KAPETULU 20
“Kutaanda niKwimika mushindu’ Hela Chakwila Kwadiña Ikañesha
Yuma yineliwu aApolosi naPawulu kulonda nsañu yayiwahi yitwalekihu
Kushindamena haYilwilu 18:23–19:41
1, 2. (a) Kukalanyi kunamoniyi Pawulu niamabwambu jindi? (b) Yumanyi yitukuhanjekahu mukanu kapetulu?
MUNYIKWAKWA yamu-Efwesesa mudi ipumba chikupu, amakwawu anakubideka, kudila nikutemoka. Anatuñi izanvu dawantu anahili, nawa anakukeña kuleta chikupu ipumba! Amabwambu jaPawulu ayedi anakwendayi nawu anayikwati nawa anayitadañeshi. Munyikwakwa yamaneni yatandumuka, mwalandishilañawu antu mudi antu amavulu anadibombi nezanvu dawantu anahili, nawa wejima wawu anayi mwibulu damusumba mudi antu amavulu anateli kushika ku 25,000. Antu amavulu aneluki wanyi chinakojeji kwikali idi ipumba ilaña anatoñojoki nawu kudi chuma chinakukeña kwilawu natembeli yawu ninzambi yawu wamumbanda akeñeshawu Atemisi. Dichi anatachiki kubidika nañovu nawu: “Muneni yowu Atemisi wawaEfwesesa!”—Yilw. 19:34.
2 Cheñi, tunamoni Satana chinesekiyi kuzatisha izanvu dawantu anazuwi kulonda alekeshi mudimu wakutaandisha nsañu yaWanta waNzambi. Ilaña, tuneluki netu Satana hazatishaña hohu aka kafutaku. Mukanu kapetulu, tukuhanjeka tufuta twazatishiliyi Satana kulonda aluwañeshi mudimu nikunuñañana kwadiña hakachi kawakaKristu akusambila. Chasweja kulema, tukudiza netu itu tufuta twindi twazatikili wanyi, muloña “Izu daYehova datwalekelihu kutaanda nawa demikileña mushindu chikupu.” (Yilw. 19:20) Indi ana akaKristu emikili ñahi mushindu? Chuma chatukwashaña kwimika mushindu dichayikwashili niwena. Hela chochu, Yehova diyi mukakushinda, bayi etuku. Ilaña twatela kwilahu chuma, neyi cheliliwu akaKristu akusambila. Nawukwashu waspiritu yaYehova, tunateli kwikala nayilwilu yinateli kutukwasha kushimwina chachiwahi. Tusambilenu kuhanjeka hadi Apolosi.
“Welukili Chikupu Nsona” (Yilwilu 18:24-28)
3, 4. Chumanyi chamweniwu aAkwila naPrisila mudi Apolosi nawa amukwashili ñahi?
3 Hampinji yayileñayi Pawulu kuEfwesesa halwendu lwindi lwamuchisatu lwawumishonali, kaYudeya wejina daApolosi washikili mumusumba. Wafumini kumusumba waya mpuhu waAlesanderiya, muEjipitu. Apolosi wadiña nayilwilu yayiwahi chikupu. Welukili chakuhosha. Kubombela hakwiluka chakuhosha chiwahi, “welukili chikupu Nsona.” Kubombelahu, “spiritu yajila yamukwashili kwikala neyena chikupu.” Apolosi wadiña neyena chikupu, nawa wahosheleña nakuhamuka kudi aYudeya mumasinagogi.—Yilw. 18:24, 25.
4 Akwila naPrisila atiyili Apolosi chahosheleñayi. Chakadi nikujina, azañaleli hakutiya “nakutañisha yuma yahosha hadi Yesu,” munjila yoloka. Yuma yahosheliyi hadi Yesu yadiña yalala. Hela chochu, hashimbwili wanyi awa akaKristu amweni chuma chalema chabuliliyi kwilukayi Apolosi. “Welukili hohu nsañu yachipapatishu chaYowanu.” Awa adisumbula adizoza, nawa akakuchima matenti, atiyili woma wanyi nawu muloña Apolosi weluka kuhosha nawa wataña chikupu. Ilaña “amutwalili hambadi nakumulumbulwila chiwahi mwaya njila yaNzambi.” (Yilw. 18:25, 26) Iwu iyala weluka akuhosha nawa wadiza welili ñahi chamukwashiliwu? Wamwekesheli chilwilu chasweja kulema chatela kwikala nawakaKristu ejima kudizoza.
5, 6. Chumanyi chamukwashili Apolosi kulonda amuzatishi kudi Yehova nawa yumanyi yitukudizila kudi Apolosi?
5 Chineli Apolosi wetejeli wukwashu waAkwila naPrisila, wekalili kambuña aYehova washikahu. Wayili kuAkaya, kwenoku “wayikwashili chikupu” akakwitiya. Mudimu windi wakushimwina wakwashili cheñi aYudeya ashakamineña munidi iluña ahosheleña nawu Yesu hadiña Mesiya akaniniwuku. Luka nalumbululi nindi: “Wayikonkolweli aYudeya chakadi kuyihita mumbadi nindi ntañishilu yawu yakutwamba, dichi wayilejeleña naNsona nindi Yesu diyi Kristu.” (Yilw. 18:27, 28) Apolosi wekalili chitwa muchipompelu chawakaKristu! Munjila yikwawu tukuhosha netu diyi wakwashili “izu daYehova” kutwalekahu nakutaanda. Yumanyi yitunateli kudizila kuchuma cheliliyi Apolosi?
6 Kudizoza hichilwilu chalema chikupu kudi akaKristu ejima. Ejima wetu tukweti yawaana yashiyashana chila twavwalikili nayu, tunekali nayu mukuhita kwampinji, indi kwiji atudizishiliyu chakutudizisha. Hela chochu, twatela kwikala adizoza kubadika waana wutukweti. Neyi nehi, chawaana chetu chinateli kuleta kukala. Tunateli kwikala iseki dawushi munateli kukulila chilwilu chatama chakudivwimba. (1 Kor. 4:7; Yak. 4:6) Neyi mwamweni twadizoza tukuzataña nañovu kulonda tumoneña akwetu netu atubadika. (Fwili. 2:3) Tukukaana wanyi kufumba hela kutudizisha kudi akwetu. Tukukakela wanyi kuyitoñojoka yetu yayaaka neyi twiluka netu iyi yuma yinakwendela wanyi hamu nachinakutulombolawu kudi spiritu yajila. Neyi tutwalekahu kwikala adizoza, Yehova nimwanindi akutwalekahu kutuzatisha.—Luka 1:51, 52.
7. Tunateli kwimbujola ñahi kudizoza kwaPawulu niApolosi?
7 Kudizoza kukutukwasha kubula kudihela nawakwetu. Munateli kufwikija Satana chafwilileñayi kuleta chaambu hakachi kanana akaKristu akusambila? Watela wadi kutiya kuwaha chikupu hakumona awa amayala akweti yilwilu yayiwahi Apolosi nakapostolu Pawulu atachiki kudimona nawu wabadika mukwawu hinyi hadaha wumu atoñojokeña nindi walema chikupu muchipompelu! Chadi kwikala chalema kudi wena kwila muniyi njila. MuKorinda, akaKristu amakwawu atachikili kuhosha nawu, “Ami nidi waPawulu,” amakwawu niwena nawu, “Ami nidi waApolosi.” Komana aPawulu naApolosi etejeli iyi nhoshelu? Inehi! Mukudizoza Pawulu wamweni nindi Apolosi wazatileña chikupu mudimu nawa wamwinkelelihu nyidimu yikwawu. Nawa Apolosi niyena walondeleli mwamulejeliwu kudi Pawulu. (1 Kor. 1:10-12; 3:6, 9; Tit. 3:12, 13) Twatela kwikala adizoza nikuzatila hamu neyi wena!
“Kuyishinjila haNsañu yaWanta waNzambi” (Yilwilu 18:23; 19:1-10)
8. Njilanyi yazatishiliyi Pawulu hakufunta kuEfwesesa, nawa muloñadi?
8 Pawulu wayishikili nindi wakafunta kuEfwesesa nawa dimweliliyi. a (Yilw. 18:20, 21) Hela chochu, talenu chafuntiliyi. Twamumona kakukumishaku muAntiyoki, yamuSiriya. Hakwila ashiki kuEfwesesa, watela kuzatisha njila yamuketu yaya kuSelusiya, akandama mbopolu, nakuzambukila kunakuyayi. Ilaña nahitili, “mumaluña adiña kwakulehi.” Kwesekeja hohu, lwendu lwaPawulu lwashimunawu haYilwilu 18:23 ni 19:1 lwatela lwadiña lwamakilomita 1600! Muloñadi Pawulu chendeleliyi lwendu lwalulehi nawa lwakala? Muloña wafwilileña, “kukolesha atumbanji ejima.” (Yilw. 18:23) Lwendu lwindi lwawumishonali lwamuchisatu, kufwana ana malwendu indi ayedi afuminiku, nilwena lwadiña lwakala, ilaña wamweni nindi lwalema. Ankoñi añinza niañodi jawu niwena elaña mwomumu. Komana twasakililaña wanyi chadihanañawu?
9. Muloñadi izanvu dawantumbanji chiyatela kudipapatishilawu cheñi nawa yumanyi yitukudizila kuchuma cheliliwu?
9 Chashikiliyi muEfwesesa Pawulu wawanini atumbanji 12 aYowanu Mpapatishi. Ayipapatishili nantanjikilu yaYowanu yadiña yaleka dehi kuzatika. Kubombelahu, chinamwekani neyi elukili yuma yantesha indi kwiji kwosi yuma yelukiliwu haspiritu yajila. Pawulu wayikwashili nawa kufwana Apolosi adizozeli nawa afwilileña kudiza. Hanyima yakuyipapatisha mwijina daYesu, atambwilili spiritu yajila niyawaana muchiyahamisha. Mwamweni, mwafumaña yuma yayiwahi chikupu neyi twendelaña hamu nakuloñesha kwaYehova kunayilaku hambidi.—Yilw. 19:1-7.
10. Muloñadi Pawulu chafumininiyi musinagogi nakuya mukapeka keneni kahashikola, nawa yumanyi yitwatela kudizilaku mumudimu wakushimwina?
10 Kudi chuma chikwawu chamwekeni. Pawulu washimwinini chakadi woma musinagogi hadi tukweji tusatu. Hela chakwila “wahanjekileña nawantu nakuyishinjila hansañu yaWanta waNzambi,” amakwawu akolesheli nyichima yawu nawa ekalili akakudimbulula. Chatela anati mpinji nakuhosha nawantu ahosheleña “nakusawula Njila” hamesu awantu, Pawulu washiliku ntanjikilu yakuhosha nawantu mukapeka keneni kahashikola. (Yilw. 19:8, 9) Antu akañeleña kupaminaku kuspiritu ateleli kufuma musinagogi nakuya hashikola. Kufwana Pawulu, ninetu tunateli kuleka kuhanjeka nawantu amakwawu neyi tumona netu eni matala anakukeña wanyi kutiyilila hela anakukeña nawu tutadekeña. Kudi antu amavulu adi neyi nyikoku anakukeña kutiya nsañu yinateli kuyikolesha!
11, 12. (a) Tunateli kumwimbujola ñahi Pawulu chazatileñayi nañovu nikuhimpa? (b) AYinsahu jaYehova azataña ñahi nañovu nikuhimpa neyi anakushimwina kudi antu amavulu?
11 Watela watañishileña haniyi shikola ifuku dejima kutachika nampinji ya 11:00 kushika na 16:00 (Talenu nsañu yakudiza yidi haYilwilu 19:9, nwtsty.) Iyi yatela yadiña mpinji yayiwahi nawa yawunda ilaña dimaora hikwatatileña nankashi helileña antu anenzi kuchayili nakunooka. Neyi Pawulu walondeleleña iyi mpinji hadi yaaka yiyedi dikwila nawu wazatili maora akubadika ha 3,000 nakutañisha. b Tunawani muloña wamuchiyedi wakojejeli izu daYehova kutwalekahu kutaanda. Pawulu wazatileña nañovu nawa wahimpileña. Wahimpileña mpinji kulonda ashimwineña antu amunidi iluña. Chumanyi chafuminimu? “AYudeya niaGiriki ejima ashakamineña mukabeta kaAsiya, atiyili izu daMwanta.” (Yilw. 19:10) Washimwinini chikupu wunsahu!
Twafwilaña chikupu kuwana antu kumaluña kwejima kudiwu
12 AYinsahu jaYehova makonu niwena azataña nañovu nikuhimpa kulonda awani antu kumaluña kwejima kwadiwu. Twashimwinaña munyikwakwa, kumamaketi, nikwemikilañawu nyotoka. Twayitemeshelaña mafoni hela kuyisonekela nyikanda. Nawa neyi tunakuzata mudimu wakwitala nikwitala twafwilaña chikupu kuya mpinji yitunateli kuyiwana hamatala.
Kutwalekahu “Kutaanda niKwimika Mushindu” Hela Chakwila Kudi Aspiritu Atama (Yilwilu 19:11-22)
13, 14. (a) Yehova wamwinkeli Pawulu wuswa wakwila chumanyi? (b) Anyana kaSeva akoñeli chiluwanyi, nawa antu amavulu amunsakililu yakutwamba makonu akoñaña ñahi chiluwa chochimu?
13 Luka natuleji nindi yadiña himpinji yayiwahi chikupu, Yehova wamukwashili Pawulu kukoña “nyidimu yañovu chikupu.” Yakuvwala niyitambala yavwalilliyi Pawulu ayitwalileña kudi antu akata, nawa akoleleña. Niaspiritu atama ayifumishileña kuzatisha iyi njila yoyimu. c (Yilw. 19:11, 12) Antu amavulu ahayamini hakumona niandemoni anakuyifumisha, ilaña bayi neyi ejima azañaleliku.
14 AYudeya “amakwawu ahitañeneñamu nakufumisha andemoni” niwena elileña neyi chelileñayi Pawulu hakufumisha andemoni. Amakwawu hakachi kanawa aYudeya esekeli kuzatisha ijina daYesu nidaPawulu hakufumisha ndemoni. Luka nashimuni anyana kaSeva 7 awamayala adiña amuchisaka chawatupristu akeñeleña kwila mwenimu. Ndemoni wayihosheleli nindi: “Ami Yesu namwiluka, Pawulu niyena namwiluka, hanu dinu enu, yenu anyi?” Dichi iwu iyala wadiña nandemoni wayimotokeleli nakuyitabola neyi kanyama wazuwa wamwisaña, wayikatishili chakwila atemukili nzekesi. (Yilw. 19:13-16) “Izu daYehova demikili mushindu,” muniyi njila chamwekeni hatooka kudi ejima nawu Nzambi wamwinkeli Pawulu ñovu bayi ana amayala adiña munsakililu yakutwambaku. Makonu antu amavulu atoñojokaña nawu neyi atena ijina daYesu hela aditena nawu “hiyakaKristu” dikwila nawu anakumuzañalesha Nzambi. Hela chochu, Yesu wamwekesheli nindi, antu hohu elaña nkeñelu yaTata yindi diwu akweti kuchiñeja kwalala kwakumbidi.—Mat. 7:21-23.
15. Neyi mwapeshaña hela mudi nayuma yinakundami kukupesha, munateli kwimbujola ñahi aEfwesesa?
15 Chayisawishiliwu anyana kaSeva chakojejeli antu kutachika kumutiya Nzambi walala woma, nawa chumichi chakojejeli antu amavulu kwitiya nawa alekeli tushidikilu twawu twakupesha. Aefwesesa akoñeleña chikupu yuma nawukwashu wawandemoni. Mwadiña nyikayi nawa antu avwalileña makayi nawa tumina nimazu ahosheleñawu akakupanda ayisonekeleña. Aefwesesa amavulu abalumukili chikupu chakwila apompesheli nyikanda yawu yakupanda nakuyochela hamesu awantu ejima hela chakwila iyi nyikanda yadi kufwa madola amavulu chikupu makonu. d Luka washimwini nindi: “Izu daYehova datwalekelihu kutaanda nawa demikileña mushindu chikupu.” (Yilw. 19:17-20) Chalala chemikili mushindu chikupu makudi ninyidimu yawandemoni! Twatela kwimbujola yuma yeliliwu ana antu ashinshika. Tunakushakama mukaayi munenzali chikupu kupesha. Neyi tunakwilahu yuma hela tukwetihu yuma yinakundami kukupesha, twatela kwila neyi chelili aefwesesa! Kujileka yoyenoyu mpinji, twatela kuzata nañovu kulonda tuleki yilwilu yamuchidiwu hela chinakali ñahi.
“Kwavulumukili Ipumba Dadeni” (Yilwilu 19:23-41)
“Enu amabwambu jami, mweluka chikupu nenu muniwu mudimu dimutunakuhetela.”—Yilwilu 19:25
16, 17. (a) Lumbululenu Demeterusa chakojejeliyi antu kutachika kuleta ipumba muEfwesesa. (b) AEfwesesa amwekesheli ñahi nawu akeñeleña wanyi kutiya nsañu jakwitiya?
16 Ichi tuhanjekenu hakafuta kamu kaSatana kalumbulwililiyi Luka hasonekeliyi nindi “kwavulumukili ipumba dadeni kutalisha haNjila.” Wadiña nakulebumuna wanyi. e (Yilw. 19:23) Muchiji wasiliva, wejina daDemeterusa diyi watachikili iku kukala. Walejeli akwawu achiji nindi maheta awu afumineña mukulandisha ankishi. Watwalekelihu kuyileja nindi nsañu yashimwineñayi Pawulu yamanishileña buzinisi yawu, muloña akaKristu hiyadifukwileña kudi ankishiku. Nkumininaku welukili nindi antu alejeleñayi akeña musumba nimuza wawu, dichi wayisoñamishili nidi neyi amutiyilila Pawulu chikumwekana neyi Nzambi yawu wamumbanda Atemisi nitembeli yawu “yamukunkulwayi.”—Yilw. 19:24-27.
17 Demeterusa washinjilili antu kulonda akaani nsañu yaPawulu. Achiji asiliva atachikili kubidika nawu “Muneni yowu Atemisi wawaEfwesesa!” nawa antu atachikili kuleta ipumba, dichaletesheli antu hiyakutachika kuleta ipumba neyi chitwashimunahu kumatachikilu akanu kapetulu. f Pawulu iyala wadihana chikupu wakeñeleña nindi ayi munidi ibulu kulonda adileji idi izaza, ilaña atumbanji amukanishili nawu bayi adiñija muwubanjiku. Iyala wumu wejina daAlesanderi wemeni mukachi kezaza nindi ahoshi. Chineli wadiña kaYudeya, hadaha wafwilileña kulumbulula chaambu chadiña hadi aYudeya nanawa akaKristu. Ilaña neyi walumbulwili mwenimu idi izaza dadi kutiya wanyi. Chelukiliwu nawu hikaYudeya, amukaanishili kuhosha nawa atwalekelihu kubidika nawu “Muneni yowu Atemisi wawaEfwesesa!” hadi maora ayedi. Nimakonu kudi antu amavulu abulaña kukeña kwiluka kwitiya kwalala. Dichi chumichi chayileteshaña antu kubula kutoñojoka chiwahi.—Yilw. 19:28-34.
18, 19. (a) Nsoneki wumu wawundishili ñahi izaza dazuwili muEfwesesa? (b) Antu jaYehova mpinji yikwawu ayikiñaña ñahi kudi akawuswa, nawa yumanyi yitwatela kwila kulonda atukiñeña?
18 Nkumininaku, mukakusoneka wamwenesheli idi izaza. Iwu iyala wahosheli chiwahi, iwu chilolu wadilejeli idi izaza nindi, tembeli yawu niNzambi yawu wamumbanda hiyadiña muwumbanji kudi awa akaKristuku, nawa nindi Pawulu niamabwambu nindi anakoñihu muloña wudi wejima kutalisha kutembeli yaAtemisiku, nawa wayilejeli nindi kudi njila yayiwahi yakumanishilamu kukala. Hadaha wayilejeli nindi, idi izanvu akudilukuka kudi aRoma nanochu chanadipompeshiwu wejima wawu chakadi kulondela nshimbi. Chahosheliyi muniyi njila, izaza dapalañeni. Muloña wamazu aniwu chilolu, antu ejima azuwili awundili.—Yilw. 19:35-41.
19 Iyi bayi neyi diyadiña mpinji yatachi helili mukawuswa enzi nakukiña atumbanji twaYesuku nawa iyi hidiyi mpinji yadiña yakukumishakuku. Kafwampi, kapostolu Yowanu wamweneneñahu dehi chadimu muchimwenu nindi antu alema amukanu kaayi esekejawu neseki, akaminya kaloña kamakabisha aSatana aletañayi hadi antu amulondelaña Yesu. (Chim. 12:15, 16) Nawa chumichi dichamwekanaña. Kakavulu, asompeshi akiñaña wuswa wawaYinsahu jaYehova wakupompa hamu nakudifukula nikushimwina nsañu yayiwahi kudi antu. Hela chochu, yilwilu yetu yayiwahi diyatukwashaña kwimika mushindu munsañu jamuchidiwu. Chakadi nikujina yilwilu yayiwahi yaPawulu yamukwashili kudiluka nawayilolu amunfulumendi muEfwesesa, dichi akeñeleña kumukiña. (Yilw. 19:31) Dichi twatela kumwekeshaña yilwilu yayiwahi yakalemesha yinateli kukokola antu ejima itwahoshaña nawu. Tuneluki wanyi yuma yayiwahi yinateli kufumamu.
20. (a) Mwatiyaña ñahi chimwatoñojoka hezu daYehova chidatwalekelihu kutaanda muyaaka nkulakaji yakusambila nimakonu? (b) Yumanyi yimunakufwila kwila hampinji yinakushindayi Yehova makonu?
20 Komana chatuzañaleshaña wanyi neyi tutoñojoka netu “Izu daYehova datwalekelihu kutaanda nawa demikileña mushindu chikupu,” muyaaka nkulakaji yakusambila? Twatiyaña muzañalu yowumu hakumona Yehova chinakutukwashayi kutwalekahu kwimika mushindu. Komana kwila mudihana kulonda muzatiku mbadi muniku kushinda nehi? Dichi dizilenu kuyatalilahu yitunahanjekihu. Ikalenu adizoza, endelenuña hamu nakuloñesha kwaYehova kunakuyilaku hambidi, twalekenuhu kuzata nañovu, kaanenu kupesha, nawa zatenu nañovu kulonda muhaneña wunsahu wawuhi kuhitila mukwikala nayilwilu yayiwahi, ashinshika nawa akalemesha.
a Talenu chikasha chinakwila nawu “ Efwesesa—Musumba Weneni muAsia,” chidi hefu 161.
b Pawulu wasonekeli cheñi mukanda 1 Akorinda hadiñayi muEfwesesa.
c Mahina avwaliliyi Pawulu atela adiña ditwayi dakasililiyi kumutu kuchina masulwila akenda kamwiñila mumesu. Izu dabalumunawu nawu yitambala haniyi vasi muchiGiriki datalishaku yakuvwala yavwalañawu mumbunda chinakumwekesha nawu haniyi mpinji wazatileña nañovu mumudimu wakuchima matenti hampinji yabulileñayi kushimwina, hadaha nampinji yantetemena.—Yilw. 20:34, 35.
d Luka nashimuni nindi yadi kufwa yikunku yamali asiliva 50,000. Neyi wateneneña denari, dikwila nawu mukakuzata wateleli kuzata mafuku 50,000 dikwila nawu yaaka 137 hakwila ekali namali amuchidawa neyi nakuzata mafuku 7 mumulungu.
e Antu amavulu ahoshaña nawu Pawulu wateneneña iyi nsañu hayilejeleñayi akaKorinda nindi “twelukili wanyi neyi tukuhanda hela nehi.” (2 Kor. 1:8) Hela chochu, hadaha wateneneña kukala kukwawu kwasweja. Pawulu chasonekeliyi nindi “nazuñi nawanyama azuwa amwisaña kuEfwesesa” hadaha wateneneña anyama adiña mwibulu hela antu amukañesheleña. (1 Kor. 15:32) Hadaha wateneneña anyama aweni hela akufwikija.
f Mazanvu amuchidi awa, chidi neyi anana achiji ekala nañovu chikupu. Chakutalilahu, chimwahitili yaaka kwakwihi na 100, izanvu dawakakocha mankendi daleteli ipumba dodimu muEfwesesa.
