KAPETULU 13
“Namukeña Tata”
1, 2. Kapostolu Yowanu washimwini nindidi kutalisha hefuku dakukumishaku hadiñayi Yesu hamu nawapostolu indi?
KASHINAKAJI hakutumpika nsonekeshu muwulombu, nakwanuka yuma yayivulu. Ijina dindi diyi Yowanu, nawa diyi kapostolu kaYesu Kristu wunashalihu nkawindi hohu. Haniyi mpinji wudi kwakwihi nayaaka 100 yakuvwalika. Yowanu nakwanuka yuma yamwekeni ifuku dimu nawufuku kwakwihi nayaaka 70 yinahitihu, ifuku dakukumishaku hadiñayi Yesu hamu nawapostolu indi henohu kanda yafwi. Yowanu hakwanuka nikusoneka yuma yejima yamwekeni muloña spiritu yajila yaNzambi yinakumulombola.
2 Hefuku denidi nawufuku, Yesu washimwini hatooka nindi akumujaha. Yowanu nkawindi diyi washimuna chuma chacheni chaletesheli Yesu ahoshi nindi akumujaha: “Hakwila nawu kaayi keluki nawu namukeña Tata, inakwila neyi chanlejeliyi Tata kwila. Nyamukenu, tufumenu kunu.”—Yowanu 14:31.
3. Yesu wamwekesheli ñahi nindi wamukeña Tata yindi?
3 “Namukeña Tata.” Kwosi chuma chalemesheliyi Yesu kubadika kumukeña Tata yindiku. Havulileña kutenatena awa mazu kulonda amwekeshi chalemawuku. Kafwampi, Yowanu 14:13 diyi hohu vasi yamuBayibolu hekala mazu ahosheliyi Yesu amwekeshaña chamukeñeliyi Tata yindi. Hela chochu, yuma yejima yelileñayi Yesu yamwekesheleña hatooka chamukeñeliyi Tata yindi. Wamwekesheleña nindi wamukeña Yehova mafuku ejima. Kuhamuka kwaYesu, kwovwahila nikuumika kwindi, jamwekesheleña nawu wamukeña Nzambi. Kukeña kwamuletesheli kukalakala mudimu windi wakushimwina.
4, 5. Bayibolu yahosha hakukeña kwamuchidinyi, nawa tunateli kuhosha netudi kutalisha hakukeña kwaYesu kwamukeñeliyi Yehova?
4 Makonu, antu amakwawu anateli kutoñojoka nawu antu akweti kukeña ekala azeya. Anateli kutoñojoka hankumbu nitumina twahoshaña hakukeña, hadaha nimuzañalu wekalaña hakachi keyala namumbanda adimwekeshelaña kukeña mpinji jikwawu. Bayibolu yahosha hakukeña kwekala hakachi keyala namumbanda, ilaña yahosha munjila yakalemesha kubadika chahoshaña antu hakukeña makonu. (Yishimu 5:15-21) Hela chochu, Izu daNzambi dahosha nankashi hakukeña kukwawu kwambukaku. Iku kukeña bayi neyi hikukeña kwakulumbisha hela kwakapinji kantesha, nawa kwakubula kukasunuka hakuhanjeka kwashindamena hamaana awantuku. Kwabombelamu muchima niyitoñojoka. Kukeña kwamuchidiwu kwafumaña hamuchima, akuyuulaña nanshimbi jalema nawa kwendelaña hamu naniji nshimbi, nawa kwamwekenaña muyilwilu yayiwahi. Hikukeña kwalala. Izu daNzambi dahosha nawu, “Kukeña hikwamanañaku.”—1 AKorinda 13:8.
5 Hakachi kawantu ejima, Yesu diyi wasambililihu kumukeña Yehova chikupu. Kwosi muntu niwumu wamubadika Yesu mukwovwahila lushimbi lwaYehova lwabadika kulema nshimbi jejima, lwakwila nawu: “Watela kukeña Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima ninañovu jeyi jejima.” (Maku 12:30) Indi Yesu wekalili ñahi nakukeña kwamuchidiwu? Watwalekelihu ñahi kusweja kumukeña Nzambi hadiñayi hanu hamaseki? Tunateli kumwimbujola ñahi?
Kukeña Kwakola Nawa Kunashimbuli Nankashi
6, 7. Tuneluki ñahi netu Yishimu 8:22-31 yahosha hadi Mwana kaNzambi bayi hachilwilu chamaana hohuku?
6 Komana mwazatahu dehi mudimu nebwambu denu nawa mukuhita kwampinji mwiluka nenu munekali amabwambu ezala kambuki namunu? Chumichi chinateli kuyikwasha kwiluka kukeña kwadiña hakachi kaYehova naMwanindi wumu hohu. Tunahoshi kakavulu hamukanda waYishimu 8:30, ilaña ichi tuhanjekenu hansañu yadikuma naniyi vasi. Muvasi 22 nakushika ku 31, mwekala nhoshelu yonenawu yalumbulula maana nakuyifwikija neyi muntu. Tweluka ñahi netu awa mazu atalisha kudi Mwana kaNzambi?
7 Muvasi 22, maana ahosha nawu: “Yehova wanleñeli nakwikala ntachikilu yanjila yindi, wakusambilahu hayuma yeliliyi kunyaaka oko-o.” Iyi vasi yahosha hachuma chikwawu bayi hamaanaku, muloña ichi chilwilu ‘hiyachileñeliku.’ Maana hiyakweti ntachikiluku, muloña Yehova wekala kwoku kufuma tuhu kunyaaka oko-o nawa wekala namaana mpinji yejima. (Isamu 90:2) Hela chochu, Mwana kaNzambi diyi wadiña “wedi wayileñaleña yejima.” Amuleñeli, diyi wadiña watachi kuleña hayuma yejima yaleñeliyi Yehova. (AKolosi 1:15) Mwana wadiñaku henohu iseki niiwulu kanda ayileñi neyi chalumbululawu muYishimu. Nawa hakwikala Izu, Mukakumuhoshelaku Nzambi, diyi njila yayiwahi mwamwekesheleliyi Yehova maana indi.—Yowanu 1:1.
8. Yumanyi yelileñayi Mwana henohu kanda enzi hamaseki, nawa chumanyi chitunateli kutoñojokahu neyi tunakukomoka yileñaleña?
8 Yumanyi yelileñayi Mwana hadi yaaka yayivulu henohu kanda enzi hamaseki? Vasi 30 yatulejaña nawu wadiña “mukawukalawenu” waNzambi. Idi izu datalisha mudihi? AKolosi 1:16 yashimuna nawu: “Mudi yena dimwaleñeleliwu yuma yejima yamumawulu niyahamaseki . . . Yuma yejima ayileñeli kuhitila mudi yena nawa amuleñeleli yena.” Dichi Yehova, Nleñi, wazatishili Mwanindi, Mukawukalawenu hakuleña yuma yejima, kutachikila kuyileñaleña yakuspiritu yamwiwulu nakushika kuyileñaleña yamuluzwizu, iseki ninyitondu yayiwahi yashiyashana, anyama niyileñaleña yabadika yahamaseki, dikwila nawu antu. Munjila yikwawu, tunateli kufwanisha kunuñañana kwekala hakachi kaTata yawantu naMwana namukakufunjeka chakutuña itala wunakuzatila hamu namukakutuña, walondelaña chiwahi chinafunjekiyi. Kafwampi, neyi chileñaleña chidi chejima chitukomwesha, dikwila nawu tunakumushimeka Mukakufunjeka Muneni. (Isamu 19:1) Hela chochu, tunateli cheñi kwanuka kunuñañana kwakuwahi kwekala hakachi kaNleñi ‘namukawukalawenu’ windi.
9, 10. (a) Chumanyi chaletesheli kukeña kwekala hakachi kaYehova naMwanindi kwiikali kwakola chikupu? (b) Chumanyi chinateli kuletesha kukeña kumwamukeña Tata yenu wamwiwulu kwiikali kwakola chikupu?
9 Neyi antu ayedi abula kuwanina anakuzatila hamu, mpinji jikwawu akañanyaña kutiyashana. Ilaña Yehova naMwanindi atiyashanaña. Mwana wazatili hadi yaaka yayivulu naTata yindi nawa amushimuna iku nakuhosha nindi: “Nadiña nakuzañalela kumesu indi mpinji yonsu.” (Yishimu 8:30) Mwamweni, wazañaleleña kwikala hamu naTata yindi, nawa Tata yindi niyena watiyileña chochimu. Chakadi nikujina, Mwana wekalili chikupu neyi Tata yindi, wembujoleli yilwilu yaNzambi. Tunamoni chaletesha kukeña kwekala hakachi kaTata yawantu naMwana kwiikali kwakola chikupu! Tunateli kuhosha chakadi kuhita mumbadi netu iku dikukeña kwakola nawa kunashimbuli kubadika kukeña kwejima.
10 Hanu dinu chumichi chinakutudizishadi? Hadaha munateli kutoñojoka nenu himunateli kumukeña Yehova chamuchidiwuku. Mwamweni, hakachi ketu hosi wukweti chifulu chahewulu neyi chaMwanaku. Hela chochu, twekala nakukooleka kweneni. Anukenu nenu, Yesu waswinini kwakwihi naTata yindi kuhitila mukuzatila hamu nindi. Muloña wakutukeña, Yehova watwinka kukooleka kwakwikala “akakukalakala hamu” nindi. (1 AKorinda 3:9) Chitukumwimbujolaña Yesu mumudimu wakushimwina, mpinji yejima twatela kwanukaña netu twekala akakukalakala hamu naNzambi. Dichi, mpaanda yakukeña yatunuñaña naYehova yatwalekañahu kukolelaku. Komana kudihu kukooleka kukwawu kwakuwahi?
Chatwalekelihu Yesu Kumukeña Chikupu Yehova
11-13. (a) Chakutalilahwinyi chinateli kutukwasha kwiluka netu twatela kutwalekahu kukolesha kukeña kwetu, nawa Yesu wakolesheli ñahi kukeña kwindi kwamukeñayi Yehova hadiñayi kansi? (b) Mwana kaNzambi wamwekesheli ñahi nindi wakeñeleña kumudizisha kudi Yehova hampinji yadiñayi mwiwulu nihampinji yenjiliyi hamaseki?
11 Hakwila tutwalekihu kumukeña chikupu Yehova, toñojokenu hanichi chakutalilahu. Kufwana nkenu yalubanji yatumbawu hanji, kukeña kwakeñekaña kukuhemba chiwahi nikukwakamena hakwila nawu kukoli nikutwalekahu. Neyi tubula kushaku muchima, kunateli kukeha nikujimañana. Yesu hamweneña kukeña kwamukeñeliyi Yehova neyi chuma chakuhemeshaku. Tutalenu cheliliyi hakwila atwalekihu kumukeña chikupu Yehova muchihandilu chindi chejima chaheseki.
12 Toñojokenu cheñi chuma chamwekeni hatembeli muYerusalema hampinji Yesu yadiñayi kansi. Anukenu mazu alejeliyi anvwali jindi akameneni, wayilejeli nindi: “Mwankeñelañadi? Komana himweluka nenu natela kwikala mwitala daTata yamiku?” (Luka 2:49) Hadiñayi kampululu, chakadi nikujina Yesu hanukileña yuma yelileñayi mwiwulu henohu kanda enzi hamasekiku. Hela chochu, wamukeñeli chikupu Tata yindi, Yehova. Welukili nindi kukeña kwamuchidiwu kwamwekeneneña mukudifukula. Dichi, hikwadiñahu iluña damutiyishileña Yesu kuwaha kubadika itala daTata yindi dakudifukwilamuku. Wafwilileña kwikala hetala denidi nawa hakeñeli kufumahuku. Kubombelahu, hadiña nakutiyilila hohuku, ilaña wafwilileña nikudiza hadi Yehova nikuhosha yuma yelukiliyi. Watachikili wanyi kutiya muniyi njila hadiñayi nayaaka 12, nawa hashikijiliyi iyi yaaka, halekeli kutiya muniyi njilaku.
13 Henohu kanda enzi hamaseki, Mwana wadizilili chikupu kudi Tata yindi. Wuprofwetu wekala haIsaya 50:4-6 washimuna nawu Yehova wamudizishili Mwanindi chikupu kutalisha hamudimu windi wawuMesiya. Hela chakwila muniyi yuma yadizileñayi mwabombeleli kudiza hamakabi amu akamumwekena Wawayishewa waYehova, Mwana wadizili namuchima wumu. Chenjiliyi Yesu hamaseki nawa chakuliliyi, watwalekelihu kuya kwitala daTata yindi nakudifukula nikudiza yuma yakeñeleñayi Yehova nindi adizeña hetala dindi. Bayibolu yashimuna nawu Yesu wayileña kutembeli nikusinagogi. (Luka 4:16; 19:47) Neyi tunakukeña netu kukeña kwetu kutwamukeña Yehova kutwalekihu, twatela kuyaña kukupompa kwawakaKristu, kutwadifukulaña kudi Yehova, kudiza yuma yikwawu nikumushimeka.
“Wayili nkawindi hampidi nakulomba”
14, 15. (a) Muloñadi Yesu chakeñeleleñayi kwikala kwakankawindi? (b) Yesu wamwekesheli ñahi kudi Tata yindi mukulomba chekala wubwambu windi naYena nichamulemeshañayi?
14 Yesu cheñi watwalekelihu kumukeña Yehova chikupu kuhitila mukulomba mpinji yejima. Hela chakwila wadiña wakasunuka nawa wakeñeleña kwikala hamu nawantu, tweluka netu mpinji jikwawu wakeñeleña kwikala kwakankawindi. Chakutalilahu, Luka 5:16 yahosha nawu: “Kakavulu wayileña kumaluña kwabula antu nakulomba.” Dichahosha niMatewu 14:23 nawu: “Hanyima yakwila naleji dehi mazaza awantu nindi ayi, wayili nkawindi hampidi nakulomba. Wadiña nkawindi kwenoku nichikwelili melela.” Yesu wakeñeli kwikala kwakankawindi haniyi mpinji nimpinji jikwawu, bayi neyi waheleli antu hela kubula kukeña kwikala nawakwawuku, ilaña wakeñeleña kwikala nkawindi naYehova kulonda alombi kudi Tata yindi nakukasunuka.
15 Neyi nakulomba, mpinji jikwawu Yesu wazatishileña mazu akwila nawu “Aba, Tata.” (Maku 14:36) Mumafuku aYesu, “Aba” hiizu dazatishileñayi mwana hakumwekesha kukeña kudi “tata” yindi. Kakavulu, dadiña hakachi kamazu atachikileñayi mwana kutena neyi hakudiza kuhosha. Hela chochu, dadiña izu dakumwekesha kalemesha. Hela chakwila idi izu damwekesheleña wubwambu wukwetiyi Mwana naTata yindi wakeñayi, damwekesheleña cheñi nawu Yesu wamulemesha Tata yindi. Mukulomba kwaYesu kwejima kwasonekawu, kwamwekeshaña wubwambu weniwu nikalemesha. Chakutalilahu, haYowanu kapetulu 17, kapostolu Yowanu wasonekeli kulomba kwakulehi kwalombeliyi Yesu chakufuma hamuchima hawufuku wakukumishaku. Twazañalalaña chikupu kudiza hakulomba kweniku nawa chalema kwimbujola kulomba kwaYesu, bayi neyi kufuntisha-funtishahu mazu aYesuku, ilaña twatela kukeña njila yakulombelamu kudi Tata yetu wamwiwulu chakufuma hamuchima mpinji yejima. Neyi twilaña mwenimu, kukeña kwetu kukutwalekahu nawa kukukola.
16, 17. (a) Yesu wamwekesheli ñahi nindi wamukeña Tata yindi? (b) Yesu wamwekesheli ñahi nindi Tata yindi wekala nachisambu?
16 Kwesekeja nachitwadiza hakusambila, Yesu hafuntisha-funtishileñahu mazu wowamu akwila nindi ‘Namukeña Tataku.’ Hela chochu, kakavulu wamwekesheleña nindi wamukeña Tata yindi namazu ahosheleñayi. Munjilanyi? Yesu wahosheli nindi: “Tata, Mwanta wewulu niiseki, nakuhameki hamesu awantu.” (Matewu 11:25) Chitwadizileña Chibalu 2 chawunu mukanda, twadizili netu Yesu watiyileña kuwaha kumuhameka Tata yindi kuhitila mukukwasha antu kulonda amwiluki. Chakutalilahu, wamufwanishili Yehova natata yawantu wafwilileña kwanakena mwanindi wajimbeli chakwila watalilileña kwinza kwamwana yeniwu wabalumukili mumuchima, chamumweneniyi hahalehi, wamukinkililili nakumukumbata. (Luka 15:20) Iyi nsañu yahosheliyi Yesu nindi Yehova wukweti kukeña nawa wanakenaña, yashikaña hanyichima yawantu ejima ayitañaña.
17 Kakavulu Yesu wamuhamekeleña Tata yindi hakwikala wachisambu. Wazatishili chakutalilahu chawanvwali abula kuwanina kulonda yamwekeshi chitunateli kukuhwelela netu Tata yetu nateli kutwinka spiritu yajila yitunakukeña. (Luka 11:13) Yesu wahosheli cheñi hakuchiñeja kwashiikayi Tata yindi. Nawa wahosheli hakuchiñeja kwindi kwakufunta mwiwulu nakushakama naTata yindi. (Yowanu 14:28; 17:5) Wayilejeli atumbanji twindi hakuchiñeja kwahembeleliyi Yehova “mukanka wanyanya wanyikoku” waKristu, kwakushakama mwiwulu nikuyuula hamu naMwanta wawuMesiya. (Luka 12:32; Yowanu 14:2) Nawa wamukundejeli mukanshidi wadiña kwakwihi nakufwa nindi ekali nakuchiñeja kwakwikala nawumi muParadisa. (Luka 23:43) Muloña wakuhosha haniji njila mwamwekeshelañayi Tata yindi kukeña, kwamukwashili Yesu kutwalekahu kumukeña chikupu Yehova. Atumbanji twaKristu amavulu eluka nawu chuma chayikwashaña kutwalekahu kumukeña Yehova nikumukuhwelela hikuhosha hadi yena nihayuma yayiwahi yachiñejañawu yayishiikayi.
Komana Mwamukeña Yehova Neyi Chamukeñeliyi Yesu?
18. Njilanyi yabadika kulema mutwatela kumwimbujolela Yesu, nawa muloñadi?
18 Hakachi kanjila jejima mutwatela kumulondela Yesu, kwosi njila yabadika kulema iyi njila yakwila nawu: Twatela kumukeña Yehova namuchima wetu wejima, nawumi wetu wejima, nayitoñojoka yetu yejima ninañovu jetu jejima. (Luka 10:27) Hitwatela kuhosha netu twamukeña Yehova muloña hohu wakutiya netu twamukeñaku; ilaña twatela kumwekesha cheñi kukeña kweniku nayuma yitwelaña. Yesu hatiyileña hohu nindi wamukeña Tata yindi, indi kwiji kuhosha hohu nindi, ‘Namukeña Tataku.’ Wahosheli nindi: “Hakwila nawu kaayi keluki nawu namukeña Tata, inakwila neyi chanlejeliyi Tata kwila.” (Yowanu 14:31) Satana wahosheli nindi kwosi muntu wunateli kumukalakela Yehova namuchima wumuku. (Yoba 2:4, 5) Hakwila nawu amwekeshi nindi mwahosheliyi Satana mwakutwamba, Yesu welilihu chuma chimu kulonda aleji antu amukaayi chaswejeliyi kumukeña Tata yindi. Wovwahilili kushika nikukufwa. Munateli kumwimbujola Yesu? Komana munateli kuleja antu mukaayi nenu mwamukeña Yehova Nzambi nankashi?
19, 20. (a) Yumanyi yalema yikutuletesha tuyeña kukupompa kwawakaKristu mpinji yejima? (b) Tunateli kumona ñahi kudiza nkawetu, kutoñojokahu chikupu nikulomba?
19 Atuleñeli namuchima wakufwila chikupu kuswina kwakwihi naNzambi nikumwekesha chitwamukeña. Dichi, Yehova watuloñeshela njila mwakudifukwila kulonda tutwalekihu kumukeña Tata yetu. Neyi munayi kukupompa kwawakaKristu, mwatela kwanuka nenu munayi nakudifukula kudi Nzambi yenu. Yuma yakeñekaña hakudifukula hikulomba chakufuma hamuchima, kwimba tumina twakushimeka, kutiyilila nakanañachima nikwakulahu neyi chinatweshiki. Munateli cheñi kukolesha akwenu akaKristu hampinji yakupompa. (AHeberu 10:24, 25) Kudifukula kudi Yehova mpinji yejima hakupompa kwawakaKristu kukayikwasha kumukeña Nzambi chikupu.
20 Kukeña kutwamukeña Yehova kunateli kuswejelaku neyi tudizaña nkawetu, kutoñojoka chikupu hayuma yitunakudiza nikulomba. Monenuña yumiyi nenu hinjila jinateli kuyikwasha kwikala hamu naYehova nkawenu. Chimukudizaña Izu daNzambi dasonekewa nikutoñojokahu chikupu, Yehova wukuyilejaña chatoñojokañayi. Hampinji yimunakulomba, munakumuleja yuma yidi kumuchima wenu. Anukenu nenu bayi neyi kulomba kwakeñekaña hohu kumulomba Nzambi netu atwinki yuma yitunakukeñaku. Twamusakililaña Yehova hayuma yayiwahi yitwatambwilaña nawa twamushimekaña hanyidimu yindi yabadika kuhitila mukulomba. (Isamu 146:1) Kubombelahu, kumushimeka Yehova hatooka namuzañalu diyi njila yabadika yakumusakililamu Yehova nikumwekesha netu twamukeña.
21. Kumukeña Yehova kwalemenadi, nawa yumanyi yitwakadiza mutupetulu tunalondelihu?
21 Kumukeña Nzambi dichuma chalema chinateli kutukwasha kwikala namuzañalu wahaya nyaaka. Adama niEva ateleleli kumukeña Nzambi hakwila nawu atwalekihu kudiluñisha. Dichuma chabadika kulema chimwatela kwila hakwila nawu mutweshi kuumika neyi ayeseka hamuloña wachikuhwelelu chenu. Dihashindamena kwikala mukakumulondela Yesu. Kafwampi, kumukeña Nzambi kwendelaña hamu nakukeña akwetu antu. (1 Yowanu 4:20) Mutupetulu tunalondelihu, twakadiza Yesu chakeñeliyi antu. Mukapetulu kanahiñihu, twakadiza chuma chacheni chaletesheli antu amavulu amumoni Yesu nawu wakasunuka.
