikiliwu, Pawulu wayilejeli nindi: “Enu mweluka chiwahi chinashakamini nanenu kutachika hefuku datachi dinadatili mukabeta kaAsiya, nakumuzatila Mwanta nakudizoza chikupu, namadilu nikweseka kunamweni hamuloña watufuta twawaYudeya, nawa hinalekeli kuyileja enu yuma yejima yayiwahi hela kuyitañisha hamesu awantu nikwitala niitalaku. Ilaña nayishimwinini chikupu aYudeya niaGiriki wunsahu nami abalumuki munyichima nakubalumukila kudi Nzambi nikumukuhwelela Mwanta wetu Yesu.”—Yilw. 20:18-21.
15. Kuwahanyi kwekala mukushimwina kwitala nikwitala?
15 Kudi njila jajivulu jitunateli kuzatisha hakwila tuyishimwini antu nsañu yayiwahi makonu. Kufwana Pawulu twazataña nañovu kulonda tuyi kwejima kudi antu, kwemeneña nyotoka, munyikwakwa, nikumamaketi. Ilaña, kushimwina kwitala nikwitala diyi njila yayeni yazatishañawu aYinsahu jaYehova. Muloñadi? Chatachi, kushimwina kwitala nikwikala kwakwashaña antu kutiya nsañu yaWanta mpinji yejima, nakumwekesha nawu Nzambi hakweti chaambuku. Nawa kwakwashaña antu akweti nyichima yashinshika kuyikwasha kwesekeja nakukala kukwetiwu. Kubombelahu, mudimu wakushimwina kwitala nikwitala wakwashaña antu anakuwuzata kwikala nachikuhwelelu nikuumika. Mwamweni, chinjikijilu chayilukilañaku akaKristu alala hiiyena dikwetiwu dakushimwina “hamesu awantu nikwitala niitala.”
16, 17. Pawulu wamwekesheli ñahi nindi hadiña nawomaku, nawa akaKristu makonu amwimbujolaña ñahi?
16 Pawulu wayilumbulwili akulumpi amuEfwesesa nindi welukili wanyi wubanji wadi kumonayi hakufunta kuYerusalema. Wayilejeli nindi: “Hela chochu, hinamonaña wumi wami nami walemaku, chuma chinalemesha nankashi hikumanisha yuma yinatela kwila nimudimu wanyinkeliwu kudi Mwanta Yesu, wakushimwina chikupu wunsahu wansañu yayiwahi yaluwi lwaNzambi lwasweja.” (Yilw. 20:24) Pawulu wakaanini chuma chidi chejima, kukata kumujimba hela ikañesha dasweja kumukañesha kumanisha mudimu windi.
17 AkaKristu makonu niwena omikaña kukala kwamboka-mboka. Amakwawu ayilekeshaña kudi nfulumendi nikuyikabisha. Amakwawu niwena anakuumika nayikatu yasweja kumujimba nimuyitoñojoka. AkaKristu atwansi niwena ayikanjikijaña kwila yuma yatama kudi akwawu kushikola. Mukukala kwejima kwamonañawu aYinsahu jaYehova ekalaña ahamuka, neyi cheliliyi Pawulu. Afwilaña “kushimwina chikupu wunsahu wansañu yayiwahi.”
“Dihembenuña Enu Aweni niMukanka Wanyikoku Wejima” (Yilwilu 20:25-38)
18. Yumanyi yeliliyi Pawulu hakwila yabuli kwikala namuloña wamashi, nawa akulumpi muEfwesesa adi kwila ñahi chuma chochimu?
18 Kuhiñahu Pawulu wayifumbili akulumpi amuEfwesesa chakadi kuhiyihita mumbadi, kuzatisha chakutalilahu chindi yomweni. Chatachi wayilejeli nindi hadaha aka dikadiña kakukumishaku kudimonahu nayena. Kuhiñahu wayilejeli nindi: “Hinikweti muloña wamashi awantu ejimaku, muloña hinnaleki kuyileja enu nkeñelu yejima yaNzambiku.” Akulumpi amuEfwesesa adi kumwimbujola ñahi Pawulu kulonda abuli kwikala namuloña wamashi? Wayilejeli nindi: “Dihembenuña enu aweni nimukanka wanyikoku wejima iyayitondelelihu kudi spiritu yajila kwikala akulumpi, kulonda mubiñeña chipompelu chaNzambi, chalandiliyi namashi aMwanindi.” (Yilw. 20:26-28) Pawulu wayisoñamishili nindi “atuñwidi azuwa” akenza nakudibomba namukanka wawanyikoku nawa “akatachika kuhosha yuma yakutwamba kulonda adikokeli atumbanji.” Akulumpi akwila ñahi? Pawulu wayisoñamishili nindi: “Tonenuña, nawa ilukenu nenu hadi yaaka yisatu, hinalekeli kuyikonkomwena hamuntu-hamuntu mwaana niwufuku namadiluku.”—Yilw. 20:29-31.
19. Wunfwikijinyi wadiñaku muyaaka nkulakaji yakusambila, nawa wakojejeli yumanyi muyaaka yalondelelihu?
19 “Atuñwidi azuwa” enjili helili kunashali apostolu atensha. Mu 98 C.E., kapostolu Yowanu wasonekeli nindi: “Hayinu mpinji akakumudimbulula Kristu anamwekani dehi . . . Afumini mudi etu, muloña adiña etu wanyi; muloña neyi adiña etu, mutenowu adi kutwalekahu kushakama nanetu.” (1 Yow. 2:18, 19) Chimwahitili yaaka kwakwihi na 200, kufuma hafwililiyi Yesu, akulumpi jawakakusekesha atuñili izanvu dadimena dadimweneña nawu dabadika ejima muchipompelu, nawa chimwahitili yaaka kwakwihi na 300 kufuma hafwililiyi Yesu, Nyuuli wawaRoma Constantine wetejeli idi izanvu danawa “akaKristu” akutwamba. Chineli akoñeleña yuma yatama iku anakuyitena nawu “akaKristu,” awa akulumpi jakwitiya mwamweni “ahosheleña yuma yakutwamba.” Wunfwikiji wamuchidiwu wuchidi kumwekana muyuma yatañishañawu niyelañawu akaKristendomu.
20, 21. Pawulu wamwekesheli ñahi nindi wadiña wadihana, nawa akulumpi muchipompelu chawakaKristu anateli ñahi kumwimbujola?
20 Chihandilu chaPawulu chambukiliku chikupu nanawa antu enjili nakutachika kudila antu amuchipompelu mabula hanyitu. Wazatileña kulonda adikwasheña yomweni kuchina wamba kekala chiteli muchipompelu. Chazatileñayi nañovu kulonda akwashi akwawu akakwitiya, kwosi niyuma yimu yadilileñamu. Pawulu wakonkomweneneña akulumpi amuEfwesesa nindi ekaleña namuchima wakudihana. Wayilejeli nindi: “Mwatela kukwasha antu azeya nawa mwatela kwanuka mazu aMwanta Yesu, ahosheliyi yomweni nindi: ‘Mukuhana mwekala muzañalu chikupu kubadika wekala mukutambwila.’”—Yilw. 20:35.
21 Kufwana Pawulu, akulumpi akaKristu makonu ekala namuchima wakudihana. Kwambukaku nawakulumpi amumachechi aditenaña nawu hiyakaKristu, adilaña nyikoku yawu hanyitu, antu enkawu mudimu “wakubiña chipompelu chaNzambi” azataña nyidimu yawu chakadi kuyifweta. Muchipompelu chawakaKristu mwekala wanyi kudivwimba nikufwila yuma, muloña antu ‘adikeñelaña aweni kulema’ “mukuhita kwampinji akadimbuka. (Yish. 25:27) Mukudinka wanta mwafumaña kusawuka.—Yish. 11:2.
“Wejima wawu adilili nankashi.”—Yilwilu 20:37
22. Yumanyi yaletesheli Pawulu amukeñi kudi akulumpi amuEfwesesa?
22 Amanakwetu amukeñeli chikupu Pawulu muloña wayikeñeli chakufuma hamuchima. Mwamweni, mpinji yakudambula chiyashikili “adilili nankashi nawa amukumbatili Pawulu nakumufufwa.” (Yilw. 20:37, 38) Amanakwetu niahela asakililaña nikukeña chikupu antu adi neyi Pawulu, adihanaña kukalakela nyikoku chakadi kuyifweta. Hanyima yakuhanjeka hayuma yeliliyi Pawulu, komana mukwiteja wanyi nenu Pawulu waditiyileña hela kulebumuna chahosheliyi nindi: “Hinikweti muloña wamashi awantu ejimaku”?—Yilw. 20:26.
a Talenu chikasha chinakwila nawu “ Nyikanda yaPawulu Kufuma kuMasidoniya.”
b Chinamwekani neyi hanilu lwendu lwayiliyi kuKorinda Pawulu dihu hasonekeliyi mukanda kudi aRoma.
c Talenu chikasha chinakwila nawu “ Pawulu Natwali Yawana Yakukwasha Adi Mukukankila,” hefu 169.
d Luka naditenimu haYilwilu 20:5, 6 chinakumwekesha nawu wadiwanini cheñi naPawulu muFwilipi hanyima yakumushiya kwenakuna mafuku akunyima.—Yilwilu 16:10-17, 40.
e Lwendu lwakwenda kufuma kuFwilipi nakuya kuTirowasi lwasendeleña mafuku 5. Kwatela kwadina mpepela yeneni chikupu, muloña lwendu lolumu kunyima endelihu mafuku ayedi.—Yilw. 16:11.