KAPETULU 22
“Lekenu Nkeñelu yaYehova Yizatiki”
Chineli Pawulu nakufwila kwila nkeñelu yaNzambi, nayi kuYerusalema
Kushindamena haYilwilu 21:1-17
1-4. Muloñadi Pawulu chinakuyilayi kuYerusalema, nawa yumanyi yikumumwekena kwenakuna?
APAWULU naLuka chinafumiwu muMiletusa, wena niakulumpi amuEfwesesa anadishalishi, muloña adikeñeli nankashi. Awa amamishonali ayedi anemani mumbopolu. Nawa yiteli yawu yinasendiwu yinenzali nayuma yatelela halwendu. Anasendi nimali akwinka akaKristu anakankili muYudeya nawa anakufwila chikupu kuhana iyi yawaana.
2 Mpepela yawunda yinashikeni mumahina akwendesha nachu waatu, nawa wunatachiki kwenda kufuma kuchikumu. Awa amayala ayedi, kushilahu niamanakwawu 7 anakwendawu nawu, anamoni amanakwawu anemani kuchikumu ananeñi. (Yilw. 20:4, 14, 15) Anatwalekihu kudibayibisha sampu ninochu chinalekiwu kudimonawu.
3 Kwakwihi nayaka yisatu, Pawulu nazati chikupu nanawa akulumpi amuEfwesesa. Ilaña ichi, anamulomboli kudi spiritu yajila nawu ayi kuYerusalema. Nelukiku yuma yikumumwekena kwenakuna. Hakusambila wadiña wayileja dehi akulumpi nindi: “Kwesekeja nachinakukeña spiritu, inakuya kuYerusalema hela chakwila neluki wanyi yuma yikummwekena kwenoku, ilaña spiritu yajila yinatwalekihu kunleja kakavulu nawu, kaleya nimakabi anakunhembelela musumba nimusumba.” (Yilw. 20:22, 23) Hela chakwila neluki nindi wukumona kukala, Pawulu namoni nindi “kwesekeja nachinakukeña spiritu,” watela kuya nawa nakufwila chikupu kulondela munakumulombolawu kudi spiritu kuya kuYerusalema. Walemesha wumi windi, ilaña kwila nkeñelu yaNzambi dichuma chasweja kulema muwumi windi.
4 Komana ninenu dichimwatiyaña? Neyi tudihana kudi Yehova, twamukanaña netu kwila nkeñelu yindi dichuma chasweja kulema muwumi wetu. Kuhanjeka hayuma yeliliyi Pawulu kunateli kutukwasha kumwimbujola.
Kupandakana “Chituutu chaKipirosi” (Yilwilu 21:1-3)
5. Njilanyi yazatishiliyi Pawulu niamabwambu jindi hakuya kuTira?
5 Mbopolu yazatishileñawu aPawulu niamabwambu jindi ‘yayileña hohu.’ Dikwila nawu, ayileña hohu chakadi kuyiluwañesha kudi mpepela hela kukala kudi kwejima ninochu chashikiliwu kuKosi hefuku dodimu. (Yilw. 21:1) Chinamwekani neyi waatu wakaminini kwenakuna henohu kanda ayi kuRodi nikuPatara. Chashikiliwu kuPatara, chikumu chekalila kukabeta kachidiilu kaAsia Minor, amanakwetu akandamini waatu weneni wasendaña yuma, wayitwalili kuTira, MuFwinisiya. Hayileñawu apandakeni “chituutu chaKipirosi . . . kukabadi [kachikumu] kakuchimunswa.” (Yilw. 21:3) Muloñadi nsoneki waYilwilu, Luka chashililimu iyi nsañu?
6. (a) Tukuhosheladi netu Pawulu chamweniyi chituutu chaKiriposi chamukolesheli? (b) Neyi tutoñojokaña ochu Yehova chinakutukiswilayi nikutukwasha, tukukunkulula netudi?
6 Hadaha Pawulu wenyikili china chituutu nakuyileja yuma yamumwekeneni. Halwendu lwindi lwatachi lwawumishonali henohu munahiti yaaka 9, Pawulu, kushilahu niBaranaba naYowanu Maku, awanini Elimasi katepa, wadimbulwileña yuma yatañishileñawu. (Yilw. 13:4-12) Chamweniyi ichi chituutu nawa chanukiliyi yuma yamwekeni chatela chamukolesheli Pawulu nawa chamwinkeli ñovu yakuumika kukala kwadiña hambidi. Ninetu chinateli kutukolesha neyi tutoñojoka ochu Yehova chinakutukiswilayi nikutukwasha kuumika kukala. Kutoñojoka muniyi njila kunateli kutukwasha kuhosha neyi chahosheliyi Davidi, wasonekeli nindi: “Muntu waloña wamonaña kukala kwakuvulu, ilaña Yehova wamupulwishaña mukukala kwejima.”—Mas. 34:19.
“Twakeñakeñeli atumbanji, twayiwanini” (Yilwilu 21:4-9)
7. Yumanyi yeliliwu awa akakwenda chashikiliwu hohu muTira?
7 Pawulu walemesheli nankashi kwikala hamu nawakwawu akaKristu nawa wafwilileña kwikala nawantu akweti chikuhwelelu chamuchidiwu. Chashikiliwu hohu muTira, Luka natuleji nind, “twakeñakeñeli atumbanji, twayiwanini.” (Yilw. 21:4) Pawulu chelukiliyi nindi muTira mudi akwawu akaKristu, yena niamabwambu jindi atela ayikeñakeñeli nawa ashakamini nawu. Kuwaha kumu kwekala mukudiza chalala kudi kwakwila nawu kwejima kutukuya, tukuwana amanakwetu akaKristu anateli kututambwila. Antu amukeña Nzambi nawa ekala mukudifukula kwala ekalaña nawamabwambu mukaayi kejima.
8. Tunateli kutiyishisha ñahi Yilwilu 21:4?
8 Hakulumbulula yuma yamwekeni mumafuku 7 ashakaminiwu muTira, Luka nasoneki nsañu yinateli kutuhayamisha hakusambila: “Kuhitila mudi spiritu [amanakwetu muTira] atwalekelihu kumuleja Pawulu nawu bayi adata mwendu muYerusalemaku.” (Yilw. 21:4) Komana Yehova wabalumwini yitoñojoka yindi? Komana wamulombweleña Pawulu nindi abuli kuya kuYerusalema? Inehi. Spiritu yamwekesheleña nawu Pawulu wukumona kukala muYerusalema, ilaña bayi nawu abuli kuya muniwu musumbaku. Chinamwekani neyi kuzatisha spiritu yajila, amanakwetu muTira akunkulwili nawu Pawulu wukumona kukala muYerusalema. Dichi, hamuloña wakumukeña Pawulu, amulejeli nawu abuli kuya muniwu musumba. Chadiña hohu chiwahi chafwilileñawu kumukiñawu Pawulu kukuna kukala. Hela chochu, chineli Pawulu wafwilileña kwila nkeñelu yaYehova, Pawulu wayili kuYerusalema.—Yilw. 21:12.
9, 10. (a) Pawulu chatiyiliyi yuma yakameneneñawu amanakwetu muTira, watela wanukili yumanyi yadifwanaku? (b) Yitoñojokanyi yinataandi makonu, nawa yinambukiku ñahi namazu aYesu?
9 Chatiyiliyi amanakwindi anakwakamena, hadaha Pawulu wanukili nindi Yesu niyena wamweni kukala kwokumu hayilejeliyi atumbanji twindi nindi nakuya kuYerusalema, wukumona kukala kwakuvulu nawa akumujaha. Hamuloña wakwakamena, Petulu wamulejeli nindi: “Ditiyili luwi, Mwanta; yumiyi hiyakakumwekena hela hantiku.” Yesu wamwakwili nindi: “Yaku kunyima yami, eyi Satana! Wudi chuma chakunhukesha, muloña watoñojokaña yitoñojoka yawantu bayi yaNzambiku.” (Mat. 16:21-23) Yesu wetejeli mudimu wakudihana wamwinkeliwu kudi Nzambi. Pawulu niyena dichatiyiliyi. Kufwana Petulu, amanakwetu muTira niwena adiña nayitoñojoka yayiwahi, ilaña elukili hohu wanyi nkeñelu yaNzambi.
Kumulondela Yesu kwakeñekaña kwikala namuchima wakudihana
10 Antu amavulu makonu akañanyaña kwila yuma yayiwahi yalema yakala kwila. Antu amavulu akeñaña kwitiya kwabulaña kuyileja kwila yuma yidi yejima. Kwambukaku, Yesu washimwini nindi twatela kwikala nayitoñojoka yambukaku chikupu. Walejeli atumbanji twindi nindi: “Neyi muntu nakukeña kunlondela, adibondi yomweni nakusenda mutondu windi wakuyandishila nawa atwalekihu kunlondela.” (Mat. 16:24) Kufukulahu kumulondela Yesu hichuma chachiwahi chitwatela kwila, dichitwatela tuhu kwila, ilaña chapela wanyi.
11. Indi atumbanji muTira amwekesheli ñahi nawu amukeñeli Pawulu nawa afwilileña kumukwasha?
11 Hanashimbuli wanyi Pawulu, Luka niakwawu anakukeña kutwalekahu nalwendu lwawu. Yuma yamwekeni hakudishiika yamwekesheli nawu adikeña. Amayala, ambanda nianyana amushinjikijiliku Pawulu ninowu adiñayi nawu ndo-o nikuchikumu. Kwenakuna, wejima wawu afukamini nakulombela hamu kuhiñahu adishalishili. Kufumahu, Pawulu, Luka niakwawu mwendeleleñawu akandamini waatu wukwawu nawa ayili kuTolemayi, kwenoku awanini amanakwawu nawa ashakamini nawu ifuku dimu.—Yilw. 21:5-7.
12, 13. (a) Yumanyi yelileñayi Fwilipu muchihandilu chindi? (b) Anvwali akaKristu makonu atela kumwimbujola ñahi Fwilipu?
12 Kuhiñahu, Luka nashimuni nindi, Pawulu niakwawu endeleñayi nawu anayi kuKesareya. Chashikiliwu kwenakuna, “eñilili mwitala daFwilipu mukakushimwina.” a (Yilw. 21:8) Atela atiyili kuwaha chikupu hakumumona Fwilipu. Yaaka 20 yahitilihu muYerusalema, amutondeli kudi apostolu kulonda ayi nakuhana yakuda muchipompelu chawakaKristu chachiha. Fwilipu amwilukili nawu wadiña nakushimwina chikupu neyena. Anukenu, helili atumbanji atachiki kuyikabisha nawa apalañaneña, Fwilipu wayili kuSamariya nawa watachikili kushimwina kwenakuna. Chimwahitili mpinji, wamushimwinini ntuñu kaEtiyopiya nawa wamupapatishili. (Yilw. 6:2-6; 8:4-13, 26-38) Wazatili hadi yaaka yayivulu nakashinshi!
13 Fwilipu watwalekelihu neyena dindi dakushimwina. Chineli wadiña muKesareya, watwalekelihu namudimu windi wakushimwina, dichaletesheli Luka amuteneña nindi “mukakushimwina.” Luka natuleji cheñi nindi wadiña nawanyana awambanda awana adiña nakuprofweta, chinakumwekesha nawu adiña nakwimbuloja mumahanji atata yawu. b (Yilw. 21:9) Fwilipu watela wazatili nañovu kulonda akwashi chisaka chindi kumukeña Yehova nikumukalakela. Anvwali akaKristu makonu atela kumwimbujola chikupu, atela kulombolaña mudimu wakushimwina nikukwasha anyanawu kukeña mudimu wakushimwina.
14. Yumanyi yafumineñamu neyi Pawulu nendeli amanakwindi akakwitiya, nawa mpinjinyi yitunateli kwila mwenimu makonu?
14 Kumaluña ejima, Pawulu wakeñeleña akwawu akakwitiya nawa washakamineña nawu hadi mpinji yayilehi. Chakadi nikujina amanakwetu kunawa maluña afwilileña kumumwekeshela iwu kamishonali chisambu niakwawu endeleñayi nawu. Mpinji yamuchidiwu mwamweni diyayikwashileña ‘kudikolesha wumu namukwawu.’ (Rom. 1:11, 12) Mpinji yamuchidiwu twekalaña nayu nimakonu. Kudi yuma yayivulu nankashi yafumañamu neyi chakwila tudizoza nakutambwila ankoñi añinza nieni kwawu.—Rom. 12:13.
‘Ami Nadiloñeshi kufwa’ (Yilwilu 21:10-14)
15, 16. Nsañwinyi yaleteliyi Agabusi, nawa antu atiyiliku atiyili ñahi?
15 Hampinji Pawulu yashakamineñayi naFwilipu, kwenjili mwenyi mukwawu, Agabusi. Antu apompeli kwitala naFwilipu elukili nawu Agabusi wadiña hikaprofwetu; washimwineñahu dehi nzala yakapwelendendi mumpinji yaKaludusa. (Yilw. 11:27, 28) Hadaha adihwileña nawu: ‘Agabusi nenjilidi? Nsanwinyi yinakukeñayi kutuleja?’ Chinakumushinshikawu, anamoni nanoni mushipi waPawulu—muya wawulehi kwakasilileñawu mali niyuma yikwawu nawa wavwalileñawu mumbunda. Dichi Agabusi nadikasi naniwu muya kumakasa nikunyendu. Kuhiñahu wahosheli. Nsañu yahosheliyi yadiña yakuhayamisha: “Spiritu yajila yinahoshi nawu, ‘Ichi dichakamukasawu mwini iwu mushipi kudi aYudeya muYerusalema nawa akamuhana mumakasa awantu akunyuza.’”—Yilw. 21:11.
16 Wuprofwetu wamwekesheli nawu Pawulu wukuya kuYerusalema. Wamwekesheli cheñi nawu yuma yayishimwinineñayi aYudeya yikukojeja amuhani “mumakasa awantu akunyuza.” Iwu wuprofwetu wakojejeli antu atiyiliku kwakamena. Luka wasonekeli nindi: “Chitwatiyili mwenimu, etu hamu niantu adiñahu twatachikili kumulembelela netu bayi yakanduka kuYerusalemaku. Kuhiñahu Pawulu waakwili nindi: ‘Muloñadi chimunakudilila nakunzeyesha muyitoñojoka? Bayi mwakamaku, ami nadiloñeshi kunkasa nikufwila muYerusalema kukoola ijina daMwanta Yesu.’”—Yilw. 21:12, 13.
17, 18. Pawulu wamwekesheli ñahi kuhamuka nawa amanakwetu elili ñahi?
17 Fwikijenu iyi yuma yamwekeni. Amanakwetu kushilahu niLuka, anakumukañesha Pawulu kuya. Amakwawu anakudila. Hamuloña wakukeña kunamumwekesheliwu Pawulu, nayileji mukuwunda nindi “munakunzeyesha muyitoñojoka” hela neyi chahosha kubalumuna kukwawu nawu “munakunzeyesha mumuchima.” Ilaña nakufwila chikupu kuya, nawa neyi chocheliliyi kudi amanakwetu muTira, wukwiteja wanyi kumukañesha hela madilu amukojeji abuli kuya. Ilaña nayileji chinakukeñela kuyilayi. Wamwekesheli kuhamuka nimuchima wakufwila chikupu! Kufwana Yesu, Pawulu niyena wafwilileña chikupu kuya kuYerusalema. (Heb. 12:2) Pawulu wakeñeleña wanyi kumujaha, ilaña neyi chuma chamuchidiwu chimwekana, wamweneña nindi chalema kufwa kukola ijina daKristu Yesu.
18 Amanakwetu elili ñahi? Alemesheli mwafuukwiliyi. Twatañaña netu: “Chakaaniniyi, twalekeli kumukañesha nawa twahosheli netu: ‘Lekenu nkeñelu yaYehova yizatiki.’” (Yilw. 21:14) Antu amukañesheleña Pawulu kuya kuYerusalema atwalekelihu wanyi kumukañesha neyi chakeñeleñawu. Amutiyilili Pawulu nawa ovwahilili, elukili nawa etejeli nkeñelu yaYehova nawu yizatiki hela chadiña chakala kwila mwenimu. Pawulu watwalekelihu nanjila yindi yadikumushikija kukufwa. Kudi Pawulu chadi kuwaha antu amukeñeli kubula kumukañesha.
19. Yumanyi yalema yitwadizilaña kuyuma yamumwekeneni Pawulu?
19 Twadizilañaku chuma chalema kuyuma yamumwekeneni Pawulu: Bayi tukañesha antu anakukeña kudihana kumukalakela Nzambiku. Tunateli kuzatisha ichi chikuma muyuma yikwawu, bayi neyi munabombeli hohu wumi nikufwaku. Chakutalilahu, anvwali akaKristu amavulu chayikalilaña hakumona anyanawu anakuya nakumukalakela Yehova kumaluña akwakulehi, ilaña hiyayikañeshañaku. Phyllis, washakamaña kuEngland, wanukaña chatiyiliyi helili mwanindi wumu hohu wamubanda ayi nakuzata wumishonali muAfrica. Phyllis wahosheli nindi: “Chankatili chikupu haniyi mpinji. Chaneñesheli nankashi hakutiya nawu nakuya kwakulehi. Naneñeli nawa natiyili kuwaha hampinji yoyimu. Nalombeli chikupu kakavulu. Kwadiña hikufuukula kwindi nawa hinateleleli kumufuukwilakuku. Henohu iyami namudizishileña kutwamijaku Wanta hambidi! Nakalakeli mumatuña acheñi hadi yaaka 30 yinahitihu, nawa namusakililaña Yehova hefuku-hefuku hakumukwasha kwikala washinshika.” Chalema nankashi kukolesha akwetu akaKristu anakudihana!
Chachiwahi nankashi kukolesha amanakwetu anakudihana
Yilwilu 21:15-17)
“Anakwetu Atutambwilili naMuzañalu” (20, 21. Chumanyi chinakumwekesha nawu Pawulu wafwilileña kwikala nawamanakwindi, nawa wafwilileñadi kwikala nanowu adi nachikuhwelelu neyi chindi?
20 Chadiloñesheliyi, Pawulu wayili nawa amanakwetu amakwawu ayili nindi, chumichi chamwekesheli nawu amukeña nawa akeñeleña kumukwasha. Hanyamukileñawu hohu hakuya kuYerusalema, Pawulu niakwawu adiñayi nawu amwekesheli chikupu nawu akeñeleña kwikala nawamanakwawu niahela akaKristu. MuTira, awanini atumbanji nawa ashakamina nawu mafuku 7. MuTolemayi, ayimushili amanakwawu niahela nawa ashakamini nawu ifuku dimu. MuKesareya, ashakamini mafuku amavulu mwitala daFwilipu. Kuhiñahu, atumbanji afumini kuKesareya amushinjikijiluku Pawulu niamabwambu jindi kuYerusalema, kwayitambwililiwu kudi Manasoni, kambanji wakusambila. Nkumininaku, chashikiliwu muYerusalema, Luka nashimuni nindi “anakwetu atutambwilili namuzañalu.”—Yilw. 21:17.
21 Mwamweni, Pawulu wakeñeleña kwikala nawantu adiña nachikuhwelelu neyi chindi. Iwu kapostolu amukolesheli kudi amanakwindi niahela neyi chatukoleshañawu makonu. Chakadi nikujina, chamukolesheliwu chamukwashili Pawulu kuumika akakudimbulula azuwili akeñeleña kumujaha.
a Talenu chikasha chinakwila nawu “ Kesareya—Musumba Weneni wawaYudeya muRoma,” hefu 174.
b Talenu chikasha chinakwila nawu “ Komana Ambanda akaKristu Anateli Kwikala Antañishi?” hefu 177.