1-3. (a) Yesu wayishiyili ñahi apostolu indi, nawa muloñadi chumichi chichabulilili kuyineñesha hela kuyizañalesha? (b) Muloñadi chitwatelela kwilukila yuma yelañayi Yesu kufuma hampinji yafuntiliyi mwiwulu?

 AMAYALA 11 anemani hampidi. Anakutala muntu wanaamba 12 akeñawu chikupu nawa anazañalali. Wudi namujimba wawuntu, kafwampi diyi Yesu wunasañuki muntu wasweja ñovu hakachi kawañelu aYehova. Yesu napompeshi apostolu indi kulonda adiwani nawu haMpidi yaNyiolivi kakukumishaku.

² Chakadi nikujina Yesu nanuki yuma yayivulu haMpidi yaNyiolivi yidi heshinadi daChinekineki chaKidironi kufuma muYerusalema. Kuchikulu dikwekala musumba waBetani kwamusañwililiwu Lazaru kudi Yesu. Mwahitili hohu nyilungu yantesha kufuma heñililiyi Yesu muYerusalema kufuma muBetefwaji. Hadaha kuMpidi yaNyiolivi dikwadiña itempa daÑesemani, kwaneñeleliyi Yesu chikupu hampinji yadiñawu kwakwihi nakumukwata. Haniyi mpidi, Yesu nakushiika amabwambu jindi nawa akakumulondela indi akeñayi. Hakuhosha mazu amawahi akuyishiika nachu. Kufumahu hakuya mwiwulu. Apostolu indi emeni kuka-a nakumutala Mwanta wawu akeñawu chinakuyayi mwiwulu. Nkumininaku, ivu hidikumubuta, kumumona nawa cheñi nehi.—Yilwilu 1:6-12.

³ Komana chumichi hichayineñeshaña hela kuyizañalesha hamuloña wakwaambuka namuntu imwakeñaku? Chineli añelu ayedi ayanukishi apostolu, nsañu yaYesu hiyinakumiku. (Yilwilu 1:10, 11) Chayiliyi mwiwulu diyadiña ntachikilu yayuma. Izu daNzambi datulejaña yuma yamumwekeneni Yesu. Kwiluka yuma yakalakalañayi Yesu kufuma  hampinji yayiliyi mwiwulu kwalema hama. Muloñadi? Anukenu mazu amulejeliwu Petulu kudi Yesu nindi: “Twalekakuhu kunlondela.” (Yowanu 21:19, 22) Wejima wetu twatela kwovwahila ilu lushimbi muchihandilu chetu chejima, bayi neyi kufuukulahu hakapinji kantesha hohuku. Hakwila nawu twili mwenimu twatela kwiluka chuma chinakwilayi Mwanta wetu yinu mpinji nimudimu wamwinkawu mwiwulu.

4. Bayibolu yashimwineñahu dehi nawudi hayuma yikamwekena neyi Yesu nafunti dehi mwiwulu?

⁴ Nsona hiyashimuna chamutambwililiwu Yesu hampinji yafuntiliyi mwiwulu nichazañaleliyi hakudiwana naTata yindiku. Hela chochu, Bayibolu yashimwineñahu dehi yuma yikamwekana mwiwulu neyi Yesu nafunti dehi. Kufuma mumpinji yaMosi nakushika muyaaka nkulakaji yakusambila, aYudeya adiña nakwanakana chawija chajila mpinji yejima. Ifuku dimu hachaaka nichaaka, kapristu muneni weñilileña Mwajila Chikupu mutembeli nakusampula mashi anyilambu kuchimbañu chachitiyañenu Hefuku daKubuta Nshidi. Hanidi ifuku kapristu muneni wemeneneñaku Mesiya. Nkeñelu yachina chawija yadiña yakwanakena nshidi. Dichi Yesu washikijili iyi nkeñelu kamu hohu hampinji yaheniyi ifutu danyiloña dakeñekeleña hakwanakena antu nshidi. Wayili kudi Yehova, mwiwulu mwalubanji, mwasweja kujila mukuleña kwejima nakuhana ifutu danyiloña kudi Tata yindi. (AHeberu 9: 11, 12, 24) Komana Yehova wetejeli mulambu windi?

5, 6. (a) Chumanyi chamwekeshaña nawu Yehova wetejeli mulambu waKristu wefutu danyiloña? (b) Anyi ahetelañamu mwifutu danyiloña, nawa munjilanyi?

⁵ Twawanaña ñakwilu kuhitila mukushinshika chuma chamwekeni chimwahitili mafuku antesha kufuma hafuntiliyi Yesu mwiwulu. Izanvu danyanya dawakaKristu akushika ku  120 dapompeli muYerusalema mukapeka kahewulu, kukasumuka hikukutiyakana lushindu lwampepela yinakukunka nañovu yasweja nankashi hilukwinzesha mwadiñawu. Hanyitu yawu hamwekeni yuma yamwekeneña neyi nyizuzu yakesi, nawa enzeli spiritu yajila nakutachika kuhosha madimi ambokamboka. (Yilwilu 2:1-4) Chumichi chamwekesheleña nawu Nzambi watondeli muza wawuha, Isarela waNzambi, “muchidi watondewa“ nawa “atupristu awanta,”akakukalakala mudimu waNzambi hamaseki. (1 Petulu 2:9) Mwamweni, Yehova Nzambi wetejeli mulambu waKristu wefutu danyiloña. Spiritu yajila yechililiwu yadiña hakachi kankisu yatambwililiwu hakutachika kuhitila mwifutu danyiloña.

⁶ Kufuma tuhu hayina mpinji, ifutu danyiloña daKristu dakwasha atumbanji twindi mukaayi kejima. Chili twekala hakachi “[kamukanka] wanyanya wanyikoku,” wakayuula naKristu mwiwulu, hela twekala hakachi ‘kanyikoku yikwawu,’ akayuulañayi hamaseki, twahetelaña mumulambu windi. (Luka 12:32; Yowanu 10:16) Dihashindamena kuchiñeja kwetu nikutwanakena nshidi jetu. Neyi tutwalekahu ‘kukuhwelela’ ifutu danyiloña nikumulondela Yesu mafuku ejima, tunateli kwikala nachinleji chamuchima chitooka nikukuhwelela chikupu yuma yakumbidi.—Yowanu 3:16.

7. Yesu amwinkeli ñovwinyi hampinji yafuntiliyi mwiwulu, nawa munateli kumukwasha ñahi?

⁷ Nyidimwinyi yazatañayi Yesu kufuma hampinji yafuntiliyi mwiwulu? Wukweti wuswa chikupu. (Matewu 28:18) Mwamweni, Yehova wamutondeli kulonda alomboleña chipompelu chawakaKristu, mudimu wazatañayi munjila yakukeña nawa yayiwahi. (AKolosi 1:13) Neyi chashimwineñahu dehi, Yesu wayinka amayala ashikahu mudimu wakwakamena nyikoku yindi. (AEfwesesa 4:8) Chakutalilahu, wamutondeli Pawulu kwikala “kapostolu kunyuza,” wamutemesheli kuya nakushimwina nsañu yayiwahi kumatuña akwakulehi. (ARoma 11:13; 1 Timotewu 2:7) Kwakwihi nakumana  kwayaaka nkulakaji yakusambila Yesu wahosheli mazu akuhameka, kufumba nikwolola nachu yipompelu 7 yakukabeta kaRoma muAsiya. (Chimwekeshu, tupetulu 2-3) Komana mweluka nenu Yesu diyi Mutu wachipompelu chawakaKristu? (AEfwesesa 5:23) Hakwila nawu mutwalekihu kumulondela, mwatela kwovwahila nikutiyañana muchipompelu chenu.

8, 9. Ñovwinyi yamwinkeliwu Yesu mu 1914, nawa chumichi chatela kutukwasha ñahi muyuma yitwafuukulaña?

⁸ Yesu amwinkeli cheñi ñovu jikwawu mu 1914. Munichi chaaka amutondeli kwikala Mwanta waWanta wawuMesiya waYehova. Chatachikiliyi Yesu kuyuula, “mwiwulu mwatachikili njita.” Chumanyi chamwekeni? Satana niañelu jindi ayinatilili hamaseki, nakuleta yihuñu heseki. Chineli majita, wubanji, kuchinisha antu, nyisoñu, nyitentanshi, ninzala yinakuyandisha antu makonu yinaswejeliku yinakumwekesha nawu chayinu mpinji Yesu nakuyuula mwiwulu. Satana wuchidi “nyuuli wakanu kaayi” hadi ‘kapinji kantesha.’ (Chimwekeshu 12:7-12; Yowanu 12:31; Matewu 24:3-7; Luka 21:11) Hela chochu, Yesu nakuleja antu mukaayi kejima kulonda eteji chiyuulu chindi.

⁹ Chalema kwikala kukabadi kaMwanta wawuMesiya. Twatela kwikala nawuselewa windi muyuma yejima yitwafuukulaña mafuku ejima, bayi wuselewa wamukanu kaayi katamaku. Neyi “Mwanta wawanyanta nawa Nkaaka yawankaaka” nakushinshika antu, wazuwaña mumuchima windi waloña hela kuzañalala. (Chimwekeshu 19:16) Muloñadi?

10. Yesu wekala muntu wamuchidinyi, nawa yumanyi yamuleteshaña kuzuwa?

¹⁰ Mwanta wetu wekala wamuzañalu neyi chekala Tata yindi. (1 Timotewu 1:11) Hampinji yadiñayi hamaseki Yesu hadiña wakalishaku. Ilaña kudi yuma yayivulu yinakumwekana hamaseki makonu yamuleteshaña kuzuwa. Chakadi nikujina wazuwaña nakudifukula kwejima  kwatwambaña nawu kwamwimenaku. Washimwineñahu dehi yuma yayivulu nindi: “Bayi neyi muntu wejima wantenaña nindi, ‘Mwanta, Mwanta,’ wakeñila muWanta wamumawuluku, chiña hohu muntu welaña nkeñelu yaTata yami wudi mumawulu diyi wakeñilamu. Hanodu ifuku amavulu akañila nawu: ‘Mwanta, Mwanta, komana . . . hitwakoñeli nyidimu yayivulu yañovu mwijina deyiku?’ Dichi nakayileja nami: ‘Hinayilukiliku! Fumenu kudi ami, enu akakukoña yuma yatama.’”—Matewu 7:21-23.

11-13. Muloñadi antu amakwawu chinateliwu kuhayama namazu ahosheliyi Yesu kutalisha hadi antu akoñaña “nyidimu yayivulu yañovu” mwijina dindi, nawa muloñadi chazuwilañayi? Shimunenu chakutalilahu.

¹¹ Awa mazu anateli kuhayamisha antu amavulu aditenaña makonu nawu hiyakaKristu. Muloñadi Yesu chakalejelayi awa mazu antu akoñaña “nyidimu yayivulu yañovu” mwijina dindi? Machechi awaKristendomu ahanaña yawaana, kukwasha atuzweñi, kutuña yipateli nimashikola nawa azataña nyidimu yikwawu yayivulu. Hakwila nawu twiiluki chakaletesha Yesu kuyizuwila, talenu chakutalilahu.

¹² Tata yawantu nimama yawantu anakufwila kukasa lwendu. Hiyanakukeña kusenda anyanawuku, dichi anakeñi muntu wakushala nawu. Nshimbi yinamulejiwu yapela: “Wuyihembeña anyanetu chiwahi. Wuyinkeña yakuda, wuyiwelesheña nikuyitala kulonda abuli kudikatisha.” Chinafuntiwu anvwali anahayami hakuwana anyanawu adi nanzala, majilu, akata, nawa aneña. Anakumudilila nhembi nawu ayakameni, ilaña nayidiwuli. Muloñadi? Muloña wudi handalu nakuwahisha mawindu. Anvwali anahili chikupu nakumwihula kulonda ayilumbulwili chachiwahi. Nhembi hakwakula nindi: “Talenu yuma yejimiyi yinnakoñi! Komana mawindu hiyanakumwekana chiwahiku? Naloñeshaña yuma yamwitala kulonda chisaka chenu chihetelimu!” Komana anvwali akutiya kuwaha? Kwakulehi! Hiyamulejeli kuzata iyi nyidimuku, akeñeleña hohu kuyihembela anyanawu. Akuzuwa muloña nakaani kutiyilila nshimbi jamulejeliwu.

 ¹³ Kristendomu nakoñi yuma yidi neyi ona nhembi. Yesu wayishilili akakumwimenaku nshimbi yakudiisha antu kuspiritu kuhitila mukuyitañisha chalala chaMwizu daNzambi nikuyikwasha kulonda ekali awunyonji kuspiritu. (Yowanu 21:15-17) Ilaña Kristendomu nakañanyi chikupu kwovwahila ilu lushimbi. Nakuyifwisha antu nanzala yakuspiritu, kuyiluwañesha nansañu yakutwamba nawa hiyeluka nsañu yalema yamuBayiboluku. (Isaya 65:13; Amosi 8:11) Hela chakwila nakweseka kuwahisha yuma mukanu kaayi hanateli kuyiñaku, wakaana kwovwahila mumushikila. Kafwampi kanu kaayi kaSatana kadi neyi itala didi kwakwihi nakudihumuna. Izu daNzambi dahosha hatooka nawu kaayi kaSatana keña akikisañani.—1 Yowanu 2:15-17.

14. Mudimwinyi wamuzañaleshaña Yesu makonu, nawa muloñadi?

¹⁴ Kwambukaku, Yesu wazañalalaña hakumona antu amavulu hamaseki anakukalakala mudimu wakwilisha atumbanji washililiyi atumbanji twindi henohu kanda afunti mwiwulu. (Matewu 28:19, 20) Hikukooleka kwakweni kwakumuzañalesha Mwanta wawuMesiya! Dichi tutwalekenuhu kukwasha “nduñu wamaana nikashinshi.” (Matewu 24:45) Kwambukaku nawakulumpi jakudifukula kwaKristendomu, izanvu dawakaKristu awayishewa dazataña nañovu chikupu hakutwala mudimu wakushimwina hambidi nikudiisha anyikoku jaKristu nakashinshi.

15, 16. (a) Yesu watiyaña ñahi hakuhelañana kunasweji makonu, nawa tweluka ñahi chumichi? (b) AkaKristendomu amuhilishaña ñahi Yesu?

¹⁵ Tweluka chikupu netu Mwanta wahilaña neyi amona antu mukaayi anasweji kuhelañana makonu. Tunateli kwanuka chazuwiliwu aFwarisi chamweniwu Yesu nakuuka antu haSabata. Adiña achinchika nyichima chakwila ashindameneni hachaambu nikuheñesha Nshimbi jaMosi nanshimbi jawu. Yihayamisha yakoñeliyi Yesu yakwashileña antu chikupu. AFwarisi amweneña yihayamisha yakoñeliyi Yesu yazañalesheleña antu, kuyikuula, nikukolesha chikuhwelelu  chawu nawu yamukunkulwayi. Indi Yesu watiyili ñahi nanawa antu? Ifuku dimu wayitalili “iku nahili, nikutiya kutama nankashi hamuloña wakuchinchika kwanyichima yawu.”—Maku 3:5.

¹⁶ Makonu, Yesu wamonaña yuma yayivulu ‘yamutiyishaña kutama nankashi.’ Anlomboli jaKristendomu aputa mesu kuhitila mukusha maana kutushidikilu twawu nintañishilu yabula kwesekana naNsona. Kubombelahu, mudimu wakushimwina nsañu yayiwahi yaWanta waNzambi wayitiyishaña kutama. Mumatuña amakwawu, akulumpi jakudifukula ahilaña nakukabisha nankashi akaKristu ashimwinaña nsañu yashimwininiyi Yesu. (Yowanu 16:2; Chimwekeshu 18:4, 24) Hampinji yoyimu, akulumpi jakudifukula wenawa avula kukolesha antu jawu kuya kunjita nakujaha antu, nakutoñojoka nawu kwila mwenimu kunateli kumuzañalesha Yesu Kristu.

17. Akakumulondela Yesu alala azañaleshaña ñahi muchima windi?

¹⁷ Kwambukaku, akakumulondela Yesu alala afwilaña kukeña akwawu antu. Ashimwinaña nsañu yayiwahi kudi “antu ejima” neyi chashimwinineñayi Yesu hela chakwila ayikabishaña. (1 Timotewu 2:4) Nawa kukeña kwabadika kwamwekeshañawu kudi akwawu antu, dichinjikijilu chayilukilañawu. (Yowanu 13:34, 35) Amulondelaña Yesu chikupu nikuzañalesha muchima waMwanta wawuMesiya, hampinji yamwekeshañawu kukeña nikalemesha kudi akwawu akaKristu.

18. Yumanyi yamutiyishaña kutama Mwanta wetu, nawa tunateli kumuzañalesha ñahi?

¹⁸ Twatela kwiluka cheñi netu Mwanta wetu watiyaña kutama neyi akakumulondela akañanya kuumika, nakubula kumukeña Yehova neyi chamukeñeliwu hatachi nikuleka kumukalakela. (Chimwekeshu 2:4, 5) Hela chochu, Yesu wazañalalaña nawantu omikaña kushika nikunsa. (Matewu 24:13) Dichi twatela kwanukaña lushimbi lwaKristu lwakwila nawu: “Twalekakuhu kunlondela.” (Yowanu 21:19) Tutalenu  yuma yikwawu yayiwahi yakahanayi Mwanta wawuMesiya kudi antu akomika kushika nikunsa.

19, 20. (a) Kumulondela Yesu kwaletaña nkiswinyi makonu? (b) Kumulondela Kristu kwatukwashaña ñahi kwikala natata yetu itwakeña?

¹⁹ Kumulondela Yesu kwaletaña nkisu yayeni muchihandilu makonu. Neyi tumwiteja Kristu netu diyi Mwanta wetu, kulondela wunlomboli windi nichakutalilahu chindi, tukwikala namaheta abulaña kwikala nawantu mukaayi. Tukukalakalaña mudimu waletaña muzañalu muchihandilu, tukwikala anuñañana nikukeñañana chikupu nawakwetu akakwitiya, tukwikala nachinleji chamuchima chitooka, nawa hitukwakamenañaku. Dikwila nawu tukwikala amuzañalu. Tukwikala nankisu yayivulu nankashi.

²⁰ Yehova wamwiteja Yesu kwikala “Tata waHaya Nyaaka” kudi antu akeñaña kushakama haya nyaaka hamaseki. Yesu diyi asinsishawu hadi tata yawantu watachi, Adama, wakojejeli anyanindi ejima kumona yihuñu. (Isaya 9:6, 7) Neyi twiteja Yesu kwikala ‘Tata yetu waHaya Nyaaka’ nikumukuhwelela, tukatambwila wumi wahaya nyaaka. Kubombelahu, tukukundama kwakwihi chikupu naYehova Nzambi. Neyi chitunadizi, kuzata nañovu kulonda twimbujoleña chakutalilahu chaYesu ifuku niifuku hinjila yayiwahi yakwovwahilamu lushimbi lwonenawu kudi Nzambi lwakwila nawu: “Mwimbujolenuña Nzambi chineli mudi anyana akeñayi.”—AEfwesesa 5:1.

21. Akakumulondela Kristu atoñekaña ñahi chejeji mukaayi kamwidima?

²¹ Neyi tumwimbujolaña Yesu niTata yindi Yehova, tukwila chuma chachiwahi nankashi. Tukutoñekaña chejeji. Mukanu kaayi mudi mwidima, antu amavulu anayidimbi kudi Satana nawa anakwimbujola yaaku yindi. Etu twamulondelaña Kristu twatoñekaña chejeji chansañu yalala yamuNsona kudi kwejima, chejeji chaleteshaña akaKristu kwikala  nayilwilu yayiwahi, muzañalu waweni, kuwunda nikukeña kwalala. Nawa twaswinaña kwakwihi naYehova, ichi dichuma chalema chatela kwila muntu wejima wukweti maana.

22, 23. (a) Nkiswinyi yakatambwila antu atwalekañahu kumulondela Yesu nakashinshi? (b) Twatela kufuukulahu kwiladi?

²² Toñojokenu cheñi yuma yinakukeña kuyililayi Yehova kumbidi kuhitila mudi Mwanta windi wawuMesiya. Iwu Mwanta keña azuñi njita yaloña nakaayi kaSatana katama. Yesu wakemika mushindu. (Chimwekeshu 19:11-15) Kufumahu Kristu wakatachika Kuyuula hadi Yaaka Ikombakaji heseki. Nfulumendi yindi yamwiwulu yakakwasha antu ejima  ashinshika kulonda akekali awanina nawa akadiluñishi yuma yayiwahi muloña wefutu danyiloña. Fwikijenu chimwakekala akola kumujimba, chimwakekala akwenzi nikwikala nañovu, chimwakazatilaña hamu namuzañalu nachisaka chawantu anuñañana hakubalumuna dinu iseki kwikala paradisa! Hakumana kwaChiyuulu chaYaaka Ikombakaji, Yesu wakahana wanta kudi Tata yindi. (1 AKorinda 15:24) Neyi mutwalekahu kumulondela Kristu nakashinshi, mwakatambwila nkisu yasweja kuwaha, “[kusubuka] kwakulema kwawanyana kaNzambi.” (ARoma 8:21) Eñañi, twakadiluñisha yuma yayiwahi yejima yadiluñishileñawu aAdama naEva nawa yajimbesheliwu. Chineli tudi anyana kaYehova awamayala niawambanda, twakasubuka muwuduñu wanshidi yaAdama haya nyaaka. Chalala, “nikufwa hikwakekalaku cheñiku.”—Chimwekeshu 21:4.

²³ Anukenu ona mukwenzi waheta nawa nyuuli itwadizili muKapetulu 1. Wakaanini mutambi waYesu wakwila nawu: ‘Inzaku wiikali mukakunlondela.’ (Maku 10:17-22) Bayi mwakela neyi cheliliyiku! Itejenu mutambi waYesu namuzañalu chikupu. Fuukulenuhu kuumika, nakutwalekahu kumulondela Kabiña Walala ifuku niifuku, chaaka nichaaka, kulonda mwakamoni chakashikijayi Yesu yuma yejima yafuukulayi Yehova.