1-3. (a) Muloñadi mama yawantu chawahishilañayi mwanindi? (b) Muloñadi Yehova chakeñelañayi nindi twikali awunyonji?

FWIKIJENU mama yawantu nakuwahisha mwanindi kulonda yayi kushikola. Wukumuwelesha nikumuvwika chiwahi yakuvwala yayiwahi. Chumichi chikuletesha mwanindi kuhanda chiwahi nawa akwawu akwiluka nawu anvwali jindi amuhembaña chiwahi.

² Tata yetu, Yehova, nakukeña nindi twikali awunyonji nawa atooka. (Masamu 18:26) Weluka nindi yuma  yikuwaha neyi twikala awunyonji. Neyi tudi awunyonji, tukumulemeshaña.—Ezekeli 36:22; tañenu 1 Petulu 2:12.

³ Indi kwikala awunyonji kwatalisha mudihi? Muloñadi chichawahila kwikala awunyonji? Chitukuhanjekaña hanawa malwihu, tukumona mutunateli kuhimpa.

4, 5. (a) Muloñadi chitwatela kwikalila awunyonji? (b) Indi yileñaleña yatulejañadi chamonañayi Yehova wunyonji?

⁴ Twadizilaña kudi Yehova chakwikala awunyonji nawa atooka. (Alevi 11:44, 45) Chuma cheneni chaleteshaña twikali awunyonji chidi chakwila nawu twakeñaña kwikala “akwakwimbujola Nzambi.”—Aefwesesa 5:1.

⁵ Yileñaleña niyena yatulejaña chamonañayi Yehova wunyonji. Yehova waleñeli yuma yahimpikaña nakutookesha mpepela nimenji. (Yeremiya 10:12) Toñojokenu hanjila jajivulu mwaditokeshelaña iseki, hela chakwila antu aditamishaña. Chakutalilahu, Yehova waleña tububu twanyanya nankashi tutwamonaña hohu namayikolosikopu. Itu tububu twafwomonaña wulembi wamajilu kwikala chuma chabulaña kuleta wubanji. Twazataña mudimu weneni. Itu tububu atuzatishaña nikudi asayantisiti hakutookesha nachu yuma yamajilu.—Aroma 1:20.

6, 7. Indi Nshimbi yaMosi yamwekesheli ñahi nawu akwakudifukula aYehova atela kwikala awunyonji?

⁶ Cheñi Nshimbi jayinkeliwu aIsarela kudi Yehova kuhitila mudi Mosi yatulejaña chichalemena kwikala awunyonji. Chakutalilahu, aIsarela ateleli kwikala  awunyonji hakwila Yehova yeteji kudifukula kwawu. Hefuku Dakubuta Nyiloña, kapristu muneni waweleleña kayedi. (Alevi 16:4, 23, 24) Henohu atupristu amakwawu kanda alambuli nyilambu, asambilileña kuwela kumakasa nikunyendu. (Kwidika 30:17-21; 2 Kushindulula 4:6) Mpinji jikwawu, antu abulileña kwovwahila nshimbi jahosheleña hawunyonji afwileña.—Alevi 15:31; Kuchinda 19:17-20.

⁷ Indochu etu? Twadizilañaku jajivulu muNshimbi jaYehova kutalisha hachamonañayi wunyonji. (Malaki 3:6) Yatulejaña nawu ambuña aYehova ateleleli kwikala awunyonji. Nshimbi jaYehova jahimpika wanyi. Nikulelu, Yehova nakukeña akwakudifukula indi kwikala awunyonji nawa atooka.—Yakoba 1:27.

8. Munjilanyi mutwatela kwikalila awunyonji?

⁸ Yehova hakeñaña hohu nindi twikali awunyonji kumujimba, kunvwalilu hela kushakama mumatala awunyonjiku. Wakeñaña nindi twikali awunyonji muyuma yejima. Twatela kwikala awunyonji mukudifukula, muyilwilu nimuyitoñojoka yetu. Neyi tunakukeña Yehova yatumoneña awunyonji, twatela kwikala awunyonji nawa atooka muyuma yejima yitwelaña.

9, 10. Indi kwikala awunyonji mukudifukula kwatalisha mudihi?

⁹ Kudifukula kwakadi majilu. Hitwatela kwila yuma yelaña antu ekala mukudifukula kwakutwambaku. AIsarela hiyadiñawu atuyili muBabiloni, ashakamineña nawantu adifukwileña kudi ankishi. Dichi Isaya waprofweteli nindi aIsarela akafunta kwawu kuIsarela kulonda akafuntishi cheñi kudifukula kutooka. Yehova wayilejeli nindi: “Idikenumu, bayi mukunka kuchuma chamajiluku.  Fumenu mukachi kawu. Ikalenu atooka.” AIsarela hiyateleli kudifukula kudi Nzambi hampinji yoyimu anakulondela ntañishilu, yaaku nitushidikilu twawaBabiloni adiña mukudifukula kwakutwambaku.—Isaya 52:11.

¹⁰ Nikulelu, akwaKristu alala atondolwelaña kudifukula kwakutwamba. (Tañenu 1 Akorinda 10:21.) Mukaayi kejima, yisemwa yayivulu nitushidikilu jashindamena hantañishilu yakudifukula kwakutwamba. Chakutalilahu, muyisemwa yikwawu, antu eluka nawu kudi chuma chekala mudi etu chabulaña kufwa neyi tunafwi, nawa kudi tushidikilu twatuvulu twashindamena haniyi nsañu. (Mukwakutañisha 9:5, 6, 10) AkwaKristu atela kutondolwela itu tushidikilu. Antaña jetu anateli kutukakeja nawu tutwilondeleña. Chineli tunakukeña kwikala awunyonji kudi Yehova, twakaanaña hela anatukakeji.—Yilwilu 5:29.

11. Indi kwikala awunyonji muyilwilu yetu kwatalisha mudihi?

¹¹ Yilwilu yayiwahi. Hakwila Yehova yatumoni nindi tudi atooka, twatela kutondolwela yilwilu yejima yawuvumbi. (Tañenu Aefwesesa 5:5.) MuBayibolu, Yehova watulejaña ‘kutemuka wuvumbi.’ Washimuna hatooka nindi antu elaña wuvumbi nawa abulaña kubalumuka ‘hiyakaswana Wanta waNzambiku.’—1 Akorinda 6:9, 10, 18; talenu Mazu Adi Kunsa 22.

12, 13. Muloñadi chitwatela kwikalila awunyonji muyitoñojoka?

¹² Yitoñojoka yitooka. Muntu welaña yuma yinakutoñojokayi. (Matewu 5:28; 15:18, 19) Yitoñojoka yitooka yatuleñelaña kwila yuma yayiwahi. Hela chochu, twawanina wanyi, mpinji jikwawu tukutoñojokaña yuma yatama. Neyi yitoñojoka yamuchidiwu yinenzi,  twatela kuleka kutoñojokahu hohenohu. Neyi kuleka nehi, mukuhita kwampinji muchima wukutachika kushilila nayitoñojoka yatama. Hadaha tukutachika kwila yuma yitunakutoñojoka. Twatela kwinzesha yitoñojoka yetu nayitoñojoka yayiwahi. (Tañenu Afwilipi 4:8.) Twatondolwelaña yuma yakumanishilamu wuudi mudi wuvumbi nimadombu. Twasakulaña chiwahi yuma yitwatañaña, jitwatalaña ninsañu yitwahoshaña.—Masamu 19:8, 9.

¹³ Hakwila tushakami mukukeña kwaNzambi, kudifukula kwetu, yilwilu yetu niyitoñojoka yetu yatela kwikala yitooka. Yehova wakeñaña cheñi nindi twikali awunyonji kumujimba.

14. Muloñadi chichalemena kwikala awunyonji kumujimba?

¹⁴ Neyi tukuhembaña nyijimba yetu nawunyonji nihitwashakamaña, yuma yikutuwahilaña hamu niakwetu. Tukutiyaña kuwaha nawa antu akudikundaña nanetu. Ilaña kudi chuma chacheni chaleteshaña twikali awunyonji kumujimba. Kwikala awunyonji kwaletaña mpuhu kudi Yehova. Tuhani chakutalilahu: Neyi mwamonaña mwana wendaña namajilu mpinji yejima, hadaha mukutoñojoka nenu anvwali jindi awuhulu. Dichitwekala ninetu, neyi hitunakudihemba chiwahiku, antu hiyakumulemeshaña Yehovaku. Pawulu nindi: “Hitunakukoñahu chuma hela chimu chakuhukesha nachu antuku, kulonda mudimu wetu abuli hakuwutenena kutama; ilaña muyuma yejima tunakudihameka etu aweni kwikala akwakukalakala aNzambi.”—2 Akorinda 6:3, 4.

15, 16. Chumanyi chitwatela kwila kulonda twikali awunyonji?

 ¹⁵ Mujimba wetu niyakuvwala. Twatela kwikala awunyonji mpinji yejima. Chakutalilahu, twatela kuwela mpinji yejima hela netu hefuku-hefuku. Twesukaña kumakasa nasopu henohu kanda tutachiki kuteleka hela kuda nihanyima yakufuma kumusalanyi hela hanyima yakukwata yuma yamajilu. Kwisuka kumakasa kwamwekanaña neyi kwamukunkulwayi, ilaña kwalema muloña kwajahaña tububu nawa kwakañeshaña nyisoñu kutanda. Kwapulwishaña nimawumi. Neyi tudana musalanyi hela suweji, twatela kuwana njila yimu mwakunatila matamisha. AIsarela akushankulu adiña nanyisalanyi wanyi, ashikilileña hohu matamisha kwakulehi namatala awantu nikwatehwinineñawu menji.—Kuhituluka 23:12, 13.

 ¹⁶ Hichinayi mukwila nawu yakuvwala yetu yatela kwikala yayiwahi nankashi, yawuseya hela yinediki katatakaku. Ilaña yatela kwikala yayiwahi nawa yawunyonji chikupu. (Tañenu 1 Timotewu 2:9, 10.) Tunakukeña mmwekenu yetu yileteña kalemesha kudi Yehova.—Titusa 2:10.

17. Muloñadi chitwatela kuhembela matala etu niinji yetu nawunyonji?

¹⁷ Matala etu niinji yetu. Twatela kuhemba matala etu awunyonji kwejima kutwashakamaña. Twatela kwiluka cheñi netu motoka yetu, katukutuku, nkinga hela chikuñu chejima chitwendelañahu chawunyonji, sweje-e neyi twendelañahu hakuya nakupompa hela kushimwina. Muloña hakushimwina, twalejaña antu chakashakamañawu awunyonji muparadisa heseki. (Luka 23:43; Chimwekeshu 11:18) Mmwekenu yamatala etu niinji yetu jamwekeshaña nawu tunakudiloñesha chadimu chitukashakamaña mwituña dadiha.

18. Muloñadi chitwahembelaña maluña etu akudifukwila nawunyonji?

¹⁸ Maluña etu akudifukwila. Twamwekeshaña netu twakeña wunyonji neyi tunakuhemba Matala aWanta nawunyonji hela hitwapompelaña kupompa kwamaneni. Neyi antu anenzi Kwitala daWanta katachi, amonaña wunyonji wudihu. Nawa Yehova watumbakanaña. Chineli twekala amuchipompelu, twekalaña nakukooleka kwakuwahisha Mwitala daWanta nikuwahisha hanakisiki.—2 Kushindulula 34:10.

19. Yumanyi yitwatela kutondolwela?

¹⁹ Hela chakwila Bayibolu hiyatuleja yaaku yatama yejima yitwatela kutondolwelaku, ilaña yatulejaña  yishina yatukwashaña kwiluka chayimonañayi Yehova yumiyi. Hakeñaña nindi tunweña makanya, kusheta hela kuzatisha yitumbu chatamaku. Neyi tudi amabwambu jaNzambi, tukutondolwelaña yumiyi. Muloñadi? Muloña wumi twawulemesha nankashi. Iyi yaaku yaketwishaña wumi wetu, yaletaña yikatu nawa yashaña akwetu muwubanji. Antu amavulu alekaña iyi yaaku yatama muloña akeñaña kukata wanyi. Ilaña etu amabwambu jaYehova, kudi chuma cheneni chitwalekelaña, twamukeña Nzambi. Kankaña wumu nindi: “Chineli Yehova wankwashili, nalekeli kwila yuma yatama niyuma yanteñwishili. . . . Namoni kankawami kachi hinadi kutwesha kuhimpaku.” Tuhanjekenu hayishina yitanu yamuBayibolu yinateli kukwasha muntu kuleka yaaku yatama.

20, 21. Yaaku yamuchidinyi yinakukeñayi Yehova nindi tuleki?

²⁰ “Chineli atukana iyi yikaninu, tuditookeshenu kukutama kwejima kwamujimba nispiritu, kulonda tusweji kwikala ajila hampinji yitunakumutiya Nzambi woma.” (2 Akorinda 7:1) Yehova nakukeña nindi tuleki kwila yuma yatama yinateli kuluwañesha yitoñojoka hela mujimba wetu.

²¹ Ha 2 Akorinda 6:17, 18 atulejaña chuma chacheni ‘chitwaditookeshelaña kukutama kwejima.’ Yehova watulejaña nindi: “Lekenu kukwata chuma chamajilu.” Watushiika nindi: “Ninami nakayitambwila. Nawa nakekala tata yenu, enu mwakekala anyanami awamayala niawambanda.” Neyi tukuleka yuma yejima yikutuletesha kwikala namajilu hela kututamisha, Yehova wukutukeña neyi tata yawantu chakeñañayi anyanindi.

22-25. Yishinanyi yamuNsona yikutukwasha kuleka yaaku yatama?

 ²² “Keñaku Yehova Nzambi yeyi namuchima weyi wejima, nawumi weyi wejima, nayitoñojoka yeyi yejima.” (Matewu 22:37) Ilu hilushimbi lwasweja kulema nankashi. (Matewu 22:38) Twatela kumukeña Yehova chikupu. Hanu dinu tunateli kumukeña ñahi Yehova chikupu neyi chakwila tukwilaña yuma yikuketwisha wumi wetu hela yikukisañana woñu wetu? Twatela kudishaku chikupu twileña yuma yamwekeshaña nawu wumi watwinkayi twawulemesha.

²³ “[Yehova] wenkaña antu ejima wumi niyuma yejima.” (Yilwilu 17:24, 25) Neyi ibwambu denu nayinki chawaana chachiwahi nankashi, kwiji mukuchinata hela kuchikisañana? Wumi hichawaana chabadika chatwinkayi Yehova. Twahamekaña nankashi hakutwinka ichi chawaana. Dichi, twatela kwila yuma yikuletesha antu amuhamekeña Yehova.—Masamu 36:9.

²⁴ “Keñaku mukwenu neyi chiwadikeña eyi aweni.” (Matewu 22:39) Yaaku yatama hiyatuneñeshaña etu hohuku. Yaneñeshaña niakwetu amakwawu, anateli kwikala antu itwakeñesha. Chakutalilahu, muntu washakamaña itala dimu namuntu wanwaña makanya nateli kuholokela muyikatu yamaneni muloña nakwona wishi wamakanya. Dichi neyi tuleka yaaku yatama, dikwila nawu tunakuleja akwetu netu twayikeña.—1 Yowanu 4:20, 21.

²⁵ “Twalekakuhu nakuyanukisha ovwahileña jinfulumendi niakwawuswa.” (Titusa 3:1) Mumaluña amavulu, antu ayikaanisha kuhemba hela kuzatisha yitumbu yakaanishawu. Chineli Yehova watulejaña nindi tulemesheña jinfulumendi, twovwahilaña iji nshimbi.—Aroma 13:1.

26. (a) Yumanyi yitwatela kwila kulonda Yehova yeteji kudifukula kwetu? (b) Muloñadi Nzambi chakeñelañayi nindi twikaleña awunyonji?

 ²⁶ Neyi tunakukeña kwikala amabwambu jaYehova, twatela kudishinshika kulonda tumoni neyi kudi yuma yitwatela kuhimpa. Nawa twatela kutachika chochichi. Tuneluki netu kuleka yuma yatama kwakala, ilaña tukutwesha. Yehova natushiiki nindi wukutukwashaku. Wahosheli nindi: “Yami Yehova Nzambi yeyi, yami nakulejaña mwakukuwahisha, yami nakulombolaña njila yatela kuya eyi.” (Isaya 48:17) Neyi tukudishaku chikupu kulonda twikali awunyonji, tukwiluka chikupu netu tunakumulemesha Nzambi yetu.