1-3. (a) Indi ndimi welaña ñahi neyi chakwila hakutwesha kwaañuula mbutu yayivulu nkawindiku? (b) Indi Yesu wadiña nakukalanyi muchaaka cha 33 C.E., nawa wamanishili ñahi iku kukala?

 TOÑOJOKENU hakukala kukwetiyi ndimi muniyi nsañu yinalondelihu. Wadimini maha indi mutukweji twakunyima nakutumba mbutu. Hakuyitala chiwahi chineli nyitombu yitachiki kwidika, nawa nazañalali hakumona mbutu yindi yinakuli. Ñovu yindi yinayi mumenji wanyi, muloña mpinji yakwaañula yinashiki. Kukala kukwetiyi dikweniku: Mbutu yinasweji kuvula hakutwesha kuyaañula nkawindiku. Hakwila nawu yamanishi iku kukala, nafuukulihu kwiñija akakukalakala nakuyitemesha mumaha indi. Kafwampi, wukweti mpinji yantesha hohu yakwaañula mbutu yindi yalema.

² Muchaaka cha 33 C.E., Yesu asañwiliwu wamweni kukala kwokumu. Hampinji yazatileñayi mudimu wakushimwina  hamaseki, watumbili mbutu yachalala. Ichi dinu mpinji yakwaañula yinashiki dehi, nawa mbutu yayivulu. Antu amavulu anakwiteja nsañu anakukeñeka kuyipompesha kulonda ekali atumbanji. (Yowanu 4:35-38) Indi Yesu wukumanisha ñahi iku kukala? Yesu wudi hampidi yamuÑaliliya henohu wudi kwakwihi nakuya mwiwulu, hakuyinka atumbanji mudimu wakukeña akakukalakala amavulu, nakuyileja nindi: “Dichi, yenu mwakelishi antu akunyuza yejima ekali atumbanji, muyipapatisheña . . . , muyidizisheña ahembeña yuma yejima yinnayileji enu.”—Matewu 28:19, 20.

³ Kukalakala iwu mudimu dichuma chasweja kulema chamwekeshaña nawu muntu himukakumulondela Kristu walala. Ichi dinu tuhanjekenu hamalwihu asatu. Muloñadi Yesu chayinkeleliyi atumbanji mudimu wakukeña akakukalakala amavulu? Wayidizishili ñahi? Indi etu twazataña ñahi iwu mudimu?

4, 5. Muloñadi Yesu chabulililiyi kumanisha mudimu watachikiliyi, nawa anyi adi kutwalekahu kuzata iwu mudimu neyi nafunti mwiwulu?

⁴ Chatachikiliyi Yesu mudimu windi wakushimwina muchaaka cha 29 C.E., welukili nindi natachiki mudimu wakabula kumanishayi nkawindi. Hampinji yantesha yadiñayi hamaseki, washimwinini iluña danyanya nawa washimwinini nsañu yaWanta kudi antu antesha hohu. Eña, washimwinini aYudeya hohu niantu abalumukili kwikala aYudeya, “anyikoku ajimbala amwitala daIsarela.” (Matewu 15:24) Hela chochu, ana “anyikoku ajimbala” apalañeneni muIsarela mwejima. Kubombelahu, nsañu yayiwahi ateleleli kuyishimwina iseki dejima.—Matewu 13:38; 24:14.

⁵ Yesu welukili nindi mudimu weneni akawuzata neyi nasañuki dehi. Walejeli apostolu indi ashinshika 11 nindi:  “Inakuyileja chikupu nami, muntu wejima wukunkuhwelela, niyena wakazata nyidimu yinazataña; nawa wakazata nyidimu yabadika haniyi, muloña inakuya kudi Tata.” (Yowanu 14:12) Chineli Mwana wafuntileña mwiwulu, apostolu indi kushilahu niejima akekala atumbanji twindi adi kutwalekahu kuzata mudimu wakushimwina nikutañisha. (Yowanu 17:20) Mukudizoza Yesu welukili nindi akazata nyidimu “yabadika” yindi. Munjilanyi? Munjila jisatu.

6, 7. (a) Nyidimu yazatañawu akakumulondela Yesu yabadika ñahi nyidimu yindi? (b) Tunateli kumwekesha ñahi netu Yesu hayikuhweleleli atumbanji twindi chamukunkulwayiku?

⁶ Njila yatachi, atumbanji aYesu akashimwina iluña deneni. Makonu mudimu wawu wakushimwina wunashiki kwakumina iseki, kubadika matuña ashimwininiyi Yesu. Njila yamuchiyedi, akashimwina antu amavulu. Izanvu danyanya dawatumbanji ashiliyi Yesu davulili nakwikala makombakaji. (Yilwilu 2:41; 4:4) Makonu anashiki kumamiliyoni, nawa atumbanji amaha amavulu nankashi enda apapatishewa chaaka nichaaka. Njila yamuchisatu, akashimwina hadi mpinji yayilehi, nakushika nimunanu mafuku, kwakwihi nayaaka 2,000 yinahitihu kufuma hamanishiliyi Yesu mudimu windi wakushimwina wazatiliyi yaaka yisatu nachikunku.

⁷ Yesu wakuhweleleli atumbanji twindi chahosheliyi nindi akazata “nyidimu yabadika haniyi.” Wayikunjikili mudimu wasweja kulemeshayi, wakushimwina nikutañisha “nsañu yayiwahi yaWanta waNzambi.” (Luka 4:43) Wayikuhweleleli nindi akuzata iwu mudimu nakashinshi. Indi chumichi chinatalishi mudihi kudi etu makonu? Neyi tuzata mudimu wakushimwina neyena nawa namuchima wejima, tukumwekesha netu Yesu hayikuhweleleli atumbanji twindi chamukunkulwayiku. Iku hikukooleka kwabadika kuwaha!—Luka 13:24.

8, 9. Yumanyi yayiwahi yeliliyi Yesu mumudimu wakushimwina, nawa tunateli kumwimbujola ñahi?

⁸ Yesu wayidizishili chikupu atumbanji twindi hakwila nawu azati mudimu wakushimwina. Sweje-e dinu, welili yuma yayiwahi yatela kwimbujolawu. (Luka 6:40) Mukapetulu kanafumihu twadizili chamweneñayi mudimu wakushimwina. Toñojokenu ntahi hadi atumbanji ayileña naYesu kwejima hampinji yashimwinineñayi. Amweni nawu wadiña nakushimwina kwejima kwadiña antu, kuyikumu yamajiya nihajimpidi, munyisumba nihayisankanu nimumatala. (Matewu 5:1, 2; Luka 5:1-3; 8:1; 19:5, 6) Amweni nawu wadiña wadikita, watachikileña kuzata nantetemena kushika niwufuku. Bayi neyi Yesu wazatileña mudimu wakushimwina neyi wudana mudimu wakuzataku. (Luka 21:37, 38; Yowanu 5:17) Chakadi nikujina, atumbanji elukili nawu kukeña kwakeñeliyi antu dikwamuletesheli kuzata muniyi njila. Hadaha amweneña chatiyilileñayi antu wushona. (Maku 6:34) Munakutoñojoka nenu chakutalilahu chaYesu chayikojejeli atumbanji twindi kwiladi? Indi enu mwadi kwiladi?

⁹ Chineli twekala akakumulondela Kristu, twembujolaña yuma yeliliyi mumudimu wetu wakushimwina. Dichi twazataña hakumina ñovu jetu “[hakushimuna] chikupu wunsahu.” (Yilwilu 10:42) Kufwana Yesu, twendelaña antu kumatala awu. (Yilwilu 5:42) Twahimpaña ndandanda yetu neyi chinakukeñaka kulonda tuyendeli hampinji yitunateli kuyiwana hamatala. Twakeñakeñaña antu nikuyishimwina mukubabala, munyikwakwa, mupaaki, mumasitolu nikunyidimu. Twatwalekañahu ‘kuzata nañovu,’ mumudimu wakushimwina, muloña twalemesha chikupu iwu mudimu. (1 Timotewu 4:10) Kukeña antu amakwawu kwatusañumunaña kwikala nampinji yakushimwina antu kumaluña ejima kutwatela kuyiwana.—1 ATesalonika 2:8.

10-12. Nshimbinyi jalema jayidizishiliyi Yesu atumbanji twindi henohu kanda ayitemeshi nakushimwina?

 ¹⁰ Yesu wayidizishili cheñi atumbanji twindi kuhitila mukuyileja nshimbi jakulondela. Henohu kanda atemeshi apostolu 12 niatumbanji 70 mumudimu wakushimwina, Yesu wayilejeli nshimbi jakulondela hakushimwina. (Matewu 10:1-15; Luka 10:1-12) Nshimbi jayinkeliwu jayikwashili kuzata chiwahi, muloña mukanda waLuka 10:17 wahosha nawu: “Atumbanji 70 afuntili namuzañalu.” Tushinshikenu yuma yiyedi yalema yatañishiliyi Yesu, iku tunakwanuka netu mazu indi hitwatela kuyitiya kwesekeja natushidikilu twawaYudeya akumpinji yakunyimaku.

¹¹ Yesu wayidizishili atumbanji twindi kumukuhwelela Yehova. Wayilejeli nindi: “Bayi mufwila wuru hela siliva hela kwikala nawuneñu muyikwama yenu yamali, hela ipakumuna dayakuda yahalwendu hela yakuvwala yiyedi hela nkwabilu hela mukombuku, muloña mukakukalakala atelela kumwinka yakuda.” (Matewu 10:9, 10) Akakwenda adiña nachaaku chakusenda chikwama chamali, ipakumuna dayakuda ninkwabilu yikwawu. a Yesu chayilejeleñayi atumbanji twindi kubula kwakama naniyi yuma, dikwila nawu wayilejeli nindi: “Mukuhwelelenu chikupu Yehova, muloña wukuyikwashaña muyuma yejima.” Yehova wadi kuyikwasha kuhitila mukusañumuna antu etejeleña nsañu yayiwahi  kuyimwekeshela chisambu, muloña aIsarela adiña nachaaku chakutambwila enyi.—Luka 22:35.

¹² Yesu wayidizishili cheñi atumbanji twindi kutondolwelela yuma yabula kulema yaluwañeshaña. Wahosheli nindi: “Bayi mwimusha muntu wudi wejima munjilaku.” (Luka 10:4) Komana Yesu wayilejeleña nindi abuleña kuhanjeka nawantu? Inehi. Bayi neyi kunyima akuminineña dakwimusha nawu handenu mwani hohuku. Adiña nakulondela yidika yayivulu nikuhanjeka mpinji yeneni. Muntu wumu wadiza chikupu jaBayibolu wahosheli nindi: “Antu akumusela hiyadimushileña neyi chitwadimushaña etu, chidi neyi kunoñama chanti, hela kudipaka mumakasaku, ilaña adiña nakudikumbata kakavulu, kunoñama nikukaama hamaseki. Yuma yejimiyi yakeñekeleña mpinji yeneni.” Hakuyileja atumbanji twindi nindi bayi emushaña neyi chemusheleñawu antu ejimaku, Yesu wahosheli nindi: “Mwatela kuzatisha chiwahi mpinji yenu, nsañu yimunakushimuna mwatela kuyishimwina mukunyakashana.” b

13. Munjilanyi mutunateli kumwekesha netu twalemesha nshimbi yayinkeliyi Yesu atumbanji twindi amuyaaka nkulakaji yakusambila?

¹³ Twalemesha nshimbi yayilejeliyi Yesu atumbanji twindi amuyaaka nkulakaji yakusambila. Twamukuhwelela Yehova chikupu hakuzata mudimu wetu wakushimwina. (Yishimu 3:5, 6) Tweluka netu hitwamba kakaankilahu yuma yitwakeñaña muwumi neyi ‘tusambila kukeña Wantaku.’ (Matewu 6:33) Akakushimwina Wanta ampinji yejima mukaayi kejima anateli kwiteja nawu Yehova wakwashanaña nimumpinji yakala. (Isamu 37:25) Tweluka cheñi netu chalema kutondolwela yuma yaluwañeshaña. Neyi tubula kubabala  kanu kaayi kanateli kutuluwañesha. (Luka 21:34-36) Hela chochu, bayi neyi ayinu himpinji yitwatela kuhuñumukaku. Twatela kunyakala kushimwina nsañu muloña wumi wawantu wudi hakatoña. (ARoma 10:13-15) Neyi twiluka netu twatela kunyakala kushimwina nsañu tukwiteja wanyi yuma yamanishaña mpinji yamukanu kaayi kutuluwañesha kuzatisha mpinji yetu mumudimu wakushimwina. Anukenu nenu mpinji yinashaliku yanyanya, mudimu wakwaañula weneni.—Matewu 9:37, 38.

14. Chumanyi chinakumwekesha nawu mudimu wasonekawu haMatewu 28:18-20 wakundama akakumulondela Kristu ejima? (Talenu cheñi tumazu twaheshina.)

¹⁴ Yesu asañwiliwu wayinkeli atumbanji twindi mudimu weneni chayilejeliyi nindi “yenu mwakelishi . . . atumbanji.” Bayi neyi walejeleña hohu atumbanji adiñayi nawu hampidi muÑaliliya hanidi ifukuku. c Mudimu wahaniniyi wakeñekaña kushimwina “antu akunyuza yejima,” nawa wakatwalekahu “kushika nikukukuma kwanshakaminu yamakonu.” Chalala, iwu mudimu atela kuwuzata kudi akakumulondela Kristu ejima kushilahu ninetu makonu. Tushinshikenu mazu ahosheliyi Yesu asonekawu haMatewu 28:18-20.

15. Muloñadi chitwatelela kwovwahila nshimbi yahaniniyi Yesu yakwilisha atumbanji?

¹⁵ Henohu kanda yayinki mudimu, Yesu wahosheli nindi: “Ananyinki wuswa wejima mwiwulu niheseki.” (Vasi 18) Komana Yesu wukweti ñovu jamuchidiwu? Eña. Diyi mukulumpi wawañelu, wahanaña nshimbi kudi nyikanka ninyikanka yawañelu. (1 ATesalonika 4:16; Chimwekeshu 12:7) Chineli diyi “mutu wachipompelu,” wukweti ñovu hadi atumbanji  twindi hamaseki. (AEfwesesa 5:23) Kufuma tuhu mu 1914 wayuulaña neyi Mwanta wawuMesiya mwiwulu. (Chimwekeshu 11:15) Wukweti ñovu yakusañula afu. (Yowanu 5:26-28) Hamuloña wakwila wasambilili kushimuna ñovu jikwetiyi, chumichi chamwekesha nawu Yesu hadiña nakwihula mwakwililaku, ilaña wahanini nshimbi yakulondela. Chikuwaha neyi twovwahila muloña Yesu amwinkeli iyi ñovu kudi Nzambi bayi neyi wadinkeli yomwenuku.—1 AKorinda 15:27.

16. Hakutuleja nindi “yenu,” Yesu nakutuleja nindi twili chumanyi, nawa twazataña ñahi iwu mudimu?

¹⁶ Yesu hakuhana mudimu, watachikili nezu dimu dakwila nawu: “Yenu.” (Vasi 19) Watwinka mudimu wakuleja antu nsañu yaWanta. Hakwila tutweshi kuzata iwu mudimu, twatela kuzatisha njila jajivulu. Kushimwina kwitala nikwitala diyi njila yayiwahi nankashi kuhanjekelamu nawantu. (Yilwilu 20:20) Twakeñaña cheñi njila jakushimwinamu wunsahu wamumpanji; mpinji yejima twafwilaña kutachika kuhanjeka nawantu hansañu yayiwahi neyi chinatwesheki. Njila jitwazatishaña hakushimwina jinateli kushiyashana kwesekeja nachidi yuma. Hela chochu, chuma chalema dichi ichi: ‘Twayaña’ nakukeñakeña antu atelela.—Matewu 10:11.

17. ‘Twelishaña ñahi atumbanji’?

¹⁷ Kuhiñahu Yesu walumbulwili nkeñelu yaniwu mudimu nindi yekala, “[yakwilisha] antu akunyuza yejima ekali atumbanji.” (Vasi 19) ‘Twelishaña ñahi atumbanji’? Kambanji hikadizi, muntu anakudizishawu. Hela chochu, kwilisha atumbanji hichaya mukwila nawu kudizisha hohu antuku. Neyi tunakudiza Bayibolu nawantu, chikonkwanyi chetu chekala chakuyikwasha kulonda ekali akakumulondela Kristu. Neyi chinatwesheki, twakonkomwenaña hachakutalilahu chaYesu kulonda atudizi etu amumoneña neyi Ntañishi nawa Chakutalilahu chawu, kuhanda neyi chahandileñayi nikuzata mudimu wazatileñayi.—Yowanu 13:15.

18. Muloñadi chipapatishu chichekalila chuma chasweja kulema muchihandilu chakambanji?

 ¹⁸ Chuma chalema muniwu mudimu achishimuna mumazu akwila nawu: “Muyipapatisheña mwijina daTata nidaMwana nidaspiritu yajila.” (Vasi 19) Chipapatishu dichuma chasweja kulema muchihandilu chakambanji, muloña dichinjikijilu chamwekeshaña nawu muntu nadihani namuchima wumu kudi Nzambi. Dichi, hakwila nawu muntu akahandi watela kupapatishewa. (1 Petulu 3:21) Eña, neyi atwalekahu kuzata nañovu hakumukalakela Yehova, kambanji wapapatishewa wukutalilaña kudiluñisha yuma yayiwahi yakabula kumana mwituña dadiha dinakwinza. Mwakwashahu dehi muntu kwikala kambanji wapapatishewa waKristu? Kukwasha kambanji kupapatishewa hichuma chaletaña muzañalu chikupu mumudimu wakushimwina wawakaKristu.—3 Yowanu 4.

19. Yumanyi yitwadizishaña atumbanji, nawa muloñadi chiyatela kutwalekelahu kudiza nihanyima yachipapatishu?

¹⁹ Yesu walumbulwili chuma chikwawu chaniwu mudimu nindi: “Muyidizisheña ahembeña yuma yejima yinnayileji enu.” (Vasi 20) Twadizishaña atumbanji kulonda ovwahileña nshimbi jaYesu, kushilahu ninshimbi yakumukeña Nzambi, kukeña akwetu antu, nikwilisha atumbanji. (Matewu 22:37-39) Twayidizishaña chovu-chovu kulonda eluki  chakulumbulula chalala chamuBayibolu nikuhakwilaku yuma yakuhwelelawu. Neyi anashikihu dehi kukalakala mumudimu wakushimwina, twazataña nawu hamu, kuyidizisha kuhitila muyuma yitwahoshaña kushilahu niyitwelaña kulonda niwena atwesheña kuzata chiwahi iwu mudimu. Antu anapapatishewi akeñekaña kuyikwasha munjila yikwawu kulonda ashindeña kukala kunateli kumonawu neyi atachika kumulondela Kristu.—Luka 9:23, 24.

20, 21. (a) Muloñadi chitwatela kubula kuchiinina neyi tunakuzata mudimu watwinkayi Yesu? (b) Muloñadi chitukubulila kufunta hanyima hayinu mpinji, nawa chumanyi chitwatela kufwila kwila?

²⁰ Mazu akukumishaku ahosheliyi Yesu hakuhana mudimu windi atukoleshaña hama, wahosheli nindi: “Tiyenu! Ami nukwikalaña nanenu mafuku ejima kushika nikukukuma kwanshakaminu yamakonu.” (Matewu 28:20) Yesu welukili nindi iwu mudimu walema. Welukili cheñi nindi mpinji yikwawu kukalakala iwu mudimu kukaletesha akankunyi kukabisha atumbanji twindi. (Luka 21:12) Hela chochu, hitwatela kuchiinaku. Nlomboli yetu hakeñaña nindi tuzati iwu mudimu nkawetu hela chakubula kutukwashaku. Kwiluka netu Muntu wukweti “wuswa wejima mwiwulu niheseki” watukwashaña hakuzata iwu mudimu, chatukoleshaña chikupu.

²¹ Yesu wayikanini atumbanji twindi nindi wukayikwashaña hakakalakalañawu mudimu wawu wakushimwina yaaka yejima kushika “nikukukuma kwanshakaminu yamakonu.” Twatela kutwalekahu kuzata mudimu watwinkayi Yesu sampu kukuma kunashiki. Ayinu bayi neyi diyi mpinji yakufunta hanyimaku. Mudimu weneni wakwaañula wakuspiritu wuchidi kutwalekahu. Antu amavulu akweti nyichima yayiwahi enda ayipompesha. Hakwikala akakumulondela Kristu, tufwilenu kuzata mudimu weneni watwinkawu. Tuzatisha mpinji yetu, ñovu jetu nimaheta etu hakushikija nshimbi yaKristu yakwila nawu: “Yenu mwakelishi . . . atumbanji.”