KAPETULU 1
‘Inzaku Wiikali Mukakunlondela’—Yesu Watalishili Mudihi?
“Chumanyi chinatela kwila hakwila nakekali nawumi wahaya nyaaka?”
1, 2. Mutambinyi wasweja kuwaha watela kutambwilawu antu, nawa lwihwinyi lutwatela kudihula?
MUTAMBINYI wawuwahi wumwatambwilahu dehi? Hadaha munakwanuka mpinji yayitambikiliwu kuchidika chalema, chidi neyi chawija chawulu chawantu ayedi imwakeña hama. Indi kwiji munakwanuka ifuku dayitambikiliwu kulonda mutachiki kuzata mudimu walema. Neyi mwatambwilahu dehi nyitambi yamuchidiwu, chakadi nikujina mwazañaleli nankashi nawa ayilemesheli hakuyitambika. Hela chochu, mwatambwila mutambi wasweja kuwaha. Wejima wetu twatambwila iwu mutambi. Nawa chihandilu chetu chashindamena hakwiteja iwu mutambi hela nehi. Hichuma chasweja kulema chitwatela kutondahu muwumi wetu.
2 Mutambinyi weniwu? Himutambi wafumaña kudi Yesu Kristu, Mwana kaNzambi Wañovu Jejima, Yehova, nawa awusoneka muBayibolu. HaMaku 10:21 twatañañahu mazu aYesu akwila nawu: ‘Inzaku wiikali mukakunlondela.’ Kafwampi, Yesu nakututambika wejima wetu. Twatela kudihula netu, ‘Nukwila ñahi?’ Ñakwilu yinateli kumwekana neyi yaswayi. Hinyi wunateli kukaana iwu mutambi wasweja kuwaha? Chawushona, antu amavulu akaanaña. Muloñadi?
3, 4. (a) Chumanyi chinateli kukomokawu antu hadi iyala wamuwanini Yesu nakumwihula chakwikala nawumi wahaya nyaaka? (b) Yilwilwinyi yayiwahi yatela yamweniyi Yesu mudi iwu mukwenzi nyuuli samaheta?
3 Chakutalilahu, toñojokenu hadi iwu iyala watambwilili iwu mutambi kudi Yesu kubadika hayaaka 2,000 yinahitihu. Wadiña muntu alemesheliwu nankashi. Wadiña nayuma yisatu yasweja kulemeshawu antu nawa yakomokañawu, wukwenzi, maheta nichifulu. Bayibolu yamulumbulula nawu “mukwenzi,” “waheta nankashi” nawa wadiña ‘hakachi kawanlomboli.’ (Matewu 19:20; Luka 18:18, 23) Hela chochu, iwu mukwenzi wadiña wambukaku chikupu. Watiyili wunsahu hadi Ntañishi Muneni, Yesu, nawa wakeñeli yuma yatiyiliyi.
4 Anyuuli amavulu munana mafuku hiyamulemesheleña Yesuku. (Yowanu 7:48; 12:42) Ilaña iwu nyuuli wadiña wambukaku. Bayibolu yatulejaña nawu: “Chayileñayi [Yesu] munjila, iyala wumu wenjili lufuchi nakumufukamina nakumwihula nindi: ‘Ntañishi Muwahi, chumanyi chinatela kwila hakwila nakekali nawumi wahaya nyaaka?’” (Maku 10:17) Talenu iwu muntu chakeñeliyi kuhosha naYesu, wayili lufuchi kudi Yesu hatooka neyi chadi kwilawu atuzweñi hela antu abula kulema. Kuhiñahu wamufukaminini Kristu. Dikwila nawu wadiña wadizoza nawa welukili nindi wakaankilili yuma yakuspiritu. Yesu walemesheli yilwilu yayiwahi yamuchidiwu. (Matewu 5:3; 18:4) Dihafumini ‘Yesu hakumutala iwu iyala nawa hakumumwekeshela kukeña.’ (Maku 10:21) Indi Yesu waakwili ñahi lwihu lwanona mukwenzi?
Mutambi Wasweja Kuwaha
5. Yesu wamwakwili ñahi iwu mukwenzi samaheta, nawa tuneluki ñahi netu “chuma” chabulili kwilayi hichatalishili mukwila nawu ekali kazweñiku? (Talenu cheñi tumazu twaheshina.)
5 Yesu wahosheli nindi Tata yindi waheni nsañu yayivulu yakundama kulwihu lwalema lwahosha hakuheta wumi wahaya nyaaka. Washimwini nsañu yekala muNsona, nawa ona mukwenzi wetejeli nindi wadiña nakwovwahila Nshimbi jaMosi chikupu. Hela chochu, chineli wadiña namaana chikupu, Yesu welukili yuma yadiña mumuchima windi. (Yowanu 2:25) Welukili nindi ona nyuuli wadiña nakukala kweneni kuspiritu. Dichi Yesu wamulejeli nindi: “Kudi chuma chiwunabuli kwila.” Ichi “chuma” chadiña hichumanyi? Yesu wamulejeli nindi: “Yaku wakalandishi yuma yiwukweti winki atuzweñi mali.” (Maku 10:21) Komana Yesu watalishili mukwila nindi muntu watela kwikala kazweñi hakwila amukalakeli Nzambi? Inehi. a Kristu wafuñunwineña chuma chalema nankashi.
6. Yesu wamulejeli iwu iyala nindidi, nawa chakwiliyi iwu mukwenzi nyuuli samaheta chamwekesheli ñahi yuma yadiña mumuchima windi?
6 Hakwila nawu amuleji chuma chabulili kwilayi, Yesu wamutambikili ona iyala nindi: ‘Inzaku wiikali mukakunlondela.’ Fwikijenu chumichi, Mwana kaNzambi Mukakubadika Chikupu, yomweni diyi wamutambikili ona iyala kulonda amulondeleña! Yesu wamukanini cheñi wuloku wasweja kuwaha. Wamulejeli nindi: “Wukwikala neheta mwiwulu.” Komana ona mukwenzi nyuuli samaheta washikeneni kwiteja iwu mutambi wasweja kuwaha? Nsañu yahosha nawu: “Watiyili kutama chamwakwiliwu, dichi wayili iku naneñi muloña wadiña nayuma yayivulu.” (Maku 10:21, 22) Dichi mazu ahosheliyi Yesu abulili kukuhwelelayi amwekesheli kukala kwadiña mumuchima waniwu muntu. Chakadi nikujina, washili nankashi muchima kumaheta indi, chifulu chadiñayi nachu nikulema kwenzaña muloña wakwikala nayumiyi. Chawushona, kukeña kwakeñeliyi maheta kwahambakeni kukeña kwamukeñeliyi Kristu. Dichi “chuma” chabulili kwilayi hikumukeña Yesu niYehova namuchima wejima. Muloña wakwila iwu mukwenzi hadiña nakukeña kwamuchidiwuku, wakaanini mutambi wasweja kuwaha! Indi iwu mutambi wamutambikiliwu ona iyala wayikundama ñahi?
7. Tuneluki ñahi netu mutambi waYesu watukundama ninetu makonu?
7 Yesu hakuminini dakumutambika ona iyala hela antu antesha hohuku. Yesu wahosheli nindi: “Neyi muntu nakukeña kunlondela . . . atwalekihu kunlondela.” (Luka 9:23) Ilukenu nenu ‘muntu’ wejima nateli kwikala mukakumulondela Kristu neyi mwamweni “nakukeña.” Nzambi wakokelaña antu ashinshika kudi Mwanindi. (Yowanu 6:44) Bayi aheta hohu, hela atuzweñi, indi kwiji akumunza wumu hela ikowaku, nawa bayi antu adiñaku hayina mpinji hohuku, ilaña antu ejima ayinka kukooleka kwakwiteja mutambi waYesu. Dichi mazu aYesu akwila nawu, ‘Inzaku wiikali mukakunlondela’ ayikundama ninenu. Muloñadi chimukukeñela kumulondela Kristu? Nawa yumanyi yakeñekaña hakumulondela?
Muloñadi Chitwatela Kwikalila Akakumulondela Kristu?
8. Chumanyi chakeñañawu antu ejima, nawa muloñadi?
8 Kudi nsañu yalala yitwatela kwiluka: Twakeñaña chikupu nlomboli wakutulombola chiwahi. Bayi neyi antu ejima etejaña nawu akeñaña nlomboli wakutulombola chiwahiku, hela chochu, dichuma chitwakeñaña. Kaprofwetu kaYehova Yeremiya amwoneneni kusoneka iyi nsañu yalala chikupu nawu: “Eyi Yehova, neluka chikupu nami muntu hakutwesha kutonda yomweni njila yinateli kwendayiku. Muntu wunakwenda hakutwesha kwiluka nichakulombola ntampu jindiku.” (Yeremiya 10:23) Antu hiyakweti wuswa hela ñovu yakudiyuula aweniku. Chalala, mukuhanda kwawantu kwejima anlomboli akañanyaña kuyuula chiwahi. (Mukwakutañisha 8:9) Mumafuku aYesu, anlomboli ayandishileña antu nikuyidimba. Yesu washimwini hatooka to-o hadi antu amweneñawu nawu amukunkulwayi nindi adiña “neyi anyikoku akadi kabiña.” (Maku 6:34) Nimakonu antu anakuyilombola chatama. Wejima wetu twakeñaña nlomboli itwatela kukuhwelela nikulemesha. Komana Yesu washikilamu kwikala nlomboli itwatela kukuhwelela nikulemesha? Talenu yuma yayivulu yikuletesha twiteji netu nashikilimu.
9. Muloñadi Yesu chekalilayi wambukaku nawanlomboli amakwawu ejima?
9 Chatachi, Yesu amutondeli kudi Yehova Nzambi. Anlomboli amavulu ayitondaña kudi akwawu antu abula kuwanina, nawa avula kuyidimba nikuyiluwañesha. Yesu hinlomboli wambukaku. Nkumbu yindi yatulejaña chumichi. Mazu akwila nawu “Kristu,” “[ni]Mesiya,” aya mukwila nawu “Wawayishewa.” Eña, Yesu amuwayishili, hela netu amutondeli kudi Mwanta Wabadika wakuleña kwejima kulonda azati mudimu windi wajila. Yehova Nzambi wahosheli kutalisha hadi Mwanindi nindi: “Talenu! Kambuñami inatondeli, inakeña, inatiyaña kuwaha! Nakasha spiritu yami hadi yena.” (Matewu 12:18) Nleñi yetu hohu diyi weluka nlomboli watela kutulombola chiwahi. Maana aYehova asweja kubadika, dichikuletesha tukuhweleli nlomboli atondayi.—Yishimu 3:5, 6.
10. Muloñadi yuma yeliliyi Yesu chiyawahila antu kuyimbujola?
10 Chamuchiyedi, Yesu watwimikila chakutalilahu chachiwahi hama. Nlomboli wamuwahi wekala nayilwilu yayiwahi yatela kukomoka nikwimbujolawu antu jindi. Walombolaña kuhitila mukwila yuma yayilejañayi nikuyisañumuna kwikala antu amawahi. Yilwilwinyi yimukukeña chikupu nenu nlomboli ekali nayu? Kuhamuka tahindi Maana? Indi kwiji wushona? Indi kuumika mumpinji yamakabi? Chimukudizaña nsañu yachihandilu chaYesu hadiñayi hamaseki, mukwiluka nenu wadiña naniyi yilwilu kushilahu niyikwawu. Chineli wamwimbujoleleña chikupu Tata yindi wamwiwulu, Yesu wadiña nayilwilu yaNzambi yejima. Wadiña muntu wawanina muyuma yejima. Dichi yuma yejima yeliliyi, mazu ejima ahosheliyi niyuma yejima yatoñojokeleñayi mwekala chuma chachiwahi chitwatela kwimbujola. Bayibolu yahosha nawu wayishilili “chakutalilahu, kulonda mwendi mumahaji indi.”—1 Petulu 2:21.
11. Yesu wamwekesheli ñahi nindi ‘hikabiña wamuwahi’?
11 Chamuchisatu, Kristu welileña chikupu mwahosheleñayi, nindi: “Yami kabiña wamuwahi.” (Yowanu 10:14) Antu akushankulu elukili iyi nhoshelu. Atubiña azatileña nañovu hakukiña nyikoku yahembeleñawu. “Kabiña wamuwahi” wadiña nakusha wumi windi muwubanji kukoola nyikoku. Chakutalilahu, Davidi nkakulula yaYesu, wadiña kabiña hachidiñayi kansi, nawa washili wumi windi muwubanji kapampa kakavulu kulonda apulwishi nyikoku yindi kudi kanyama wamwisaña wazuwa. (1 Samweli 17:34-36) Yesu welili yuma yabadika hakusha wumi windi muwubanji kukoola atumbanji twindi. Wayifwilili. (Yowanu 10:15) Anlombolinyi anateli kudihana muniyi njila?
12, 13. (a) Indi kabiña welukaña ñahi nyikoku yindi, nawa munjilanyi mwamwilukilañawu kudi nyikoku? (b) Muloñadi chimunakukeñela kuyilombola kudi Kabiña Wamuwahi?
12 Yesu wamwekesheli nindi “hikabiña wamuwahi” nimuyuma yikwawu. Wahosheli nindi: “Neluka anyikoku ami, nawa anyikoku ami añiluka.” (Yowanu 10:14) Toñojokenu chuma chakeñeleñayi Yesu nindi antu afwikijeña hakuzatisha ichi chakutalilahu. Muntu wunakutala mukanka wawanyikoku nateli kuyimona nindi hinyikoku hohu. Hela chochu, kabiña weluka nyikoku yejima. Welukaña mukaji wunakukeña kumukwasha neyi nasemi dehi, nimwana kamukoku wazeya watela kusendayi nimwana kamukoku wanyanya wunakañanyi kwenda chintampu chachilehi niwakata hela wunadikatishi. Anyikoku niwena eluka kabiña kawu. Eluka izu dindi nawa hiyaluwukilaña izu dakabiña wacheñiku. Neyi atiya nawu kabiña nakuyibabesha, anyakalaña kutiyilila. Alondelaña kwejima kwayilombolañayi. Nawa weluka kwakuyilombola. Weluka kwekala munyenvu, kwekala menji awunda nikwekala matahu amawahi. Anyikoku elukaña nawu akiñewa muloña kabiña nakuyihemba.—Isamu 23.
13 Komana mukukeña wanyi kuyiyuula kudi nlomboli wamuchidiwu? Kabiña Wamuwahi waya mpuhu yayiwahi yakuhemba atumbanji twindi muniyi njila. Washiika kuyilombola kuwumi wawuwahi makonu nihaya nyaaka. (Yowanu 10:10, 11; Chimwekeshu 7:16, 17) Dichi twatela kwiluka chiwahi yuma yakeñekaña hakumulondela Kristu.
Kwikala Mukakumulondela Kristu Kwatalisha Mudihi?
14, 15. Hakwila muntu ekali mukakumulondela Kristu, yumanyi yatela kwilayi chatela ahosheña hohu nawu nidi mukaKristu hela nawu namukeña Yesu chikupu?
14 Antu amavulu makonu atoñojokaña nawu eteja dehi mutambi waKristu. Kafwampi aditenaña nawu akaKristu. Hadaha ekala muchechi mwayaña anvwali jawu nawa mwayipapatishiliwu. Indi kwiji ahoshaña nawu amukeña Yesu chikupu nikumwiteja nawu diyi Chamwinu chawu. Komana ichi chinayi mukwila nawu hiyakakumulondela Kristu? Komana dimwatalishiliyi Yesu hampinji yatutambikiliyi nindi twiikali akakumulondela? Kwekala yuma yayivulu yakeñekaña hakwila muntu ekali mukakumulondela Kristu.
15 Antu amavulu ashakamaña mumatuña mudi antu aditenaña nawu hiyakaKristu. Komana antu ashakamaña munawa matuña ovwahilaña nikwila yuma yatañishileñayi Yesu? Tahindi munawa matuña mwenzala kuhelañana, makabisha, madombu niyuma yatama yitwamonaña mumatuña mwekala antu abula kwikala akaKristu?
16, 17. Chumanyi chabulaña kwilawu antu aditenaña nawu hiyakaKristu, nawa akakumulondela Kristu alala ambukaku ñahi?
16 Yesu wahosheli nindi atumbanji twindi alala hiyakayilukila hohu kumazu ahoshañawu hela kwijina daditenañawuku, ilaña akayilukila kuyuma yakoñañawu. Chakutalilahu, wahosheli nindi: “Bayi neyi muntu wejima wantenaña nindi, ‘Mwanta, Mwanta,’ wakeñila muWanta wamumawuluku, chiña hohu muntu welaña nkeñelu yaTata yami wudi mumawulu diyi wakeñilamu.” (Matewu 7:21) Muloñadi antu amavulu amutenaña Yesu nawu hiMwanta wawu chakañenyañawu kwila nkeñelu yaTata yindi? Anukenu ona mukwenzi nyuuli samaheta. Munjila yoyimu ‘chuma chabulaña kwilawu’ antu aditenaña nawu hiyakaKristu, hikumukeña Yesu namuchima wejima niNowu wamutemesheli.
17 Munjilanyi? Komana antu amavulu aditenaña nawu hiyakaKristu hiyahoshaña cheñi nawu amukeña Kristuku? Dichahoshañawu. Ilaña kumukeña Yesu niYehova kwakeñekaña yuma yayivulu kubadika kuhosha hohu. Yesu wahosheli nindi: “Muntu wankeña, wukuhemba izu dami.” (Yowanu 14:23) Cheñi wahosheli hamu neyi kabiña nindi: “Anyikoku ami atiyaña izu dami nawa nayiluka, dichi anlondelaña.” (Yowanu 10:27) Eña, hitwatela hohu kumukeña Kristu namazu itwahoshaña hela nachitwatiyañaku, ilaña twatela kumukeña nimuyuma yitwelaña.
18, 19. (a) Kudiza hadi Yesu kunateli kutuletesha kwiladi? (b) Awunu mukanda awusonekeladi, nawa wukukwasha ñahi antu adimonaña nawu anamulondeli Kristu hadi yaaka yayivulu?
18 Hela chochu, yuma yitwelaña yamwekeshaña chitwekala. Dichi twatela kufwilaña kuhimpa wuntu wetu. Yesu wahosheli nindi: “Hakwila akekali nawumi wahaya nyaaka, atela kukwiluka eyi Nzambi walala wumu hohu, ninowu iwatemesheli Yesu Kristu.” (Yowanu 17:3) Neyi tudizaña nikutoñojoka chikupu hansañu yalala yahosha hadi Yesu, chumichi chikutusañumuna munyichima yetu. Tukumukeña chikupu nawa tukufwilaña kumulondela hefuku-hefuku.
19 Dichi awunu mukanda awusoneka kulonda wutukwashi kwiluka chikupu chakumulondela Yesu, bayi neyi walumbulula yuma yejima yamwekeni muchihandilu chindiku. b Awusoneka kulonda wutukwashi kushinshika muchibanjilu chaNsona nakudihula netu, ‘Komana mwamweni inakumulondela Yesu?’ (Yakoba 1:23-25) Hadaha mwadimonaña nenu mwekala mukoku walombolañawu kudi Kabiña Wamuwahi hadi yaaka yayivulu. Komana munateli kwiteja wanyi nenu mpinji yejima tunateli kuwana njila jitunateli kuwahishilamu chumichi? Bayibolu yatukonkomwenaña nawu: “Desekenuña kulonda mwiluki neyi mudi muchikuhwelelu; dishinshikenuña kulonda mwiluki chimwekala enu aweni.” (2 AKorinda 13:5) Twatela kuzata nañovu kulonda twiluki chikupu netu anakutulombola kudi Kabiña Wamuwahi watukeña, Yesu, atondayi Yehova yomweni kulonda atulomboleña.
20. Chumanyi chitwakadiza mukapetulu kanalondelihu?
20 Dichi chimukudizaña wunu mukanda wuyikwashi kumukeña Yesu niYehova chikupu. Kukeña kweniku chikukuyilombolaña muchihandilu mukwikala nakuwunda nimuzañalu mukanu kaayi kakakulu nawa mukutwalekahu kumuhameka Yehova haya nyaka hakutwinka Kabiña Wamuwahi. Kafwampi chitukudizaña hadi Kristu twatela kushindamena hachikuku chalala. Dichi muKapetulu 2 twakadiza mudimu wazatañayi Yesu hakwila mwafuukulayi Yehova.
a Yesu halejeli antu ejima akumulondela kushiya maheta awuku. Hela chakwila wahosheli nindi antu aheta chakayikalila kwiñila muWanta waNzambi, wahosheli cheñi nindi: “Yuma yejima kudi Nzambi yikutwesheka.” (Maku 10:23, 27) Kafwampi, antu antesha adiña aheta ekalili akakumulondela Kristu. Ayifumbili muchipompelu chawakaKristu kutalisha hamaheta, ilaña hiyayilejeli kuhana maheta awu ejima kudi atuzweñiku.—1 Timotewu 6:17.
b Neyi munakukeña kwiluka yuma yejima yamwekeni muchihandilu chaYesu mundonda yalumbululawu muwihi, talenu mukanda wunakwila nawu Yesu—Diyi Njila, Chalala, Wumi, wedishawu kudi aYinsahu jaYehova.