1, 2. Muloñadi tata yawantu wukweti kukeña chazañalelañayi hakumona mwanindi nakumwovwahila, nawa chumichi chamwekeshaña ñahi chatiyañayi Yehova?

 TATA yawantu nakutalila hawindu, hakumona mwanindi wanyanya nakuhema ngunja nawakwawu. Ngunja yawu hiyikutantukila mumukwakwa. Mwana hakushinshika kunaholokeli ngunja. Ibwambu dindi hakumuleja nindi ayi nakunona ngunja mumukwakwa, ilaña yena hakwila nindi: “Ankaanisha kuya mumukwakwa.” Tata yindi natiyi kuwaha.

² Muloñadi tata yawantu chinazañaleliyi? Muloña wamukaanisha mwanindi kuya mumukwakwa nkawindi. Mwana novwahili hela chakwila neluki wanyi nindi tata yindi nakumutala, tata yawantu neluki nindi mwanindi nakudiza kwovwahila nawa kwosi chuma chatama chikumumwekena. Tata yawantu natiyi neyi chatiyañayi Tata yetu wamwiwulu, Yehova. Nzambi weluka nindi neyi tunakukeña kwikala ashinshika kulonda twakadiluñishi yuma yayiwahi yatushiikayi kumbidi, twatela kumukuhwelela nikudiza kumwovwahila. (Yishimu 3:5, 6) Hakwila tutweshi kwila mwenimu, watutemesheleli ntañishi wabadika antu ejima.

3, 4. Indi Yesu ‘wadizili ñahi kwovwahila’ nawa munjilanyi ‘mwamwilishililiwu kwikala wawanina’? Shimunenu chakutalilahu.

³ Bayibolu yahosha nsañu yakuhayamisha hadi Yesu nawu: “Hela chakwila wadiña mwana, wadizili kwovwahila kuyuma yakabakeniyi. Chelili anamwilishi dehi kwikala wawanina, wekalili mukakuhana wamwinu wahaya nyaaka kudi antu ejima amwovwahilaña.” (AHeberu 5:8, 9) Iwu Mwana washakamini mwiwulu hadi yaaka yayivulu. Wamweni Satana niakwawu añelu chadikañiliwu naYehova, ilaña Mwana wawedi hadibombeli nawuku. Wuprofwetu wonenawu washimwini mazu akundama kudi Yesu nawu: “Hinadikañiliku.” (Isaya 50:5) Hanu dinu mazu akwila nawu “wadizili kwovwahila” amukundama ñahi iwu  Mwana wawanina wovwahila? Neyi wadiña dehi wawanina, munjilanyi ‘mwamwilishililiwu kwikala wawanina’ cheñi?

⁴ Talenu ichi chakutalilahu. Mushidika wukweti mpoku yakabali yachikuñu. Hela chakwila kanda ayizatisheñahu dehi munjita, ayichila chiwahi nawa yikuzatika kwesekeja namudimu wayichililawu. Hela chochu, hakuhimpa iyi mpoku yakabali nampoku yakabali yikwawu yachilawu nachikuñu chasweja kukola. Iyi mpoku yakabali yayiha ayizatishahu dehi munjita nawa yazatikili chiwahi. Komana neli chiwahi wanyi hakuhimpa iyi mpoku yakabali? Munjila yoyimu, Yesu wadiña wovwahila chikupu henohu kanda enzi heseki. Ilaña chenjiliyi heseki, kwovwahila kwindi kwadiña kwambukaku chikupu. Chelili Yesu amoni kweseka kwabulili kumonayi mwiwulu, kwovwahila kwindi kwadiña mukweseka nawa iku kweseka kwaletesheli amwekeshi muchima wakwovwahila chikupu.

5. Muloñadi chichalemeneni Yesu kwovwahila Tata yindi, nawa tukudiza yumanyi mukanu kapetulu?

⁵ Hakwila Yesu azati chiwahi mudimu wenjililiyi hanu heseki wateleli kwikala wovwahila. Chineli diyi “Adama wakukumishaku,” Yesu wenjili hanu hamaseki nakuzata mudimu wakañenyiwu anvwali jetu akusambila, dikwila nawu kumwovwahila Yehova Nzambi nihampinji yamwesekeliwu. (1 AKorinda 15:45) Bayi neyi Yesu wovwahilileña chikali kwovwahila hohuku. Yesu wovwahilili namaana indi ejima, namuchima windi wejima niwumi windi wejima. Nawa welili mwenimu namuzañalu. Kwila nkeñelu yaTata yindi kwadiña kwalema kubadika kuda. (Yowanu 4:34) Chumanyi chikutukwasha kwikala ovwahila neyi Yesu? Tukudiza chuma chaletesheli ovwahili. Kwikala nayilwilu neyi yaYesu kukutukwasha kukaana kweseka nawa kukutuletesha kwila nkeñelu yaNzambi. Tukudiza cheñi yuma yayiwahi yikwawu yafumaña mukwikala ovwahila neyi Kristu.

6, 7. Yumanyi yaletesheli Yesu kwovwahila?

⁶ Yesu wovwahilili muloña wadiña nayilwilu yayiwahi. Neyi chitwadizili muKapetulu 3, Kristu wadiña wadizoza. Kudinka  wanta kwaleteshaña antu kubula kwovwahila, ilaña kudizoza kwatukwashaña kumwovwahila Yehova. (Kwidika 5:1, 2; 1 Petulu 5:5, 6) Kubombelahu, Yesu wovwahilili muloña wayuma yakeñeliyi niyaheleliyi.

⁷ Sweje-e dinu, Yesu wamukeñeli Tata yindi wamwiwulu, Yehova. Tukadiza nsañu yayivulu yahosha hakukeña kweniku muKapetulu 13. Iku kukeña kwamusañumwini Yesu kumwakama Nzambi. Wamukeñeli Yehova, wamwakamineña nankashi chakwila hakeñeleña kumuhilisha Tata yindiku. Kumwakama Nzambi dikwaletesheli Yesu amutiyi chalombeleñayi. (AHeberu 5:7) Kumwakama Yehova cheñi hichinjikijilu chadimena chamwekeshaña nawu Yesu wayuulaña neyi Mwanta wawuMesiya.—Isaya 11:3.

8, 9. Neyi chaprofweteliwu dehi, Yesu watiyileña ñahi hayuma yaloña nayatama, nawa wamwekesheli ñahi hatooka chatiyileñayi?

⁸ Kumukeña Yehova kwaya mukwila nawu tuheli yuma yahelayi.  Chakutalilahu, talenu iwu wuprofwetu wahosha hadi Mwanta wawuMesiya: “Wakeñeli kuloña nawa waheleli kutama. Dichinaleteshi Nzambi, Nzambi yeyi, akuwayishi namanji akuzañalesha kubadika akwenu.” (Isamu 45:7) ‘Akwawu’ aYesu adiña anyanta amuchisaka chaMwanta Davidi. Yesu hohu diyi wazañaleli chikupu hampinji yamuwayishiliwu kubadika anyanta ejima. Muloñadi? Wufwetu windi wabadika nankashi akwawu nawa wanta windi wakaleta nkisu yahaya nyaaka. Amukiswila muloña wakukeña kuloña nakuhela yatama, yumiyi yamuletesheli kumwovwahila Nzambi muyuma yejima.

⁹ Yesu wamwekesheli ñahi hatooka to-o nindi wakeñeli kuloña nakuhela yuma yatama? Chakutalilahu, indi Yesu watiyili ñahi chelili atumbanji twindi ovwahili wunlomboli windi kutalisha hamudimu wakushimwina niyuma yayiwahi yafuminimu? Wazañaleli chikupu. (Luka 10:1, 17, 21) Chelili antu amuYerusalema akaani kuyikwasha, Yesu watiyili ñahi? Wadilili hamuloña wakudikaña kwawantu amuniwu musumba. (Luka 19:41, 42) Yesu wazañaleleña nayuma yaloña nawa wahilileña nayuma yatama.

10. Twatela kutiya ñahi hayuma yaloña nayatama, nawa chumanyi chatela kutukwasha kwila mwenimu?

¹⁰ Neyi tutoñojokaña chikupu hachamweneñayi Yesu yuma yaloña niyatama, chikutukwasha kumwimbujola nikumwovwahila Yehova munjila yayiwahi. Hela chakwila hitwawaninaku, twatela kwikala namuchima wakukeña yuma yaloña nikuhela chikupu yilwilu yatama. Twatela kulomba kudi Yehova atukwashi kulonda tutiyeña neyi chatiyañayi yena niMwanindi. (Isamu 51:10) Twatela cheñi kutondolwela yuma yatela kutuzeyesha. Kutonda chiwahi yisela niantu akudikunda nawu kwalema nankashi. (Yishimu 13:20; AFwilipi 4:8) Neyi twikala nayilwilu neyi yaKristu hitukukuminaña dakwovwahila kulonda antu atumoneña nawu twovwahilaku. Tukwilaña yuma yaloña muloña twakeña kwila yaloña. Tukutondolwelaña kwila yuma yatama muloña twayihela, bayi neyi muloña wakuchiina netu akutuwanaku, ilaña muloña wakwila twayihela oyu yuma.

11, 12. (a) Chumanyi chamumwekeneni Yesu hampinji yatachikiliyi mudimu windi wakushimwina? (b) Indi Satana wasambilili kumweseka ñahi Yesu, nawa wazatishili kafutanyi?

¹¹ Hamuloña wakuhela nshidi, Yesu amwesekeli hampinji yatachikiliyi mudimu windi wakushimwina. Hanyima yakumupapatisha, washakamini mwisaña nanzala mafuku 40 mwaana niwufuku. Nkumininaku, Satana wenjili nakumweseka. Talenu kafuta kazatishiliyi Diyabolu.—Matewu 4:1-11.

¹² Satana wasambilili kuhosha nindi: “Neyi wudi mwana kaNzambi, lejaku awa malola abalumuki mankendi.” (Matewu 4:3) Yesu watiyilidi hanyima yakushakama chakadi kuda hadi mpinji yayilehi? Bayibolu yahosha hatooka nawu: “Watiyili nzala.” (Matewu 4:2) Satana welukili nindi Yesu watiyili nzala nawa wazeyeli kumujimba, dichi Satana wazatishili iyi mpinji kulonda amweseki Yesu. Talenu cheñi mazu akasawuntu ahosheliyi Satana: “Neyi wudi mwana kaNzambi.” Satana welukili nindi Yesu “diyi wedi wayileñaleña yejima.” (AKolosi 1:15) Hela chochu, Yesu hakeñeli Satana amukojeji adikañiku. Yesu welukili nindi Nzambi wakeñeli wanyi nindi azatishi ñovu yindi kulonda eli yuma yikumutiyisha yomweni kuwaha. Wakaanini kwila mwenimu, chumichi chamwekesheleña nawu washindameneni hadi Yehova kulonda amwinki yakuda nikumulombola.—Matewu 4:4.

13-15. (a) Kwesekanyi kwamuchiyedi nikwamuchisatu kwamwesekeliwu Yesu kudi Satana, nawa Yesu waakwili nindidi? (b) Tuneluki ñahi netu Yesu watwalekelihu kwikala wasoñama kulonda adikañi naSatana?

¹³ Hamwesekeleñayi Yesu kapampa kamuchiyedi, Satana wamutwalili hewulu dambañu yatembeli. Kuhitila mukukasa kafuta kakuzatisha chatama Izu daNzambi, Satana wamwesekeli Yesu nindi atiyishi antu kuwaha nakudinata kufuma hewulu dambañu kulonda añelu amwamwini. Neyi izaza dawantu dadiña hatembeli damweni chihayamisha chamuchidiwu, kwosi wadi kukaana nindi Yesu diyi Mesiya akaniniwuku. Nawa neyi antu amwitejeli Yesu nawu diyi Mesiya muloña wakuyitiyisha kuwaha, komana adi kumukabisha? Hekwawu. Ilaña Yesu welukili  nindi Yehova wakeñeleña Mesiya akalakali mudimu windi nakudizoza, kubadika eli chuma chakuhayamisha chadi kuletesha antu amukuhweleli. (Isaya 42:1, 2) Yesu wakaanini cheñi kudikaña naYehova. Hakeñeli kuya mpuhu muloña wakumudimbaku.

¹⁴ Chumanyi cheliliyi hampinji yamwesekeliwu kuhitila mukumuleja mawanta? Hakumweseka kwamuchisatu, Satana wamulejeli Yesu nindi neyi wukudibuka heseki nakudifukula kudi yena, wukumwinka mawanta ejima amukaayi. Komana Yesu washiliku muchima kuchuma chamwinkeleñawu kudi Satana? Wamwakwili nindi: “Fumaku aha, eyi Satana!” Wabombelelihu nindi: “Muloña chasonekewa nawu: ‘Watela kudifukula kudi Yehova Nzambi yeyi nawa yena hohu diyi iwatela kukalakela mudimu wajila.’” (Matewu 4:10) Kwosi chuma chamuhuñumwini Yesu kulonda adifukuli kudi nzambi wacheñiku. Hetejeli kufwila wanta hela kuya mpuhu mukanu kaayi kumukojeji kudikañaku.

¹⁵ Komana Satana walekeli kumweseka? Wamushiyili kwesekeja nachamulejeliyi kudi Yesu. Hela chochu, Nsañu Yayiwahi yaLuka yahosha nawu Diyabolu “wamushiyili sampu nimpinji yikwawu yatelela.” (Luka 4:13) Eñañi, Satana wafwilileña kuwana mpinji yikwawu yakumweseka Yesu kushika tuhu nikunsa. Bayibolu yatulejaña nawu Yesu “[amwesekeli] muyuma yejima.” (AHeberu 4:15) Dichi Yesu watwalekelihu kwikala wasoñama, ninetu twatela kwikala asoñama.

16. Satana wesekaña ñahi antu jaNzambi makonu, nawa tunateli kutondolwela ñahi tufuta twindi?

¹⁶ Satana nakutwalekahu kweseka antu jaNzambi makonu. Chawushona, kakavulu kubula kuwanina kwatukojejaña kufwa mumuhetu swayi. Chaaku chitwaswana chakwikala nalwisu, kudivwimba nikufwila wanta diyuma yazatishañayi Satana. Satana nateli kutukokola nayaaku yejimiyi kushilahu nichaaku chakufwila maheta. Chalema nankashi neyi tutoñojokahu chiwahi mpinji yikwawu. Twatela kutoñojokahu chikupu hamazu ekala ha 1 Yowanu 2:15-17. Hampinji yitunakwila mwenimu twatela kudihula neyi chakwila kufwila yuma  yamakonu, yidi neyi maheta, nikukeña kutiyisha amakwawu kuwaha kunakumanisha kukeña kwetu kutwamukeña Tata yetu wamwiwulu. Twatela kwiluka netu kanu kaayi kanakuhita hamu ninyuuli yaku, Satana. Dichi tutondolweleña tufuta twindi twatukojejaña kuvulumuna. Tumwimbujoleña Mwanta wetu muloña “yena hakoñelihu nshidiku.”—1 Petulu 2:22.

17. Yesu watiyili ñahi hakumwovwahila Tata yindi, nawa amakwawu anateli kutaadika nawudi?

¹⁷ Kwovwahila hikwatalisha mukutondolwela hohu nshidiku; Kristu wadikitili nankashi hakwovwahila nshimbi jaTata yindi jejima. Wahosheli nindi: “Mpinji yejima nelaña yuma yamutiyishaña kuwaha.” (Yowanu 8:29) Iku kwovwahila kwamuletesheleña Yesu kwikala namuzañalu chikupu. Amakwawu anateli kuhosha nawu Yesu hichamukalilili kwovwahilaku. Anateli kutoñojoka nawu wateleleli kumwovwahila Yehova hohu muloña wawanina, ilaña etu twavula kwovwahila antu akweti wuswa abula kuwanina. Kuhosha hohu chalala, Yesu wovwahilileña niantu akweti wuswa abula kuwanina.

18. Yumanyi yayiwahi yeliliyi Yesu kutalisha hakwovwahila yatela kwimbujolawu atwansi?

¹⁸ Yesu amukulishili kudi anvwali jindi abula kuwanina, aYosefu naMariya. Chakadi nikujina, wamweneña yiluwa yawanvwali jindi kubadika anyana amavulu chamonañawu yiluwa yawanvwali jawu. Komana wadikañili kuhitila mukwila chuma chabulili kumulejawu kudi Nzambi nakuyileja anvwali jindi mwakuhembela chisaka? Talenu mukanda waLuka 2:51 chiwahosha hadi Yesu hadiñiyi nayaaka 12, nawu: “Watwalekelihu kuyovwahila.” Hakwovwahila muniyi njila, welili chuma chachiwahi chatela kwimbujolawu atwansi akaKristu afwilaña kwovwahila nikulemesha anvwali jawu.—AEfwesesa 6:1, 2.

19, 20. (a) Kukalanyi kwamweniyi Yesu kutalisha hakwovwahila antu abula kuwanina? (b) Muloñadi akaKristu alala makonu chatelelawu kwovwahila ayilombolaña?

¹⁹ Kutalisha hakwovwahila antu abula kuwanina, Yesu wamweni  kukala kwabulawu kumonahu dehi akaKristu alala makonu. Talenu yuma chiyadiña yakala hampinji yadiñayi hamaseki. Kudifukula kwawaYudeya, tembeli mwadifukwilileñawu muYerusalema nintanjikilu yawupristu, ajitejeli kudi Yehova hadi yaaka yayivulu, ilaña adiña kwakwihi nakujifumishahu kulonda asinsishihu ntanjikilu yachipompelu chawakaKristu. (Matewu 23:33-38) Hayoyina mpinji anlomboli jakudifukula amavulu atañishileña nsañu yakutwamba yafumini kumaana awaGiriki. Mutembeli aswejeli kwililamu yuma yatama chakwila Yesu wayiteneni nindi “iyeñu dawatupondu.” (Maku 11:17) Komana Yesu wakaanini kuya kutembeli hela kumasinagogi? Inehi. Yehova wachidiña kuzatisha tembeli nimasinagogi. Yesu wovwahilileña nakuya kuyawija hatembeli nikusinagogi kushika nimpinji yahimpiliyi Nzambi yuma.—Luka 4: 16; Yowanu 5:1.

²⁰ Neyi chakwila Yesu wadiña wovwahila muyumiyi, akaKristu alala makonu niwena atela kwikala ovwahila. Kafwampi, tunakushakama mumpinji yambukaku chikupu, yashimwineñawu dehi nawu mpinji yakufuntisha kudifukula kwalala. Nzambi watushiika chikupu nindi hakamwiteja Satana kuluwañesha antu jindi afuntishayiku. (Isaya 2:1, 2; 54:17) Hela chochu, nimuchipompelu chawakaKristu mwekala antu avulumunaña. Komana yiluwa yawantu amakwawu yatela kutuletesha kubula kumwovwahila Yehova, hadaha nikuleka kuya kukupompa  kwawakaKristu indi kwiji nikuwana nyiloña mudi akulumpi? Inehi. Twovwahilaña anakulombola muchipompelu namuchima wumu. Nawa twovwahilaña kuhitila mukuya kukupompa kwawakaKristu, kukupompa kwanyanya nikuzatisha kufumba kwamuNsona kwatufumbañawu.—AHeberu 10:24, 25; 13:17.

21. Chumanyi chayililiyi Yesu antu akeñeleña kumukañesha kwovwahila Nzambi, nawa tunateli kumwimbujola ñahi?

²¹ Yesu hetejeli antu hela amabwambu jindi akeñeliyi chikupu kumukañesha kumwovwahila Yehovaku. Chakutalilahu, kapostolu Petulu wamushinjilili Mwanta windi nindi, hateleleli kukaba nikufwaku. Yesu wakaanini kufumba kwaPetulu kwamwekeneña neyi kwakuwahi ilaña kwatama, kwamulejeliyi nindi bayi akamenaku. (Matewu 16:21-23) Makonu akakumulondela Yesu omikaña kukala kwafumaña kudi antaña jawu afwilaña kuyikañesha kwovwahila nshimbi niyishina yaNzambi. Kufwana atumbanji twaYesu akusambila, ninetu tweluka netu “Nzambi diyi nyuuli wutwatela kwovwahila bayi antuku.”—Yilwilu 5:29.

22. Yesu waakwili lwihwinyi, nawa munjilanyi?

²² Hampinji yadiñayi kwakwihi nakufwa, Yesu amwesekeli chikupu kulonda abuli kwovwahila. Hadina ifuku dakala, “wadizili kwovwahila” nankashi. Welili mwakeñeleña Tata yindi, bayi mwakeñeleña yenaku. (Luka 22:42) Watwalekelihu kwikala washinshika muchihandilu chindi chejima nawa dichuma chitwatela kwimbujola ninetu. (1 Timotewu 3:16) Waakwili lwihu lwehwiliwu kushankulu nawu: Komana muntu wawanina nateli kumwovwahila Yehova neyi amweseka? Adama naEva akañenyi. Chenjiliyi Yesu watwalekelihu kwikala washinshika nichafwiliyi. Muntu wabadika yileñaleña yaYehova yejima waheni ñakwilu yayiwahi chikupu. Wovwahilili hela chakwila kwovwahila kwamuletesheli akabakani nikufwa.

23-25. (a) Kwovwahila kwadifwana ñahi nakashinshi? Shimunenu chakutalilahu. (b) Chilwilwinyi chitwakadiza mukapetulu kanalondelihu?

²³ Kashinshi hela kumwakama Yehova namuchima wejima,  kwamwekenaña mukwovwahila. Muloña Yesu wovwahilili, watwalekelihu kwikala washinshika nawa antu ejima ahetelamu. (ARoma 5:19) Yehova wamukiswilili Yesu hama. Neyi tumwovwahila Mwanta wetu Kristu, Yehova wakatukiswila ninetu. Kumwovwahila Kristu kwatulombolaña “[kuwamwinu] wahaya nyaaka”!—AHeberu 5:9.

²⁴ Kubombelahu, antu atwalekañahu kwikala ashinshika kudi Yehova ayikiswilaña. Mukanda waYishimu 10:9 wahosha nawu: “Muntu wunakwenda mukashinshi wakenda mukukiñewa.” Neyi kashinshi akesekeja netala deneni dakutuña namatafwali, mpinji yejima yitukwovwahila, iku kwovwahila akukwesekeja netafwali dimu. Itafwali dimu hidamwekanaña kulemaku, ilaña dekala namudimu walema. Neyi muyinuña hamu, munateli kutuña itala dadiwahi nankashi. Neyi tutwalekahu kumwovwahila Yehova hefuku-hefuku nihachaaka-hachaaka, tukumwekesha netu twamukeña namuchima wetu wejima nawa twashinshika kudi yena.

²⁵ Neyi tutwalekahu kwovwahila hampinji yayilehi tukwikala nachilwilu chikwawu, kuumika. Mukapetulu kanalondelihu twakadiza njila jimu mwamwekesheleliyi Yesu ichi chilwilu.