1, 2. Muloñadi chichinateli kutukalila kwikala nawubwambu wawuwahi naYehova nkawetu, nawa yumanyi yatwililayi Yesu Kristu yikutukwasha kuswina kwakwihi naNzambi?

 KOMANA mwajimbalahu dehi? Munateli kwanuka ifuku dimwajimbeli hampinji yimwayileña nakuhempula ibwambu denu hela ntaña yenu. Chimwendeliku chintampu munjila yimwabula kwiluka, komana mwemeni nakwihula njila yimwatela kuya? Toñojokenu chimukutiya neyi chakwila muntu wukweti luwi ayila nindi: “Nlondeleña nukukutwala kuwunakuya” chatela ayileji hohu njila. Mukuzañalala chikupu!

² Chumichi dichatwililañayi niYesu Kristu. Chakadi wakutukwasha hitwadi kwikala nawubwambu wawuwahi naNzambiku. Muloña wanshidi yitwaswana nikubula kuwanina, antu ajimbala “anadaambuli kuwumi waNzambi.” (AEfwesesa 4:17, 18) Hakwila nawu tuwani njila chiña atukwasha. Yesu, Chakutalilahu chetu wukweti luwi, hakuminaña dakutufumba nikutuleja njila hohuku; welaña yuma yayivulu. Neyi chitwadizili muKapetulu 1, Yesu nakututambika nindi: “[Inzaku] wiikali mukakunlondela.” (Maku 10:21) Hela chochu, watuleja cheñi muloña waweni wutwatela kwitejela iwu mutambi. Mpinji yimu Yesu wahosheli nindi: “Ami yami njila, chalala niwumi. Kwosi muntu wukwinza kudi Tata, chiña ahitila mudi ami.” (Yowanu 14:6) Tuhanjekenu yuma yaleteshaña kuswina kwakwihi naTata kwiikali kwaswayi kuhitila hohu mudi Mwana. Muloña wayumiyi, tukuhanjeka chaleteshaña Yesu ekali, “njila, chalala niwumi.”

3. Muloñadi chitwatela kuswinina kwakwihi naNzambi kuhitila mudi Yesu?

³ Ichi dichuma chatachi nawa chasweja kulema, tunateli kuswina kwakwihi naNzambi kuhitila mudi Yesu muloña Yehova wamutonda Mwanindi kulonda azati mudimu walema. a Tata wamwilisha kwikala muntu walema kulonda ashikijilimu yuma yejima yafuukwiliyi. (2 AKorinda 1:20; AKolosi 1:18-20) Hakwila twiluki mudimu walema wazatañayi Mwana, twatela kwiluka chuma chamwekeni mwitempa daEdeni chelili antu ayedi akusambila adibombi naSatana nakudikaña naYehova.—Kutachika 2:16, 17; 3:1-6.

4. Kudikaña kwadikañiliwu muEdeni kwaleteli nsañwinyi, nawa Yehova wafuukwilihu kwiladi hakumanisha iyi nsañu?

⁴ Kudikaña kwadikañiliwu muEdeni kwaleteli nsañu yakundama yileñaleña yaNzambi yejima: Komana owu wukweti ijina daYehova mwamweni wajila, wamuwahi, waloña nawa wamwekeshaña kukeña muyuma yelañayi? Hakwila nawu yamanishi iyi nsañu, Yehova wafuukwilihu nindi mwana wakuspiritu waloña enzi hamaseki. Mudimu wazatiliyi iwu mwana waloña wakuspiritu wadiña walema chikupu. Wahanini wumi windi kulonda ajiliki ijina daTata yindi nikwikala ifutu danyiloña dakwamwina nachu antu. Chadiña chaswayi kumanisha kukala kwejima kwafumini mukudikaña kwaSatana muloña mwana atondawu watwalekelihu kwikala washinshika nichafwiliyi. (AHeberu 2:14, 15; 1 Yowanu 3:8) Ilaña Yehova wukweti anyana amavulu aloña akuspiritu. (Danyeli 7:9, 10) Mwananyi atondeliyi kulonda azati iwu mudimu wasweja kulema? Yehova watondeli “Mwanindi wumu hohu,” wekalili Yesu Kristu.—Yowanu 3:16.

5, 6. Yehova wamwekesheli ñahi nindi wamukuhweleleli Mwanindi, nawa chumichi chashindameneni hachumanyi?

⁵ Komana twatela kuhayama chamutondeliwu Yesu kudi  Yehova? Inehi! Tata wamukuhweleleli chikupu Mwanindi wumu hohu. Henohu kuchidi yaaka yayivulu hakwila nawu Mwanindi enzi hamaseki, Yehova washimwineñahu dehi nindi iwu Mwana wakekala washinshika hela chakwila wakamona makabi ashiyashana. (Isaya 53:3-7, 10-12; Yilwilu 8:32-35) Chumanyi chitwadizilaña kumazu ahosheleliyi chadimu Yehova nindi Mwanindi wakatwalekahu kwikala washinshika? Kufwana yileñaleña yejima yikweti maana, Mwana niyena wadiña nawuswa wakudifuukwila, ñovu yakwila chuma chinakeñiyi. Ilaña Yehova wamukuhweleleli chikupu chakwila washimwineñahu dehi nindi Mwanindi wakekala washinshika. Chumanyi chaletesheli yamukuhweleli? Wadiña wamwiluka. Yehova wamwiluka Mwanindi chikupu nawa weluka chafwilañayi Mwanindi kumuzañalesha. (Yowanu 8:29; 14:31) Mwana wamukeña Tata yindi, Yehova niyena wamukeña Mwanindi. (Yowanu 3: 35) Kukeña kwekala hakachi kaTata naMwana dikwayileteshaña ekali anuñañana nikudikuhwelela chikupu.—AKolosi 3:14.

⁶ Muloña wakulema kwamudimu wazatañayi Mwana, chamukuhwelelawu kudi Tata yindi nikukeña kwamunuñañeshaña Mwana naTata yindi, yumiyi yikutuletesha tukuhweleli netu chaswayi kuswina kwakwihi naNzambi kuhitila mudi Yesu hohu. Hela chochu, kudi chuma chikwawu chikuletesha tukuhweleli netu iwu Mwana hohu diyi wunateli kutulombola kudi Tata.

7, 8. Muloñadi Yesu chahosheleliyi chakubula kuhita mumbadi nindi kwosi wamwiluka Tataku, “chiña Mwana”?

⁷ Kudi yuma yitwatela kwila hakwila twiikali amabwambu jaYehova. (Isamu 15:1-5) Mwana diyi hohu weluka chikupu yuma yitwatela kwila hakwila twovwahileña nshimbi jaNzambi kulonda atutiyeña kuwaha. Yesu wahosheli nindi: “Tata yami nanyinki yuma yejima nawa kwosi muntu wamwiluka chikupu Mwanaku, chiña Tata; nawa kwosi muntu  wamwiluka chikupu Tataku, chiña Mwana, ninowu akukeña kulumbulwilayi Mwana chekalayi Tata.” (Matewu 11:27) Tushinshikenu chaletesheli Yesu ahoshi chakubula kuhita mumbadi nindi, kwosi muntu wamwiluka chikupu Tataku “chiña Mwana.”

⁸ Chineli “diyi wedi wayileñaleña yejima,” iwu Mwana wukweti wubwambu wadimena naYehova. (AKolosi 1:15) Fwikijenu kudikunda kwadiña hakachi kaMwana naTata yindi hadi yaaka yayivulu hampinji yachidiñawu hohu ayedi, kufuma tuhu hatachikiliwu kuleña yuma kushika nimpinji yaleñeliwu yileñaleña yikwawu yakuspiritu. (Yowanu 1:3; AKolosi 1:16, 17) Fwikijenu kukooleka kwabadika kwadiña naMwana hakwikala hamu naTata yindi, nakudiza chatoñojokañayi Tata yindi hayuma nikwiluka yuma Yafuukulayi ninshimbi jindi. Mwamweni, hikulebumuna wanyi neyi ahosha nawu Yesu wamwiluka Tata yindi chikupu kubadika muntu wudi wejima. Kudikunda kweniku kwaletesheli Yesu kumwekesha yilwilu yaTata yindi kubadika muntu wudi wejima.

9, 10. (a) Indi Yesu wamwekesheli ñahi yilwilu yaTata yindi? (b) Twatela kwiladi hakwila nawu Yehova atutiyeña kuwaha?

⁹ Yuma yatañishileñayi Yesu yamwekesheli chikupu nawu welukili chatoñojokañayi Yehova niyuma yakeñañayi nindi akakudifukula Indi eleña. b Yesu wamwekesheli cheñi yilwilu yaTata yindi munjila yikwawu yalema. Wahosheli nindi: “Muntu wejima wunamoni ami, namoni niTata.” (Yowanu 14:9) Wamwimbujoleli Tata yindi chachiwahi muyuma yejima yahosheleñayi niyelileñayi. Neyi tutaña nsañu yaYesu muBayibolu yahosha hamazu añovu nawa ekoku azatishileñayi hakutañisha, wushona wamuletesheleña kuuka antu nikuyitoñojokelaku kwamuletesheleña kuwulumuna madilu, tunateli kumufwikija Yehova nakuhosha nikwila yuma yoyimu. (Matewu 7:28, 29; Maku 1:40-42; Yowanu 11:32-36)  Tunateli kumwiluka Tata chekalayi niyuma yafuukulayi kwila kuhitila mumazu ahosheleña Mwana niyuma yelileñayi. (Yowanu 5:19; 8:28; 12:49, 50) Hakwila nawu Yehova atutiyeña kuwaha, twatela kutiyilila kuntañishilu yaYesu nikwila yuma yelileñayi.—Yowanu 14:23.

¹⁰ Chineli Yesu wamwiluka Yehova nankashi nawa wamwimbujolaña chikupu, chikutuhayamisha wanyi hakwiluka netu Yehova wafuukulahu nindi Mwana ekali njila yakutukwashilamu kuswina kwakwihi naTata. Chineli tuneluki dehi chaletesha tuswineña kwakwihi naYehova kuhitila mudi Yesu hohu, ichi dinu tutalenu mwatalisha mazu aYesu akwila nawu: “Ami yami njila, chalala niwumi. Kwosi muntu wukwinza kudi Tata, chiña ahitila mudi ami.”—Yowanu 14:6.

11. Muloñadi chitwatelela kwikala nawubwambu wawuwahi naNzambi kuhitila mudi Yesu hohu?

¹¹ Tunadizi dehi netu hitunateli kuswina kwakwihi naNzambi chakadi kuhitila mudi Yesuku. Tutalenu iyi nsañu chiyatukundama. Yesu diyi “njila” muloña tunateli kwikala nawubwambu wawuwahi naNzambi kuhitila mudi yena hohu. Muloñadi? Muloña wakwikala washinshika kushika nikukufwa, Yesu wahanini wumi windi kwikala ifutu danyiloña. (Matewu 20:28) Hitwadi kutwesha kuswina kwakwihi naNzambi chakadi ifutu danyiloñaku. Nshidi yasha mukoleku hakachi kawantu naNzambi, muloña Yehova wajila hetejaña nshidiku. (Isaya 6:3; 59:2) Ilaña mulambu waYesu wafumishilihu iwu mukoleku; mulambu weniwu wabutili hanshidi. (AHeberu 10:12; 1 Yowanu 1:7) Neyi twiteja nikukuhwelela ifutu danyiloña dahanayi Nzambi kuhitila mudi Kristu, Yehova wukututiyaña kuwaha. Kwosi njila yikwawu yitwatela ‘kukundaminamu kudi Nzambiku.’—ARoma 5:6-11.

12. Yesu wekala ñahi “njila”?

¹² Yesu wekala “njila” hampinji yitunakulomba. Tunateli  kulomba kudi Yehova kuhitila mudi Yesu nakwiluka netu kulomba kwetu kwakufuma hamuchima akukutiya. (1 Yowanu 5:13, 14) Yesu yomweni wahosheli nindi: “Neyi mumulomba Tata chuma, wakayinkachu mwijina dami. . . . Lombenu, mukutambwila kulonda muzañalu wenu wuvuli chikupu.” (Yowanu 16:23, 24) Kafwampi, tunateli kumulomba Yehova mwijina daYesu nikumutena netu “Tata yetu.” (Matewu 6:9) Yesu wekala cheñi “njila” kuhitila muyuma yeliliyi. Neyi chitwadiza dehi, Yesu wamwimbujoleleña Tata yindi chikupu. Dichi yuma yeliliyi Yesu yatudizishaña yuma yitwatela kwila hakwila tumuzañalesheña Yehova muchihandilu chetu. Hakwila tuswini kwakwihi naYehova twatela kwenda mumahaji aYesu.—1 Petulu 2:21.

13, 14. (a) Yesu wahosheleña ñahi chalala? (b) Hakwila nawu Yesu ekali “chalala,” wateleli kwiladi, nawa muloñadi?

¹³ Yesu wahosheleña hachalala mpinji yejima hamazu aTata yindi awuprofwetu. (Yowanu 8:40, 45, 46) Mukanwa kaYesu hiyawaninimu makudiku. (1 Petulu 2:22) Antu amudimbulwileña niwena elukili nawu watañishileña “njila yaNzambi muchalala.” (Maku 12:13, 14) Hela chochu, Yesu chahosheliyi nindi: “Ami yami . . . chalala,” hatalishili mukwila nindi walejeleña antu chalala kuhitila munhoshelu yindi, kushimwina nikutañisha hohuku. Ilaña Yesu hichalala munjila jikwawu.

¹⁴ Ilukenu nenu Yehova woneneni ansoneki aBayibolu kusoneka wuprofwetu wawuvulu wahosha hadi Mesiya hela Kristu, henohu kunashali yaaka yayivulu. Iwu wuprofwetu washimwineñahu dehi nsañu yakundama hachihandilu chindi, mudimu windi nikufwa kwindi. Kubombelahu, Nshimbi jaMosi jadiña nawuprofwetu wahosheli hadi Mesiya. (AHeberu 10:1) Komana Yesu wadi kushinshika kushika nikukufwa kulonda ashikiji yuma yejima yaprofweteliwu hadi yena? Chumichi dichadi kuletesha Yehova amulemeshi  nawu hiNzambi wawuprofwetu walala. Iwu mudimu wasweja kutoha washindameneni hadi Yesu. Yesu wamwekesheli nawu wuprofwetu wadiña walala kuhitila mumazu ahosheliyi niyuma yejima yakoñeleñayi nichahandileñayi. (2 AKorinda 1:20) Mwamweni, Yesu wadiña “chalala.” Muloña yuma yeliliyi hamaseki yaletesheli mazu aYehova awuprofwetu walala ashikijewi.—Yowanu 1:17; AKolosi 2:16, 17.

15. Indi kukuhwelela mudi Mwana kwatalisha mudihi, nawa kwila mwenimu kwalombolaña kuchumanyi?

¹⁵ Yesu diyi “wumi,” muloña mudi yena hohu dimutunateli kutambwila, “wumi walala.” (1 Timotewu 6:19) Bayibolu yahosha nawu: “Muntu wamukuhwelelaña Mwana wukweti wumi wahaya nyaaka; hakwila muntu wadikañaña naMwana hakekala nawumiku, ilaña kuzuwa kwaNzambi kwakekala hadi yena.” (Yowanu 3:36) Indi kukuhwelela mudi Mwana kaNzambi kwatalisha mudihi? Kwatalisha mukwila nawu twakuhwelela netu hitunateli kwikala nawumi chakadi yenaku. Kubombelahu, kwatalisha mukwila nawu twamwekeshaña chikuhwelelu chetu nanyidimu, kutwalekahu kudiza hadi Yesu nikuzata nañovu kulonda tulondeleña yuma yatañishileñayi niyelileñayi. (Yakoba 2:26) Dichi, kukuhwelela mudi Mwana kaNzambi kwalombolaña kuwumi wahaya nyaaka, “mukanka wanyanya wanyikoku” wawakaKristu awayishewa, wakatambwila wumi wakuspiritu wabulaña kufwa, nawa “izaza deneni” “[da]wanyikoku amakwawu,” dikatambwila wumi wawanina muparadisa hamaseki.—Luka 12:32; 23:43; Chimwekeshu 7:9-17; Yowanu 10:16.

16, 17. (a) Yesu wakekala ñahi “wumi” nikudi antu afwa dehi? (b) Chumanyi chitwatela kukuhwelela?

¹⁶ Indi antu afwa dehi? Yesu ‘hiwumi’ nikudi antu afwa dehi. Hadiñayi kwakwihi nakumusañula ibwambu dindi Lazaru, Yesu wamulejeli Mata muhela aLazaru nindi: “Yami kusañuka niwumi. Muntu wejima wukunkuhwelela, hela  chakwila afwa, wakekala nawumi cheñi.” (Yowanu 11:25) Yehova wamwinka Mwanindi “nsapi jakufwa niJejamu,” dikwila nawu, wamwinka ñovu yakusañula. (Chimwekeshu 1:17, 18) Chineli wekala naniji nsapi, Yesu walemeshewa wakenzununa yenzelu yejamu dawantu ejima nakufumisha ejima adimu.—Yowanu 5:28, 29.

¹⁷ Yesu washimwini chenjililiyi hamaseki nimudimu wenjiliyi nakuzatayi namazu akwila nindi: “Ami yami njila, chalala niwumi.” Awa mazu alema hama kudi etu makonu. Anukenu nenu Yesu watwalekelihu nindi: “Kwosi muntu wukwinza kudi Tata, chiña ahitila mudi ami.” (Yowanu 14:6) Mazu aYesu achidi alema nimakonu neyi chiyadiñawu hampinji yayihosheliyi. Dichi twatela kukuhwelela chikupu netu neyi tumulondela Yesu, hitwamba kajimbalaku. Yena nkawindi hohu diyi wakatuleja njila yaya kudi “Tata.”

18. Chumanyi chakeñekaña hakwila twiikali atumbanji twaYesu alala?

¹⁸ Chineli Yesu wukweti mudimu walema hama nawa wamwiluka Tata chikupu, chumichi chatela kutusañumuna kumulondela Mwana. Neyi chitwadizili muKapetulu 1, kwikala atumbanji aYesu alala kwakeñekaña kwila yuma yitwahoshaña, bayi kukumina dakuhosha hohu hela kutoñojokaku. Kumulondela Kristu kwakeñekaña kwila yuma yatañishañayi nikulondela yuma yelañayi muchihandilu chetu. (Yowanu 13:15) Iwu mukanda wumunakutaña wukuyikwasha kwila mwenimu.

19, 20. Muniwu mukanda mudi yumanyi yinateli kuyikwasha hampinji yimunakufwila kumulondela Kristu?

¹⁹ Mutupetulu tunalondelihu, twakadiza chikupu chadiña chihandilu nimudimu waYesu. Tupetulu twenitu atwaambula muyibalu yisatu. Chatachi, twakashinshika hayilwilu yindi nichakoñeleñayi yuma. Chamuchiyedi, twakadiza chadikitileñayi hakushimwina nikutañisha. Chamuchisatu, twakadiza chamwekesheliyi kukeña. Kutachika naKapetulu  3, mutupetulu twejima tunalondelihu mudi chikasha chakudizisha chinakwila nawu, “Munateli Kumulondela Ñahi Yesu?” Nsona nimalwihu adi muniyi yikasha anayiloñeshi kulonda atukwashi kutoñojoka chitwatela kumwimbujola Yesu muyuma yitwahoshaña niyitwelaña.

²⁰ Kuhitila muwukwashu waYehova Nzambi, himukujimbala hela kwaambuka kudi yena muloña wanshidi yimwaswanaku. Hamuloña wakukeña, Yehova wadibondeli chikupu hakutemesha Mwanindi kulonda yatuleji njila yakwikala nawubwambu wawuwahi naNzambi. (1 Yowanu 4:9, 10) Chumichi chiyisañumuni kulonda muzatili haniku kukeña kwasweja kuhitila mukwiteja mutambi waYesu waakwila nawu: “Ikalaku mukakunlondela.”—Yowanu 1:43.